БСТ | Яңылыҡтар

Яңы йыл байрамы уңайынан ял көндәрендә хәмер һатыу сикләнә Республика парламенты рәйесе Константин Толкачев белдереүенсә, бындай тәртип 4 көн буйы ғәмәлдә була. 3 ғинуарҙа алкоголь иртәнге 8-ҙән киске бишкә тиклем һатыла. 4-6 ғинуарҙа уны көндөҙ сәғәт ундан бишкә тиклем алырға мөмкин. Башҡа көндәрҙә сауҙа ғәҙәти тәртиптә алып барыла. Бындай сикләү бер нисә йыл ғәмәлдә. Ул һөҙөмтәле тип табылды, - тине Константин Толкачев.

Яңы йылға тиклем 6 көн ҡалды!❄

Яңы йыл алдынан Өфө хосписында байрам ойошторолдо Ауыр сир менән ауырыған пациенттарҙы Башҡортостан ҡурайсылар ансамбле, Балалар фонды ағзалары һәм Бөтә донъя башҡорттары ҡоролтайы ағзалары тәбрикләне. Улар пациенттар менән аралашты, бүләк тапшырҙы.

«Теләктәр шыршыһы» Бөтә Рәсәй акцияһы балаларға Яңы йыл мөғжизәһе бүләк итә Мәғлүм булыуынса, «Теләктәр шыршыһы» Бөтә Рәсәй хәйриә акцияһы 2018 йылдан ил Президенты Владимир Путиндың башланғысы менән ойошторола. Уның төп маҡсаты - етем, ата-әсә ҡарауынан мәхрүм, физик мөмкинлеге сикләнгән, аҙ тәьмин ителгән, аталары махсус хәрби операцияла ҡатнашҡан балаларҙың яңы йыл хыялдарын тормошҡа ашырыу.

Өфөлә «Был минең донъя: биләмәләр, телдәр һәм мәҙәниәттәр тотороҡло үҫештә» форумы үтте Мәҙәниәт, мәғариф, экология, фән вәкилдәре бер майҙанда. Өфөлә «Был минең донъя: биләмәләр, телдәр һәм мәҙәниәттәр тотороҡло үҫештә» тип исемләнгән форум үтте. Башҡортостандың ЮНЕСКО эштәре буйынса комитеты ойошторған Халыҡ-ара форумға тәжрибә уртаҡлашырға Ҡытай, Иран, Малайзия илдәренән дә ҡушылдылар.

Радий Хәбиров тәҡдиме менән ауыл мәҙәниәт йорто хеҙмәткәрҙәренә дәүләт пограммаһы нигеҙендә ярҙам 4 йыл элек программа эшләй башлағанда түләү ярты миллион булһа, былтырҙан бер миллионға етте. «Ауыл мәҙәниәт хеҙмәткәре» республика программаһы сиктәрендә миллиондар 120 белгескә тапшырылды. Быйыл иһә был бәхет йәнә 30 кешегә йылмайҙы. Миллион һумға Стәрлетамаҡ районы Яңы Уҫылы ауылыннан торлаҡ һатып алған Зәлиә Әхмәтшинаның йәшәү һәм хеҙмәт шарттары тураһында киләһе яҙмала.

Ялға ҡайтҡан яугир Ғафури районында йәшәүсе Алһыу Ғәлимоваға ноут-бук бүләк иткән Махсус хәрби операциянан ҡыҫҡа ваҡытлы ялға ҡайтҡан яугир Ғафури районында йәшәүсе Алһыу Ғәлимоваға ноут-бук бүләк иткән. 9 -сы класста уҡыусы Алһыуға был хәрбиҙең илһөйәрлек хаты өсөн Яңы йыл бүләге. Яугир әйтеүенсә, гуманитар ылау менән алғы һыҙыҡҡа килеп еткән хаттар Ватан һаҡсыларына рухи көс-дәрт бирә.

Өфөлә бер төркөм яугирҙар ҡыҫҡа ваҡытлы ялдан һуң йәнә махсус хәрби операция биләмәһенә юлланды Башҡортостанда бер төркөм яугирҙар ҡыҫҡа ваҡытлы ялдан һуң йәнә махсус хәрби операция биләмәһенә юлланды. Уларҙы оҙатыу сараһы «Өфө-Арена» комплексы алдындағы майҙанда үтте. Ир-егеттәр хеҙмәт урынына уңайлы автобустарҙа барасаҡ. Хәрбиҙәрҙең отпускыһы ике аҙнаға иҫәпләнгән.

