3 107
订阅者
-124 小时
-17 天
+1830 天
帖子存档
3 106
سون اولاراق بوتون او تایلی-بو تایلی آذربایجان ضیالی و یازیچیلاریمیزا بئله بیر تکلیفله مراجعت ائدیرم. بو خوشاگلمز حادثهلره سون قویماق اوچون بیر سسهله آذربایجان یازیچیلار بیرلییینین تدبیر گؤرمهسینی قاشیمیزا مقصد قویوب، طلب ائتمهلیگیک.
https://t.me/Adabiyyatsevanlar
3 106
یداله کنعانی
«سایمان آروز» حاقیندا ملاحظهلریم
بو یاخینلاردا سوسیال شبکهلرده سایمان آروز (سامان حسنزاده) modern.az مئدیاسیندا آزادلیق رادیوسونون موکافاتینا لاییق گؤرولموش دهیرلی یازیچیمیز روقیه کبیری حاقیندا ایشلهتدیگی خوشاگلمز ایفادهلر دولاشماقدادیر. بو حاقدا آذربایجان(ایران) یازیچیلاری و ضیالیلاری حاقلی اولاراق سایمان آروزون بو منفی حرکتینی تنقید ائدیب و قیناماقدادیرلار.
من ده بو بارهده قیسا شکیلده اؤز مؤقعیمی بیلدیرمک ایستهییرم. سایمان بئئِیین بو حرکتینی قیناییر و اونون حاقیندا آشاغیدا اؤز ملاحظهمی بیلدیرمک ایستهییرم.
سایمان بئیی 2004-جو ایلدن تانیییرام. اونو ایلک دفعه ایرانلی مهاجیرلر جمعیتی(آدف) قرارگاهیندا – امیرعلی لاهرودی معلمین اوتاغیندا گؤرموشم. اونونلا صحبت اسناسیندا معلوم اولدو کی، فیرقه مهاجیرلری حاقیندا بیر سندلی فیلم حاضرلاماق ایستهییر، اونا گؤره ده بیزدن مهاجیرلر حاقیندا معلومات وئرمهییمیزی خواهیش ائتدی. طبیعی کی، آدف رهبرلیگی بونا راضی اولا بیلمزدی. چونکی بو موضوعلا علاقهدار بیر نئچه نفر ده بیزه مراجعت ائتمیشدی. او گوندن اعتباراً داها اونو گؤره بیلمهدیم. تبریزه دؤندوگونو ائشیتدیم. ایکینجی دفعه ایسه 2007-جی ایلده غلامرضا صبری تبریزینین اوفیسیندا گؤردوم.
سامان آروزون آذربایجان یازیچیلار بیرلیگینین جنوبی آذربایجان شعبهسینین صدیرلیگینه تحکیم اولونماسینین پرده آرخاسی:
آذربایجان یازیچیلار بیرلییینین جنوبی آذربایجان شعبهسینین ایداره هئیتی خالق شاعری بالاش آذراوغلونون باشچیلیغی آلتیندا هر آیین سونوندا ایجلاس کئچیرهرک جنوبدا گئدن ادبی پروسئس بارهده فیکیر مبادیلهسی آپاریلیرلاراق اونون آنالیزی مقاله شکلینده “ادبیات” قزئتینده صابیر نبیاوغلو آدیلا چاپ اولونوردو. بو هئیتده بالاش آذراوغلو، صابیر نبیاوغلو، شاعر فیکرت صادیق، شاعر عباس عبدالله، دؤکتور پروانه ممّدلی و من ایشتیراک ائدیردیم. او واخت سایمان بئیدن اثر-علامت یوخ ایدی. او، حتی آذربایجان یازیچیلار بیرلییینین عضوو ده دئییلدی.
بالاش معلمین خستهلیگی ایله علاقهدار آرتیق ایجلاسلاریمیز آردیجیل تشکیل اولونموردو. آرابیر صابیر معلمین رهبرلیگی ایله ایجلاسیمیز تشکیل اولوردو.
گونلرین بیر گونو بئله بیر خبر یاییلدی کی، سایمان آروز آذربایجان یازیچیلار بیرلییینین جنوب شعبهسینین رهبرلیگینه گتیریلیب.
بو مسئله هئیتده مذاکیره اولوندو و بئله بیر قرار وئریلدی کی، آذربایجان یازیچیلار بیرلییینین رهبرلیگینه اعتراض مکتوبو یازیلیسین. بو وظیفه منه تاپشیریلدی. مکتوب حاضرلاندی و اکثر جنوب یازیچیلاری اونو ایمضالایاراق منیم واسطهمله آذربایجان یازیچیلار بیرلییی رهبرلییینه تقدیم اولوندو. اما آذربایجان یازیچیلار بیرلییینین رهبرلیگی طرفیندن او مکتوبا مثبت جاواب آلا بیلمهدیک.
