إِسْلَام مَنْصُوْر

إحنا هننادي بتمكين النساء وكون المرأة المثقفة يهابها الرجل الضعيف ونمسك في خناق بعض على مشاكل فارغة رجل قش مش موجودة أو تكاد تكون موجودة.. ونترك الرأس والأصل، وهو مرمطة النساء في المواصلات وهي بتروح الشغل واللي طلعان عينهم في المصانع وبيروحوا مهدودين حيلهم الساعة ١٠ بالليل ولا الحادثة الأخيرة لبنات زي الورد في ميكروباص رايح المصنع علشان يشتغلوا وكلهم ماتوا تقريبا، واللي بتنزل على مضض علشان تتكفل بمصاريفها وغيره وغيره.. ولا الصورة الأخير لأم وراها بنتها على موتوسيكل طلعان عينها علشان تشتغل مندوبة توصيل طلبات،وغيره كثير من عدم التمكين! يعني الجهد المبذول ده لو طالع في محله فعلا وفي مناشدات مهمة في إصلاح البيوت وكيفية إدارتها وفي مناشدة المؤسسات إنها تتكفي باللي محتاج فعلا، كنا ممكن نلاقي نتيجة مرجوة. لكن لو الرجال في الزمن ده طافحين المر مرة، فكثير من النساء طافحينه ألف مرة. وفي كل بيت هتلاقي مرارة الصبر والتحمل والشقاء ظاهرة على وجوه نساءهم. لما شوفت صورة الأم ووراها بنتها على الموتوسيكل، قلبي اتفجع والله العظيم لأن الشغلانة دي مميتة أصلا على الرجال، المناديب بتتحمل الحر ومعاملة سيئة من الزباين ومواجهة خصومات أولا بأول، فما بالك على امرأة - مش بمية رجل خالص - ووراها بنتها اللي المفروض تراعيها في بيت آمن مطمئن وتلاعبها. عمر ما المرأة ما كانت بمئة رجل ولا هي عايزة تبقى كده ومش مطلوب منها كده. تحت مسمى القوة والبأس والشدة، نساء كتير اتمرمطت في الدنيا وشافت شقاء ما بعده شقاء في حين إنها لم تخلق لده وتعرضت في سبيل ذلك لمساوئ عدة. الله يوسع عليهن ويرزقهن خير الرجال وخير البيوت المطمئنة؛ في عفو وعافية.

مالك تحن لمن يذلك؟ لمعصية تهدر بها نبض قلبك، لشخص يسلبك عفة جوارحك، لانتكاسة لا تنجو من براثنها بسهولة! ماك قد ألفت المهانة وابتعدت عن الكرامة؟ وتظن أن قلبك لا يزال فيه غريزة النجاة وأنت تموت يوما بعد اليوم؛ في ضحالة نفسك السوء ووساوس شيطانك! أفق لنفسك، الدنيا سريعة متكالبة على من يغفو ولو قليلا! فكيف بغفوتك وقد طالت!

الكلمة اللينة السهلة الطيبة التي تلقيها في أذن زوجك أو صاحبك أو أبيك أو ابنك؛ ممكن تغير نفسية مجتمع بأسره. يعني تخيل أثر الفراشة من رجل ذم زوجته على شيء وسمعها ما لا يطيب، خرجت المرأة تزور أهلها ووجهها متكدر، تكدر أبوها وأمها، أبوها جايز فيه اللي مكفيه فيخرج على شغله مهموما، وممكن يعامل غيره بشيء من القسوة والسلبية وهلم جرا.. امرأة أسمعت زوجها ما لا يطيق، خرج لشغله معرفش يتعامل، كلم مديره أو صاحبه بشيء من القسوة أو العجرفة، ممكن يخسر شغله أو يجيله خصم، يروح بيته يطلع كل ده على امرأته وهلم جرا.. قس على ده أمثلة لا حصر لها. وتقريبا إحنا كلنا بقى عندنا أمراض نفسية لأن مبقاش فيه لين في الكلام ولا سهولة أو طيبة. الكلمة الطيبة سهلة، ومن الصدقات والإحسان اللي هتؤجر عليها، ولكن رغم سهولتها قليل من يدركها أو يفعلها. ليه؟ علشان شايفين إنها مبقتش ماشية مع الأجواء الصعبة الحالية، اللي فيها النصح إنك متبقاش ضعيف وتتكلم كلام لين وطيب يا أحسن ياكلوك. وفيه فرق شاسع بين إنك تكون لين وقوي، وتكون لين وعبيط! تلطف مع الناس كلما سنحت لك الفرصة، مش ناقصة مرضى نفسيين والله.

