Finote Hiwot የቀጨኔ ደብረ ሰላም መድኀኔ ዓለምና ደብረ ትጉሃን ቅዱስ ገብርኤል ቤተ ክርስቲያን ፍኖተ ሕይወት ሰንበት ትምህርት ቤት

ከአሰላ ያገኘነው መረጃ ብፁዕ አቡነ ያሬድ የአርሲ ሀገረ ስብከት ሊቀ ጳጳስ ዛሬ ምሽት 3:45 አሰላ ከተማ ደብረ ምጽላል ቅድስት ማርያም ቤተ ክርስቲያን ከሚገኘው መንበረ ጵጵስናቸው ተወስደው መታሠራቸውን ለማወቅ ተችሏል። ሕገ ወጡ ቡድን ሾሜዋለሁ ያለው ግለሰብ በነገው ዕለት እንደሚመጣ የተነገረ ሲሆን በሌሎች ቤተእምነት ተከታዮችን በማስተባበር የአዲሱን ተሿሚ ፎቶ በባነር ለመስቀል ሲሞክሩ ተስተውሏል። በሐረር የተሐድሶ እንቅስቃሴ መሪና በይቅርታ ወደ ሥራው የተመለሰው ግለሰብ ለምዕራብ አርሲ ተሾሟል መባሉ ምእመናኑ አስቆጥቷል። EOTC TV +++++++++++++++++++++++++++++++++++

ልዩ መረጃ! ብፁዕ አቡነ ያሬድ ታሠሩ! ጥር 26 ቀን 2015 ዓ.ም (ተ.ሚ.ማ/ አዲስ አበባ) ብፁዕ አቡነ ያሬድ የአርሲ ሀገረ ስብከት ሊቀ ጳጳስ ዛሬ ምሽት 3:45 አሰላ ከተማ ደብረ ምጽላል ቅድስት ማርያም ቤተ ክርስቲያን ከሚገኘው መንበረ ጵጵስናቸው ተወስደው መታሠራቸው ተገለጸ። ብፁዕነታቸው በዛሬው ዕለት ማምሻውን ከአዲስ አበባ ወደ ሀገረ ስብከታቸው መድረሳቸውን ተ.ሚ.ማ ያገኘችው መረጃ ያመለክታል። በተጨማሪም የሀገረ ስብከቱ ሥራ አስኪያጅ ሊቀ ኅሩያን ታምራት ወልዴ ቤትም መከበቡንና እስካሁን ያለውን ሁኔታ ማወቅ እንዳልቻሉም ነው ምንጮቻችን የገለጹት። ሕገ ወጡ ቡድን ሾሜዋለሁ ያለው ግለሰብ በነገው ዕለት እንደሚመጣ የተነገረ ቢሆንም ምእመናኑ ሕጋዊውን ቅዱስ ሲኖዶስን ብቻ እንደሚቀበሉም ገልጸዋል። #Ethiopia #Tewahedo_Media_Center #TMC_Addia_Ababa

የእነ አቶ አካለወልድ ሞገስ ሕገወጥ ቡድን የምስካየ ኅዙናን መድኃኔዓለም ገዳምን ለመውረር ዝግጅት እያደረገ መሆኑ ተገለጸ !!! ++++++++++++++++++++++++++++++++++++++++ (ጥር 26 ቀን 2015 ዓ.ም አዲስ አበባ-ኢትዮጵያ) ሕገወጥ ቡድኑ በፔንሲዮን መሽጉ የሰነበተ መሆኑ የሚታወቅ ሲሆን በተለያዩ አህጉረ ስብከት የጸጥታ ኃይሎችን ተገን በማድረግ የአህጉረ ስብከት መንበረ ጵጵስናዎችን እየሰበረ ወረራ ሲፈጽም የቆየ ሲሆን እስከ አሁን ድረስ በወለጋ የሚገኙ አራት አህጉረ ስብከት መንበረ ጵጵስናዎችን በወረራ ተቆጣጥሯቸዋል። በተመሳሳይም በነገው ዕለት አቶ አካለ ወልድ ሞገስ ቀድሞ ሊቀ ጳጳስ በነበሩበት ወቅት የበላይ ጠባቂ ሆነው ሲመሩት የነበረውን የምስካየ ኅዙናን መድኃኔዓለም ገዳምን ለመውረር ዝግጅት ማድረጋቸውን የተ.ሚ.ማ ምንጮች ጠቁመዋል። ቅዱስ ሲኖዶስ መንግሥት የቤተ ክርስቲያኒቱን ሕግና ሥርዓት እንዲያስከብር ጥሪ ቢያቀርብም እስከ አሁን ድረስ ከመንግስት የተሰጠ ተግባራዊ ምላሽ የለም። ©ተ.ሚ.ማ

