ИБРАТЛЫ СӨЗЛЕР...

БАЛАМЫЗ НЕ УШЫН ӨТИРИК СӨЙЛЕЙДИ? Қызық. Гейде кип-кишкентай баламыздың өзи өтирик сөйлеп, алдап турғанын көргенде «Мынаў бесиктен бели шықпай атырып, өтирик айтыўды қаяқтан үйренип алған?» деп таң қаламыз. Расында да, тили енди шығып киятырған, еле ақ-қараны ажырата алмайтуғын, оң менен солын танып үлгермеген бала алдаўды қайдан билиўи мүмкин? Бала билмейди емес, биледи. Неден дейсиз ғой? Қәнигелер баланың өтирик сөйлеўине ең биринши себеп, ата-анасының баланы жийи-жийи алдаўы деп түсиндиреди. Мысалы, Дүканға баратырған анасы кишкентайына «Мен ҳәзир дәриханаға барып келемен» дейди де, қалғанларына «Мен дүканға баратырман, үйди бүлдирмей отырың» дейди. Бала буның бәрин еситип, көрип тур... Әкеси жумысқа баратырып баласына: «Балам, мен жумысқа бараман, ол жерге балалар барыўға болмайды. Мен саған кешке үлкеееен машина әкелип берейин. Келистик пе?» дейди. Бала басын ийзеп қалады. Күн бойы машина күтип жүрген бала кешке әкесиниң қолына қарайды. Машина жоқ... Далада ойнап жүрген ақлығын түски аўқатқа киргизе алмаған әжеси: «Жүр, мен үйге көөөп қылып "кәмпит" әкелип қойдым», - дейди. Үйге келсе, "кәмпит" жоқ. Телефон шыр ете қалады. Телефонды баласы көтереди. Аржақтағы адам «Ҳәй, балам, қалайсаң? Телефонды әкеңе берип жибер, асығып тур едим», - дейди. «Аға, сизге» деп телефонды алып келген балаға әкеси: «Ким екен? Пәленше ме? Эй, жоқ деп айт», - дейди. Бала таң қалған ҳалда көзи бақырайып әкесине бир қарайды да: «Ағам үйде жоқ екен. Кетип қалыпты», - дейди. *** Мине, усындай алдаўлар баланың санасына өтирик айтыўға, орны келсе алдап жибериўге болады екен-аў деген сигнал береди. Өйткени, өтирикти ҳеш ким зериккеннен айтпайтуғыны анық. Көп ата-ана буған мәжбүрлик пенен барады. Бирақ, бизиң ең үлкен қәтемиз де сол. Балаға қандай жағдай болмасын, шынлықты айтыўымыз керек. Себеби, базыда балаға берген ўәдени орынламаўдың кесиринен олар да өтирик сөйлеўге, алдаўға бейим болып өседи. «Жаслықта берген тәрбия жас қайыңды ийгендей» деген сөз бар. Сонлықтан да ата-аналар өзлериниң күнделикли турмысында көп өтирик айтатуғынын, соның ҳәммеси балаға тәсир ететуғынын уққаны дурыс болады. Интернет материалынан алынды. https://t.me/ibratli_sozler

ЕЛ ЖАМАЛЫ Сары қум саҳраңда өмир, Қайнап атыр тасар кеўил, Арал теңиз оянбақта, Жан бағышлап жаңа дәўир. Жәйҳун дәрья жағасында, Жәмлескен ел арасында, Жасар мәңги, дослық, бирлик, Ҳәр бир инсан санасында. Қаратаўдың жағалары, Мол байлықтың сағалары, Халқымның кең пейли яңлы, Үстирттиң кең далалары. Қулан, кийик шабар шөлге, Қуслар ынтық Даўыт көлге, Қарабарақ сырлас өсер, Тарбайысқан сексеўилге. Шылпық қорған, Хожа көлим, Етеги ел, бөлим, бөлим, Қалалар көп, жанлы тарийх, Қыз шашындай өрим, өрим. Темир жоллар, машын жоллар, Абат еткен күсли қоллар, Жипек жолға, тутасқанда, Кең жәҳәнге сәлем жоллар. Ел жамалы, кеўил хошым, Тасқынлаған илҳәм, йошым, Қайда жүрсем қәлбимдесең Қәдирлисең, мениң ушын. Раўаж Отарбаев https://t.me/ibrati_sozler

📖 Бердаққа. ✒️. Ибрайым Юсупов 🎙. Гүлбəхəр Қарабаева https://t.me/ibratli_sozler

Қәдирданлар, сизлерге қайырлы түн тилеймен. Бүгинги зыяратларыңыз қабыл болсын.    Түн өз ҳүкимин баслады. Демек түн тынышлықты сүйеди, ҳәмме инсанлар шийрин уйқыға кетеди. Сизлерге бүгинги түнниң жақсылығын, тынышлығын тилеймен.  Ертеңги Таңда аманлықта дийдарласыў несийп етсин. Түнниң периштелери, сизлерге шийрин уйқы ҳәм жақсы түслер инам етсин. 🤲🤲🤲🤲🤲 🌟🌟🌟🌟🌟🌟🌟🌟🌟