ادبیات سئونلر

مهندس «علیرضا صرافی» ادبیات سئونلر گوزگوسونده  زمان: سه شنبه: 1402/9/14 ساعات: 10 طراح: «تانیش» چکیلیش: «مرجان منافزاده»2 آپاریجی: «کریم قربانزاده» https://t.me/Adabiyyatsevanlar

گیلگمیش داستان‌لاری ادبیات سئونلر کانالیندا آلتینجی بؤلوم زمان: دوشنبه  1402/9/13 ساعات: 21 ناغیلی حاضیرلاییب سویله‌ین: «ریضوان حاجی قاسیملی» جانای طراح:« تانیش» https://t.me/Adabiyyatsevanlar

✍🏻:«لیلی خیاوی» زیل قارا یوخلوغو الینه آلیب ایریلی_خیردالی ناخیشلار وورور تانریمیز، توکنمز سلقه_سهمانلا بزکلی_دوزکلی بیر عالم قورور سونسوز اولدوزلاری، گزه گن لری سپیر سود یولونون دولایلارینا چکدیکجه کایینات رسیم لرینی باخیر سیرالانمیش اوزایلارینا یئکه دن خیردایا بو گزه گن لر گونشین باشینا هالای وورورلار تانری یاراتدیغی گؤی جیسیم لری یوخلوغون باغرینی بئله یاریرلار باشقا عالم لرین تانریلاریلا بیزیم ده تانریمیز گیریب یاریشا سرگی لر سریب دی ال ایشلریندن ان گؤزل دونیالار، هؤروب اوزایا بوتون یاراتدیغی دونیالار ایچره لاپ خاصا یارادیر یئر کوره سینی گؤزونو زیلله ییب جانلی حیاتا هوسله یارادیر هر ذرّه سینی اینسانی، حئیوانی، یاشیل بیتگینی هاوانی، سولاری،هر جور نعمتی یئر اوزره یارادیر اولو تانریمیز سونور دونیامیزا بوللو ثروتی یئرین یاراتماسی چتین ایش ایمیش گوجونو، واختینی آلیر الیندن آغیر یارانیشدان سینیخسا دا او یئنه ده دونیامیز دوشمور دیلیندن تانری کؤرپه یئری باسیر باغرینا آییرمیر اؤزوندن، ازدیریر اونو هله کئفه باخیر یئر گزه گنی بیلمیر نه اولاجاق عؤمرونون سونو نئچه میلیارد ایلی سوووب، ایندیسه_ یامان قوجالیب دی، الدن دوشوب دی ان آغیر اولای لار باشینا گلیب سیناقدان کئچیب دی،آرتیق بیشیب دی تانری نین دؤشوندن آیریلان گوندن هر یانی آغری ییر، درددن مله ییر تامارزی قالیب دی آللاها، دونیا گوونلی کؤکسونو هر آن اؤزله ییر تانری بیلمیر یئری هارا قویوبدو دای اودا قوجالیب، اونوتقان اولوب آللاهین الیندن دوشوب ایتندن چوخدان دی دونیامیز آللاه سیز قالیب https://t.me/Adabiyyatsevanlar

«نادر پاشا» پاییز پاییز باغچامیزدا بارداشین قوردو سارینی، یاشیلا جالاییر ایندی گؤزل گلین کیمی مین بیر  ناز ایله باهارین سارایین تالاییر ایندی گؤزلدی، اؤزو ده، سئحرکار گؤزل یازیب-یاراتدیغی باییلدان غزل اۇزمان بیر رسامدی، دۆنیاسی اؤزل دوغانی مین رنگله بویاییر ایندی آخشامدی، ساری قیز باتی دا ایتمیش بو یولجو سونونجو دوراغا یئتمیش ظالیم له ایشیمیز شاه ماتدان اؤتموش دردی، درد اۆستونه قالاییر ایندی بیرده کیم باهاری گؤره، گؤرمه یه! آرزینین سوْن گۆلون، دره، درمه یه نادر ساچلارینی بیرده هؤرمه یه خیال ایپه گینی دولاییر ایندی تبریز.۱۴۰۱. پاییز.

