بين رفوف مريم.

_ابدأي دوري حواليكي على ناس تقدمي لهم الخدمة بتاعتك بشكل مبدأي بشكل مجاني علشان تبني بورتفوليو. _دوري على وظائف في مواقع العمل الحر زي مستقل وبعيد وخمسات. الله يكرمك ويرزقك ويفتح لك أبواب الرزق الحلال الطيب المبارك

عليكم السلام ورحمة الله وبركاته.. متحرمش أبدا من دعواتك الجميلة دي واياك يارب🥺 بصي أنا اشتغلت كcontent creator وبصراحة الأونلاين لذيذ فيه مميزات كتير عن الشغل في الواقع طبعا لا يخلو من عيوب ولكن أفضل من النزول والمواصلات والحر والتعامل والاختلاط وحاجات كتير فأنصحك تبدأي تعملي سيرش تشوفي المجالات المتاح فيها شغل بالنسبة ليكي لو مجال دراستك أو كليتك عاطيكي الفرصة دي دوسي. لو لا يبقى اتعلمي مهارة وابدأي اشتغلي بيها بس المنافسة شديدة جدا حاليا فلازم تتعلمي وتطوري من نفسك ممكن تبدأي من يوتيوب أول سلسلة اتعلمت منها كتابة المحتوى التسويقي كانت بسيطة من يوتيوب ومنها بدأت أطبق واشتغلت بشكل مجاني على صفحات صحابي علشان أبني cv وبورتفوليو وبعدين بدأت أقدم على مواقع العمل الحر واشتغلت سبحان الله فضل ومنة من رب العالمين. فالخطوات: _حددي مهارة _دوري على يوتيوب ازاي تتعلميها وتبدأي فيها (تسويق، تصميم، مونتاج، مبيعات، كتابة محتوى، موديريتور) حاجات كتير دوري في اللي يناسبك وجربي مش هتخسري حاجة (تابعي قناة هشام لان الباشمهندس في خطته يعمل سلسلة عن العمل الحر) _شوفي كورس أو سلسلة وابدأي طبقي والتطبيق والممارسة هتعلمك

بصي أنا في الأمور دي وكل أمور الحياة لا أملك إلا الاستخارة. الإستخارة والدعاء تمسكي بيهم مش بس وقت الخطبة لكن طول حياتك في أمورك الكبيرة والصغيرة وفي كل شئ. تضرعي لله واسأليه الهداية وحسن الاختيار. ليه بقيت حاسة يا ولاد ان أمر البخل ده بقى واخد جدل كبير أصل البخيل بيبان لكن ميكنش شاب في بداية حياته ونحمله ما لا يطيق ولو مجبش نقول بخيل فاهمين قصدي؟ وده بسبب السوشيال ميديا أعتقد حتى من صحابنا اللي بيشاركوا الهدايا والسفر والخروجات وهكذا. فازاي تحددي هو بخيل ولا لا؟ لو هو بيجيب الحاجات العرفية المشهورة عندكم فهو كدة ماشي بالعرف والأصول. بصي انتي ممكن من الكلام معاه تشوفيه هو بيشتري لنفسه ولا لا ايه أولوياته في المصاريف لما اتكلمتوا في الامور المادية ولما بتتكلموا فيها عامة لشكل حياتكم بعد الزواج بيقول ايه وهيتصرف ازاي وهكذا. يعني مين هيمسك مصروف البيت؟ رفاهياتكم بعد الزواج حدودها ايه؟ وتشوفي اجاباته تكون متناسبة مع حالته المادية. يعني لو حالته المادية متيسرة وقالك ليه نخرج برا ونصرف مصاريف زيادة؟ هنا يبقى بخيل أو حريص.

