现已上线！2025 年 Telegram 研究 — 年度关键洞察 
3 090
订阅者
无数据24 小时
无数据7 天
-1430 天
帖子存档
3 089
Repost from ادبیات سئونلر
اوشاق ادبیاتی
«کارتون» میوه لرین صحبتی
اوشاق ادبیاتی هرهفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .
https://t.me/Adabiyyatsevanlar
3 089
اوشاق ادبیاتی
آذربایجانین ایلک اوشاق شعری
آذربایجان ادبیاتیندا ایلک اوشاق شعر کیتابینی 10– جی عصیر ده اؤلمزشاعیری «حکیم ملا محمد فضولی » یازییب دیر. اونون بو حاقدا یازدیغی کیتابی نین آدی « صحبت الاثمار » ( مئیوه لرین دانیشیغی ) دیر.
بو کیتاب تخمینا 200 بئیت دن عبارت اولان بیر مثنوی دیر. کیتاب، 1958 جی ایلده باکی دا « حمید آراسلی » طرفیندن یاییلیر. بو کیتابی کامیل «میرباقیروف» اوشاقلار اوچون نثره چئورییب،«مئیوه لرین دانیشیغی» 1376ده تبریزده « اسمر» نشریاتی طرفیندن یاییملانمیشدیر. اثرین اؤزونو بؤیوک لر اوچون یازیلماسینی دویوروق ؛ آنجاق درین فیکیرلشدیکده، یئنی چاغدا « جیزگی فیلیم لری » ( فیلم های کارتونی ) ، تمثیلی بیچیمده اوشاقلار اوچون حاضیرلانماسینی گؤرنده، « صحبت الاثمار » ین دا اوشاقلار اوچون تمثیلی بیر دیل ایله یازیلدیغینی دویورسان. بونا گؤره آذربایجانین ایلک اوشاق شعری ( بلکه ده من دئیردیم شرق ده ) فضولی یه عایددیر.
شاعیر بو کیتابدا مئیوه لرین دیلی ایله، اؤز نصیحت آمیز سؤزلرینی دئییر و هر بیر مئیوه اؤزونون خاصیتیندن دانیشیر. شعرده مئیوه لرین خاراکتئری واردیر. فضولی مئیوه لرین خاصیت لرینه اویغون سؤزلردن فایدالانیر. شاعیرین بو توصیف لرینده بوتون مئیوه لر اؤزو اؤزلویونده تایسیز دیر. هئچ بیر مئیوه، باشقا مئیوه لرین یاخشی لیغینی گؤرمک ایسته میر و هر بیری اؤزونو یاخشی لارین اَن یاخشیسی بیلیر. سوندا باغا سیاحته چیخان آدام دا ائله اونلارین یاراتدیغی بو اویومسوز دونیالاریندان قاچماق فیکرینه دوشور. بو مئیوه لر آراسیندا هئچ بیر فیکیر و دویغو بیرلشمه سی یوخدور. اونلار ین هربیریسی نین داورانیشی « بوردا منم باغداد دا کور خلیفه » ضرب المثلینی یادا سالیر.
https://t.me/Adabiyyatsevanlar
3 089
اوشاق ادبیاتژ
«حبیب فرشباف» 2شعیر
«آتام بئكاردير»
اوندا آتامين ايشي وارايدي
منه آلاردي چوخلو اويونجاق؛
ايندي بئكاردير پولو يوخ آنجاق،
ايش تاپسا، منه باشماق آلاجاق.
«يالانچي چوبان»
سحر- سحر بير چوبان
داغا ديرماشماق همان
اَلين قويوب قولاغا
چيغيراردي اوجادان
ـ قورد آپاردي قويونو
تئز گلين آي جاماعات!
قويمايين هَدهر اولسون
يازيقدير بو حيوانات!
الَه آغاجي گَلن
اوز قويارديلار داغا،
اونلاري گؤرهن چوبان
باشلاياردي گولماغا،
ـ اَده هارا گليرسيز؟
من ظارافات ائديرديم
بير تولكويموش گؤردويوم
من اؤزومو ايتيرديم.
هر گون يالانچي چوبان
اوتاراركن قويونو
كندليلرين باشينا
آچاردي بو اويونو.
بير گون يالانچي چوبان
سحر داغا ديرماشدي،
قويونلار قاباغيندا
اوكنددن اوزاقلاشدي،
نئچه جاناوار بيردن
ديرماشديلار درهدن،
چوبان چيغيردي هاراي !
آي جاماعات گلين هاي!
هر كس ائشيتدي سسين
سؤيدو اونون ددهسين
ـ فیلان، فیلان گؤرهسن
يئنه نه قورقو قوروب،
قارا قويون سوتوندن
يئييب چؤلده قودوروب.
بير نفرده گلمهدي
چوبانين كؤمهگينه،
چوبان دؤرد جاناوارا
نه ائلهسين تكينه؟
جاناوارلار بير آندا
سورويه داراشديلار
بئشين بوغوب دؤردون ده
گؤتوردولر قاشديلار
https://t.me/Adabiyyatsevanlar
3 089
اوشاق ادبیاتی
«حسن شیدائی»
اوشاقلار
گلین گلین اوشاقلار دستمال سَرین اوشاقلار
قیش دولانیب یازگلیب چیچک درین اوشاقلار
مامیلی ماتان اوشاقلار ائوده یاتان اوشاقلار
غم غصه نی اوره کدن چؤله آتان اوشاقلار
اوتورمایین آماندیر دؤوره بَریز دومان دیر
اوتورساز یاتاجاقسیز زامان آیری زاماندیر
آچین گؤزوزی اوشاقلار آنین سؤزوز اوشاقلار
اوزوزی بَرک ساخلایین اولون اؤزوز اوشاقلار
https://t.me/Adabiyyatsevanlar
3 089
اوشاق ادبیاتی
منه ایمکان یاراتسانیز منیمده قابلیت لریمی گوررسینیز.
https://t.me/Adabiyyatsevanlar
3 089
اوشاق ادبیاتی
سئوگی افسانه سی ۲
یازار:«صمد بهرنگی»
چئویرن:«منیژه جمنژاد»
💗 پادشاهین قیزی یاخشی حال دا دئییلدیر. همشه تک جانینا باغدا دولانیر، کیمسه ایله ده دانیشمیردی. کیمسهنی اؤزونه لاییق بیلمهییردی. ایکی یئکه گؤل ده باغین آراسیندا دو٘زلتمیشلر، بیری همشه یئنیساغیلمیش سود له دولویدو، بیری ده گولاب، قیزیل گول، یاسمن عطری له. ایکی جوان قوللوقچو بللی ساعاتدا باشلارینی آشاغی سالیب ائلهسی گؤلون باشینا گلمهلی ایدیلر، قیز سود گؤلوندن چیخیب گو٘لاب گؤلونه گیریب، چیخیب، حولهیه چولقالاناردی. قوللوقچولار بدنینه ال وورمامالی ایدیلر. بیرینین بارماغینین اوجو دا اونون تو٘کونه، دریسینه دَیسهیدی، ائله او گو٘ن الی، بارماغی کسیلمک اوچون جلادلارا تاپشیریلاردی. پادشاهین قیزی هامینی اؤزوندن اوزاقلادمیش، تک تنها قالمیشدیر، واقتینین نئجه کئچیرمهسینی بیلمزدی. کپنک توتماقدان، گو٘ل درمکدن، سود ده، گولاب دا یویونماقدان، اویناماقدان، یئییب ایچمکدن ، قورت لارا باخماقدان دا دویموشدو. چارهسیزلیکدن چوخو یاتاردی...