مهندس «میرعلی سید سلامتین» خاطیره گئجه‌سی تبریزده  قید اولدو. اؤزل گزاریش مهندس «میرعلی سید سلامتین» ایل دؤنوموندن ادبیات سئونلر «مرجان منافزاده» پنجشنبه آبان آیی‌نین 25 آخشام ساعات 17/30_16 تبریزین ساوالان تالاریندا آدی قالارقی اسطوره شناس، ادبیات شناس مهندس «میرعلی سیدسلامتین»  ایل دؤنومو موناسیبتیله عزیزلمه تؤره‌نی کئچیریلدی. بو تؤره‌نده سید سلامت عاییله‌سی اوزاقدان- یاخیندان گلن دوسلاری وسید سلامتی سئونلر گئنیش بیچیمده ایشتیراک ائتمیشدیلر. برنامه‌نین آپاریجیسی «کریم بی رستمی» وئرلیشی سید سلامتین نئچه بایاتی‌سی‌نی اوخوماقلا باشلاییب اوستاد سید سلامتین خاطیره‌سین عزیزله‌دیکدن سونرا دوکتور «رحیم رئیس‌نیانی»  وئرلیشی رسمی اولاراق آچماق اوچون تریبونا دعوت ائتدیلر، دوکتور رئیس‌نیا سیدسلامتین چالیشقانلیغی، یورولمامازلیغی و ادبی، اجتماعی میراث‌لاریندان دانیشیب، سؤزلرینی عزیز نسینین وصیت نامه‌سی ساییلابیله‌جک شعریله دوام وئردی. بیر آدام واریدی هئچ دینجلمه‌دی یاشامیندا چالیشماقدان، چالیشماقدان، چالیشماقدان دینجلمه‌یه زامان تاپانمازدی ایشینی کیمسه‌یه بوراخمازدی ائله کی اؤز باش داشیسینی بئله اؤزو یازدی            اوزانیب بورادا بویلو بویونا یورقون باشینی توپراغا قویونجا بیر داها اویانماماق اوچون یوخلایینجا ایلک و سون دفعه دینجلدی بوتونویله آمما دینجلمه‌سینی داها آنلایامادی. رئیس‌نیا سؤزلری‌نین آردینجا آرتیردی:  صمدین جنازه‌سینده ۱۳۴۷ شهریورینده آرازدان توتوپ گتیریب توپراغا تاپیشیراندان سونرا، آتاسی عزت عمی چوخ متانت ایله گورونون باشیندا دایانیب اونا خطاب دئدی: «یات، دویونجا دینجل هئچ دینجلمک بیلمه‌ین اوغلوم!»   دئییب، سونرادا آغیر آددیملارلا یولا دوشدو. بیزده اونون دالینجا. او حالدا صمدین بو سؤزو قولاغیمدا سسله‌نیردی: صمد هرگئجه بیر ایللیک یول گئدیری! بو سؤزو بیر نانجیبین اونو یازدیغی اوشاق داستان‌لارینی باشقالاریندان اوغورلاماقلا سوچلامیشدی. صمد دئییردی: اوغورلوق چوخ اولسا بیر-ایکی دفعه اولار، بیر حالداکی منیم کتاب‌لاریم دالبادال چاپ اولوب چیخماقدادیرلا. نسینین بو سؤزو اؤز یاشام حکایه‌سی‌نین باشیندا اوتوروب: یوخسول‌لارین ان دگرلی سیلاح‌لاری چالیشمالاریدیر!!! دگر یارادان یالنیز ویالنیز چالیشماقدی، چالیشماقدادیر، نه بوش بوغازلیقدا! «سید سلامت ده» باشاردیغی قدر چالیشدی، آرتیق یاشاساایدی بلکه داها اوستونلوک‌لره یوکسه لیب، یئنی- یئنی اوفوق‌لره یول آچاجاق ایدی. آدی و یادی قالارقی اولسون. مجلیسین دوامیندا حبیب فرشباف، مسعود شریعتی، مرجان مناف زاده، بهروز ایمانی، علیرضا میانالی وفیروز مقدم جناب‌لاری چیخیش ائدییب استاد میر علی سید سلامتین خصوصیت‌لریندن دانیشیب اونا حصر ائله‌دیگی شعیرلری اوخودولار. بو تؤره‌نین مختلیف بؤلوم‌لرینده گؤزل سسلی موغنی‌لر: علی مظفری، قاسم وطن اوغلو، علی رحیمی جناب‌لاری دا حزین موسیقی ایله مهندس سید سلامتین خاطیره‌سینی عزیزله‌دیلر. تؤره‌نین سون. دیقه‌لرینده معصوم خانیم سیدسلامت میکروفون آرخاسینا کئچیب و اؤزو و عایله‌سی طرفیندن بوتون قوناق‌لاردان و ایل بویو او‌نلارین یانیندا اولان و سیدسلامتین عایله‌سینی تک قویمایان دوسلاردان اؤزه‌لیکله دوکتور رئیس‌نیا و انداچه چنابلاریندان تشککورونو بیلدیردی و مهندس میرعلی سیدسلامتین عزیزلمه تؤره‌نی سونا چاتدی. https://t.me/Adabiyyatsevanlar

