ادبیات سئونلر

ایتن رنگلرین سیرری ایکینجی بؤلوم ویدا حشمتی هانا هر گون مدرسه‌دن قاییتدیقدان سونرا، «قارتوپو» ایله سئحیرلی‌باغا گئدیردی. اوردا نقاشی چکیب، خیالی حیوانلارلا اویناییردی. او، «گئجه‌یاریسی» آدینداکی بایقوش‌لا دانیشیردی. اما بیر گون هانا باغا گئدنده، عادی اولمایان بیر وضعیتی آنلادی: چیچک‌لر  سولوقموش، رنگلر گؤرونموردو. قوشلارین نغمه‌لری سسلنمیر، نقاشی‌بومو(بوم نقاشی) آرتیق سئحیرلی دییلدی. هانا ناراحات اولدو. «گئجه‌یاریسی‌»ندان سوروشدو: - نه اولوب باغا؟ نییه گوللرین رنگی سولوب؟ بایقوش گؤزلرینی یوخاری قالدیراراق دئدی: -بیری رنگلری اوغورلاییر. باغین سئحرینی قایتارماق ایسته‌ییرسن‌سه، اوغرونو تاپمالیسان. بلکه «کؤلگه‌لر‌دره‌سی»نده گیزلنیب. اورا آنجاق اورگی‌ قورخوسوز اوشاقلار گئده بیلر. هانانین اورگی سئحیرلی باغا یاندی. او باغی قورتارماغا قطعی قرار وئردی. هانا، قارتوپو ایلـه بیریلیکده «ایتن‌سسلر» کؤرپوسونه چاتدی. اورا چوخ قاریشیق ایدی. سسلر بیر-بیری‌نه قاریشمیشدی؛ چیغیرتی سسی، قارغالارین قاریلتیسی، بیرده قارالتی‌دان گلن باشقا-باشقا سس‌لر. هانا اللری ایله قولاقلارینی قاپادی، اما بیردن، «قارتوپونون» یومشاق‌سسی گلدی: -بو سسلرین قارشیسیندا، بیر تک جسارت دایانار. هانا نفس آلدی، گؤزلرینی یوموب او سس‌لرین آراسیندا آنا‌سی‌نین نغمه‌سینی آختاردی. «لای‌لای دئییم یاتاسان، قیزیل گوله باتاسان لای‌لای گؤزلیم لای‌لای ائوین بزه‌گی لای‌لای... هانا آناسی‌نین سسینی، سسلرین ایچیندن تاپان کیمی، کؤرپو ایشیقلاندی، سسلر سوسدو، یول آچیلدی. گئدیب-گئدیب، «سوسقون‌گؤل»ه چاتدیلار. گؤل آینا کیمی ساکیت و دورو ایدی. اوردان کئچمه‌گه هئچ یول یوخ ایدی. فقط بیر داشین اوستونده بیلنیب-گؤرونن یازی واریدی: «خیال، سوسقون‌لوقدا گؤرونور». هانا، دانیشمادی. گؤزلرینی یوموب، یالنیز خیال ائله‌دی: قوش کیمی اوچان پنبه رنگینده تک‌شاخ‌آت و گونشی قوجاقلایان گوللر. بیردن گؤلون اوستونده، شوشه‌دن بیر یول آچیلدی. هانایلا قارتوپو، شوشه‌یولدان آستاجا کئچدیلر. یولون سونوندا، بیر دانیشان توسباغا هانا‌نین قارشیسیندا دایاندی. توسباغا دئدی: سنه اوچ تاپماجا وئره‌جم. اونلاری جوابلامالیسان. بیرینجی: گوندوز گؤرونمز، گئجه پاریلدار. هانا بیراز دوشونوب دئدی: -آی توسباغا باشینی ترپدیب دئدی: -آفرین سنه!... سونرا بوینونو بیراز اوزادیب دئدی: -ایکینجی: شوشه‌دن کئچر، اما شوشه‌نی سیندیرماز. هانا قارتوپونا باخدی. قارتوپو اوزونو هانانین آیاقلارینا سورتدو. هانا بیردن هیجانلانیب دئدی: -تاپدیم..‌ ایشیق‌دی. هر دوغرو جاواب‌لا، یئرده بیر موزاییک سینیردی و آلتیندان ایشیق اوزه چیخیردی. بئله‌لیک‌له یول آیدینلانیردی. عاغیللی‌توسباغا گولومسه‌ییب دئدی: -دوغرودو. ایندی اوچونجوسونو جوابلا: نه گؤزو وار نه قولاغی نه آیاغی وار نه قانادی، گزر کلّ‌ی جهانی. هانا او آن جواب وئردی: -خیال... آخیرینجی تاپماجانی دا دوغرو جوابلایاندا، توسباغا گولوب دئدی: -«سنین اورگین، باغین سئحرینی خاطیرلاتدی». سونوندا «کؤلگه‌لر‌دره‌سی»نه چاتدی. اوردا، دومانلارین ایچینده بیر یارادیق گؤروندو. سسی یئلین سسینه بنزه‌ییردی. او دئدی: -من رنگلرین اوغروسو دییلم. من قورخولارام. سن خیاللاریوا گوونمه‌دیکجه، من رنگلری سئحیرلی باغدان آلارام. هانا دوشوندو. او، آنلادی کی، سون گونلرده خیال ائتمه‌یی اونودوب، باشقالارا بنزه‌مه‌یه چالیشمیش. او، باغی قورتارماق اوچون گؤزلرینی یومدو و سئودیگی رنگلری خیال ائله‌دی- گؤی اوزونون ماوی رنگینی، تک‌شاخ آتین پنبه قولاقلارینی، گونشین ساری ساچلارینی...- او آن کیچیک ایشیق، اورگیندن یاناراق یارادیغا ساری گئتدی. دومان گئری چکیلدی و باغا رنگ و حیات  قاییتدی.  «گئجه‌یاریسی» اوجا سسله دئدی: -سن باغی محو اولماقدان قورتاردین، چونکی خیاللاریوا ایناندین. https://t.me/Adabiyyatsevanlar

اوشاق ادبیاتی دونیا اوشاق کلاسیک‌لری، روس خالق حِئکایه‌لری    اؤزگور اؤزیورَک، دورلیون یایینلاری، تورکیه، مارت، 2022    چئویرن: مجید تیموری‌فر (م. صفا)    بالاجا خوروز    مئشه‌ده یاشیل داملی کیچیک بیر ائو وار ایدی. بو ائوده بیر پیشیک و بیر خوروز یاشاییردی. اونلار بیر-بیرلری ایله چوخ مئهریبان ایدیلر و چوخ یاخشی آنلاشیردیلار. پیشیک همیشه آنا کیمی خوروزا قوللوق ائدیردی:    «آی خوروزوم، من ائوده اولمایان‌دا کیم گلیرسه گل‌سین، قاپینی آچما، تولکو ائوی بورا چوخ یاخین‌دیر» دئیه مصلحت وئرردی.    پیشیک حاقلی ایدی. تولکونون ائوی ده، مئشه‌ده ایدی. اوسته‌لیک، او، آرتیق خوروزو گؤرموشدو و اونو نئجه توتاجاغینی پلانلاشدیرماغا باشلامیشدی.    بیر گون پیشیک اووا گئتدی. ائوده تک قالان خوروز، قاپینی باغلاییب، یاخشیجا کیلیدله‌میشدیر.    تولکو ائوین یاخینلیغیندا گیزله نیب. پیشیک دؤنگه‌نی دؤنن کیمی، تولکو یاواشجا ائوه یاخینلاشدی. پنجره‌نین آلتیندا دایاندی و شیرین بیر شکیلده زومزومه ائتمه‌یه باشلادی:    «بالاجا خوروز، بالاجا خوروز... پارلاق توکلو، قیزیل یاللی، ایپک ساققاللی بالاجا خوروز...       