آذربایجان یازیچیلار بیرلییینین جنوبی آذربایجان شعبهسینین صدر معاوینی اولموش، اونلارلا کیتاب، یوزلرله ادبی مقالهلرین مؤلفی گؤرکملی ادیب صابیر نبیاوغلونون یئرینه بو مهم وظیفهیه هئچ بیر صلاحیتی اولمایان بو شخصین تییناتی چوخ آغری وئریجی ایدی.
سایمان آروزون بو مهم شعبهیه گتیریلمهسی و اؤزو ده اونون هئچ بیر یازیچیلیق ایستاژی اولماماسی بیزه نهیی گؤستریر؟ آذربایجان یازیچیلار بیرلییینین رهبرلیگینین مسئولیتسیزلیگی سببیندن بئله بیر بیآبیرچی دوروم یارانمیمشدیر. بو گون سایمان بئی جنوبدا گئدن ادبی پروسئسلری اونوداراق اؤز شخصی آمبیسیالاری آردینا حرکت ائتمکدهدیر. بئله بیر مهم قورومدا جنوب ادبیاتینی سایمان کیمیلره تاپشیرماق او تشکیلاتدا دورومون نه قدر آجیناجاقلی اولدوغوندان خبر وئریر.
تأسفله بو گون سایمان آروزون باشچیلیغیلا ایداره اولونان جنوبی آذربایجان شعبهسی ادبیاتلا دئییل، سیاستله مشغولدور. سایمان آروزدان اؤنجهکی دؤوره نظر یئتیردیکده، گؤرولن ایشلر بوتونلوکله ادبیاتا حصر اولونموشدور. لاکین بو جنابین رهبرلیگی دؤور دئمک اولار ادبیات اونودولموشدور. اونا گؤره ده گونئی یازیچیلاری بو داورانیشلاردان اینجییهرک مختلیف واسطهلرله اؤز اعتراضلارینی بیان ائتمکدهدیرلر.
دهیرلی حکایه و رومانلاری ایله تانینیب، مکافاتلاندیریلان حؤرمتلی روقییه خانیم کبیری بو گون آذربایجان یازیچیلار بیرلییینین جنوبی آذربایجان شعبهسی”نین رهبری طرفیندن اتهام ائدیلمهسی نه قدر کومیک و عینی حالدا تراژیک دورومون گؤستریجیسیدیر. سایمان آروزون دهیرلی یازیچیمیز بارهده بئله بیر خوشاگلمز و آبسورد حرکتی بوتون قلم صاحبلری طرفیندن قینانیلمالی و بو منفور داورانیشلارین قارشیسی آلینمالیدیر. البته بو خوشاگلمز دورومون یارانماسیندا تکجه سایمان بئییی دئییل، اونو بو وظیفهیه تعیین ائدن قوروم دا قینانیلمالیدیر.
3 106
✅ «فیروز رفاهی»-نین اثرلرینه باخیش
دگرلی آراشدیرماجی و لوغتشناس، دکتر فیروز رفاهینین اثرلری، امید فرهنگ ساراییندا گؤزدهن کئچیریلهجک.
دکتر رفاهی نین آراشدیرمالاری اساسا یئر آدلاری بارهسینده اولموشدور.
او "ایران توپونیملری" آدیندا دکتری تئزی یازمیشدیر. بو بارهده "مبانی توپونیمی و نگاهی به توپونیمهای ایران"، "هیدرونیمهای ایران" و "اورونیمهای ایران" کیتابلارینی نشر ائتمیشدیر.
بو مراسیمده اورونیمهای ایران (پژوهشی در نامهای پستی و بلندیهای ایران) آدلی کیتاب تانیتدیرلاجاق و یئر آدلاری بارهسینده، چئشیتلی سؤز–صحبتلر اولاجاق.
بو مراسیمده، «دوزگون درنگی»، «قلم صدیق» یایین ائوی و «نامه صدیق» درگیسی اشتراک ائتمیشلر.
مراسیمده دکتر فرخ توکلی، دکتر برقی، دکتر عمار احمدی، اکبر صالحی، علی اصغر جمراسی، ائلدار موغانلی، سعید موغانلی و بهبود مرادی کیمی دگرلری آراشدیرماجیلاریمیز چیخیش ائدهجکلر.
مراسیم ده اشتراک ائتمک هامی اوچون پولسوز و آچیق دیر.
