Pop tuman 7-sonli BMSM

Safar doirasida Londondagi nufuzli Royal College of Music (RCM) rahbari Kevin Porter bilan uchrashdik. Muloqotda O‘zbekistonning Buyuk Britaniyadagi Favqulodda va muxtor elchisi Ravshan Usmonov ham ishtirok etdi. Uchrashuv davomida oliy musiqa ta’limini zamonaviy talablar asosida modernizatsiya qilish, yosh iste’dodlarni qo‘llab-quvvatlash, shuningdek, milliy va jahon mumtoz musiqasi uyg‘unligini xalqaro miqyosda targ‘ib etish masalalarini muhokama qildik. Muzokaralar yakunida O‘zbekiston va RCM o‘rtasida bir qator ustuvor yo‘nalishlarda hamkorlikni yo‘lga qo‘yish bo‘yicha muhim kelishuvlarga erishdik. Xususan, O‘zbekiston Davlat konservatoriyasi va RCM o‘rtasida to‘g‘ridan-to‘g‘ri anglashuv memorandumini imzolash, talabalar hamda professor-o‘qituvchilar almashinuvini yo‘lga qo‘yishni rejalashtirmoqdamiz. Shuningdek, RCM professorlarini O‘zbekistondagi konservatoriya va ixtisoslashtirilgan musiqa maktab-internatlariga mahorat darslari o‘tkazish uchun jalb etish, o‘zbekistonlik yosh pedagoglarning Londonda malaka oshirishi va amaliyot o‘tashi uchun imkoniyatlar yaratish bo‘yicha kelishib oldik. Iqtidorli yosh musiqachilarni qo‘llab-quvvatlash maqsadida O‘zbekistonning eng salohiyatli yosh ijrochilarini "El-yurt umidi" jamg‘armasi hamda maxsus grantlar asosida RCMning bakalavriat va magistratura dasturlarida tahsil olish imkoniyatlarini yaratish bo‘yicha hamkorlik qilishga kelishdik. Ijodiy yo‘nalishda esa RCM orkestri va bastakorlari bilan hamkorlikda o‘zbek milliy cholg‘ulari va maqom san’ati asosida simfonik asarlar yaratish, shuningdek, Londonning nufuzli sahnalarida qo‘shma konsertlar tashkil etishni rejalashtirdik. Ishonchim komilki, mazkur kelishuvlar O‘zbekistonda musiqa ta’limi tizimiga ilg‘or xalqaro tajriba va standartlarni joriy etish, yosh musiqachilarimizning kasbiy salohiyatini oshirish hamda milliy musiqa san’atimizni xalqaro maydonda keng targ‘ib qilishda muhim amaliy qadam bo‘ladi.