ساده‌جه پنجره‌دن باخ، بوتون تویوقلار داری یئییر، سنی چاغیریرلار... بویور، منیم بالاجا خوروزوم...»    خوروز درحال پنجره‌یه طرف قاچیب پنجره‌نی آچدی. تولکو بئله ایسته ییردی، درحال خوروزو توتوب اؤز ائوینه دوغرو قاچماغا باشلادی. خوروز قیشقیردی:    "کؤمک ائت! تولکو منی توتدو! پیشیکیم، گؤزل پیشیکیم، منی خیلاص ائت!"    خوشبخت‌لیک‌دن پیشیک داها ایر‌ه لی گئتمه‌دی. او، خوروزون سسینی ائشیدیب تولکونو قووالاماغا باشلادی. اونو توتدو و خوروزو خیلاص ائتدی و اونا دئدی:    "عزیز خوروزوم، گؤر سؤزومه قولاق آسمادیغین اوچون سنه نه اولوب. بیر ده پنجره‌نی آچما، تولکونون دئدیگینه اینانما."    ائرته‌سی گون پیشیک یئنی‌دن اووا گئتدی. تولکو یئنه گیزلَندی، اما بو دفعه خوروز سسینی چیخارمادی. تولکو داوام ائتدی.    «قورخما، گؤزل خوروزوم، آچ پنجره‌نی، گؤر سنه نه وئره‌جم...»    خوروز پنجره‌نی یئنی‌دن آچدی، اما بو دفعه حاضر ایدی. تولکو بیر حرکت ائد‌ن کیمی، بورنونو دیم‌دیکله دی. تولکو آغریدان قیشقیراراق قاچدی. پیشیک اوودان قاییدان‌دا خوروز باشینا گلن هر شئیی اونا دانیشدی. پیشیک خوروزلا فخر ائدیردی. موکافات اولاراق، اونا چوخ گؤزل بیر بوشقاب قارغی‌دالی (نوخودا اوخشار یئمه لی دانالاری اولان بیتگی)، داری و بوغدا حاضیرلادی. اونلار یئمکلرینی سئوینجله یئدیلر.    تولکو ده، بورنونون آغری‌سینی هئچ واخت اونوتمادی و بیر داها خوروزو ناراحات ائتمه‌دی. https://t.me/Adabiyyatsevanlar

اوشاق ادبیاتی اوشاق ادبیاتی هر هفته پنجشنبه گونو ادبیات سئونلر کانالیندا . اوشاق ادبیاتینا دایر یازیلارینیزی بیزه گوندرین . https://t.me/Adabiyyatsevanlar

سولئیمان هئچ نه دئمه‌دی. کوره‌یی آغاجین دیبینه آتیب ائوه قالخدی. *** تابوتدان قاباق خرامان کنده گلدی. قارا نفس ایدی. ائله بیل بوتون یولو قاچمیشدی‌. اَرینه هئچ باخمادی. یول بویو ساچینی آلاق اوتو کیمی یولموشدو. سولئیمان اونو گؤروب آیاغا قالخدی. دوداقلاری اَسدی. آمما هئچ نه دییه بیلمه‌دی. نار آغاجی کیمی قورویوب یئرینده‌جه قالدی. خرامان گلدییی کیمی ده ائودن چیخیب آتاسی ائوینه گئتدی. سولئیمانین آناسی دا باشینا یایلیق باغلایا- باغلایا اونون آرخاسینجا چیخدی. سولئیمان، اوغلو حکمت‌له ائوده قالدی. حکمت ده آغلامیشدی. گؤزلری شیشمیشدی. آمما سولئیمان بیلیردی کی حکمت آناسی‌نین حالینا آغلاییب، دایی‌سینی هئچ تانیمیر‌. شهید نه‌دیر بیلمیر. " قاراباغ! قاراباغ! قاراباغ" " شهیدلر اؤلمز، وطن بؤلونمز!" " قاراباغ بیزیم دیر، بیزیم اولاجاق!" "آللاهو اکبر! آللاهو اکبر!" کند جاماعاتی‌نین سسی سولئیمان گیلین ائوینه چاتاندا، بیلدی کی قاینی مورادین تابوتو آرتیق کندده دیر. آغلاشما سسی شعارلارا قاریشیب کندی باشینا گؤتورموشدو. گئدیب تابوتو، بَی‌لر کیشی‌نین ال- آیاغینی اؤپمک ایسته‌دی... آمما یئرینده قورویوب قالمیشدی. سان کی کیمسه آستاجا توخونسا، قوروموش بوداق کیمی، ال- آیاغی بدنیندن سینیب قوپاجاقدی. گئتمه‌دی. او گئجه‌نی یاتا دا بیلمه‌دی. گئجه بویو فیکیرلشدی. گئجه بویو کند جاماعاتی‌نین سسی کسیلمه‌دی. شعارلار دایانمیشدی آمما آغلاشما سسی کسیلمیردی. سحره یاخین یوخویا گئتدی. گون اورتا اویانان کیمی عاغلینا نه گلدی‌سه، تئز اَینینی گئیینیب، ال- اوزونو یویوب ائودن چیخدی. هاوا گونشلی ایدی، ایستی ایدی. ائله بیل نوامبر یوخ، یایین اورتاسی ایدی. ائودن چیخیب ائنیش آشاغی ساللاندی. بیر- ایکی اوشاقدان باشقا کوچه‌ده هئچ کیم یوخ ایدی. بوتون کند جاماعاتی بَی‌لر کیشی‌نین قاپیسیندا ایدی. سولئیمانی گؤره‌ن اوشاقلار اوّلجه قورخدولار. سونرا " پاشینیان! پاشینیان!" دییه- دییه آرخاسینجا دوشدولر. سولئیمان تئز- تئز یئریمه‌یه باشلادی. اوشاقلار دا بیربیرینی هایلایا- هایلایا چوخالدیلار. گوله- گوله سولئیمانین دالینجا قاچیردیلار، سؤیوردولر. گوله- گوله " نه اولدو پاشینیان؟" - دئییب اونو داشلاییردیلار. ال چکه‌نه اوخشامیردیلار. سولئیمان کؤرپویه چاتاندا، آرتیق قاچماغا باشلامیشدی‌. تنگ‌نفس اولموشدو، آمما دایانا بیلمزدی. جنازه گؤتورولمه‌میش بَی‌لر کیشی‌نین ائوینه چاتمالی ایدی. ائو گؤرونوردو. آز قالمیشدی. بیرآز دا قاچسا اوشاقلاردان جانینی قورتاراجاقدی. بَی‌لر کیشی‌نین ائوینین قاباغینا ییغیشمیش بؤیوک‌لر، اوزاقدان قاچا- قاچا گلن آداما، اونون آرخاسینجا دوشَن اوشاقلارا باخیردیلار. هئچ کیم نه باش وئردییینی باشا دوشموردو. اوشاقلارین سس- کویونه حیه‌طده کی، ائوده کی آداملار دا چوله چیخمیشدیلار. " توتون پاشینیانی"، " پاشینیان"، " پاشینیان!".‌... کندین جاوانلاری سولئیمانی بَی‌لر کیشی‌نین ائوی‌نین دروازاسینا چاتمامیش حالقالادیلار. یومروقلاییب یئره ییخدیلار. دلی قانلی گنج‌لر، بؤیوکلر  قاریشقا کیمی اوستونه داراشدیلار. ووردوقجا ووردولار، سؤیدوکجه سؤیدولر، توپوردوکجه توپوردولر..‌. اوره‌کلری سویومادی. بَی‌لر کیشی‌نین هئچ توکو ده قیمیلدامادی. نه خرامان آرایا گیره بیلدی نه ده سولئیمانین آناسی... تا کی قوجالاردان بیری " اؤلدو دا ایت اوغلو ایت! بسدیرین!"- دئدی. سولئیمانین جانسیز بدنی‌نین باشیندا بیر ساچ- باشینی یولان خرامان قالدی بیر ده آناسی... اونلارین سسی کنده ائله یاییلیردی کی هئچ دونَن مورادین تابوتو گلنده بوتون کند جاماعاتیندان بئله سس چیخمامیشدی... سونرا کیمسه خبر گتیردی: - آی جاماعات! شوشانی آزاد ائله‌دیک! پرزدنت اوزو تئلویزیوندا دئدی! محاریبه قورتاردی! 2023- cü il, september سون. https://t.me/Adabiyyatsevanlar