مراسیم چهارشنبه، آذر آیی نین بئشی (5 آذر 1404) آخشام ساعات 16-دان، تهران امید فرهنگ ساراییندا(شهدا میدانی، ۱۷ شهریور، خشکبارچی خیاوانی) برپا اولاجاق.
3 106
علی رشتبر قاییب
بلکه بیر گون شعیرلریم دانیشدی ،
بیلدی منیم سیرریمی ده بو دونیا .
اورگیمین هاراسیندا ، نه سایاق
سنین یئرین بللی اولدو هامییا.
بلکه دیلیم چاتدیرماغین بیلمهین_
سؤزلری ده افشا ائتدی شعیریم.
بلکه بیر گون قاناد آچدی سن گئدن_
ایزلره ده چیخیب گئتدی شعیریم.
یقین اوندا بیلهجکسن روحومون_
سنی نئجه سئودیگینی دریندن.
نه یازیق کی قان تؤکهجک گؤزلرین !
چیخاجاقسان منیم کیمی دریندن.
قاپینا دک مسافه لر یول گلدیم ،
یاد ائتمگه سن تک عزیز کسیمی.
پامبیق تپدین قولاغینا قلبینین،
ائشیتمهسین اورگیمین سسینی.
بلکه بیر گون شعیرلریم دانیشدی ،
دئدی سندن اؤترو نئجه داریخدیم!
دئدی نئچه دؤنه سهوه یول وئردیم،
نئچه دؤنه یولدان آزدیم، کاریخدیم...
خاطیرلر هر طرفدن تؤکولدو،
هجوم چکدی اوزهریمه قوشون تک.
بیرجه ایلده اون بئش ایلی یاشادیم،
ساققالیما دن ده دوشدو دیشین تک.
نه توکندی گئجهلر کی قورتولوم،
نه ده دوغدو سن عطیرلی بیر صاباح.
بیر من بیلدیم نلر چکدیم ، بیر ده کی_
سن سئودیگین اوجا الله ،دوز الله.
گاه رامیزه گاه موشفیقه سیغیندیم،
بلکه مرهم تاپام سنین یئرینه.
گؤردوم کی سن باشقا اوجاق پاییسان،
بنزهمیرسن هئچ بیرینین پیرینه.
آلت اوست ائتدیم فضولینین عشقینی،
مجنون ایله گزدیم گؤزل لئیلینی.
لئیلییه ده گئدیب چاتدیم، آنجاق کی_
سنده گؤردوم اورگیمین مئیلینی.
بیر گون یقین دانیشاجاق شعیریم،
دئیهجک کی، تک سن دولو سؤزم من.
نه اولسون کی آیلار کئچیر او گوندن،
هله ده وار یوللارینا گؤزم من.
https://t.me/Adabiyyatsevanlar
3 106
کوچورن: م. صفا
عاشیق دهقان[1]
غلام اوغلو، عاشیق محمد حسین دهقان ۱۹۳۴-جو ایل، اورمیه ده آنادان اولموشدور.
عاشیق دهقان اورمیه عاشیق محیطینین نادیر ایستعدادا مالیک اولان اوستاد نمایندهسیدیر. او کیچیک یاشلاریندان عاشیق صنعتینه ماراق گؤسترمیشدیر و یئنییئتمهلیک ایللریندن اورمیه لی عاشیق فرهادین طلبهسی اولوب. صنعتین سیرلرینی، کلاسسیکلرین یارادیجیلیغینی، داستانلاری اوندان اؤیرهنمیشدیر. صنعتکار کیمی فورمالاشدیقدان سونرا مستقیل شکیلده عاشیقلیغا باشلامیشدیر. اورمیه عاشیق جمعیتینین اینکیشافیندا اونون خیدمتلری بؤیوکدور. دهقان اؤزونهمخصوصس ایفاچیلیق مکتبی یاراتمیش عاشیقلارداندیر. اورمیه عاشیق ایفاچیلیغندا اونون موسیقی اوسلوبو موهوم یئر توتور. او زیل شاقاراق و چوخ پلانلی ایفا ایمکانینا مالیکدیر و کلاسسیک ساز مئلودییالارینین ماهیر ایفاچیسی حساب اولونور. عاشیق دهقان چوخلو طلبهلر یئتیشدیرمیش و زنگین رئپئرتوارا مالیکدیر. هشتادا یاخین ساز هاواسی و ۴۰-دان چوخ داستان بیلیر. خسته قاسیملا باغلی داستانلاری و اونون پوئتیک ارثینی دریندن بیلیر. او همده، اؤزونه مخصوص چالقی طرزی ایله سئچیلیر. باکیدا چوخساییلی عاشیق کانسئرتلرینده ایشتیراک ائدیب. یونسکو۲۰۱۰ -جو ایلده اونو اوستاد صنعتکارکیمی آدلاندیراراق، آیریجا آلبومونو نشر ائتدیرمیشدیر.