#ኢንፈርህ_ሞተ

ብፁዕ ወቅዱስ አቡነ ማትያስ የሩስያን ፌዴሬሽን የፓርላማ አባል እና በኢትዮጵያ የሩስያ አምባሳደርን በጽሕፈት ቤታቸው ተቀብለው አነጋገሩ። ጥር 26 ቀን 2015 ዓ.ም (ተ.ሚ.ማ/አዲስ አበባ) ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት፣ የሩስያን ፌዴሬሽን የፓርላማ አባል እና በኢትዮጵያ የሩስያ አምባሳደርን በጽሕፈት ቤታቸው ተቀብለው አነጋግረዋል። የጉብኝታቸው ዋና ዓላማ በተፈጠረው ወቅታዊ የቤተ ክርስቲያኒቱ ችግር መፍትሔ ለማግኘትና ሐሳብ ለመለዋወጥ እንዲሁም ለብፁዕ ወቅዱስ ፓትርያርኩ አብሮነታቸውንና ድጋፋቸውን ለመግለጽ መሆኑን ገልጸዋል። ©የፓትርያርክ ልዩ ጽሕፈት ቤት

በስመ አብ ወወልድ ወመንፈስ ቅዱስ አሃዱ አምላክ አሜን! ከኢትዮጵያ ኦርቶዶክስ ተዋሕዶ ቤተ ክርስቲያን ቋሚ ሲኖዶስ የጾምና የምሕላ አዋጅ አስመልክቶ የተሰጠ መግለጫ "የነነዌም ሰዎች እግዚአብሔርን አመኑ ለጾም አዋጅ ነገሩ! ከታላቁም ጀምሮ እስከ ታናሹ ድረስ ማቅ ለበሱ።" ትንቢተ ዮናስ ምዕራፍ 3 ቁጥር 5 ቅድስት ቤተ ክርስቲያናችን በተከሰተው ሃይማኖታዊ፣ ቀኖናዊና አስተዳደራዊ መዋቅሮቿን በመጣስ መፈንቅለ ሲኖዶስ በማድረግ በሕገወጥ መንገድ ኤጲስ ቆጶስነት ሢመት በሰጡትና በተሾመ ግለሰቦች ላይ የቅዱስ ሲኖዶስ ምልዓተ ጉባኤ ጥር 18 ቀን 2015ዓ.ም. ቃለ ውግዘት ማስተላለፉ ይታወቃል። ይሁን እንጂ እነዚህ ሕገወጥ ቡድኖች ከድርጊታቸው ሊታቀቡ ካለመቻላቸውም በላይ በመንግሥት ኃይሎች በመታገዝ የኢትዮጵያ ኦርቶዶክስ ተዋሕዶ ቤተ ክርስቲያን የምታስተዳድራቸውን መንበረ ጵጵስናዎችንና ቢሮዎችን በኃይል በመውረርና በመስበር ከፍተኛ ጥፋት እያደረጉ ከመሆኑም በላይ የአህጉረ ስብከት ሥራ አስኪያጆችን ሠራተኞች ካህናትና ምእመናን በማሰርና በማንገላታት ላይ ይገኛል፡፡ መንግሥትም ሕግ ከማስከበር ይልቅ ለሕገ ወጥ ቡድኖች ድጋፍ በመስጠት የቤተ ክርስቲያኒቱን ሕግና መብት ሊያስከብር ስላልቻለ ሁሉን ማድረግ ወደሚቻለው አምላካችን በመማፀን ጸሎትና ምሕላ ማድረጉ አስፈላጊ መሆኑን ቅዱስ ሲኖዶስ ተረድቷል። በመሆነም ጾመ ነነዌን ምክንያት በማድረግ በመላው ዓለም የሚገኙ ሕዝበ ክርስቲያን ጥቁር ልብስ ብቻ በመልበስ በጾምና በጸሎት ምሕላ በመያዝ በቤተ ክርስቲያን ዓውደ ምሕረት በመገኘት ወደ እግዚአብሔር ጾም፤ ጸሎትና ምሕላ እንድታቀርቡ ቅዱስ ሲኖዶስ ጥሪውን ያስተላልፋል፡፡ ጥቁር ልብስ የምንለብሰው በመከራ መጽናት ለመግለጽ ነው፡፡ እንደሚታወቀው ጥቁር የእውቀት ምልክት ነው ተማሪዎች አውቀናል ሲሉ ጥቁር ልብስ ይለብሳሉ፡፡ እኛ ከእውቀት በላይ የሆነውን አምላካችንን በመማፀን ከዚህም ማንም ሊያናውጽን እንደማይችል የምናረጋግጥበት፤ ጥቁር የእውነት ምልከት ነው ዳኞች እውነት እንፈርዳለን ሲሉ ጥቁር ልብስ ይለብሳሉ፡፡ እኛም መከራው የሚያሰቅቀን ሳይሆን ይበልጥ ልንጸናና ልንበረታ የሚገባ መሆኑን ለዓለም ሕዝብ የምናሳይበት በመሆኑ ከጥር 29 እስከ የካቲት 1 ቀን 2015 ዓ.ም ለሦስት ቀናት በጾምና በጸሎት በአንድ ልብ ሆነን ወደ ፈጣሪያችንን እንድንጮህ አደራ እንላለን፡፡ ወስብሐት ለእግዚአብሔር ጥር 26 ቀን 2015ዓ.ም. አዲስ አበባ