هكمل باقي الأسئلة بكرة بفضل الله🤍

عندي واحدة صديقتي بحبها جدا.. اللهم بارك تزوجت وهي في الكلية وخلفت وتخرجت الحمد لله. فالأمر معتمد عليكي انك تقدري توازني حياتك ووقتك وعلى حسب مقدرتك هل انتي هتقدري تعملي كذا حاجة في نفس الوقت ولا لا. ومش هتعرفي غير بالتجربة على فكرة. بس أهم حاجة يكون عندك همة وكمان تتعلمي مهارات زي المرونة وتنظيم الوقت وتقسيم المهام والمهارات الحياتية دي. وتكوني عارفة طبعا أولوياتك لان في أوقات مش هتقدري تكوني برفيكت وترضي كل الأطراف. فطبعا الأهم هيكون العناية بنفسك. متوقعتيهاش دي صح؟ 😂 أولويتك الأولى نفسك تعتني بيها نفسيا وروحيا وجسمانيا متهمليش دينك وفروضك وعلاقتك بربك أيا كان السبب وتهتمي بنفسك والروتين الخاص بيكي ومتجيش على نفسك ولا تضغطي على نفسك. ثم هييجي بيتك زوجك وان شاء الله أولادك . ثم دراستك وطالما خطيبك داعم ومتفهم فان شاء الله يساعدك ويسندك وقت ما تحتاجيه بس الأهم انتي تهتمي ومتخليهوش يندم انه دعمك أو وافق على انك تكملي. متهمليش علاقتك بيه ولا توصليه لحد الجفاء لا اروي علاقتكم دايما علشان لما تكوني مضغوطة يدعمك بحب وميكنش مضايق لانك أصلا أعطيتيه الاهتمام ومخزون الحب عنده مليان ومش فاضي.

بصي الحاجات اللي ذكرتيها عن الخاطب حاجات ربنا يتقبلها منه وتكون في ميزانه لكن متخليش منه زوج مناسب ليكي. ​ليه شايفاه هو ومش شايفه نفسك؟ زي ما هو عنده حاجات انتي أكيد عندك حاجات تخلي كتير يتمنوا تكوني شريكة حياتهم. ​فأولاً: معيار حكمك على الخاطب من الجانب ده بس مش معيار صح في أمور تانية كتير جداً. ثانياً: محتاجة تقدري نفسك وتعرفي مميزاتك وتعرفي انك بنوتة جميلة أي رجل يتمناها فمتقلليش من نفسك قصاد حد. ​فكرة انك كنتي متوترة ومكسوفة في الرؤية ده شئ طبيعي يدل على بنت جميلة عندها حياء مفيش مشكلة أبدا في ده. ​متفهمة احساسك جدا عارفة انه اكيد مش حاجة سهلة وانه اكيد اثر عليكي وعلى ثقتك في نفسك. ​بس سواء تعرفي السبب اللي خلاه يتراجع أو لا مش مهم. ​تفكيرنا في الأمر هيكون تفكير انه أمر حصل... ​ ​مش شايفة انك عملتي حاجة أقولك لا خلي بالك منها في المرة الجاية لا خالص. ​ولما تفتكري الأمر تفتكري انك معملتيش حاجة غلط أيا كان السبب اللي خلاه يتراجع سبب خاص بيه هو ملناش دعوة بيه. ​انا زعلانة منك بلاش تقولي انك متستاهليش! هو مين قالك انكم لو تزوجتكم كنتم هتكونوا كويسين؟ أعرف ناس الشاب من أفضل الناس والبنت من أفضل الناس واتخطبوا وكانت خطبة بيرفكت في وجهة نظر الناس انهم مثاليين لبعض. وفسخوا الخطبة بعد 3 شهور والسبب؟ انهم مش مرتاحين عادي شخصياتهم مش لايقة على بعض بس عادي. وحاليا هو تزوج وهي تزوجت عادي جدا. ​فمفيش حاجة اسمها مستاهلوش انتي أصلا عملتي ايه علشان تقولي كدة فبلاش تكون دي نظرتك. ​بصي فكرة المقارنة؛ لما يجيلك حد مناسب ويدخل قلبك ويكون فيه قبول هتنسي أي حد اتقدمك قبله هتنسي أي رجل في الدنيا كلها وهيبقى هو في قلبك بس فمتقلقيش. ​ما قولتك في البداية الحاجات اللي ذكرتيها متقولش أنه كان هينفع مع شخصيتك أو هيقدر يحتويكي أو يعطيكي احتياجاتك وحاجات كتير مش لانه وحش لا ممكن ببساطة لان شخصياتكم مش مناسبة لبعض. ​الله يراضي قلبك ويرزقك الشخص اللي يستاهلك 🫂