بو یازینین آردینی ادبیات سئونلر کانالیندا اوخویون
3 089
اوشاق ادبیاتی
سئوگی افسانه سی ۲
یازار:«صمد بهرنگی»
چئویرن:«منیژه جمنژاد»
💗 پادشاهین قیزی یاخشی حال دا دئییلدیر. همشه تک جانینا باغدا دولانیر، کیمسه ایله ده دانیشمیردی. کیمسهنی اؤزونه لاییق بیلمهییردی. ایکی یئکه گؤل ده باغین آراسیندا دو٘زلتمیشلر، بیری همشه یئنیساغیلمیش سود له دولویدو، بیری ده گولاب، قیزیل گول، یاسمن عطری له. ایکی جوان قوللوقچو بللی ساعاتدا باشلارینی آشاغی سالیب ائلهسی گؤلون باشینا گلمهلی ایدیلر، قیز سود گؤلوندن چیخیب گو٘لاب گؤلونه گیریب، چیخیب، حولهیه چولقالاناردی. قوللوقچولار بدنینه ال وورمامالی ایدیلر. بیرینین بارماغینین اوجو دا اونون تو٘کونه، دریسینه دَیسهیدی، ائله او گو٘ن الی، بارماغی کسیلمک اوچون جلادلارا تاپشیریلاردی. پادشاهین قیزی هامینی اؤزوندن اوزاقلادمیش، تک تنها قالمیشدیر، واقتینین نئجه کئچیرمهسینی بیلمزدی. کپنک توتماقدان، گو٘ل درمکدن، سود ده، گولاب دا یویونماقدان، اویناماقدان، یئییب ایچمکدن ، قورت لارا باخماقدان دا دویموشدو. چارهسیزلیکدن چوخو یاتاردی. همشه ده قوچعلینی یوخودا گؤرردی. قوچعلی پادشاهین قیزی له اویناماغا گلردی. قیز اؤنجه سئوینردی، سونرا پادشاهین قیزی اولدوغو، باشقالاریندان چوخ اوستون اولدوغو یادینا دو٘شردی. اوندا قاش قاباق ساللاییب، قوچ علینی اوزاقلاداردی. آما قوچعلی بوراخمازدی. اونون الینی توتماق ایستردی. قیز الینی چکردی. آما سونوندا، قوچ علی الینی توتماسینی قویاردی، ایکیسی اویناماغا، آتیلیب دو٘شوب کپنک توتماغا باشلاردیلار. اویونون آراسیندا قوچعلی دئیردی: شازدا خانیم. من سیزه عاشیقام. خواهش ائلیرم منده سیزجان اولاندا منیم له ائولنین. بوردا گئنه پادشاهین قیزی اولدوغو یادینا دو٘شوب، قوچعلیه سیلی ووروب، های- کوی سالاردی. قوچعلینی جلادلارا تاپشیراردی، بیردن اؤز باغیرتیسی نا یوخودان اویاناردی...
همشه بو یوخونو گؤردی. یوخودا باشقا اویونداش گؤره بیلمزدی. هله یوخودا قوچعلینی ده هامان یاشلاردا، هامان اوشاقلیق او٘ست باشیله گؤرردی. پادشاهین قیزینین ائلچیسی ده واریدی. نئچه شاهزاده اوزاق مملکتلردن ائلچیلیینه گلمیشلر، آما او گؤرمهدن اونلاری رد ائله میشدی، من کیمسهنی اؤزومدن ساوایی سئومرم دئمیشدی.
بیرگون پادشاهین قیزی سو٘د گؤلونده یویونوردو. بیر گؤیرچین گلیب، گؤلون قیراغیندا، نار آغاجیندا اوتوروب دئدی: آی گوزل قیز، سنین نه گؤزل بدنین وار! من سنه عاشیق اولدوم. خواهش ائلیرم، سو٘دون ایچیندن چیخ، من سنه گوزلجه باخیم. پادشاهین قیزی دئدی: آی کیفیر قوش، سنه امر ائلیرم بوردان گئت. من شازدا خانیمام، کیمسهنین منه باخماغا حاققی یوخدور. کیمسهنین منیمله دانیشماغا لیاقتی یوخدور. گؤیرچین گو٘لوب دئدی: آی گؤزل قیز، بیلیرم چوخداندیر قولاق یولداشین اولماییب... پادشاهین قیزی بیردن شازدا اولدوغونو اونودوب، یومشاییب دئدی: آی خوش دانیشیقلی گؤیرچین، خواهش ائلیرم منه باخما. یاخشی دئییل. گؤیرچین دئدی: آی گؤزل قیز، الیمده دئییل، سنی سئویرم. قیز دئدی: آی خوشصحبت گؤیرچین، من کی گؤیرچینین عشقین قبول ائده بیلمرم. اگر دوغروچو عاشیقسان جیلدیندن چیخ، منده سنه باخیم. گؤیرچین دئدی: آی گؤزل قیز، منیم عشقیمی قبول ائدهجهیینه آرخایین دئییلم. آرخایین اولوب، جیلدیمدن چیخمام اوچون ساخلامالی بیر شئی وئر. قیز دئدی: آی خوش صحبت گؤیرچین ایسته دییینی وئررم. گؤیرچین دئدی: آی گوزل قیز، یوخونو منه وئر. قیز دئدی: آی خوش صحبت گؤیرچین، منیم یوخوم نه ایشینه گلر؟ گؤیرچین دئدی: آی گؤزل قیز، سونرا نه ایشیمه گلهجهیینی گؤررسن. قیز دئدی: آی خوشصحبت گؤیرچین، یوخوم سنین اولسون. بو آندا قیزین قوللوقچولارینین آیاق سسی گلدی، حوله اللرینده باشلاری آشاغی، گلیردیلر. گؤیرچین دئدی: آی گؤزل قیز، یوخون منیم اولوب. قوللوقچولارین گلیرلر. من گئتدیم. سونرا گئنه گلرم. آدینی " قیز خانیم " قویدوم. سنین کیمی گؤزل قیزین آدی اولماسا پیس اولار. پادشاهین قیزی بیردن شازدا اولدوغونو خاطیرلاییب باغیردی: آی کیفیر حیوان، سن نه حاق لا منیمله دانیشیردین؟ منیم یوخومو قایتار. یوخسا او٘رهک بؤیرهیینی بوغازیندان چکیب چیخارارام. او کیفیر آغزین لا منه آد قویماغا حاققین یوخدور. آما گؤیرچین چوخدان نار آغاجیندان اوچوب گئتمیشدیر. پادشاهین قیزی یئرسیز سینیرلهنیب، جلادلاری یاردیما چاغیریردی.