عاشیق دهقان۱۹۷۴ -جو ایلده تبریزه کؤچوب، عاشیق صنعتینین سیرلرینی اوستاد عاشیق حسن قفّاریدن اؤیرهنیب. ۱۹۸۰-جی ایلدن مستقیل عاشیق ایفاچیلیغی ایله مشغول اولماغا باشلاییب. او، داستانچی عاشیقلارداندیر. اونون رئپئرتواریندا "قوربانی"، "عباس و گول-گز"، "آصلی و کرم"، "کؤراوغلو"، "شاه اسمایل"، "نوروز و قنداب"، "قاچاق نبی"، "خانچوبان" داستانلاری وار. "قارا کَهَری"، "ممدباغیری"، "سلطانی"، "دول هیجران"، "بهمنی"، "کؤراوغلو قایتارماسی" کیمی قدیم ساز هاولارینی دا، اوستالیقلا ایفا ائدیر.
..........................
1- اوزان- عاشیق-باخشسی انسیکلوپئدیاسی (5-جیلدلیک کتاب)، آزربایجان جمهوریتیی، باکی، 2025 -جی ایل
https://t.me/Adabiyyatsevanlar
3 106
📣: حؤرمتلی دکلاماتورلار، گویندهلر، دوبلورلار، سس آکتیورلاری
استودیویا گئتمهیه فرصتیز یا امکانیز یوخدورسا، سادهجه سس یازینیزی بیزه گؤندرین.
بیز سیزین سسلرینیزی یوخلاییب لازیم اولان ایشلری و قیمتی تعیین ائتدیکدن سونرا، میکس ائدیب سیزه تحویل وئرهجهییک.
گؤرولهجک ایشلر:
۱. سسین عمومی حجمینی گوجنلدیرمک.
۲.ضعیف حیصهلرین سس حجمینی آرتیرماق.
۳. سس-کویو (نویزو) و اضافه نفس سسلرینی تمیزلهمک.
۴. ایشین اوزهرینه اکو و ریوئرب علاوه ائتمک( بو ایشه تمایوللو اولانلار اوچون)
۵. خصوصی حیصهلره اکو و ریوئرب قویماق.
۶. سؤز سهولری و یئرسیز سسلری( تپقلاری) چیخارماق.
۷. ساده میکس (تکجه سیزین گؤندردیینیز سسین آلتیندا اؤز سئچمیمیزله موسیقی اولاجاق ) — موسیقی آشاغی و ثابت سوییهده اولاجاق.
۸. گئنیش میکس (سیزین گؤندردیینیز موسیقی ایله) — موسیقی دانیشیق آلتیندا آشاغی، دیگر حیصهلرده یوکسک اولاجاق
گئنیش میکس (بیزیم سئچدییمیز موسیقی ایله) موسیقی دانیشیق آلتیندا آشاغی، دیگر حیصهلرده یوکسک اولاجاق.
تعیین اولان یئرلرده( مثلا بعضی پاراگرافلارین آراسیندا دا قیساجا موسیقی گئدهجک.)
مصلحت آلماق و یا سس گؤندرمک اوچون علاقه یولو:
@bayarmix
چیلله گئجهسی مناسبتی ایله یازیلان سسلرین ادیتی اوچون ائندیریم نظره آلینیب.( آذرین ۱۵-ینه قدر سسلرینیزی گؤندرمک شرطی ایله)
@bayarses
https://t.me/Adabiyyatsevanlar
3 106
✍️ :ائلمان_موغانلی
پوست_مودئرن
اَللریمیز بیر-بیرینه توخوندوقدا
سؤزلر قاریشیر
سانکی اردبیلین گون باتانی
شعر ده قاچیر
شورابیل قیراغی.
ایپک ساچلارین
باغلی بیر سورغو
چؤزمهیه چالیشدیغیم هر کره
هر یئر یانیت
آنجاق بیر یانیت دا یوخ.
سانکی شَهَر اورتاسی
شانلی بالیقلی چای
بالیق توتماق دوشوندوگونده
چایی آختاریرسان
آختاریرسان
و تاپمیرسان.
شعر
ایشیقلانیر بیر آنلیق
سونرا چیغیریر:
من
باشلانمامیشام.