عليكم السلام 🤍 الله يزوجك على خير يا حبيبي ويبارك بينكم وعليكم ويجعلها زيجة سعيدة مباركة يارب. والله السؤال ده صعب جدا😅 فترة الخطبة مع الضوابط صعبة جدا ومش سهلة خالص بجد. بس الانسان هيعمل ايه غير الصبر والدعاء بالتيسير والثبات. نصيحتي لو عدى على الخطبة أكثر من ٦ شهور والأمور مستقرة اعقدي. العقد أريح في التعامل في الخطبة كل كلمة وكل تصرف بتحسي بالذنب وبتبقى قلقانة . والأهم انكم فاهمين أهمية الضوابط وانها بتحفظ قلبكم لحد العقد والزواج وبتخليكم تركزوا انكم تعرفوا بعض كويس بدون ما المشاعر تأثر على الحكم بشكل غلط. فاصبري حاولي تملي وقت الزيارات بكلام في أمور مختلفة تخفف وطأة الضوابط وتحسسكم بالونس. وحاولي تخلي الزيارات كل أسبوعين مثلا علشان البعد ميسببش جفاء وعلشان تطمنوا لبعض وتعرفوا بعض وتعقدوا. واسمعي لدكتورة هالة سمير وفي درس لدكتور أحمد العربي عن الضوابط هتحسي بالجلد بس هيثبتك عليها😅

مقترحات للمواضيع الضروريّ مناقشتها في فترة الخطوبة: 📌 (ضروريات): 1) عمل المرأة (هل مسموح بالعمل ولا؟ لو مسموح؛ لو حصل تقصير؟ لو مش مسموح؛ هل لها مصروف شخصي؟) 2) ذمتها المالية، هل فلوسها خاصة بها، ولا لازم تشارك في المصاريف؟ 3) حدود تدخل الاهل (الصور المسموح بها، وغير المسموح بها) ٤) لما يختلفوا مين كبيرهم الي هيرجعو ليه 5) أدوار كل واحد منهم في البيت، خاصة في المراحل الحرجة (كفترة الحمل، والولادة) 6) وقت الإنجاب، وعدد الأطفال 7) تصور الأب عن تربية الأبناء؟ وهل يرى أن عليه دورًا ومسئولية؟ أم مسئولية الأم فقط؟ 8) اتخاذ القرارات هل مشاركة ومناقشة بينهم؟ أم يستقل بها الرجل؟ 9) لو ساكنين في بيت عيلة: هل على الزوجة خدمة أهله؟ الأكل مع الأهل ولا لوحدهم؟ خصوصية الزوجة؟ مفتاح الشقة مع حماتها؟ 10) أهدافهم على المستوى الشخصي والعملي والأسري 11) مقاصد كل طرف من الطرفين من الزواج، وتوقعاته من الطرف التاني 12) شراء طلبات البيت مسئولية مين؟ 13) شئون المنزل الداخلية مسئولية من (طبخ، كنس، غسل، إلخ) 14) الصفات إلي ضرورية بالنسبة لهم وميقدروش يستغنوا عنها، والصفات إلي بيكرهوها وميقدروش يستحملوها 15) المساحة الشخصية والخصوصية (هل لكل طرف مساحة شخصية وخصوصية، زي موبايله بعض الأسرار، ولا لازم يمتزجوا تمامًا؟) 16) أولويات كل طرف في الحياة واهتماماته 17) مدى أهمية الأسرة والطرف التاني ومركزيته في حياته. 📌 (لتجويد العلاقة): 18) الأسلوب المناسب وقت الغضب: التجنب، المواساة، الإنصات. 19) طريقة الاعتذار والاسترضاء المناسبة وقت الزعل 20) عنده استعداد للتعلم ومهتم به؟ 21) بيحب قعدة البيت ولا الخروج؟ 22) ظروف شغله، وكيفية التوفيق بينها وبين الأسرة 23) مستعد يصبر عليها وهي لسه بتتعلم الطبخ؟ وبيحب أكل إيه عشان تتعلمه؟ - إسماعيل الزمزمي