بو سولئیمانین صبیر کاساسینی داشیران سونونجو دامجی اولدو. ائله همین گئجه خرامان سولئیمانا تکلیف ائله‌دی کی رایونا گئتسین، هم باشی دینجه‌لر، هم ده بو صؤحبت یاددان چیخار، سونرا قاییدار. *** - بیلیرم، کندده‌کی‌لر ده بو دانیشیر...- سولئیمان اللرینی، آغزینی سیلیب دئدی. - جهنمه کی دانیشسینلار...- آناسی دوداغینین آلتیندا میزیلداندی. - هه، جهنمه کی دانیشسینلار. سن گلدیییمی هئچ کیمه دئمه. او سببه تئزدن گلمیشم. هئچ کیم منی گؤرمه‌دی. بیر- ایکی آی بوردا قالاجام. محاریبه قورتارسین، پاشینیان زاد یاددان چیخسین، باکی‌یا قاییدارام. او زامانا کیمی بوردا قالاجام. *** او جور ده ائله‌دی. ایلک گونلر ائودن چؤله چیخمادی. حیه‌ط‌ده باغ- باغچا ایله باشینی قاتدی. هئچ داریخمادی دا. ائولری کندین ان هوندور یئرینده ایدی. تپه‌نین باشیندا. بوتون کندی گؤرمک اولوردو. کؤرپونو، سؤیودلوکده کی " کیسلووُدسک" کافه‌سینی، کندین مکتبینی، قایناتاسی بَی‌لر کیشی‌نین مالکانه‌سینی... کندین چیخشینداکی قبریستانلیق دا گؤرونوردو. نه ایسه ان چوخ دا اورا باخماغی سئویردی. هر دفعه قبریستانلیغا باخاندا، اونا ائله گلیردی کی باش‌داشلاری، ساحه‌ده ایشله‌ین آداملاردی. گونون ایستی‌سینده، یاغیشین آلتیندا، سحر تئزدن، آخشام چاغی دایانمادان ساحه‌ده ایشله‌ین بالاجا آداملار... سولئیمان گیلین حیه‌طلری ده بویوک ایدی. نار، قاوالی، آلما، آرمود، زغال ، اریک، قوز..‌. هر آغاجدان وار ایدی. اوجسوز- بوجاقسیز باغلاری مئشه‌یه اوخشاییردی. بو باغا گیرن قوناقلار چوخ واخت آزیردیلار. گوج- بلا ایله باغین چیخیشینی تاپیردیلار. اوشاق واختی سولئیمان اؤزو ده بو باغدا چوخ آزمیشدی. سونرا یاواش- یاواش آغاجلارین یئرینی ازبرله‌دی. چتینی نار آغاجلارینی تاپانا کیمی ایدی. نار آغاجلاری‌نین یانیندان دوز کئچندن سونرا حیه‌‌طده کی بالاجا توآلت گؤرونوردو. نار آغاجلارینین آلتیندا کوهنه " مُسکوویچ" ماشینی دا وار ایدی. قیرمیزی، تکرلری، اوتوراجاقلاری سؤکولموش، پنجره‌سیز ماشین. باباسی‌نین ایدی. آمما بیلمیردی کی نییه او ماشین بوردا دیر. نئجه بو حالا دوشوب؟ هئچ ماراقلانمامیشدی دا. هردن اوینایاندا ماشینین اوستونه چیخیب، هوپپانیب- دوشوردو. ماشین هله ده یئرینده ایدی. لاپ پیس حالا دوشموشدو. آمما هئچ یئریندن ترپنمه‌میشدی‌. سولئیمان ماشینین چوخدان پارتلامیش تکرینه تپیک ووروب باغا گیردی. نار آغاجلاری‌نین چوخو قوروموشدو. او بیری آغاجلارین دا وضعیتی یاخشی دئییلدی. *** سولئیمان بوتون گونو باغلا اللشیردی.ان بیرینجی اوت- آلاقلاری تمیزله‌دی. باغین اوز- گؤزو آچیلدی. اوندا فیکیر وئردی کی، اصلینده باغلاری او قدر ده بؤیوک دئییلمیش. بوتون باغی باشدان- آیاغا بئلله‌دی. قاپیدان کئچن آرخدان باغا سو قوشدو. بودادیغی آغاجلارین هامیسینا سو ایچیرتدی. گؤوده‌لرینی، یارپاقلارینی سیغاللادی. اوز- گؤزونو ساققال باسمیشدی. نئچه گون ایدی گوزگویه باخمیردی. گلدییی گون حیه‌طده کی ال- اوز یویانین گوزگوسونو سیندیرمیشدی. آناسینا دا دئمیشدی کی ایش گؤرنده بیلمه‌دن گوزگونو قیریب دیر. محاریبه ایسه داوام ائله‌ییردی. هر گون آزاد اولونموش تورپاقلارین خبری گلیردی. هر شاد خبردن سونرا سولئیمان حیه‌طه چیخیب فرحله کنده تاماشا ائله‌ییردی. اوزاقدا قارالان داغلارین یاواش- یاواش گؤیردییینی ، یاشیللاندیغینی گؤروردو. کنده آلتی شهید گلمیشدی. هر دفعه کند جاماعاتی قارا خبر گلن قاپی‌یا قاریشقا کیمی آخیشیردی. سولئیمان دا کیمین شهید اولدوغونو آناسیندان اؤیره‌نیردی. باش ساغلیغی وئرمک ایسته‌ییردی، آمما ائودن چیخماغا اوره‌ک ائله‌میردی. هم بَی‌لر کیشی ایله راستلاشار دییه، هم ده باکی دا اونو گؤزوم چیخدی‌یا سالان بلایه گؤره. *** ایکی هفته‌دن چوخ واخت کئچمیشدی‌. سولئیمان آیین، هفته‌نین هانسی گونو اولدوغونو دا بیلمیردی. تکجه تئلویزیوندان محاریبه‌نین نئچه‌نجی گونو اولدوغونو اؤیره‌نیردی. قیرخ گونو کئچمیشدی. سولئیمان بو گونلر عرضینده آیاغینی دا دروازادان چؤله آتمامیشدی. هئچ کیم اونون کندده اولماغیندان دویوق دوشمه‌میشدی. حیه‌طده باشینی قاتیردی. گاه باغدا ایشله‌ییردی، گاه دا حیه‌طده آیاقلاری لاخلایان ایستولو دوزلدیردی. بیر گون آناسی اضطرابلا چؤلدن گلدی. سولئیمان یئنه باغدا ایش گؤروردو. چیگنینه آتدیغی دستمالنان بوینونون، اوز- گؤزونون، باشی‌نین تَرینی سیلدی، کوره‌یه دیرسکله‌نیب آناسی‌نین وئره‌جه‌یی خبری گؤزله‌دی: - بَی‌لرین بالاجا اوغلو موراد شهید اولوب! تابوتو یولدا دیر..‌.- آناسی سولئیمانین نه ائده‌جه‌یینی گؤزله‌دی.