نئچه هفته بویو پادشاهین قیزی بیر دیقه ده یاتمامیشدی. گؤزونه هئچ یوخو گیرمهییردی. اؤنجه یوخوسوزلوقدان خستهلنمیش دیر، هامی اونون دلی اولدوغونو دو٘شونوردو. قودوز ایت کیمی اوتاغیندا یئرییردی، در دوواری چنگهلهییردی، هامیا یامان دئییردی. کیمسهنی یانینا قویموردو. ددهسینی ده، حکیملری ده. گئجه گو٘ندوز تک تنها ایدی. سونوندا یورغون، ناخوش دو٘شوب قالدی. بو دفعه ده گؤزونه یوخو گلمهییردی.
3 089
Repost from ادبیات سئونلر
اوشاق ادبیاتی
اوشاق ادبیاتی هرهفته پنجشنبه گونو ادبیات سئونلر کانالیندا،
اوشاق ادبیاتینا دایر یازیلارینیزی بیزه گوندرین.
https://t.me/Adabiyyatsevanlar
3 089
حسن ایسه دیشلرینی آغارداراق درحال راضیلاشمیشدی. قوربان دوشونوب، هامینی تعجبلندیرن سوال وئرمیشدی: «اوبادا کیمسه کئچی پئندیری و یا اینک یاغی ساتیر؟» اونا گولهرک دئمیشدیلر کی، ساتماق نهدی؟ سنه پای قویاریق آپارارسان. او ایسه: «منه چوخ لازیمدی. ایییرمی کیلو پئندیر و یا اون کق یاغ» -دئمیشدی.
اوباداکی انسانلارین و یولداشلارینین تکیدینه باخمایاراق قوربان سحر دان یئری سؤکولنده تک یولا چیخمیشدی. داغ یولو ایله اوزوآشاغی، هر الینده اون کیلولوق وئدره، بئش کم یولو گئتمک آسان دئییلدی. آنجاق او چوخ تلهسیردی. گئجیکه بیلردی دئیه، وار گوجونو توپلاییب، آز دایانماغا و تئز-تئز گئتمهیه چالیشیردی. اللریندهکی دوننکی اوزوم وئدرهلرینین یئرینی ایندی پئندیر وئدرهلرینین قولپو کسیردی.
***
علی گئتمهیه حاضرلاشیردی. یاخشی اوتولنمیش قارا شالوار، آغ کؤینک گئیینیب، ننهسی، آتاسی-آناسی و باجیسی ایله گؤروشدوکدن سونرا آناسینین اونون اوچون حاضرلادیغی سووقات دولو ایری چانتاسینی الینه آلیب، گولهرک دئدی:
-یاخشی، بو مورابّا، پئندیر، اوزوم کیمی یئیه جکلری چانتایا ییغمیسینیز کی، آغیر گلسین؟ هله آنامدان اولسا ایدی، کارتوف-سوغان دا قویاردی. بس پول؟ اوردا چؤرهیی پئندیر وئریب آلاجام، یا مورابّا وئریب مئترویا مینهجم؟
هامیسی اونون بو سؤزونه گولدولر. آنا نیگاران حالدا، یئنه پنجرهدن یولا باخیب اونا یاخینلاشدی و الیندهکی آز مقدار پولو اونا اوزادیب دئدی:
-آنان اؤلسون، آتان احتیاجیمیز وار ایدی دئیه، عریضه یازیب معاشی واختیندان تئز آلدی، خرجلهدیک. گؤتور بونو، بیرتهر اؤتوش، گلن معاشدا گؤندهرریک.
ننهسی سؤزه قاریشدی:
-سیزین نه واخت احتیاجینیز اولماییب کی... بو اوشاغا پول ساخلامادینیز. ایندی اوردا طلبه یولداشلاری پول چیخارداندا، بو نئیلهیهجک؟
آتاسی ساعتا، سونرا ایسه علییه باخیب گولومسهیهرک اوشاق واختی سؤیلهدییی کیمی دئدی:
-کوپولو کیشیسن. باخ گؤر، صندلرین یئریندهدیرسه، گئدک سنی یولا سالیم. قاتارا گئجیکهجکسن.
علی گولومسهییب دئدی:
-او معرفتسیز یالانچیدان موغایات اولون، قویمایین ائوه گئج گلسین، آوارا ایشلرله مشغول اولسون. ایندی آللاه بیلیر هاردادیر، بیزی ده آلدادیب کی، داغا گئدیرم...
علی ایله آتاسی گئتدیلر. ننه ده چیخدی حیطه. اون دقیقه کئچدی. قوربان قارانفس ایچهری گیردی. تئز الیندهکی حاضر ساخلادیغی پولو آناسینا اوزاتدی. باجیسی پولون هئچ آنانین الینه ديمهیینه ماجال وئرمهدی. جلد گؤتوروب علی گیلین آرخاسینجا قاچدی...
آنا قوربانین اوزونه خئیلی باخیب سوروشدو:
-نییه گئج گلدین؟
قوربان زورنان گولومسهییب دئدی:
-بازارا پئندیر ده آپارمیشدیم.
آنانین گؤزلری یاشاردی، اؤزونو آغلاماقدان گوجله ساخلاییب دئدی:
-نئچه گوندور اینکلری ده چؤلده ساغیب، خسته پیشیک بالالارینی یئدیزدیریرسن...
هر ایکیسی سوسدو. آنا پنجرهدن یولا باخاراق یاواش سسله دئدی:
-وصيّت ائدیرم کی، من اؤلهنده سن هارادا اولسان، گؤزلهسینلر. سنین چییینلرینده قبره گئتمک ایستهییرم.