يأسرني مَن يتحدث بالقرآن، يجري على لسانهِ كما تجري الأحاديث الاعتيادية اليومية. لا ينتظر نازلةً ليحيي آية في الصدور، بل في حديثه البسيط تراه ينطلق لسانه بمكنون صدره، فَيستدل بآية هنا وأخرى هناك. وفوق ذلك كله، قد أنعم الله عليه ببلاغة القلب وطلاقة اللسان. فَما رأينا أحدًا يحب القرآن، إلا والقرآن أحبّه.

كثير من ضغائن النفوس وأحقاد القلوب تأخذ طابع النصح. فَترى الناصح يبث سمومه وسوءات ظنونه وما يخفيه من غم في بضع كلمات للمنصوح. فيتبع ذلك كله؛ بإني لك ناصح أمين. وسليقة المؤمن لا تكذبه في استنباط الكلم الذي يسوؤه. بون واسع بين شدة النصح الواجبة في كثير من الأحيان، وبين النصح المغلف بذكر المساوئ والاستعلاء والتكبر. وأسأل الله أن يبعد عنا كيد كل حاقد، وسم كل مغلول، وأن يسلل سخيمة قلوبنا وقلوبهم، وألا يبيت في صدرنا وصدورهم شيء من الغل.

صبحكم الله بالخير.. أغيب عنكم كم يوم ألاقي الناس بتخرج من القناة، عاوزيني متواجد يعني ال ٢٤ ساعة؟ 😒 عامة، جربوا العريكة، معرفش منشأها إيه لكني جربتها لما سافرت السعودية. أكلة ممتازة جدا وغنية بالفوايد، بس تقيلة حبتين. اللي مش عارف مكوناتها يبحث عنها.

لا يريد عزلة تنم عن وحدة، بل يريد عزلة يُشارك فيها من يألفه ويوده ويواجه معه مرارة يومه والثقل على قلبه إذا انفردت به الأحزان. فإذا رأيته يتحدث عن عزلة، فادع له بالرفيق الصالح.

يا صاحبي! إذا التفتّ لامرأة وأفقدتك توازن قلبك، فإما المبادرة إليها إذا قدرت وإما الانقطاع عنها إذا انتفت القدرة. أما عن حالة المنتصف التي تُبنى على الأوهام والخيالات! فأنت الهالك فيها وحدك.

إنت بنسبة كبيرة جدا هتتزوج زواج تقليدي، بمسمى العرف الدارج حاليا. هتتعرف على واحدة كويسة ممكن ميكونش لك سابق معرفة بها، تسأل عنها، تعجبك، خطوبة فَزواج. تحصل مشاكل في أول الزواج، طبيعي، كل واحد بيتعرف على التاني بداعي الفضول، لحد ما تتعرفوا على بعض بداعي الحب والسكن، ساعتها هتهدأوا. مش هتعيش حياة مثالية زي اللي بتشوفها من المواقف الكثيرة على الفيس بوك أو غيره. مش شرط يعدي عليك أو على زوجتك ظرف قاهر يختبر مكانتكم في قلوب بعض. كل يوم بيعدي عليكم وأنتوا كويسين ومبسوطين وشياطين الإنس والجن بعيدا عنكم، فأنتم مثاليين جدا، معافين جدا. هتعيش حياتك إنت مش حياة حد تاني، حياتك العادية، اللي في عاديتها دي هي مثالية جدا لك أنت وزوجتك. هتمر بشوية تقلبات أو كثير منها، ساعات مش هتبقى حاسس إنك عارف مين اللي قدامك دي من تقلباتها، وهي كذلك. زوجتك هتتأثر بكلام فاسد سواء من أصحابها أو من كلام قرأته على وسائل التواصل أو غيرها. إنت هتتأثر كذلك بكلام فاسد آخر. هتمر عليكم فترة مش عارفين تهيأوا الود زي ما كان عليه، وفي الآخر اللي هيرجعكم هو إنها زوجتك اللي تحت كنفك ومالهاش غيرك وإنت هترجع لها لأنها أمنك وخبيئة الطمأنينة داخلك. هتسمع آراء كثيرة وجدالات كثيرة هنا وهناك، وفي الآخر إنت وزوجتك أدرى من أي حد في الدنيا باللي المفروض يتعمل. امرأة هينة مش بترمي ودنها لأي حد يلقي في مسمعها سيء الكلام والأسقام ويخرب عليها بيتها. ورجل أدرى بامرأته يحبها ويكتنفها ويتغاضى عن صغائر تقلباتها ويكون لها لا عليها. معادلة صغيرة بس محتاجة مجهود، ومحتاجة إننا نقفل علينا بيتنا ومنسمعش لحد إلا النصح الرشيد فعلا اللي تمرره على قلبك تحسه هادي بدون جدال ولا تعصب وتعنت. ده إيه؟ ده الزواج.