سولئیمان بؤرکونو بیرآز دا اوزونه ائندیرمیشدی. - دوز او گؤی دروازانین آغزیندا ساخلا. هه، هه، بوردا ساخلا.- یول بویو ساکیت دانیشان سولئیمان هیجانلا دئدی. سوروجونون پولون آرتیقلاماسی ایله وئردی، چمدانینی گؤتوروب ماشیندان دوشدو. هئچ یول یولداشی ایله ساغوللاشماق عاغلینا دا گلمه‌دی. دروازانی چیینی ایله ایته‌له‌ییب تئز ایچری گیردی. دروازالاری همیشه آچیق اولوردو. *** حیه‌طه گیرن کیمی آناسینی گؤردو. آناسی اته‌یینه دَن دولدوروب تویوق- جوجه‌نی یئمله‌ییردی. اوّل تانیمادی، قورخدو، سونرا بؤرکلو، عینک‌لی آدامین اوغلو اولدوغونو بیلیب اته‌یینده کی دَنین هامیسینی یئره تؤکدو. اوغلونون اوستونه یویوردو، قوجاقلاییب باغرینا باسدی، اؤپدو، قوخلادی. سولئیمان دا بوینونو بوکوب ائله‌جه دایاندی. ایچری کئچدیلر. اوردان- بوردان حال- احوال توتدولار‌. آناسی صؤحبت ائده- ائده سوفره آچدی. چایی دمله‌میشدی آرتیق. پئندیری، چؤره‌یی، بالی، قایماغی ماسایا دوزدو. چایی گتیرندن سونرا اوتوردو. گؤزله‌دی کی اوغلو دانیشسین. سولئیمان دا بونون فرقینده ایدی. آمما هئچ نه دئمک ایسته‌میردی. آجمیشدی، هله چای گلمه‌میش یئمه‌یه باشلامیشدی. بیر تندیر چوره‌یینی یئییب قورتارماغینا آز قالمیشدی. آناسی ایکینجی استکان چایی دا قاباغینا قویاندا سوروشدو: - نه عجب ایلین بو واختی کنده گلمیسن؟ اؤزو ده بو ساعاتدا‌. نه ایسه اولماییب کی؟ سولئیمان آغزینا قویماغا حاضیرلادیغی تیکه‌نی الینده ساخلادی. - آی آنا، گویا بیلمیرسن نه اولوب؟! جانیمی بوغازیما ییغیبلار دای! شهرده هامی باشیما اویون آچیر! ائودن چؤله چیخماغیما پشیمان اولورام! دلی ائله‌ییب‌لر منی! - دئییب چاییندان قورتوملادی. آناسی مسئله‌نین نه اولدوغونو بیلیرمیش کیمی دینمه‌دی. گؤزله‌دی کی سولئیمان اؤزو دانیشسین. - من بدبخت نئیله‌ییم کی، او ایت اوغلو ایت پاشینیانا اوخشاییرام؟! آللاه بئله یارادیب دا! منیم گوناهیم نه دیر؟!- الینده ساخلادیغی تیکه‌نی آغزینا آتیب دیری- دیری اوددو، اوستوندن ده چای ایچدی.- هر شئیی بورنومدان گتیریرلر! نه ایشده اوتورا بیلیرم، نه اوتوبوسا مینه بیلیرم، نه ماغازایا گئده بیلیرم! او گون بیزیم ائلنورون اوغلونون سنت تویوندایدیم. تویدا هامی منه باخیب گولوردو. اوشاقلار گلیب گؤتومه تپیک ووردولار! کوچه‌ده ده راحات یئرییه بیلمیرم! - غلط ائله‌ییرلر! ارمنی اؤزلری دیر! هاران اوخشاییر؟! هئچ نه‌یین پاشینیانا اوخشامیر! - آناسی داتیشدیقجا عصبله‌شن، پؤرتن اوغلونا تسللی وئرمه‌یه چالیشدی. - اوخشاییرام دا! اؤزوم گؤرمورم؟! ائله بیل او ایت اوغلو ایتین ائکیز قارداشییام! منی گؤستریب گولورلر. دوغرودان دا سولئیمان پاشینیانا اوخشاییردی. محاریبه‌یه قدر بو بنزرلیک باشینا بلا اولمامیشدی، آمما محاریبه‌دن سونرا اونون کابوسونا چئوریلدی. محاریبه‌نین ان قیزغین واختلاری ایدی. اؤلکه‌ده پاشینیانی تانیمایان، " نه اولدو پاشینیان؟" سوزونو بیلمه‌ین آدام قالمامیشدی. ایشده ایش یولداشلاری، محله‌ده قونشولاری، اوتوبوسدا، مترودا تانیمادیغی آداملار،- هامی اونو اله سالیردی. نه رستوراندا بیر تیکه چؤره‌ک یئیه بیلیردی‌، نه ده مارکت‌دن چؤره‌ک آلا بیلیردی. سولئیمان بیر موددت بونا دؤزمه‌یه چالیشدی، فیکیرلشیردی کی بیر- ایکی گونه یاددان چیخاجاق، راحات حیاتینا قاییداجاق، آمما ائله اولمادی. اوسته‌لیک، دوستو ائلنورون اوغلونون سنت تویوندا رقص ائله‌ین‌ده، اوشاقلار سولئیمانی محاصره‌یه آلیب باشینا اویون آچمیشدیلار. بیری اوستونه زیتون آتمیشدی، بیری گؤتونه تپیک ووروب قاچمیسدی. هامی گولموشدو. او دا پئنجه‌یینی گؤتوروب هئچ پول دا یازدیرمادان آرادان چیخمیشدی. همین گونون سحری مرخصی آلماغی قرار وئرمیشدی. او گونلردن بیرینده اوغلو مکتبدن آغلایا- آغلایا گلدی. اوشاغی گوج- بلا ایله ساکیتلشدیردیلر. سو وئردیلر، نفسینی دَردی‌. بیرآز اؤزونه گلدی. سونرا " مکتبده هامی منه پاشینیانین اوغلو دئییر" - دئییب، یئنه هیچقیرا- هیچقیرا آغلادی. - گئدیب او مکتبی باشلارینا اوچورارام. ارمنی کؤپک اوشاقلاری!- سولئیمان یئریندن دیک آتیلدی. آسیلقاندان پئنجه‌یینی گؤتوروب گئیه‌نه کیمی عصبی سویودو یا نه‌دن، قاپی‌نین آغزیندا دایانیب هئچ نه دئمه‌دن ائله‌جه آروادینا باخدی. خرامان:" سن اوتور آی سولئیمان. من اؤزوم صاباح او مکتبه گئده‌رم! غلط ائله‌ییرلر! اوزوم گئدیب آغیزلارینی جیراجام!"- دئییب ارینی ساکیتلشدیردی. سولئیمانین ائشیتمک ایسته‌دییی سؤزلری مونجوق کیمی آرد- آردا دوزدو. سولئیمان راحاتلاشیب پئنجه‌یینی اَینیندن چیخاریب، یئرینه آسدی. - سن ده زاریما یالاندان! نه اولوب پاشینیانا؟! ردّ اول گئت ال- اوزونو یو، گَل چؤره‌یینی یئه!- خرامان هله ده هیککه‌سیندن هیچقیران اوغلونون اوستونه قیشقیردی.