***
بیر آیدان چوخ ایدی کی، علی اونو گؤرمک ایستهییردی، گؤره بیلمیردی. نهایت گؤردو، یونجا ساحهسینه گئدن کیچیک آرخین کناریندا دورموشدو. یانیندا ایکی ساریمتیل پیشیک بالاسی وار ایدی. سما آیدین، غریبه قاریشیق و نورلو رنگده ایدی. گونش اوفوقده باتانا یاخین، قیرمیزیمتیل-ساری رنگده، هم ده ایری ایدی و سانکی حرکت ائتمیردی. بورادا زامان ایشلهمیردی... آرخین ایچیندن دوم-دورو سو آخیردی. آرخین قیراقلاریندان ساللانان، کئچن ایلدن قالان سارالمیش چاییر اوتونون نازیک یارپاقلارینی آخار سو آپاریرمیش کیمی، اوزهرینده اوزدوروردو. هر طرف یاشیل چمنلیک، اکین ساحهلری و توپا-توپا بیتمیش آغاجلاردان عبارت ایدی. او، قونور-قیرمیزیمتیل رنگلی کؤینکده، لاپ گنج یاشیندایدی. سیماسی داها گؤزل، سما کیمی نورلو، کئفی کؤک، تبسّوملو دایانمیشدی. گولومسهیهرک، قایغیلی حالدا دئییردی-« نئیلهییردین دفنه، یاسا بو قدر خرج چکیردین. بیلمیردین کی، جاوان آدامین احسانینی یئمیرلر؟ اؤز راحتلیغینا خرجلهیه ایدین...»
https://t.me/Adabiyyatsevanlar
3 089
ایندی ده اؤزونو حالسیز و اشتهاسیز حسّ ائدیردی. سون ایکی گئجهده چوخ آز یاتماسی یورغونلوق و باشگیجهللنمهسی عمله گتیریردی. اودور کی، یئمیشان آغاجینین کؤلگهسینه چکیلن سوفرهلرینی آچان یولداشلاری اونو چؤرک یئمهیه سسلهینده «سیز یئیین منیم اشتهام یوخدور» دئدی. اشتهاسی اولماسا دا، اصلینده اوزانیب دینجلمک، هئچ اولماسا، بیر ساعت یاتماق ایستهییردی. یولداشلاریندان بیری «حسن» اوندان بیر صینیف آشاغی اوخویوردو. دیگرینین «واقیف»ین ایسه ۴۵-۵۰ یاشی اولاردی. واقیف ساققیز توتماق هوسکاری ایدی. حسنی ایسه ساققیز یوخ، بو داغلاری گزمک و بورادا آراق ایچمک داها چوخ ماراقلاندیریردی.
اونلار هوسله سوفرهلرینی آچدیلار. ائودن گتیردیکلری یئمکلری سوفرهیه دوزدولر. واقیف یئنیدن قوربانی سسلهدی:
-گل چیخ گؤرک... سنی گؤزلویوروک.
حسن ده اونا قوشولدو:
-نئیلهیهجکسن او قدر ساققیزی؟ ساتاجاقسان؟ گل گؤرک. گتیردییینی ده چیخارت قوی اورتایا.
داغ ساققیزینی دوغرودان دا ساتیردیلار. بیر پارچدان اللییه یاخین چئینم (بیردفعهلیک چئینهمک اوچون کیچیک پارچالار) چیخیردی. رایون مرکزینده چئینهمهیینی ۴۰-۵۰ قپیکدن ساتماق اولوردو. قوربان دوروب، کؤنولسوز حالدا اونلارا یاخینلاشدی. تورباسینی آچیب پئندیر پامادور و بیر شوشه اوزوم آراغی اورتایا قویدو. سونرا ایسه یئمیشانین کؤلگهسینده آرخاسی اوسته اوزانیب دئدی:
-سیز یئیین. من بیر آز یاتیم یوخوم گلیر.
یولداشلاری تعجبله اونا باخدیلار. واقیف دئدی:
-آ بالا، دور چؤرهیینی یئ. سحردن آجیق.
حسن آراق شوشهسینه باخا-باخا دئدی:
-دونن تئزدندن،گون اورتایا قدر تندیره سرینیزین آرخاسیندان توستو چیخیردی. ایندی الله بیلیر، نه قدر سپیرت چکمیسن. آخشامدان دا بیزی قیزیشدیریب بورا گتیرمیسن. ایندی بو نهدی؟ بیر شوشه آراقلا بیز اوچ نفر ایکی گون بوردا نئیلهیهجیییک؟
قوربان ائله اوزانمیشدی کی، گؤرن دئیردی بیر ده یئریندن قالخمایاجاق. یورغونلوق و یوخوسوزلوغون اوزهرینه ولیش کیشینین قامچیلارینین یئرینده یارانان آغری قاریشیق ذؤوقلو سیزیلتی، سرین و چیچک قوخولو داغ هاواسی اونا اعجازکار یوخو گتیریردی. یولداشلارینین سسینی گوجله ائشیدیر، چتینلیکله درک ائدیردی. یاواش سسله دئدی:
-واقیف دایی، سیز یئیین، یئمک ایستهمیرم. یوخوم چوخ گلیر. حسن سن ده او بیر شوشهنی ایچ بسیندی. منیم آراق ایچدیییمی گؤرموسن؟ بیر ده کی، من بو گون آخشام قاییتمالییام.
حسن اونا آجیقلاندی. آراغین بیر شوشه اولماسی کئفینی پوزموشدو. ایستهدی اونون اوستونه قیشقیرسین، اؤزونو ساخلادی. قوربانین دمیر کیمی بیلکلری، سرت یومروقلارینین دادینی بیلیردی. اودور کی تا دینمهدی. واقیفه گؤز-قاش ائدهرک قوربانی سوفرهنین باشینا چاغیرماسینی ایستهدی.
-قوربان، بو یولداشلیق اولمادی کی، سن اوردا یات، بیز چؤرک یئیک. دور گل، یئمهیینی یئ. سونرا بیر آز یاتارسان.
بوتون یئنییئتمه و گنجلر کیمی، بو یولداشلیق صحبتی قوربانین اینجه دامارینا توخوندو. اؤزونو توپارلاییب سوفرهنین باشینا گلدی. حسن تئز سئوینجک تورباسیندان اوچ بالاجا ایستکان چیخاردیب آراق سوزدو. واقیف ایستکانی قالدیریب دئدی:
-سیزینله یولداشلیغا دير، سیزین ساغلیغینیزا ساغ اولون!...
حسن تئز ایستکانی توققوشدوردو، قوربانین الینی ایستکانا طرف آپارمادیغینی گؤروب دئدی:
-گؤتور، گؤتور ووراق تا مکتبی ده قورتارمیسان. نه گؤزلهییرسن؟ هئچ بونون لذّتینی بیلیرسن؟ ساغ،چ اولسون، واقیف عمینی. آلتی آی اولار کی بونون نئجه بیر عوضسیز نعمت اودوغونو منه باشا سالیب.
او، قوربانین ایستکانی یئنه گؤتورمهدییینی گؤروب واقیفه اشاره ائتدی. واقیف گولومسهیهرک دئدی:
- قوربان بو جور داغ هاواسی، بیزیم کیمی یولداشلارلا ایچمهمک، یولداشلیغا دا، بو سوفرهیه ده حؤرمتسیزلیکدی. گؤر هله خوموش خالان سیزه نه جور چولپا قیزاردیب. گؤتور گؤرک، نئجه آراق چکمیسن.