ልዩ መረጃ! በሻሸመኔ ከተማ የሚገኘው የምዕራብ አርሲ ሀገረ ስብከት ጽሕፈት ቤት በመንግሥት የጸጥታ አካላት መታሸጉ ተገለጸ። በትናንትናው ዕለት የሀገረ ስብከቱ ዋና ፀሐፊና የሕዝብ ግንኙነት ኃላፊው በድጋሚ መታሰራቸውን መግለጻችን የሚታወስ ሲሆን ሌሎች የሀገረ ስብከት ሰራተኞችም እየተሳደዱ እንደሆነ ተገልጿል። ለዚህ ምክንያቱ ደግሞ ሕገ ወጡን ቡድን ተቀበሉ የሚል እንደሆነ ተ.ሚ.ማ ያገኘው መረጃ ያመለክታል።

መንግሥት ራሱን ጨምሮ ሌሎች የአደጋ ስጋት ምንጮችን ገምግሞ አፋጣኝ እርምጃ እንዲወስድ እናሳስባለን። በወቅታዊ የቤተክርስቲያን ጉዳይ ከኢትዮጵያ ዜጎች ለማኀበራዊ ፍትህ (ኢዜማ) የተሰጠ መግለጫ የኢትዮጵያ ዜጎች ለማኅበራዊ ፍትህ (ኢዜማ) ከሰሞኑ በኢትዮጵያ ኦርቶዶክስ ተዋሕዶ ቤተክርስቲያን የተፈጠረውን ችግር በአንክሮ ሲከታተል ቆይቷል። ፓርቲያችን በሀገራችን የሚገኙ የዕምነት ተቋማት የማኅበረሰቡን እሴት በመገንባት የሚውስዱት ሚና ከፍተኛ እንደሆነ ያምናል፤ የኢትዮጵያ ኦርቶዶክስ ተዋሕዶ ቤተክርስቲያንም በዚህ ረገድ ተጠቃሽ ነች። ሀገራችን ኢትዮጵያ አሁን ላይ እየተዳደረችበት ባለው ሕገ መንግሥት አንቀፅ 11 ላይ በግልጽ እንደሰፈረው መንግሥትና ሃይማኖት የተለያዩ ናቸው። መንግሥት በሃይማኖት ጉዳይ ጣልቃ አይገባም፣ ሃይማኖትም በመንግሥት ጉዳይ ጣልቃ አይገባም ብሎ ከደነገገው በተቃራኒ የፀጥታ ኃይሎች እየወሰዱት ያለው እርምጃ አሳስቦናል፡፡ በመሆኑም መንግሥት ከሰሞኑ በኢትዮጵያ ኦርቶዶክስ ተዋሕዶ ቤተክርስቲያን የውስጥ ጉዳይ ላይ ከተለያዩ አቅጣጫዎች እየተስተዋሉ ያሉ ጣልቃ ገብነቶች መዘዛቸው ከባድ መሆኑን ተረድቶ በአስቸኳይ ሕግ እና ሥርዓትን አክብሮ እንዲያስከብር እንጠይቃለን። የተለያዩ የፖለቲካ ዓላማ ያነገቡ ግለሰቦችም ሆኑ ሌሎች ቡድኖች በተፈጠረው ችግር ውስጥ የሚያደርጉት ተሳትፎ ችግሩን አባብሰው ደም አፋሳሽ ግጭት ሊያስከትሉ የሚችሉ አዝማሚያዎች እየተስተዋሉ በመሆኑ፤ መንግሥት ራሱን ጨምሮ ሌሎች የአደጋ ስጋት ምንጮችን ገምግሞ አፋጣኝ እርምጃ እንዲወስድ እናሳስባለን። የሃይማኖት ተቋማት ላይ በማናቸውም ወገን የሚደረግ ጣልቃ ገብነት መዘዙ ብዙ ስለሆነ፤ የሚመለከታቸው ባለድርሻ አካላት ሁሉ ከፍተኛ ጥንቃቄ እንዲያደርጉ እናሳስባለን። ፓርቲያችን በተደጋጋሚ እንደሚገልጸው ፖለቲካ በዘር፣ በሃይማኖት፣ እና ሌሎች ልዩነቶች ላይ ሳይሆን ሕዝቡን በእኩልነት በሚያስተሳስረው ዜግነት ላይ ሊሆን እንደሚገባ አሁንም በጽኑ ለመግለጽ ይወዳል፡፡

