MOI

ဧရာဝတီတိုင်းဒေသကြီးအစိုးရအဖွဲ့ တိုင်းရင်းသားလူမျိုးရေးရာဝန်ကြီး မြို့နယ်အဆင့် ဒုတိယအကြိမ် ကရင်ရိုးရာချည်ဖြူဖွဲ့ မင်္ဂလာစုပေါင်းလက်ချည်ပွဲ အခမ်းအနားတက်ရောက် လပွတ္တာ စက်တင်ဘာ ၅ ဧရာဝတီတိုင်းဒေသကြီးအစိုးရအဖွဲ့ တိုင်းရင်းသားလူမျိုးရေးရာဝန်ကြီး မန်းသိန်းကျော်သည် လပွတ္တာမြို့နယ်၊ ကသပေါင်းကျေးရွာ၌ ယမန်နေ့နံနက်ပိုင်းကကျင်းပပြုလုပ်သည့် မြို့နယ်အဆင့် ဒုတိယအကြိမ် ကရင်ရိုးရာချည်ဖြူဖွဲ့ မင်္ဂလာစုပေါင်းလက်ချည်ပွဲ အခမ်းအနားသို့ တက်ရောက်ခဲ့သည်။ ဦးစွာအခမ်းအနားကို ဖားစည် ၉ ချက်တီး၍ဖွင့်လှစ်ပြီး နိုင်ငံတော်အလံနှင့် ကရင်တိုင်းရင်းသား အလံတို့အားအလေးပြုကြပြီးနောက် မှန်ကျောင်းတိုက်ဆရာတော်ဘဒ္ဒန္တအဂ္ဂဓမ္မနှင့် အောင်သုခ ကျောင်းတိုက်ဆရာတော် ဘဒ္ဒန္တတိက္ခဉာဏတို့က ဩဝါဒအမှာစကားများ မိန့်ကြားကြသည်။ ဆက်လက်၍ ဧရာဝတီတိုင်း ဒေသကြီးအစိုးရအဖွဲ့ တိုင်းရင်းသားလူမျိုးရေးရာဝန်ကြီး မန်းသိန်းကျော်က အမှာစကား ပြောကြားရာတွင် ကရင်တိုင်းရင်းသားတို့၏ ရိုးရာယဉ်ကျေးမှု ဓလေ့ထုံးတမ်းများကို ထိန်းသိမ်းစောင့်ရှောက်၍ မျိုးဆက်သစ်လူငယ်များထံ လက်ဆင့်ကမ်းပေးနိုင်ရေး၊ တိုင်းရင်းသား အချင်းချင်း ချစ်ကြည်ရင်းနှီးမှုနှင့် စည်းလုံးညီညွတ်မှု ပိုမိုခိုင်မာစေရေးတို့ကို အလေးထား ဆောင်ရွက်ကြရန်လိုအပ်ကြောင်း အလေးထားပြောကြားသည်။ ထို့နောက် လပွတ္တာခရိုင် စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ ဦးကိုကိုလှိုင်က အမှာစကားပြောကြားပြီး ပြည်သူ့လွှတ်တော်ကိုယ်စားလှယ် ဦးဝင်းဆွေကလည်း အမှာစကား ပြောကြားပြီး ကရင်ရိုးရာဝါခေါင်လချည်ဖြူဖွဲ့ မင်္ဂလာအခမ်းအနား၏ ရည်ရွယ်ချက်နှင့် အစဉ်အလာအရဆောင်ရွက်ပုံများ၊ ချည်ဖြူဖွဲ့မင်္ဂလာ၏ရိုးရာယဉ်ကျေးမှုဆိုင်ရာ အဓိပ္ပာယ်များကို ရှင်းလင်းတင်ပြခဲ့သည်။ ဆက်လက်၍ မြို့နယ်ကရင်စာပေနှင့်ယဉ်ကျေးမှုအသင်း ဒုတိယဥက္ကဋ္ဌ စောကဘလူထူးက ကျေးဇူးတင်စကားပြောကြားပြီး ဝန်ကြီးနှင့်တက်ရောက်လာကြသူများအား အမှတ်တရ လက်ဆောင်ပစ္စည်းများ ပေးအပ်ခဲ့ပြီးနောက် ကရင်ရိုးရာဝါခေါင်လ ချည်ဖြူဖွဲ့မင်္ဂလာပွဲကို ရိုးရာအစဉ်အလာများနှင့်အညီ ဆက်လက်ကျင်းပရာ အခမ်းအနားသို့ တက်ရောက်လာကြသည့် ဧည့်သည်တော်များ၊ တိုင်းရင်းသားများနှင့် ဖိတ်ကြားထားသူများအား ချည်ဖြူဖွဲ့၍ မင်္ဂလာပြုကြသည်။ အဆိုပါကရင်ရိုးရာချည်ဖြူဖွဲ့ မင်္ဂလာပွဲသည် ကရင်တိုင်းရင်းသားတို့၏ ရိုးရာယဉ်ကျေးမှု ဓလေ့ထုံးတမ်းများကို ထိန်းသိမ်းဖော်ထုတ်နိုင်ရန်နှင့် မျိုးဆက်သစ်များထံ လက်ဆင့်ကမ်း ပေးနိုင်ရန်အပြင် တိုင်းရင်းသားအချင်းချင်း ချစ်ကြည်ရင်းနှီးမှုနှင့် စည်းလုံးညီညွတ်မှု ပိုမိုတိုးတက်ခိုင်မာစေရန် ရည်ရွယ်ကျင်းပခြင်းဖြစ်ကြောင်း သိရသည်။ ခရိုင်(ပြန်/ဆက်) MOI News Application အား အောက်ပါ link တွင် Download ပြုလုပ်နိုင်ပါသည်- For Andriod https://shorturl.at/uK23k For IOS https://rb.gy/vgdhqc Subscribe to Myanmar Newspaper https://t.me/myanmarnewspaper Subscribe to The Global New Light of Myanmar https://t.me/gnlmon Subscribe to MOI https://t.me/iprdrnd View to mtube Video Streaming Platform https://mtube.gov.mm/