قوربان همین گون ایلک دفعه آراق ایچدی. بیر ایستکان، آز کئچمدی کی، اورک بولانتیسی گوجلندی. یئییب-ایچدیکلرینی قوسدو. یئمیشانین کؤلگهسینده اوستونه پئنجهیینی آتیب یاتدی. یوخودان اویاناندا، گونون آخشاما دوغرو اییلدییینی و یولداشلارینین دا یاتدیغینی گؤردو. برک آجمیشدی.
سوفرهیه باخدی، شوشه بوش ایدی و یئییلهجک بیر شئی قالمامیشدی. واقیفین یولداشلیق فلسفهسینین اینجه دوستورلارینی آراق حلّ ائتمیشدی.
یولداشلارینین تکیدی و آخشامین دوشدویونو گؤروب، گئجهلهمک اوچون یاخینلیقداکی اوبایا گئتمیشدیلر. اوباداکی قوناقپرور انسانلار ال چکمهمیشدیلر کی، صاباح قالاجاقسینیز و سیزه چپیش کسهجهییک یئییب، ایچهجهییک. چپیش و یئییب-ایچمک آدی گلنده واقیف یئنه اؤزون مخصوص شکیلده ائل عادتلریندن، قوناقپرورلیکدن فلسفه آچمیش، بو تکلیفین اورهگیندن اولدوغونو چپیش دریسی ایله اؤرتمک ایستهمیشدی.
3 089
-سؤز سوروشمورام؟- دئیه علی یئنه آجیقلا سوال ائتدی.
-بهمز دوزهلدیرم... - سن گئت! اوست-باشینا هیس قوناجاق، من ده بیر آزدان گلیرم... اوچ-دؤرد گوندن سونرا گئده جکسن، یئنه درسلرین باشلایاجاق. گئت دینجل. - قوربان قایغیلی حالدا قارداشینا دئدی.
علی یاخینلاشیب، اونون دوزهلتدییی قریبه آپاراتا باخماغا باشلادی.
-ا، بو نهدیر دوزلتمیسن؟ سن لاپ کیمیاگرسن کی، لابوراتورییادیر ائلهبیل.
قوربان گولوب، بارماغینی توشلاییب ایضاح ائتمهیه باشلادی:
-باخ، بورادا اوزوم اولان قابین آلتینا اودون قویوب، یاندیریرام. اوزومون بخاری بو توربادان کئچیر. توربا سویوق سو اولان بوچکادان کئچیر، بخار مایع حالینا دوشور. گؤرورسن، اورادان دا بهمز سوزولور. ایستهییرسینیز گلیم، سیزین اینستیتوتدا دا بوندان بیرینی دوزهلدیم. آج طلبهلرسینیز، بوتون گونو بهمز یئیین.
او بونلاری دئییب گولمکدن اوغوندو. علی ده گولومسهییب دئدی:
-ائی کیمیاگر. هئچ بیلیرسن ویتیس سیلوئستریس نه دئمهکدیر؟
قوربان باشینی قاشیییب گولهرک:
-هاردان بیلیم نهدیر؟ دئ بیلیم
علی:
- لاتینجا اوزومون بینالخالق آدیدیر «ویتیس سیلوئستریس» دئیهنده سن ده، زنجی ده، مونقول دا صحبتین اوزومدن گئتدییینی باشا دوشور. -باخ بو باشینا حوققا آچدیغین اوزومدن- قوربان قهقهه چکیب گولدو. سونرا دئدی:
-قاقاش، سنین ایشین-گوجون یوخدور؟ نییه گئدیب دینجلمیرسن، حیطی گزیب اؤز الینله مئیوهلردن ییغیب یئمیرسن؟
علی اونا ترس-ترس باخدی. سونرا یاخینلاشیب، سوزولن مایعدن اووجونا ییغیب، قوخلادی. اوز-گؤزونو تورشودوب، حرصله دئدی:
-ا، بو کی، سپیرتدی . نه بهمز. سنین نه واخت دیلینه دوز سؤز گلهجک؟ بو ایل مکتبی بیتیردین، وورما جدولینی بیلمیرسن! آوارا-آوارا ایشلرله مشغولسان. ایندی بو سپیرتی نئیلیهجکسن؟ یوخسا آراق دوزه لدیب ایچهجکسن؟
قوربان باشینی آشاغی ساللاییب دینمهدی. او هئچ واخت نه ایندی-نه ده سونرالار عائله-اوشاق صاحبی اولاندا دا علینین تنقید و دانلاقلارینا جاواب وئرمزدی. هئچ اؤزونه برائت قازاندیراجاق فیکیرلر ده سسلهندیرمزدی.
-منه دوزونو دئ، بو سپیرت سنین نهیینه لازیمدیر؟ جاواب وئر یوخسا ایندی ووروب آشیرداجام هامیسینی!!!
اونلارین سسینه آنا گلدی. علینین قولوندان توتوب، اؤزونه طرف چکرک دئدی:
-گل گئدک، قوربان ایشینی قورتاریب، گلر.
علی لاپ عصبلهشدی:
-نه ایش؟ بو آدام پیس ایشلرله مشغولدور. هئچ واخت دوز سؤز دانیشمیر. گئجه یارییا قدر وئییللهنیر. ائوه گلمیر. ایندی ده آراق دوزلتمهیه باشلاییب. سیز ده فیکیر وئرمیرسینیز. بونون آخیری یاخشی اولمایاجاق! -بونو دئییب، یاخینلاشیب قوربانین «آپاراتی»نی ووروب آشیرماق ایستهدی.
آنا اونون قاباغینا کئچیب، قولوندان توتوب ائوه طرف چکرک دئدی:
-گل، سونرا دانیشاریق.
-بونون ایشینه باخ! اوست-باشیندان، اوز-گؤزوندن جین هورکور! سونرا اؤزونوز ده پئشمان اولاجاقسینیز!
علی بونلاری دئییب، آجیقلی حالدا اورادان اوزاقلاشدی.
همین گون آخشامچاغی قوربان ائوده یئنه دانلاندی، بو دفعه آناسی:
-اینکلری آخشام هؤروکدن آچیب گتیرنده یونجا ساحهسینین قیراغیندا نییه یاخشیجا اوتارمیرسان؟ سودلری آزالیب. -دئیهرک دانلادی. او همیشهکی کیمی دینمهدی.