میرحسین دلدار بناب   آدام اول آی آدام! اوره‌ییم اولوبدور، داریسقال مزار سیخیلیر، قاچماغا، یول تاپانماییر سانکی بیر قارتالی، قفسله‌ییبلر چالیشیر اوچماغا، یول تاپانماییر! فصیل‌لر ایتیبدیر، منیم ایچیمده یازیما تؤکولور، پاییز یاپراغی! گونلریم جومعه‌نین، داریخان چاغی سپیلیر اوستومه اؤلوم توپراغی! نه قدر داریخار بیر یازیق اینسان؟ نه قدر سیخیلار بیر اوووج اورک؟! باشا چاتمایاجاق، بو آغلاتی‌لار دینجلیکده یاشاماق، ال‌چاتماز دیلک! باخیشلار قئیقاجی، سؤزلر تیکانلی نه‌یه ده‌ییشمیشدیر، اینسان خوش گونو؟ یازین بیر گونونون، دادین دادمامیش باشینا جالانیر، قارا قیش گونو! داریخیر سؤزلریم، سیخیلیر جانیم بیر بوغاز، کندیرله، دارتیشان کیمی اؤزگه اؤزگه‌ایله، ساواشار بللی اؤزوم اؤزوم ایله ساواشان کیمی! ایتمیشم ایچیمین کوچه‌لرینده دیوارلار قویورلار باش- باشا منله بئینیمده بیر دلی باغیریب دئییر آدام اول آی آدام، گل یاشا منله!... https://t.me/Adabiyyatsevanlar

اوشاق ادبیاتی آنا دیلی کارتون

اوشاق ادبیاتی حبیب فرشباف «گولوشوم‌ آغ‌ - آبّباغ‌»    كئفيم‌ سازدير، آلنيم‌ آچيق‌ اوزوم‌ آغ‌،  اللريم‌ آغ‌، ديشلريم‌ آغ‌، اوزوم‌ آغ‌.  تنبل‌ليگه بولانميشدي‌ ايشلريم‌،  هيچ‌ يومازديم‌ قاپ‌- قارايدي‌ ديشلريم‌.  اوره‌ييمده‌ ساخلاميشديم‌ آرزيمي‌،  گولمه‌گه‌ده من‌ آچمازديم‌ آغزيمي‌.  فيرچالاديم‌ سحر، آخشام‌، هر گئجه،‌  پيس‌ ايي‌ گلمز ديشلريمدن‌ اينديجه‌.  گلين‌ باخين‌ ديشلريم‌ آغ‌، اوزوم‌ آغ‌!  گولوشوم‌ ده‌ آغ‌ - آبّباغ‌ دير، آغ‌ - آبّباغ‌! https://t.me/Adabiyyatsevanlar

اوشاق ادبیاتی شاه و بولود توخویانین ناغیلی حاضیرلاییب سسلندیرن:«فاطمه محمودی» https://t.me/Adabiyyatsevanlar

اوشاق ادبیاتی ائلدار موغانلی 1-    منیم اولدوزوم   بورویوبدو گؤی اوزون قورخولو بیر زیل قارا، گئجه چیخاندا چؤله باخیرام اولدوزلارا.   آنام دئییر: “-گول بالام هامی‌نین وار اولدوزو؛ هله چوخ اولدوز وار کی، گؤرمور اینسانین گؤزو.”   گئجه گؤیو بزه‌ییر گؤزل اولدوز، گؤیچک آی؛ بیلمیرم اولدوزلاردان هانکی دوشوب منه پای.   آنام یئنه دانیشیر: “-هامی‌نین اولدوزی وار، سنین‌ده نازلی بالام گؤیده اولدوزون اولار.   بالاجا اولدوزلارین- یییه‌سی اوشاقلاردی؛ بؤیوک آدام‌لاریندا بؤیوک اولدوزو واردی.”   من کوسورم بو سؤزدن، دوداغیمی بوزورم؛ هامی‌دان بؤیوک اولان اولدوزومو گزیرم.   تاپانمیرام سمادا ایسته‌دیگیم اولدوزو؛ من اولدوز ایسته‌ییرم ایشیقلادا گوندوزو.   آنام دئییر: “-او اولدوز گئجه گؤیده تاپیلماز؛ اونون آدی گونش‌دیر اودا گوندوزسوز اولماز.”   سئوینیرم بو سؤزدن، بوراخیرام هر ایشی؛ ائوه گیریب یاتیرام گوندوز گؤره‌م گونشی.   او منیم اولدوزومدور، سئوه‌جه‌یم اورکدن؛ گئجه‌نی سئومیرم کی، اولدوزون‌دا سئوه‌م من. 1364 - تبریز