تخيّل أنّك تدلّ صديقًا أو قريبًا على فضل "سُبحانَ الله والحَمدلله ولا إله إلا الله واللهُ أكبَر" فكُلّما قالها غُرِسَت لهُ شجرة في الجنّة، وغُرِسَت لك مثلها فرُبَّما كُنتَ نائمًا أو تتناول طعامك أو مُنهَمكًا في عمل، واللهُ يغرس لكَ نخلةً في الجنّة بسبب أقوامٍ دللتهم وذكَّرتهم. - ابراهيم السكران.

مفيش معيار محدد أقدر أستند عليه وأقولك الحد الأدنى من المرتب إنك تاخد كذا علشان تعرف تتزوج. لكن أقدر أتكلم عن مقارنة غير عادلة تماما بتحصل من بعض الرجال اللي مقبلين على الزواج. إنه يلاقي أب وعنده أسرة وبقاله عشرين سنة مثلا متزوج ومرتبه يا دوبك ما بين ال ٨.٠٠٠ وال ١٠.٠٠٠ جنيه ويقارن حاله بحال الرجل ده. يقول: طيب ما الراجل متزوج وبقاله عشرين سنة وبيقبض راتب زيي ليه أنا متزوجش أو مقدرش على الزواج! والحقيقة إن الرجل ده الله يعينه مر بفترات كثيرة جدا وصُقل بفعل التجارب وأكيد معه زوجة قدرت تدبر وتساند وتصبر. الرجل ده لو افترضنا إنه زمان قبل التعويم كان ببقبض راتب كويس، الراتب الكويس ده كان ممكن يقدر يحوش منه ويدخل جمعية ويشتري حتة أرض صغيرة كده يبني عليها بيت. وممكن هتلاقيه مجهز بنته مثلا كمان. تغير الزمن واستفحال الغلاء خلى سعر الفلوس اللي في إيدك تعتبر مالهاش قيمة. فأنت مينفعش تقارن نفسك به، لأنه اكتسب خبرة وتدبير وخلافه. لو سألتك ال ٨.٠٠٠ جنيه دول اللي في ايدك يكفوا إيه أو هتدبرهم إزاي؟ هتوه ومش هتعرف تتصرف بنسبة كبيرة. طبعا أنا حاطت رقم تقريبي ومش بقول لازم يبقى معاك كذا علشان تتزوج؛ الموضوع واسع جدا وفيه ناس بتتزوج بمرتبات متصنفة أنها تحت خط الفقر حرفيا وأمورها الحمد لله بتمشي. لكن الفكرة إنك لازم كرجل تشتغل على نفسك حتى لو مرتبك قلبل ومتخافش تاخد مجازفة لتعلم شيء هيفيدك حتى لو الفلوس دي تعبت فيها وممكن متجنيش ثمارها دلوقتي. كل قرش هتدفعه في تعلم خبرة أو استزادة من شيء في مجالك هيعود عليك إن شاء الله فيما بعد. والسلام.

