تفاصيل 🖤

من الطرائف أول مرة تركت مصافحة النساء جانا أحد الزوار في البيت مع زوجته وبناته. بي كل بساطة ما صافحت الزوجة والبنات لكن تفاجأت بزعل الرجل يعني كيف ما أصافح بناته. !! وقعد يشرح لي مسافة إنو ما فيها شي وده تشدد. بعد قعدنا للغداء قعد يناقشني وقال لناس البيت الولد ده شكلو بقى وهابي ههههههه. والنسوان الواحدة تقول ليك يا ولد أنا شلتك في جنبتي دي. والتانية تقول ليك يعني هسا إنت ما تصافحني يعني فيها شنو يعني حتعرسني؟! ههههههه والمتفلسف يقول ليك المس يأتي في القرأن بمعنى الزواج!! ياخي السيدة عائشة قالت ما مست يد رسول الله صلى الله عليه وسلم يعني بتتكلم عن مس اليد. هل في زواج باليد؟! ولا عشان لما تمشي تخطب بتقول عايز أطلب يد بنتك ؟ههه ياخي دي سنة نبينا وسيدنا رسول الله صلى الله عليه وسلم. السيدة عائشة رضي الله عنها قالت:( ولا واللهِ ما مَسَّت يَدُه يَدَ امرَأةٍ قَطُّ في المُبايَعةِ، ما يُبايِعُهنَّ إلَّا بقَولِه: قد بايَعتُكِ على ذلك) . ترك مصافحة النساء فيها راحة بال عجيبة. وسد باب لكتير من الفتن. الشباب العاملين منشورات ترك المصافحة شجعوهم وما تقولوا ليهم خلوها بينكم وبين ربنا عشان ده من التعاون على البر والتقوى. أنا يوم عمنا داك غالطني وقال لناس البيت الولد ده بقى وهابي وحكى لي عن واحد اسمه محمد بن عبدالوهاب النجدي بسوء وقال لي عنده كتاب اسمه الأصول الثلاثة قررت طوالي أقرأ الكتاب. وكانت أول مرة أسمع بالكتاب. وإنت يا عمنا لما بنت تقول ليك ما بصافح الرجال ما تديها محاضرة عن كونك قدر أبوها وما قاصد شي وقلبك نضيف لأنو بالتأكيد ما أنضف من قلب سيدنا النبي صلى الله عليه وسلم. وحتى لو النبي صلى الله عليه ترك المصافحة حفاظاََ على قلوبهن فإنت من باب أولى. وإنت عزيزي الشاب تأكد بعد مدة من ترك المصافحة أغلب الناس اللي بتنتقدك حيكونوا أكتر الناس احتراماََ ليك.. وأهم حاجة رضا ربنا ورسوله صلى الله عليه وسلم. -ذو النون عبدالرحمن