Дмитрий Медведев Өфөлә хәрби хеҙмәткә контракт буйынса һайлап алыу үҙәге эшмәкәрлеге менән танышты Рәсәйҙең Именлек Советы рәйесе Дмитрий Медведев Өфөлә «Һаҡсы» граждандарҙы хәрби хеҙмәткә контракт буйынса һайлап алыу үҙәге эшмәкәрлеге менән танышты. Үҙәк быйыл октябрҙә асылды. Бында Оборона министрлығы менән контракт төҙөргә теләүселәр өсөн тулы спектр хеҙмәт күрһәтелә. Ошонда уҡ документтар тултырыу һәм медицина тикшереүе үтеү ҙә ойошторолған.

Дмитрий Медведев махсус хәрби операцияла ҡатнашыусыларға дәүләт наградалары тапшырҙы Рәсәйҙең именлек советы рәйесе Дмитрий Медведев махсус хәрби операцияла ҡатнашыусыларға дәүләт наградалары тапшырҙы. Әле яугирҙар яраланғандан һуң республиканың хәрби бәрелештәр ветерандары клиник госпиталендә реабилитация үтә. Дмитрий Медведев яҡташтарыбыҙҙы өс «Ҡаһарманлыҡ өсөн», ике «Батырлыҡ өсөн « һәм бер Жуков миҙалы менән бүләкләне. Ил именлеге советы рәйесе яугирҙарға тиҙерәк һауығыуҙарын теләне һәм һис икеләнмәй ватан һағына баҫыуҙары өсөн ихтирамын белдерҙе

Өфө хакимиәте хеҙмәткәрҙәре яңы йыл каникулында урамдарҙа дежур итә Улар биләмәләрҙе ҡарҙан таҙартыуҙы күҙәтә, тип хәбәр итәләр коммуналь хужалыҡ идаралығынан. Бындай дежур көн һайын ойошторола. Юл таҙартыуҙа тотҡарлыҡтар булғанда өҫтәмә техника йәлеп ителәсәк.

❄ Мегасело. Яңы сығарылыш. Әбйәлил районы Был 25 йәшлек егетте республикала иң өмөтлө йылҡысыларҙың береһе тип атайҙар. Тапшырыу геройы Айтуған Фәттәхов ысынлап та өмөттәрҙе аҡлай) 💙 Ғөмүмән, урындағы халыҡ бик тырыш, ышаныслы, ныҡышмал. Ауылдарҙа хужалыҡты ла тергеҙә, халҡыбыҙ йолаларын да ҡәҙерләп һаҡлай. Әбйәлил район халҡының йәшәйеше хаҡында яңы сығарылышыбыҙҙа бәйән итәбеҙ. Тулы яҙманы бында ҡарағыҙ 👉 https://vk.com/video-224884924_456239075

Әбйәлил районы Әбделмәмбәт урта мәктәбендә Рәмзиә Кәримова уҡыусыларға үҙенең премияһын тапшырҙы Әбйәлил районы Әбделмәмбәт урта мәктәбендә Рәсәйҙең атҡаҙанған журналисы, Дәүләт Йыйылышы-Ҡоролтай депутаты Рәмзиә Кәримова уҡыусыларға үҙенең премияһын тапшырҙы. Коллегабыҙ үҙенең тыуған мәктәбендә премияны өсөнсө йыл рәттән тапшырып килә. Аҡсалата бүләк уҡыу һәм йәмәғәт эштәрендә әүҙем ҡатнашҡан, китап уҡырға яратҡан, матбуғат баҫмаларына яҙышҡан өс балаға бирелә. Ул йәш быуында әҙәбиәткә, ижадҡа һөйөү уятыу, дәртләндереү маҡсатын ҡуя.

Өфөлә Әнүәр Әсфәндиәровтың ғүмере һәм фәнни ижады тураһындағы китаптың исем туйы үтте Өфөлә танылған ғалим, профессор, Салауат Юлаев ордены кавалеры Әнүәр Әсфәндиәровтың ғүмере һәм фәнни ижады тураһындағы китаптың исем туйы үтте. «Ғилемгә арналған ғүмер» тип исемләнгән баҫма шәхестең тыуыуына 90 йыл уңайынан ойошторолған конференцияла тәҡдим ителде.