***
اوچ یولداش ایدیلر. هرهسی بیر طرفده ساققیز کوللارینین داشلی، چینقیللی دیبلرینی اوّل کولونگله، سونرا ایسه اوجو دؤیولهرک سیوریلشمیش میخلا قازیردیلار. سونرا بویلاری بیر مئتره چاتان، آچیق کول رنگلی یارپاقلاری و زوغلاری خیردا توکجوکلرله اؤرتولموش، ساری چیچکلی ساققیز کوللارینین یئرین آلتیندا قالان، دیامئتری اوچ-بئش سم اولان، قارا رنگلی اساس کؤکونو ایتی بیچاقلا کسیردیلر. بو زامان آغ رنگلی سوده بنزر، نسبتاً قاتی مایع چیخیردی. کسیلمیش کولو قازیلمیش یووانین اوستونه قویوردولار کی، گون دوشمهسین. چونکی گون دوشنده کول آز سود وئریردی. بیر آز سونرا بیچاقلا همن قاتیلاشمیش سود او سیییریب ایستکان و یا پارچین ایچینه تؤکوردولر. ساققیز کولونون کؤکونو بیر آز آشاغیدان یئنیدن کسیردیلر. هر دفعه یئنیدن کسدیکجه چیخان سود آزالیردی. پارچا ییغیلان سود داها دا قاتیلاشیر، برکیییر، آچیق شابالیدی رنگ آلیردی. بو دا اولوردو طبیعی ساققیز. ساققیز سیخیلیب برکیدیکجه، پارچین اوزهرینه توند-قونور رنگلی سویو چیخیردی. بو سو آجی ایدی و معده-باغیرساق خستلیکلری قوردقوووجو کیمی، عوضسیز طبیعی درمان ساییلیردی. طبیعی ساققیز اؤزو ده، هم بو باخیمدان، هم ده دیشلرین دیبینین مؤحکملنمهسینده فایدالی ایدی.
گون آز قالیردی گون اورتا اولسون. چوخ یورولموش هم ده آجمیشدیلار. سحر هاوا ایشیقلاشمامیش کندین ماگیسترال(اصلی جاده) یول کئچن حیصّهسینده گؤروشموش ایکی ساعتدان آرتیق یول گلمیشدیلر. قوربانین آوتوموبیلله، اوزاق یول گئتمکله، هئچ آراسی یوخ ایدی. بِنزین قوخوسو گلن کیمی اورهگی بولانیردی.
3 089
بو باغلارین حسابینا معاش آلمیش، ائو-ائشیک دوزلتمیش، محصول واختی کلّی مقداردا مکافاتلار آلمیش، اوغول-اوشاق بؤیودوب، اوخودوب، ائولندیرمیشدیلر... قیش آیلاریندا ایسه بو پوللار حسابینا بوتون سووئتلر مکانینداکی کورورتلاری گزمیشدیلر، سونرا ایسه بوتون حیصّهلریندن اودونجاغیندان، یارپاقلاریندان، قوراسیندان، مئیوهسینین توخوموندان( چت دئییردیلر) لجهییندن، اؤزوندن ایسه، هم طبیعی حالدا، هم قورودولموش حالدا یئییلن شیرهسی، سپیرتی شرابیندان گئنیش استفاده ائدیلن، قرآندا آدی دفعهلرله چکیلن عوضسیز بیتکیلردن اولان اوزومه قارشی اینسانلار آمانسیز بیتکی سویقیریمی حیاتا کئچیردیلر. اوزوم تنکلری ده بوتون بیتکیلر کیمی بو خیانتی انسانا باغیشلادی؛ یئنیدن پؤهرهلهدیلر، لاکین اینسانلار فیکیرلرینده، اونلاری محو ائتمک قراریندا قطعی ایدیلر. ائله بیلیردیلر کی، اونلاری محو ائتسهلر، یئریندن قیزیل پاریلداییب اوجالاجاق... و باشلادیلار سئپلی تراکتور سالیب، بو یئرلری شوملاماغا، تنکلرین یئرین آلتیندا قالان گؤودهلرینی ده کؤکوندن چیخاردیب آپاردیلار. تنکلر یئنه پؤهرلهیردیلر، آنجاق انسانلاری چوخ سئودیکلریندن اونلارین آرزولارینی همیشهکی کیمی اورکلرینده قویمادیلار و بیر داها او یئرلرده گؤرسنمهدیلر. او یئرلردن قیزیل-فیلان دا چیخمادی.
سونرالار خا اوتیک تصرّوفاتچیلیغین کیم نه گلدی اکدی. کیمیسی ده هئچ نه اکمهدی سوواریب مال-قویون اوتاردی، نتیجهسینده چوخلو قیغ، تس-تزکلر بیتدی... اینسانلار ایشلرینی آخیرا چاتدیردیلار. باغلارین مفتیللرینی آچیب، حالقا شکلینده توپالار دوزلتدیلر، شپالئرلری ده چیخاریب ائولرینه گتیردیلر. واختیله اوزوم زوغلارینی، سالخیملارینی ساخلایان شپالئرلردن حاصار، تویوق حینی، آیاقیولونون اوستونو اؤرتمک اوچون استفاده ائتدیلر. شراب زاوودلارینین مئتاللارینی سؤکوب، مین تونلوق چنلری کسیب، تئز-تلسیک قونشو اؤلکهلره آپاردیلار، تسبئح، ایت دریسیندن «مودنو کوژا» آیاققابیلار، «باککوش»، «ساری قیز»، «ایمپورتنی عطیرلی» ساققیزلارلا ديیشدیلر...
ولیش کیشی خوشبخت ایدی کی چارداغینین یاندیغینی گؤرسه ده، بو گونلری گؤرمهدی...
***
گون خئیلی یوخاری قالخمیش، ایستی دوشموشدو. علی ایندی یوخودان اویانیردی. بیر آز دا یئرینده ساغا-سولا فیرلانیب، یوخودان سونراکی یئردم-یئرینده ائشهلنمهیین دادینی چیخاردیردی. آناسینین سسی گلدی:
- آنا قوربان، گون اورتادی آدام بو قدر یاتار؟ دور گل آشاغی.
علی یئریندن قالخیب ایکینجی مرتبهدن آشاغی دوشدو. ال-اوزونو یودو، دیشلرینی فیرچالادی. باجیسینین گتیردییی تزه دسماللا ال-اوزونو سیلدی. سونرا بارماغی ایله آغ کؤینهییندهکی کونجوت دنهسی بویدا لکهنی اونا گؤستهریب، یئنی کؤینک ایستهدی. اونا تاماشا ائدن ننهسی زارافاتلا دئدی:
-نه دیر؟ موسکوادان گلییدیر کی، تزه صابون دسمال وئریرسینیز؟ یا نارکوم(دولت گوونلیک کمیتهسی) اوغلودور.
آناسی گولوب دئدی:
-هه، منیم بالام اؤزو نارکومدور. آناسی اؤلموش، اوشاقلیقدان بئلهدیر. چوخ تمیزکاردیر. گرک اوزونو سیلدییی دسماللا هئچ کیم سیلینمهسین.
علی آخشامدان ساغیلمیش اینک سودونون قایماغی ایله شیرینچای ایچدی. کئچی پئندیری ایله کیشمیشی اوزومدن یئیه-یئیه آناسیندان سوروشدو:
-قوربان هانی؟ گؤزومه ديمیر.