حکمت کیشی ده سولئیمانا دئمیشدی کی، بی‌لرین قیزینی آلسا، اونا حاققینی حالال ائتمیه‌جک، اوغوللوقدان چیخاراجاق. آنجاق سولئیمان آتاسینا قولاق آسمادی. خرامانی چوخ سئویردی. خرامان دا اونو چوخ سئویردی. قوشولوب باکی‌یا قاچدیلار. بیر ساعاتین ایچینده خبر بوتون کنده یاییلدی. بی‌لر کیشی حکمتین قاپیسینا گلدی. کند جاماعاتی دا تاماشایا ییغیشمیشدی. سؤیوشدولر، ال به یاخا اولدولار. آخیر طاقتدن دوشوب آرالاندیلار. هئچ اون گون اولمامیش حکمت کیشی بئیین سکته‌سی کئچیردی. یاتاغا دوشدو. آناسی گونلرله سولئیمانا زنگ ووروب، نه قدر آند- آمان ائله‌دی کی آتاسی اؤلوم آیاغیندا دیر، بوگون- صاباح اؤله‌جک، گلسین حالاللیق ایسته‌سین، سولئیمان اینانمادی. ائله بیلدی اونو آلدادیرلار، خراماندان آییرماق اوچون بئله دئییرلر. کنده گئتمه‌دی. آتاسی‌نین اؤلوم خبری گلندن سونرا بیلدی کی یالان دئییلمیش. بیلمه‌دی نئیله‌سین. گئجه بیر باشا آتاسی‌نین قبرینه گئتدی. هؤنکور- هؤنکور آغلادی. ساکیتلشدی. سونرا یئنه آغلادی. تا کی گؤزونده یاش قالمادی. گیزلینجه اوردان ائوه گئتدی. آناسی باشینا قارا یایلیق آتیب حیه‌طده تسبئح چئویریردی. اوغلونو گؤروب او دا هؤنکوردو. سولئیمانین اوره‌یی بیرجه اونا راحاتلادی کی آناسی اونو هئچ نه‌ده گوناهکارلاندیرمیردی. دئدی: آللاهین قیسمتی بئله‌یمیش: " سیز باکی‌دا خرامانلا بیربیرینیزدن موغایات اولون، هئچ بورا گلمه‌یین، من هردن سیزین یانینیزا گله‌جم." سولئیمان او جور ده ائله‌دی. بیر ده کنده قاییتمادی. دوز اوتوز ایل. باکی‌دا اییرمی یاشلی سولئیمانلا اون سکگیز یاشلی خرامان، دوز اوتوز ایل بیربیریندن موغایات اولدولار. ایش تاپیب ایشله‌دیلر. کرایه ائوده قالدیلار. اوشاقلاری اولمادی. بوتون پوللاری حکیم‌لره، درمانلارا گئتدی. تورکیه‌یه، ایرانا گئتدیلر، اسرائیل‌دن باکی‌یا گلن یهودی حکیم سون اومیدلری ایدی.‌او دا کؤمک اولمادی. سولئیمانین آناسی ایشین ایچینه گیردی. گلینی فالچیلارا، باخیجیلارا، پیرلره، زیارتگاهلارا آپاردی. هر دفعه بیر موللا یانینا گئتدی. دوعا یازدیردی. گلینه عمل ائله‌ییب‌لر،- دئدیلر. عمل ائلیه‌نین الی قوروسون. اییرمی ایل سونرا اوشاقلاری اولدو‌. آدینی حکمت قویدولار. *** تاکسی کندین گیریشینه تزه چاتمیشدی، سولئیمان سوروجویه دئدی کی قبریستانلیقدا ساخلاسین. سوروجو " باش اوسته"،- دئییب ماشینی ساخلادی. سحر آچیلمیشدی. سولئیمان ماشیندان دوشوب قبریستانلیغا باخدی. قبریستانلیق خیلی بؤیوموشدو. آرتیق قونشو کنده چاتیردی. آتاسی‌نین مزارینی آختارا- آختارا قبریستانلیقدا گزمه‌یه باشلادی. هله اوستو گؤتورولمه‌میش قبیرلر وار ایدی، اوستونده حربی فورمادا جاوان اوغلان شکیل‌لری، بایراقلار، کندین شهیدلری. هامیسی‌نین قارشیسیندا دایانیب شکیل‌لرینه؛ معصوم اوزلرینه باخدی. آدلارینی، دوغوم ایللرینی اوخودو. 19، 18, 20, 21 یاش... او دا عسگرلیکدن قاییدیب خرامانی قاچیرداندا بو یاشدا ایدی. ائله بو قبریستانلیغین یانیندا گؤروشوب قاچمیشدیلار. دوشونه- دوشونه آتاسی‌نین قبرینه چاتدی. اؤزونو ساخلایا بیلمه‌ییب یئنه هؤنکور- هؤنکور آغلادی. بیلیردی کی آتاسی اونا گؤره اؤلوب، آمما داها چوخ آتاسی ایله حالاللاشماغا گلمه‌دییی اوچون پشیمان ایدی، اؤزونو باغیشلایا بیلمیردی. سوروجونون ده سیگارت چکه- چکه اونا باخدیغینی گؤروب، اؤزونو اله آلدی. کاپشنینی چیخاریب آتاسی‌نین باش داشی‌نین توزونو سیلدی. شکلینی سیغاللاییب اؤپدو، سونرا قبرین اطرافیندا بیتمیش کول- کوسلاری دا یولوب ماشینا تلسدی. - بو یوللا سور ائله. هله بیرآز گئده‌جکسن. - آتان ایدی معللیم؟ - هه. آتام ایدی... سولئیمان چوخ یورولموشدو، هم ده کنده قاییتدیغی اوچون اؤزونو ناراحات حیس ائدیردی. باکی‌دان نییه قاچدیغینی اونوتموشدو. ایندی او مسئله عینی‌نه ده دئییلدی. ائله بیل بو کنددن قیراقدا هئچ حیاتی اولمامیشدی. باکی‌دا یاشادیغی اوتوز ایل، اونون اوچون، ائله بو کندین هنده‌ورینده فیرلانماق کیمی بیر شئی ایدی. کنده حاق- حساب چکمک اوچون قاییتمیشدی. - آللاه رحمت ائله‌سین. منیم ده آتام من اوشاق اولاندا اولوب..‌ - آللاه رحمت ائله‌سین. قاباقدان ساغا دؤنه‌جکسن،- سولئیمان سوروجونون تزه‌دن صؤحبته باشلاماق ایسته‌دیینی حیس ائدیب، تئز قارشیسینی الدی،- ساغا دؤنوب آخیرا کیمی دوز گئت. او چایی گؤرورسن؟ کؤرپونو کئچیب یوخوشو قالخاجاقسان. اودور، تپه‌نین باشیندا کی ائو دیر. هاوا تامام ایشیقلانمیشدی. کوچه‌ده کی تک- توک آداملار تعجوبلو ماشینا باخیردیلار. ماشین گؤزدن ایته‌نه کیمی باخیشلارینی چکمیردیلر.