Декабрь өсөн балалар пособиеларын республика халҡы ваҡытынан алда аласаҡ Декабрь өсөн балалар пособиеларын республика халҡы ваҡытынан алда, ә пенсияларҙы билдәләнгән график буйынса аласаҡ. Был хаҡта социаль фондтың Башҡортостан бүлексәһе хәбәр итә. Шулай итеп, балаларға түләүҙәр 25 декабрҙә барып етергә тейеш.

Бөгөн Башҡортостан Конституцияһы көнө билдәләнә Республикабыҙ үҫешен, заманса йөҙөн билдәләгән төп закондың ҡабул ителеүенә 31 йыл тулды. Байрам менән төбәк халҡын Радий Хәбиров ҡотланы. Төп закон Башҡортостандың илдең терәк төбәге булараҡ үҫеш йүнәлешен билдәләне. Быуаттар дауамында төрлө милләт вәкилдәре бер ерҙә татыу йәшәй, уртаҡ йортобоҙ мәнфәғәтендә ҙур, берҙәм Рәсәй төҙөй. Башҡортостан Конституцияһы ата-бабаларыбыҙ мираҫын, телдәрҙе, мәҙәниәтте, халыҡтар дуҫлығын, граждандарҙың хоҡуҡтарын һәм законлы мәнфәғәттәрен һаҡлай. Беҙ бергә эшләйбеҙ, алға барабыҙ, һәр кем үҙ урынында уртаҡ Ватаныбыҙҙы яҡлай. Һәм һәр ваҡыт шулай буласаҡ. Бөтәгеҙҙе лә байрам менән, тип яҙған Башҡортотсан башлығы.

Башҡортостанда яңы йылға 570 боҙ ҡаласығы төҙөлә Был турала хөкүмәттә уҙған оператив кәңәшмәлә белдерелде. Республика торлаҡ-коммуналь хужалыҡ министры Ирина Голованова әйтеүенсә, боҙ ҡаласыҡтарының күбеһе асылған, ҡайһы бер муниципалитеттарҙа һауа торошона бәйле эштәр тотҡарланған. Республикала 1 мең 700-ҙән ашыу шыршы ҡуйылған, 1 мең боҙ ҡумта һәм һырғалаҡ урынлаштырылған.

Белоретта яугир исеме мәңгеләштерелде Райондың Аҙналы ауылында махсус хәрби операцияла батырҙарса һәләк булған Руслан Әхмәтшинға иҫтәлекле банер асылды. Руслан 2022 йылдың октябрендә өлөшләтә мобилизация буйынса Ҡораллы көстәргә саҡырыла. Донбаста хеҙмәт итә. Быйыл августа штурм ваҡытында ғүмере өҙөлә. Фронтта күрһәткән ҡыйыулығы өсөн, үлгәндән һуң, Ҡаһарманлыҡ орденына тәҡдим ителә. “Ул беҙҙең өсөн ысын герой. Ҡустыбыҙ менән ғорурланабыҙ”, - ти Русландың туғаны Рафиҡ Әхмәтшин.

Башҡортостандан яҙыусы МХО-ла һәләк булған Махсус хәрби операция барышында башҡорт яҙыусыһы Сабит Фазлыев һәләк булған. «Башинформ» агентлығына БР Яҙыусылар союзында хәбәр итеүҙәренсә, ул 2024 йылдың ғинуарында РФ Оборона министрлығы менән килешеү төҙөгән. Яҡынса мәғлүмәттәр буйынса, Сабит Мағаз улы 26 декабрҙә Ейәнсура районында ерләнәсәк. Яҙыусы Сабит Фазлыев әҙәбиәт һөйөүселәргә «Ҡара этап» тарихи романы авторы булараҡ билдәле.

Башҡортостанда Ҡыш бабай резиденцияһы асылды Быйыл ул баш ҡалала түгел, ә Торатау итәгендә урынлашҡан. Ҡыш бабай менән күрешергә республиканың төрлө нөктәһенән киләләр. Резиденцияны асыу тантанаһында ҡунаҡтарға байрам программаһы, ҡышҡы һабантуй, мауыҡтырғыс оҫталыҡ дәрестәре тәҡдим ителде. Улар Яңы йыл байрамдарында ла дауам итә. Күңелле тамашалар иртәнге сәғәт 11-ҙән киске 10-ға тиклем бара.