انا أحب سيدنا عمر بن الخطاب رضي الله عنه حبا شديدا.. واللي قرأ في سيرته رضوان الله عليه وشاف تحوله الرهيب من الشدة والقسوة والبأس قبل الإسلام للرحمة وتهذيب شدته وبأسه بعد الإسلام؛ هيعلم يقينا أن الله اجتباه لينفع به أمة الإسلام قاطبة ويكون الخليفة الراشد الثاني بعد سيدنا أبو بكر رضوان الله عليهم جميعا. في النقش التاريخي الجميل جدا اللي ظاهر ده بخط سيدنا عمر نفسه: الله ولي عمر بن الخطاب في الدنيا والآخرة. لا إله إلا الله. كلمتين في الصميم ينموا عن توحيد خالص وخضوع الفاروق لخالقه. رضي الله عن عمر وأبي بكر وعثمان وعلي، وعن الصحابة الكرام أجمعين. وصلى الله وسلم على سيدنا محمد وعلى آله وصحبه وسلم.

أنا اكتشفت بقى إن الفيس بوك لما بيقع؛ بيقرب الناس فعلا من بعض. يعني تطبيق تواصل اجتماعي يقع شوية، يخلي الناس كلها تكلم بعضها على الواتساب تسأل هو ليه وقع؟ وبالتالي يسألوا بقى بعضهم عن حالهم وعاملين إيه وكده!

ربنا يخلي لنا التلجرام.. كل ما الفيس يقع هو والانستا؛ يفضل شغال على وضعه كده. واطمنوا محدش هكركم؛ هيهكر إيه في حساباتكم طيب! الفيش بوك واقع عند الكل.

ليس كل ما يريده القلب ينال. اعتد بعض الحرمان؛ فبعض الحرمان عافية. دنيا طبعت على النقائص، وجنة حفت بالمكاره، فاحفظ نفسك وصنها من تتابع الآمال، فطول الأمل قتال.

43% من سنة ٢٠٢٦ قد مضى وولى.. شايف سرعة مرور الوقت عاملة إزاي! انتبه كويس لوقتك.

كثير من الأحيان لا تدري ما الذي يصلحك، وما الذي يكون نافعا لك! لذلك كان من دعاء رسول الله صلى الله عليه وسلم؛ "يا حي يا قيوم برحمتك أستغيث أصلح لي شأني كله ولا تكلني إلى نفسي طرفة عين." فالله عليم، حي قيوم، يدبر الأمر. ليس بجاهك أو حَولك. بل بحول الله وقوته.