- من اؤزوم زنگیلانلی‌یام. زنگیلانی دا آلسایدیلار...بوتون گونو او خبری گؤزله‌ییرم. قورخورام زنگیلانی قایتارمامیش محاریبه دایانسین. - اللی یاشیندا آریق، چلیمسیز سوروجو گوزگودن آرخا اوتوراجاقدا بوزوشموش سولئیمانا باخیب دئدی. - بیر- ایکی گونه زنگیلانی دا آلارلار. ناراحات اولما،- پنجره‌دن چؤله بویلانان سولئیمان دئدی. - آی قارداش سحردن سنه باخیرام، منیم اوره‌ییم سیخیلیر. سن آللاه او باشینداکینی، گؤزونده‌کینی چیخار راحات اوتور دا. اؤزونه نییه ظولوم وئریرسن؟! سوروجو جسارتله‌نیب بایاقدان دئمک ایسته‌دیینی دیله گتیردی. - منه بئله راحات دیر. سن یولونو سور تئز چاتاق،- سولئیمانین بو سؤزلریندن سونرا پرت اولموش سوروجو سوسدو. *** ایکی- اوچ ساعات سونرا سولئیمان پنجره‌نین تاققیلتی‌سینا اویاندی. - کوردمیره‌ییک. دوش بیر تیکه چؤره‌ک یئیه‌ک، چای ایچک- اینجیک سوروجو دئدی. - چوخ ساغ اول. من آج دئییلم. سنه نوش اولسون. راحاتجا یئمه‌یینی یئه. سوروجو گئدندن سونرا ماشیندان دوشدو. هله گئجه ایدی. حسابلادی کی کنده سحر تئزدن چاتاجاق. سوروجو یاخشی سورموردو. فرصت‌کن بیر سیگارت یاندیریب، کافه‌دن آرالی‌دا کی توآلته آددیملادی. توآلت قاپیسی‌نین قیریق یئریندن سمایا باخدی. کافه‌ده اوتوران آداملارین، قاب- قاشیغی‌نین سسی ائشیدیلیردی. تکم- سئیرک ایت هوروشمه‌لرینی، جیرجیرامالار فاصیله‌سیز، عینی ریتم‌له مشایعت ائدیردی. گؤیده بیر اولدوز دا یوخ ایدی. آی بولودلارین آرخاسیندان بیر نئچه ثانیه‌لیک چؤله چیخیر، سونرا یئنه یوخ اولوردو. کافه‌دن گلن ماهنی سسینه دیکسیندی. کافه‌ده‌کی‌لر گولوشوردولر، دییه‌سن رقص ائله‌ییردیلر. ال چالیردیلار. ایشینی قورتاریب تئز آیاغا قالخدی. چؤلده ال- اوزونو یویاندا، سوروجو غفیل یانینا گلدی: - اوووو... معللیم! بورداسان؟ من ده بایاقدان سنی آختاریرام! سولئیمان ال- اوز یویاندان باشینی قالدیرمادان تئز اَینینی و بورکونو تاخیب چئوریلدی. هئچ نه دئمه‌دی. کئفی کؤک سوروجو آرتیق اونون ترس‌لیینه اؤیرنمیشدی: - بیر دنه من ده توآلته دَییم، گئدک معللیم. چوخ یوبانمایاق. نه دئییب آتالار؟ یولچو یولدا گرک. سولئیمان ماشینا طرف گئدیب یئنه سیگارت یاندیردی. سوروجو گلن کیمی یولا چیخدیلار. بو دفعه تئز یوخویا گئتدی. گؤزونو آچاندا گؤردویو یئرلر اونا چوخ دوغما ایدی. رایونلارینا چاتمیشدی. دان یئری آغارماغا باشلامیشدی. اوزونده تبسسوم یاراندی. گئنیش اکین ساحه‌لرینه باخدیقجا اوره‌یی ده سینه‌سینده بؤیویوردو‌. اوزاقدا کی نهنگ داغلار کؤلگه کیمی قارالیردی‌. اکین ساحه‌لری‌نین اوستوندن اوچان بوتون قوشلاری تانیییردی: بو شاناپیپیک دیر، بو ساغساغان دیر... ساحه‌ده کی آتلاردان گؤزلرینی چکمیر، بیر طرفدن ده صاحیب‌لرینی آختاریردی. الینده اوزون چوبوقلا ساحه‌ده گزیشن شوخ قامتلی کیمی‌سه گؤرنده، بیلیردی کی، آتین صاحیبی دیر، راحلاشیردی. ماشین سرعتلنمیشدی. یول قیراغیندا کی آداملاری، حیوانلاری 25-جی کادر کیمی گؤروردو. ائله بیل زاماندا سیاحت ائدیردی. آداملار بیر آنین ایچینده گؤرونوب غفیل گؤزدن ایتیردیلر. آغاجلار ایسه داها گئج یوخا چیخیردیلار. سولئیمانا ائله گلیردی کی آغاجلار دا هاراسا گئدیر. او، کنده قاییدیردی، آغاجلار ایسه کنددن باش گؤتوروب قاچیردیلار. *** کنده آز قالمیشدی. گؤزلری دولموشدو. آغلاماماق اوچون اؤزونو گوجله ساخلاییردی. سوروجو ده بونون فرقینه واریب سرعتی آزالتمیشدی کی، بو عینک‌لی، بؤرکلو ترس آدام اطرافا دویونجا باخا بیلسین. سولئیمانین دوز اوتوز ایل ایدی کی، بورالارا آیاغی دَیمیردی... ائله بیل دونَن ایدی، اییرمی یاشیندایدی. عسگرلیکدن تزه گلمیشدی. خرامانی سئویردی. خرامان دا اونو سئویردی. صوبح تئزدن کندین چیخیشینداکی قبریستانلیقدا گؤروشوب باکی‌یا قاچدیلار. ائله بیل دونَن ایدی... خرامانین آتاسی بَی‌لر کیشی دئمیشدی کی ایکی دونیا بیر اولسا دا، حکمتین اوغلونا قیز وئرمه‌رم. بَی‌لر کیشی کندین ان حؤرمتلی کیشی‌لریندن ایدی. مال - مولکونون سایی- حسابی یوخ ایدی. اوچ اوغلو، بیر قیزی وار ایدی. خرامان ائوین ایلک بئشیگی ایدی. کیشی قیزینی اوغوللاریندان دا چوخ ایسته‌ییردی. آمما حکمتین اوغلونا قیز وئرمَمه‌یی‌نین سببی باشقایدی. سولئیمانین آتاسی حکمت کیشی ده ائله بئله آدام دئییلدی. کند ساوئتی‌نین صدری ایدی. بوتون کند اونون سؤزونه تابع ایدی. اونون ایجازه‌سی اولمادان هئچ کیم داش اوستونه داش قویا بیلمزدی‌. هامی اونون یانینا خواهیشه گلیردی. وظیفه‌یه گلندن سونرا لاپ عزازیللشمیشدی. بیر واختلار بَی‌لر کیشی ایله محکم دوست ایدیلار. اوشاقلیقدان بیر یئرده بؤیوموشدولار. سونرا نه اولدو نه اولمادی، هئچ کند جاماعاتی دا بیلمه‌دی، بیر گئجه‌نین ایچینده قانلی- بیچاق اولدولار. گؤرنده بیربیرینه سالام دا وئرمه‌دیلر.