በኢትዮጵያ ኦርቶዶክስ ተዋሕዶ ቤተ ክርስቲያን የተፈጠረው ድርጊት እንዳስጨነቃቸውና በቤተ ክርስቲያኗ የውስጥ ሕግ ብቻ መፈታት እንዳለበት እንደሚያምኑ በኢትዮጵያ የሩሲያ አምባሳደር ኢቭጌኒ ተርኪሂን ገለጹ:: ከማኅበረ ቅዱሳን ቴሌቪዥን ጋር ቆይታ ያደረጉት አምባሳደሩ ሩሲያ እና ኢትዮጵያ የረጅም ዓመታት ግንኙነት እንዳላቸውና ለዚህም ጥንካሬ መንፈሳዊ ትስስሩ ከፍተኛ ሚና እንዳለው ተናግረዋል። የኢትዮጵያ ኦርቶዶክስ ተዋሕዶ ቤተ ክርስቲያን ለኢትዮጵያ ሕዝብ ታሪክ ባህል እምብርት ናት በማለት የሀገሪቱን ታሪክ ሳይቀር የሰነደች መሆኗንም ጠቅሰዋል። ከአየር ንብረት ለውጥ ጋር ተያይዞ በአሁኑ ሰዓት የሀገሪቱ ጠቅላይ ሚኒስትር ሳይቀር እውቅና ያገኙበት እንቅስቃሴ ቢኖርም በኢትዮጵያ ታሪክ ግን በቤተ ክርስቲያኗ ለዘመናት የተሠራው የአካባቢ ጥበቃ ሥራ ቤተ ክርስቲያኗን "የአረንጓዴ አሸራ እምብርት" ያደርጋታል ብለዋል። አምባሳደር ኢቭጌኒ ተርኪሂን አክለውም በአሁኑ ሰዓትያለችበት ሁኔታ እንዳሳዘናቸውና እንደኦርቶዶክስ ሃይማኖት ተከታይነታቸውም እንዳስጨንቃቸው ገልጸዋል። ከዚህ በፊት የኢትዮጵያ ኦርቶዶክስ ተዋሕዶ ቤተ ክርስቲያን አስቸጋሪ ጊዜ ላይ በሆነችበት ሰዓት የሩሲያ ኦርቶዶክስ ቤተ ክርስቲያን በቅዱስ ፓትርያርኳ በኩል ሀዘናቸውን በመግለጽ አጋርነታቸውን ማሳየታቸውን አስታውሰዋል። በሁለቱ አብያተ ክርስቲያናት ታሪክ በርካታ የፈተና ጊዜያት አልፈዋል ያሉት አምባሳደር ኢቭጌኒ ተርኪሂን የኢትዮጵያ ኦርቶዶክስ ተዋሕዶ ቤተ ክርስቲያንም ይህንን ከባድ ጊዜ እንደምታልፈው እምነታቸው መሆኑን ተናግረዋል። አምባሳደሩ በቆይታቸውም ጥያቄ ያነሳው አካልም "አጥቂ" እርምጃ ከመውሰድና ከመገንጠል ይልቅ ቅሬታውን በቀጥታ ለአባቶችና ምእመናን ማሳወቅና በቤተ ክርስቲያኗ ሕግ መሄድ ይገባው ነበር ብለዋል። በቀጣይም በራሷ በቤተ ክርስቲያኗ ሕግ መሰረት በውይይት እንዲፈታ ፍላጎታቸው መሆኑን ገልጸዋል። ይቺን ቤተ ክርስቲያን ማፍረስ ማለት ሀገር ማፍረስ በመሆኑ መጠንቀቅ ያስፈልጋል ሲሉ አጽንዖት የሰጡት አምባሳደሩ ሁለቱ አብያተ ክርስቲያናትም እንደቀደመው ጊዜ በመተባበር እንደሚቀጥሉም አሳውቀዋል። የኢትዮጵያ ኦርቶዶክስ ተዋሕዶ ቤተ ክርስቲያን አባቶችና ምእመናንንም አንድነታቸውን እንዲያስጠብቁና ይህ ባይሆን በቀጣይ ትውልድ ሁሉ የሚያስጠይቅ ይሆናል "በዚሁ ሂደትም ከጎናችሁ እንደምንቆም ላረጋግጥላችሁ እወዳለሁ" በማለት መልእክት አስተላልፈዋል። ሙሉ ቃለ መጠይቁን ዛሬ ምሽት 2:00 ሰዓት በማኅበረ ቅዱሳን ቴሌቪዥን እና የዩቱዩብ ቻናል ይጠብቁን፡፡