آنانین اوزو قایغیلی ایفاده آلدی. بیر آز دوشونوب دئدی:
-حیطدهدیر. سن چؤرهیینی یئ، گلر ایندی...
آنالار هرهسی بیر عالم اولان اؤولادلارینین مخصوصی دونیالارینی اؤزلرینده بیرلشدیرن نهنگ کائناتلاردیر. آنا سئوگیسی هر اؤولادین دونیاسینی احاطه ائدر، ایسیدر. قوش قانادلاری بوتون یومورتالارینی احاطه ائتدییی کیمی...
-آخی من حیطده قوربانی گؤرمهدیم- علی بونو دئییب آیاغا قالخدی. او، بعضا قارداشینا اللم-قللم ایشلرینین اوستونده آجیقلانسا دا، آجی سؤزلر دئسه ده، اونو اؤزوندن چوخ ایستهییردی و همیشه ده اوندان اؤترو نهدنسه نیگاران ایدی. اودور کی، آناسینین سیماسینین تئز ديیشدییینی قایغیلی گؤرکم آلدیغینی درحال گؤرموشدو.
علی حیطه چیخیب یان-یؤرهیه باخدی. قوربانی گؤرمهدی. ائوین قیراغیندا تندیره سر دئییلن، عادتاً پالچیق کرپیجدن هؤرولن، ایچهریسینده تندیرین اولدوغو کیچیک بیر تیکیلی واردی. علی آلاباشین اورادا یاتدیغینی و تندیره سرین آرخاسیندان توستو چیخدیغینی گؤردو و اورا گئتدی. قوربانی گؤروب، تعجبله سوروشدو:
- ا، سن نه ایش گؤرورسن؟ اوست-باشین پالچیق، اوز-گؤزون هیسین-پاسین ایچیندهدیر.
قوربان اونا باخیب، گولومسهدی. نهدنسه قوربانین بو آنداکی گولومسهین ایری قارا گؤزلریندهکی و سیماسینداکی دوغمالیق قایغیلی ایفاده و بورادا ائدیلن صحبت همیشهلیک علینین گؤز و سس یادداشیندا قالدی.
3 089
بونا باخمایاراق، بئلینده نازیک، یاندیریجی آغری حیسّ ائتدی...
-سنه دئییرم دایان! اونسوز دا، قاچا بیلمیهجکسن کوپویوغلو!- ولیش کیشی باغیردی.
او، سؤیوشه دؤزمزدی هئچ واخت، ایستهدی ولیش کیشینی سؤیسون، آنجاق بو فیکیردن داشیندی. دوشوندو کی، بلکه هله اونو تانیمیر. قارانلیقدی، سسینی چیخارسا، تانییار. آتاسینی ادارهیه چاغیرارلار... اوندان باشقا جوره حئییف چیخماق قرارینا گلدی.
قارا آت یوز مئترلیک جرگهنی سرعتله باشا کیمی قاچیر، ولیش اونو چؤندهریب، یئنیدن یئنی جرگهیه سالیردی. آت چاتانا قدر قوربان مفتیللرین آراسیندان ایکی جرگه او طرفه کئچه بیلیردی. آنجاق آرادا بیر قامچی دا بؤیروندن برک ديمیشدی کی، اونون یئرینین گؤیرتیسی ایکی آی قوربانین بدنینده قالمیشدی... قریبه دیر کی، همن بو ولیش کیشینین ده سونرالار پیتیلی-اوزوملری ییغیلمامیش باغا گیرمیش قوزولارینی قامچیلادیغی اوشاقلار داشلاییب، بؤیرونو زدهلهدیلر. ولیش کیشی ائله بو زدهدن دونیاسینی ديیشمیشدی...
دان یئری سؤکولور، هاوا ایشیقلانیردی. آرتیق ولیش کیشی، قوربانی تانیمیشدی و عنادیندان ال چکمیردی. او، آتینی چاپاراق جرگهنی اوزونونا، قوربان ایسه الینده وئدرهلری ائنینه کئچمکده داوام ائدیردی. آلاباش دا هوره-هوره آتین دالینجا قاچیردی. آنجاق اونون تپیییندن قورخاراق چوخ یاخینلاشمیردی. هم آلاباشلا آت، هم ده قوربان برک یورولموشدولار. آنجاق ائله بیل دوغولاندا گؤبهیی اوزوم باغلارینا آتیلمیش، سووئت املاکینی قوروماغا بئشیکده آند ایچمیش ولیش کیشی گئت-گئده لاپ جوشوردو.
انسان فیزیکی جهتدن یورولاندا، تنبللشنده وضعيّتدن چیخماق اوچون بئینی داها سرعتله ایشلهییر. آغلینا غئیری عادی فیکیرلر داها تئز گلیر. قوربانین دا آغلینا چیخیش یولو گلدی- آتی ییخماق لازیم ایدی...
قوربان وئدرهلرینی اوزوم کوللارینین دیبینه ائله قویدو کی، آت قاچاندا ديیب، آشیرماسین. بونون اوچون وئدرهلری تنکلرین گؤودهلری ایله یاناشی، عینی سیرادا یئرلشدیردی. سونرا همن یئردن نیسبتاً گئرییه، جرگهنین اورتاسینا طرف قاچدی. بو پروسئس واخت آپاردی و بیر قامچی دا یئدی. بو دفعه قامچینین اوجو باشیندان توتدو. اونون آغریسیندان برک عصبیلشدی. ایستهدی سؤیسون، لاکین یئنه سسینی چیخارتمادی. فیکیرلشدییی قیصاص آلماق حیسّی داها دا گوجلندی. آنجاق بو هله گلهجهیین ایشی ایدی. ایندی بو ظالم عینادکاردان جانینی و وئدرهدهکی اوزوملری قورتارماق لازیم ایدی. وئدرهلری اوردا قویوب قاچماق هئچ آغلینا دا گلمیردی. اوزوملری مطلق آپارمالی ایدی...
او عینی جرگهلرده ساغا-سولا کئچمهیه باشلادی. هر دفعه واخت قازاندیقجا بیر-بیریندن ایییرمی مئتر آرالی ایکی شپالئردن مفتیللری آچماغا باشلادی. شپالئر تنکلرین زوغلاری باغلاندیغی نازیک، اوزون بِتون دیرکلر ایدی. یالنیز بو جور شپالئری آشیریب، آتی ییخماق اولاردی.. مفتیللری آچدیقدان سونرا، همین شپالئرین یانیندا دایاندی. ولیش کیشی اونون دوردوغو جرگه ایله آتی چاپماغا باشلادی. آتین یاخینلاشدیغینی گؤزلهین قوربان لازیمی آندا او بیری جرگهیه کئچیب، شپالئری وار گوجو ایله ایتلهییب جرگهنین آراسینا آشیرا بیلدی. سونرا قاچاراق دیگر شپالئری ده آشیردی.