الوصول للزنا في الزمن ده سهل جدا وأسهل مما تتخيل. وأنا بتكلم عن الزنا الحقيقي مكتمل الأركان. وكثير جدا من جيل الشباب الحالي (رجال ونساء) هنا بما فيهم الصالح والطالح اتعرضوا لمواقف كانوا خلاص هيقعوا فيها لا محالة، لولا ستر الله سبحانه. ولو فاكر إنك موقعتش فيه لحد دلوقتي علشان الموضوع مش متيسر معاك، فأنت غلطان. لأن التيسير الدنيوي متاح جدا وعلى عينك يا تاجر، ولكن إنت موصلتش له علشان ربنا سبحانه وتعالى عصمك من الوقوع فيها والحمد لله. الناس بقى من كثرة ما الموضوع بقى منتشر، بقوا يجروا على أي ركن أو أي مبرر يستخبوا وراءه، ده الزنا حصل علشان كذا ده مش عارف مين اللي استغل إيه ووقعوا فيه.. باشا إنت قدام كارثة بتصطدم معاك مباشرة، بالرضا والمباشرة وفي سن صغير وسن كبير. زواج معدوم وأنفس متشبعة قهر وغل وفساد، ورجال ونساء بيسنوا السكاكين لبعض كل ما يحصل خلاف علشان نشوف مين اللي كسبان فينا! بيهربوا بقى للزنا، بيسنوا السكاكين لبعض علشان محدش فيهم عاوز يشيل مسؤولية حاجة أو فيه خلاف رايح جاي. طب العمل إيه وأنا جوايا شهوة وعمالة تكبر! يبقى السهل منه اللي مفيهوش قيود، اللي هرميه بعدها وراء ظهري وخلصت. المهرب إيه؟ إننا ننفس عن كبتنا ده؟ طب إزاي؟ بالزنا. سوشيال ميديا مفتوحة قربت الدنيا من بعض فوق الوصف، سيّحت كل الحدود المطلوبة، حالة استمراء في الاستعباط من المقبل على الذنب تحت مسمى الاعتيادية.. واحدة واحدة الموضوع يقلب لكارثة. ودي حالة من ضمن حاجات، لسا متكلمناش إيه اللي بيحصل في العمل المختلط وإيه اللي بيحصل في غيره وغيره.. علشان مكهربش الناس وأقول إن والله الدنيا كلها بقت عاتمة، لا، لسا فيه خير وخير كثير. بس لما تيجي تشوف اننا كمجتمع مسلم يخرج منه كده، فأنت قدام كارثة ومش مطلوب منك تدفن راسك زي النعام وتقول طالما بعيد عني يبقى خلاص. الزنا من الإفساد في الأرض، وكبيرة من الكبائر تستوجب أشد العقوبات. والزاني اللي شايف نفسه إنه ممكن يقع في ده ويتوب، فكده هو بيضحك على ربنا مثلا؟ ما أنت ممكن تموت وأنت بتعمل كده، وتبعث على ما مت عليه، ممكن تتفضح في الدنيا ويقولوا عليك الزاني أهو، أمك وأبوك وعائلتك يتشردوا بسبب كبيرة من الكبائر عملتها. فأنت بتبارز مين؟ انتهكت حرمة جسمك في الحرام علشان شهوة؟ واللي رجله بتقع في الموضوع ده والله العظيم ما بيخرج منه سليم أبدا.. ولو خرج بيبقى الموضوع على قلبه كارثي. ولنا في غيرنا عبرة، كتير وقعوا في الزنا وبقى مش قادر يبطله ده لأنه بقى (ممتع) بالنسبة له. يجرب كيفاء شاء ما الموضوع سهل! ولكن إنت بتبارز مين؟ بتبارز ربنا اللي هتقف قدامه بكل اللي عملته ده؟ أعضاءك اللي إنت اشتهيت بها دي عارف هيحصا فيها إيه في جهنم! اتكلموا بغلظة عن الموضوع ده، ياما اتكلمنا باللين والرحمة ومنفعش، ننتهج نهج الغلظة شوية والحديث عن جهنم وعقاب الزاني في الدنيا والآخرة وسوءات عمله دي إيه! مع وضع جمل إن باب التوبة مفتوح نعم، لكن لازم نغلظ القول لأن الدنيا خربت. الناس مبقتش تخاف من ربها، الناس تبلدت تحت وطأة الحاجة وضغوط الحياة، مع استمرار قول إن ربنا غفور رحيم على مسامعهم، الدنيا بتخرب، لأن ربنا سبحانه شديد العقاب لا يؤمن مكره أيضا. الآباء اللي سايبين أولادهم، قسما بالله لتتحاسبوا حسابا عسيرا على تقصيركم، متجيش تقول ما أنا ربيت وعملت وهما اللي باظوا! خليك وراهم وحاوط عليهم واسحل نفسك في مراقبتهم.

في مرحلة من مراحل حياتك لازم تخرج من الريف لو إنت عايش فيه. والريف هنا هي المناطق على أطراف المدن أو البعيدة وفيها خدمات بسيطة وكل الناس تعرف بعض؛ وكل الناس كذلك تعرف كل حاجة عن بعض تقريبا. أي بروز هيبان في تعليمك أو وظيفتك هيتم تسليط الضوء عليه بكل الأشكال! ولو إنت ذكي كفاية؛ هتخلي معاملتك مع الناس سطحية جدا بدون ما تقطع معهم؛ ده لأن ببساطة الناس بتتدخل في حياة غيرها كنوع من الاستحقاقية؛ لازم يعرف عنك كل خطواتك. حتى السؤال عن الحمل للمتزوجة والسؤال عن القبض للرجل العامل وغيره! ويا سلام لو اشتريت قطعة أرض وعايز تبني عليها بيت! عادي جدا الناس تسأل: جاب الفلوس منين! الفضول ده في أوقات كثيرة بيبني حسد وحقد وينغص عليك معيشتك فيما بعد. أسلم حاجة تعملها إنك لا تنخرط مع الناس ولا تتبسط معهم للدرجة اللي تبيح لهم يسألوك عن أي شيء! تخفف معهم لحد ما ربنا يكرمك وتخرج بالسلامة.