‌ گوزلَنیلمه‌ین بیر قتلین تاریخچه‌سی(حیکایه) ✍یازان: اولوجای آکیف کوچورن: سحرخیاوی حاضیرلایان:ادبیات سئونلر - بلکه، کنده گئده‌سن؟- گازین اوستونده‌کی قازانی قیراغا چکیب آستا سسله دئدی. - نه‌دی؟- سولئیمان آروادی‌نین نه دئدییینی ائشیتسه ده، تکرار سوروشدو. - دئییرم، بلکه رایونا گئده‌سن؟ بیر آی کندده قال، هم دینجل، هم ده بو سؤز- صؤحبت قورتارسین، سونرا قاییت گَل- بو دفعه داها اورکک سسله دئدی. - بوش-بوش دانیشما! من یازیق نئینه‌میشم کی، جاماعاتدان گیزله‌نیم؟!- عصبلشسه‌ده، آروادی‌نین بو مسئله‌ده گوناهسیز اولدوغونو باشا دوشوب، تئز ده یومشالدی،- یئمه‌یی گتیر، دوزه‌له‌جک، سن ناراحات اولما. اوتوز ایل ایدی کی ائولی ایدیلر. سئویب ائولنمیشدیلر. سولئیمان اونو مکتب واختی سئومیشدی. خرامانین دا سئومه‌یی چوخ واخت آلمامیشدی. سولئیمان دؤرد ایل، اونو مکتبدن ائوده اؤتورموشدو. خلوتجه الیندن ده توتموشدو، بیر دفعه ده اؤپموشدو. خرامان یئمه‌یی چکیب اَیلَشدی. جیندیری چیخمیش اسکی ایله اللرینی سیله- سیله ارینه باخدی. سولئیمان آروادی‌نین عصبی اولدوغونو یا حالینا آجیدیغینی توتا بیلمه‌دی. باشینی آشاغی سالیب یئمه‌یینی قاشیقلادی. *** ائله‌جه ائشه‌لندی، او طرفه چئوریلدی، بو طرفه چئوریلدی. گؤزونه یوخو گئتمه‌دی. خرامانین تکلیفی عاغلینا باتمیشدی. ان یاخشیسی، بو مسئله‌لر سنگییه‌نه کیمی گؤزه گؤرونمه‌مک ایدی. هم ده نئچه ایل دیر دوز- عمللی استراحت ائله‌میردی. دیکه‌لیب آروادینی اویاتدی: - خرامان، من گئدیرم. خرامان یاخشی بیلیردی کی اَری اونون تکلیفی ایله راضیلاشاجاق. او دا یاتمامیشدی. سسی یوخولو دئییلدی: - پال- پالتارینی ییغمیشام. چمدانین ایشکافدا دیر. هر شئی قویموشام. قالخیم یوللوق دا قویوم، یولدا آجارسان. خرامان اونون اوچون یوللوق حاضیرلاییردی. سولئیمان سیگارت چکه- چکه احمدلی‌نین بوز بنالارینا، شهرین آددا- بوددا ایشیقلارینی عکس ائتدیرن دنیزه، کله- کؤتور یوللارا، شوتویَن ماشینلارا باخیردی‌. بعضی ائولرین ایشیقلاری یانیردی، بعضی‌لری‌نین یوخ. یولدان تک- توک ماشینلار اؤتوب کئچیردی. هله سحره چوخ وار ایدی. سولئیمان سحر آچیلمامیش کنده چاتماق ایسته‌ییردی. - اوتوبوس‌لا گئده‌جکسن؟ - یوخ، نه اوتوبوس؟ تاکسی دئمیشم، بیرآزدان گله‌جک. - نییه تاکسی دئییردین؟ چوخ باها آپاراجاق. - جهنمه کی، باها آپارسین! جاماعات اوتوبوسدا دا منی گؤروب لاغ ائله‌سین؟ - سون قوللابینی آلیب سیگارتین کؤتویونو دیواردا اَزدی، چیرتما ایله ان اوزاغا آتماغا چالیشدی. سیگارت یئره دوشَندن سونرا خایخیریب بلغمینی ده بوتون گوجو ایله باکی‌یا توپوردو.- دی وئر نه حاضیرلامیسانسا، ردّ اولوم گئدیم، گؤره‌ک باشیمیزا نه گلیر. - یاخشی اولاجاق، اوره‌یینی سیخما! اوزاغی بیر آیا هامی‌نین یادیندان چیخاجاق، - خرامان حاضیرلادیغی یوللوغو سولئیمانا وئردی. سولئیمان قاپیدان چیخاندا آروادینی قوجاقلادی. اصلینده، ائله‌جه یاناغیندان اؤپمک ایسته‌میشدی، آمما بیر ده گؤردو کی خرامانی برک- برک کؤکسونه سیخیب دوداقلاریندان اؤپور. خرامان دا اؤزونو ایتیردی. آخیرینجی دفعه نه واخت اؤپوشدوکلرینی ایکیسی ده اونوتموشدو. اؤپوش اوزاندی...بیر ده اوندا فرقینه واردی کی، اللری آروادی‌نین یومشاق، یومرو اومباسیندا دیر. بیرآز دا سیخمالاییب اللرینی چکدی: - یاخشی، یاخشی، بسدی بو قدر، محاریبه‌یه گئتمیرم کی. بیر آیا گله‌جم اینشاللاه،- گوله-گوله دئدی. - بیلیرم، بیلیرم...- خرامان نفسینی دره- دره دئدی،- اینشاللاه! سالامات گئت. یاخشی اولاجاق. سولئیمان تاکسی‌یه میننده آرتیق باشیندا یئکه، بوز بؤرک، گؤزونده قارا شوشه‌لی ایری عینک وار ایدی. سوروجو ایله ائله سالاملاشدی کی، اوّلدن آرادا پرده یارانسین، بوش بوغازلیغیلا یول بویو اونو ناراحات ائتمه‌سین. *** سوروجو خبرلر بوراخیلیشی‌نین باشلادیغینی ائشیدن کیمی رادیونون سسینی آرتیریب، باشینی آزجآ ساغا اَیدی. " بو گون فضولی رایونونون قوچ احمدلی، چیمن، جووارلی، پیر احمدلی، موسی بیلی، ایشیقلی، دده‌لی کندلری و فضولی شهری آذربایجانین مظفر اُردوسو طرفیندن دوشمندن آزاد ائدیلیب. یاشاسین آذربایجان! قاراباغ آذربایجان دیر! - آی آللاه، سنه شوکور! شوکور! شوکور! گؤزون آیدین سنین ده، قارداش! هامیمیزین گؤزو آیدین!- سوروجو آرخایا چئوریلدی. سولئیمانین سئوینمه‌دیینی گؤروب دوروخدو. ایسته‌دی بایاقدان آغزینی آچمایان، بؤرک و عینک آلتیندا گیزلنمیش موشترینی سؤیسون، آمما اؤزونو ساخلادی. - هه‌...گؤزوموز آیدین. بونو سحردن دئمیشدیلر، بیلیردیم- سولئیمان دیللندی کی سوروجو توختاسین.