أهم شئ في الزواج التواااااافق. وبالنسبة لك طالما بتتعلمي الحاجات اللي تخليكي أم واعية لأولادك بدينهم وصحتهم وتقدري تساعدي في مذاكرتهم فانت كدة زي الفل🤍 وعامة اليوتيوب والكورسات والكتب في كل مكان دلوقتي فمش فايتك حاجة أبدا 🤍

يا حبيبة قلبي اوعي تزعليى🫂 بصي هحكيلك حاجة.. انا مدخلتش ثانوي عام دخلت ثانوي تمريض بعد اعدادي والدي اللي دخلني وكنت رافضة وكارهة وكنت عاوزة ادخل ثانوي عام علشان ادخل كلية وهكذا كنت بقعد اقوله هدخل بعده معهد وازاي وكدة. ولما دخلت المعهد كان متاح أكمل كلية تمريض وكنت جايبة مجموع يدخلني الكلية ولكن أنا كنت بستخير مقفولة من الكلية مش عاوزة أدخل. معظم زمايلي كانوا مستغربين ودكاترة المعهد بس سبحان الله انا ربنا نزع الرغبة من قلبي وكنت حابة اني أكتفي لحد كدة وأركز في أمور تانية في حياتي وأخلي حياتي متوازنة. هل دلوقتي فارق معايا اني مش واخدة كلية؟ لا خالص ولا فارق لا في شغلي ولا حياتي. أعرف ناس أخدوا كليات ومشتغلوش بيها عادي جدا مجرد المسمى. فانت مش فايتك حاجة متزعليش ومتحسيش انك قليلة ولا انتي أقل من حد ولا حد أحسن منك. انت جميلة بدينك وأدبك وخلقك مش بتعليمك أبدا أبدا. بصي في أمر الزواج انتي عمرك ما تقبلي حد يقلل منك بسبب الأمر ده دي أول حاجة. التعليم مش شرط علشان يكون الشخص كويس وملائم ليكي أهم حاجة يكون تفكيره كويس وبيعرف يحكم على الأمور ويتصرف وهكذا ويكون ملائم ليكي ولتفكيرك وهكذا ده المهم

بسم الله مسؤولية كبيرة السؤال ده.. بصي بعيدا عن الدورات أولا انشغلي بمعرفة الشخص اللي معاكي. في بداية الخطبة كنا منشغلين بالدورات وبيقولوا كذا وبيعملوا كذا وكنا بنستبق الاحداث ونختلق خلافات من اللاشئ 😂 كان جحيم الوعي حرفيا والله. فرأي يعني انك تقعدي مع نفسك وتعرفي نفسك وتحددي احتياجاتك من الشخص اللي معاكي وتبدأي تتعرفي عليه بيحب ايه في التعامل بيعبر عن الاهتمام ازاي؟ وبيحب يتعبر له عن الاهتمام ازاي؟ لما بيزعل بيحب ياخد وقته ولا حد يتكلم معاه وهكذا من تفصيلات الحياة . الدورات في حاجات كتير هبعتها حالا هنا. بصي بعد التخرج مش بيبقى فيه مفهوم اجازة فبحب انك اصلا تعملي انشطة وتبني عادات تخفف عنك وتطور منك في حياتك كلها. حفظ قرآن دورة علم شرعي رسم تلوين كروشيه رياضة قراءة خروجة مهارة زي الكتابة أو التسويق لو بتفكري تشتغلي اونلاين مهارة مرتبطة بمجالك تطوري منها تنفعي الناس بمجالك حتى لو معلومات اونلاين وحاجات كتير بجد

