تورکجه شعر / شعر/ شعرترکی/رمان

آناسیز، آتاسیز کؤورک اوره‌ییم، یتیم‌لر ائوینده کدر بسله‌ییر. اؤزوم‌تک آدیم دا باتیب دئیه‌سن، هرکس بیر آد ایلا منی سسله‌ییر. باخیرلار اۆزومه بۇز باخیش ایله، بیلمیرلر یاشیمدان چوخدو نیسگیلیم. یئدیگیم، ایچدیگیم زهردی منه، مینّت‌لی چؤره‌یه قیسادی دیلیم. بیلمیرم کئچمیشی، گله‌جه‌ییمی؛ هئچ دئین اولماییر هارالییام من. ائله بیل ازلدن کۇپوْنوم یانیب، فله‌یین الیندن یارالیرام من. گؤزلریم تیکیلیب یوللارا، ولی- كئشکه بیر نفر ده یوْخلویا منی! یا دا کی بیریسی توتا الیمدن، گؤستره: بو قادین دوغوبدور سنی! بو یئره گوناهسیز سۆرگون اولموشام، عدالت بایراغی اسمه‌دی بیزه. غم ایله اورکده گول بسله‌میشم، سیز آللاه گیرمه‌یین بو کردیمیزه! گلندن، گئدندن سوروشورام من: نئیه بس طالعیم بئله قارادی؟ یازیمی یازاندان گیلئی‌لنیرم، جهنّم وارسا، اوف، بورا هارادی؟! #حسن_عمیدفر @turkce_sheir