"همت شهبازی" خاطرات دکتر سلام الله جاوید (۲ جیلدده)، شیرازه، ۱۴۰۱ ترجمه، تدوین و توضیح: رحیم رئیس‌نیا اوستاد تدقیقاتچی رحیم رئیس‌نیانین آذربایجان ملی حکومتی‌نین داخیلی ایشلر ناظیری دکتر سلام الله جاوید-ین حیات و اجتماعی-سیاسی فعالیت‌لرینی چئوره‌ین ایکی جیلدلیک #خاطرات‌دکترسلام‌الله‌جاوید کیتابی چوخ شئیلره ایشیق سالیر. کیتابین ایلک جیلدینده تدقیقاتچی‌، دکتر جاویدین فرقه‌دن اؤنجه و سونراکی حیاتی، شاه‌ رئژیمی‌نین تهلوکه‌سیزلیک تشکیلاتی «ساواک»ین پرونده‌سینده اولان فاکتلاری آراشدیریر. ایکینجی جیلد ایسه دکتر جاویدین فارسجا و تورکجه خاطیره‌لری‌نین فارسجایا ترجمه‌سینی احتیوا ائدیر. #آذربایجان‌ملی‌حکومتی داغیلدیقدان سونرا دکتر جاویدله علی شبسترینی خیانتده گوناهلاندیرانلار اولدو. تدقیقاتچی‌، خصوصی ایله دکتر جاویدین ساواک‌ تشکیلاتیندا اولان خصوصی دوسیاسینی اینجه‌لیکله آراشدیردیغی فاکت‌لارا اساسلاناراق دولاییسی ایله وورولان بو خیانت دامغاسی‌نین یانلیش اولدوغونو ثبوت ائتمه‌یه چالیشیر. او، فاکتلارلا گؤستریرکی دکتر جاوید حیاتی بویو فرقه‌ و سورگونلره معروض قالان فرقه عضولرینی اونوتماییر، الیندن گلن یاردیمی دا اسیرگه‌میر. سایین تدقیقاتچی پرونده‌ده اولان ساواک مامورلاری‌نین ان کیچیک راپورلارینی دا گؤزدن قاچیرمیر. دکتر جاویدین مطب یئرینه خسته آدی ایله گئدن ساواک مامورلاری‌نین یازدیقلارینی، اورایا گئدن فرقه عضولری حاقدا گزارش‌لری، دکتر جاویدین اونلارا ائتدییی یاردیملاری، فرقه تشکیلاتینا گیزلیجه رهبرلیک ائده‌رک اونو آیاقدا ساخلاماسینی بو مامورلارین گزارشلرینده گؤرمک اولور. تدقیقاتچی بورایا داخیل اولان گزارش‌لری آراشدیریر. . رحیم رئیس‌نیانین «جاوید»ین «ساواک» اداره‌سینده اولان دوسیاسی‌نین آراشدیرماسیندان بئله چیخیرکی «ملی حکومت»ین باشچی‌لاری، سونراکی دؤورلرده ده اؤزونون حقیقی فدائی‌لرینی اونوتماییر. حقیقی فدایی‌لر ده، بو دولته صادق قالاراق ۵۷.جی ایل انقلابینا قدر داوام ائدیر. بو زامان، انقلابین عموم بشری شعارلاری هر بیر کیمسه‌نی جذب ائتدییی کیمی، ملی حکومت فدایی‌لری ده اؤز مفکوره‌لرینی بو انقلابین چرچیوه‌سینده تاپدیقلارینی ظن ائتدیکلری اوچون گیزلی فعالیت‌لرینی دایاندیراراق انقلابا قوشولورلار. . گیزلی دولتین کناریندا، بلکه ده بیر-بیرلریندن خبرسیز اولاراق گیزلی ادبیات دا حیات سوروردو. گ.صباحی، ح.ساهیر، ب.سهند، م.ع.فرزانه، ب.بهزادی، س.جاوید کیمی‌لرین یازیلاری ال آلتی یاییلیر. بونلارین او دؤور یازدیقلاری‌نین درحال انقلابدان سونرا چاپ اولمالاری دا اونو گؤستریرکی گیزلی ادبیات، گیزلی دولت و گیزلی ملت اؤز ایچ‌لرینه چکیله‌رک آماجلارینی یاشاتمیشدیلار. ملتیمیزده اولان او دؤورکی اراده‌نی  من دئیردیم کی حتتا سونراکی دؤورلرده اولان نسبی سربست‌لیک دؤورونده ده  گؤرمک اولماز. اشغالا معروض قالمیش اؤلکه‌نین دولتی داغیلدیقدا، ملتی ده پَرن-پَرن اولور. دولتی اولمایانلار اوچون ایسه، یئنی بیر کیملیک یونتالایارلار. قایناق: دوشرگه https://t.me/Adabiyyatsevanlar

خاطرات دکتر سلام‌الله جاوید (۲ جیلدده)، شیرازه، ۱۴۰۱ ترجمه، تدوین و توضیح: ✍️ رحیم رئیس‌نیا 📚📚 https://telegram.me/dusharge1 ☘️