بالنسبة للمعايير. فانت اعرفي نفسك الأول انا كنت بقعد مع نفسي أقول لنفسي.. انتي كذا بتحبي كذا وتفضيلاتك كذا وانتي جميلة في كذا وانتي عندك عيب في كذا. وعلى أساس ده كنت بحدد انا محتاجة زوج هادي علشان انا سهلة الانفعال، ومحتاجة شخص بيحب يتكلم علشان انا بحب الكلام والمشاركة ومحتاجة حد يسمعني ويفهمني لاني حساسة جدا وهكذا. وعلى أساس ده كنت برفض أو أقيم الخطاب لحد ما ربنا أكرمني بزوجي. يا صغنن الله يوفقك🥰 لازم نبقى صحاب علشان تساعديني بحاول أتقن النحو علشان بحبةالكتابة وعاوزة كتابتي تبقى صحيحة فلازم تساعديني بقا👀🤍 بصي فاهمة شعورك جدا ومريت بيه خصوصا اني خلصت دراسة وكنت فاضية فكان أمر الزواج بشخص مناسب ليا مع وجود خطاب غير مناسبين بيأرقني. ولكن كنت بشغل نفسي وبدعي بالزوج الصالح بس ده اللي كنت بعمله. وخليكي عارفة انه نصيب وهيجيلك حتى لو انتي مش شايفاه حاليا. انشغلي بدراستك وبأنشطة مختلفة وادعي ربنا يرزقك بالزوج الصالح المناسب عاجلا يارب. ايوة احنا عاملين كذا قناة هبقى أشارككم الأفكار🥰 وضحيلي سوية وتقتنع من ناحية ايه؟ الزواج؟ وتقتنع بايه بالظبط

عليكم السلام حبيب قلب مريوم🥰 متحرمش من دعائك الله يرزقك مثل ما دعوتي وأكثر 🤍 بيعتمد ايه الأشياء دي ودرجتها. يعني لو كانت أشياء أو صدمات متعلقة بيكي أو بطفولتك أو هكذا ومأثرة عليكي وعلى شخصيتك وتعاملاتك يبقى محتاجة الأول تفهمي نفسك في الأمر ده وتحليه وبعدين تدخلي في علاقة وده ضروري ليكي قبل ما يكون للشخص التاني لان ممكن العلاقة تزود عندك الأمور دي لو دخلتي بدون ما تحليها. طيب لو كانت مجرد مواقف عادية سيئة مريتي بيها؟ طبعا عادي وكلنا عندنا أجزاء مظلمة في حياتنا مفيش انسان بيرفكت لكن لو مش مأثرة على علاقاتك باصحابك وباهلك وطبيعي بتمارسي حياتك يبقى عادي انت بس محتاجة تتجاوزي بانك ترميها ورا ضهرك وتنشغلي بمستقبلك. متخليها رمل متحرك ماسك رجلك ومانعك من الحركة لقدام لا عيشي. أيا كانت سوء المواقف او الحاجات دي فهي ليها حل لو ذنب له توبة لو ظَلمتي حاولي تصلحي لو ظُلمتي فوضي أمرك لله. وبصي مهما تجاوزتي وكنتي قوية هييجي عليكي وقت بتنهاري فيه وتفتكري كل حاجة وحشة حصلت لك من وقت ما تولدتي. انا بعمل ايه في الموقف ده؟ بقعد على سرير وبقعد أذكر ربنا سواء استغفار او تسبيح أو صلاة على الرسول. بدون مسبحة بدون ناس

بصي تعرضت لحاجة زي كدة وكان التفكير بيتعبني نفسيا جدا جدا. فنصيحتي: 1)الاستخارة والدعاء في المقام الأول والتضرع لربنا سبحانه وتعالى انه يهدي قلبك للصواب. 2)متتحمليش الأمر لوحدك لو شئ تقدري انك تستشيري فيه حد يكون ثقة اعملي ده. 3) اشغلي نفسك الفراغ أسوأ شئ في الدنيا والانشغال حقيقي نعمة اعملي اي انشطة تشغلك احفظي قرآن اتعلمي هواية انزلي مع اصحابك اي نشاط مناسب يملي يومك ويبعدك عن التفكير. ربنا ييسر أمرك ولو حابة تتكلمي أكتر أنا موجودة🤍

شرف ليا بجد🥺 هدفي من القناة أصلا الصحبة 🤍 ابعتيلي يوزر التليجرام بتاعك وهبعتلك🤍

أول مرة في حياتي حد يقولي كدة. فأتمنى بجد من صاحبة الرسالة تتواصل معايا لو لها حق عندي مستعدة أراضيها.

ممتنة🤍