بو عملیّات قوربانا بیر قامچی، ولیش کیشییه ایسه ساغ قولونون بیلکدن قیریلماسی حسابینا باشا گلدی. سونراکی ایش آلاباشلیق ایدی...
بو حادثهنی بیلن سووخوز صدری اوزده قوربانین آتاسینا آجیقلانسا دا، اورهگیینده اونون عملیندن ذؤوق آلمیشدی. بو سببدن «اشی اوشاقدی، اولماز» -دئییب، درینه گئتمهمیشدی. ولیش کیشی بونونلا دا جانینی قورتارمادی. او حادثهدن تخمیناً اون گون سونرا اونون اطرافی و اؤرتویو قورو قامیشدان، «دؤشهمهسی تاختا پارچالاریندان اولان ایکیمرتبهلی» چارداغی گونون گوناورتا چاغی یاندی... ائولریندن گوناورتا یئمهییندن قاییداندا، چارداغینین بِتون دیرکلری قالمیشدی.
ولیش کیشینین چارداغی و سینمیش بیلهیی حسابینا ایکی وئدره اوزومونو عنادلا، وظیفه دوروستلویو ایله قورودوغو اوزوم باغلاری چوخ کئچمهدی کی، محو اولدو... اونلاری اؤز یاراتدیغینی، همیشه اؤزو داغیدان انسان محو ائتدی...
سووئتلر داغیلان کیمی، نه حؤکومتین، نه ده کیمسهنین مولکیّتی اولمایان اوزوم باغلاری صاحبسیز قالدی. جاماعت ایللرله یئرلی ایقلیمه اویغونلاشمیش، یوکسک شکرلییی، خصوصی آرومات و کئیفيّتی ایله سئچیلن محصوللارینین دونیادا رقیبی اولمایان قیمتلی گولابی، راکاسئلین، آغادایی، کیشمیشی، عسگری، هنقیرنا، میثقالی کئچیممهسی کیمی اوزوم سورتلارینین تنکلرینی دیبیندن کسیب آپاردی، ولیش کیشینین چارداغی کیمی یاندیردیلار. او جماعت کی، اؤزلری بو باغلاری سالمیش، یایین ایستیسینده، قیشین سویوغوندا عائلهلیکجه مین بیر زحمتله بئجرمیشدیلر.
3 089
کیمیاگر و ویتیس سیلوئستریس
«صادیق قارایئوین» حئکایهسی
کوچورن:«ویدا حشمتی»
حاضیرلایان:« ادبیات سئونلر»
بیر آزدان هاوا ایشیقلاشماغا باشلایاجاقدی. تلهسمک لازیم ایدی. دان یئری سؤکولن کیمی ولیش کیشی اویاناجاق، اوّل دقتله اطرافدان گلن سسلره قولاق آساجاقدی. قولاقلارینا اعتبار ائتمهییب، آیاغا قالخاجاق. گؤزهتچی چارداغیندان هر یانی خئیلی مشاهده ائدهجکدی. داها سونرا قارا آتینی مینیب، ساحهنین اطرافینی دولاناجاقدی. قوربان بونلاری دقیق اؤیرهنمیشدی. آنجاق یئریندن قالخا بیلمیردی. دونن بوتون گونو، حتی گئجهیارییا قدر یونجا ساحهسینی سووارمیش، چوخ یورولموشدو. هئچ ایکی ساعت اولمازدی کی، یاتاغینا اوزانمیشدی. یورغونلوق و یوخوسوزلوقدان چؤرک یئمهدن، آیاقلارینین پالچیغینی تمیز یومادان یاتمیشدی.
ایندی گوجله گؤزلرینی آچیردی. یورغونلوغونون اوستونه یای سحرلرینین سرینلییی، اوخوماغا باشلایان قوشلارین سسی و مئحین گتیردییی بیچیلمیش اوت، یئمیش، مئیوه-تروز، حیطدهکی قیزیلگوللرین قوخوسو ایله طراوتلنمیش هاواسی گلهرک، اونو اعجازکار یوخو عالمینه چکیب، آپاریردی. ایستهدی بئش-اون دقیقه مورگولهییب، سونرا قالخسین، آنجاق بو فیکریندن تئز ده داشیندی. یاتیب، یوخویا قالا بیلردی و ولیش کیشی اونو آتین اوستونده قارشیلایاردی... آتاسینین سؤزو یادینا دوشدو: «یوخودان اویاندین، بیر، ایکی، اوچ! سای، آیاغا قالخ». او بئله ده ائتدی.
سما بولودسوز ایدی. اولدوزلارا باخا-باخا گئدیردی. اونا ائله گلیردی کی، اولدوزلار گؤز ووروب، گولومسهییرلر. هارا گئتدییینی بیلیرلر. قوربانین بوندان خوشو گلیردی. آلاباش دا قاباقدا گئدیردی. صاحبینین هارا گئتدییینی او دا اولدوزلار کیمی بیلیردی. نه قدر چالیشسا دا، اونو ساخلایا بیلمهمیشدی.
گلیب اوزوم باغلارینا چاتدی. جلد جرگهلرین آراسینا گیریب، یئتیشمیش اوزوملری سالخیملاریندان قوپاریب، وئدرهلرینی دولدورماغا باشلادی. ائشیتمیشدی کی، قارا اوزومون شیرهسی چوخ اولور. اونلاردان چوخ ییغماق ایستهییردی. آنجاق بو اوزوم سالخیملاری تنکدن چتین قوپوردو. بعضا گیلهلری الینده قالیر، سالخیم زوغدان آرالانمیردی. بو زامان اونون الینین ایچی آغریییر، اوزوم شیرهسینه بولاشیردی.
نهایت، ایکی پوتلوق( ۱۶ کیلولوق) وئدرهلرینی اوزومله دولدوروب، سرعتله باغدان چیخماغا باشلادی. جرگهلرین آراسیندا سیخ و هوندور اوتلار بیتمیشدی. او، سرعتله یئریدیکجه کالیشین یومشاق مئیوه قروپلارینین یئرلشدییی سونبوللری اوزونه دییر، خوش سیغال تأثیری باغیشلاییردی. آنجاق بو بیتکینین نازیک، لئنت شکیللی، اوزون یارپاقلارینین کنارلاری ایتی ایدی. چیلپاق بیلکلرینده درین، یاندیریجی ایزلر بوراخیردی. پیتراق تیکانلاری دا اوز-گؤزونه دییر، قوللارینا باتیردی.
قوربان بونلارا محل قویمایاراق جرگهنین سونونا گلیب چاتدی. احتیاطلا یان-یؤرهسینه، ولیش کیشینین چارداغینا طرف باخیب، قارا آتین اوردا اولدوغونو گؤروب، امین اولدوقدان سونرا جرگهدن چیخدی و ایری آددیملارلا، تئز-تئز ائوه طرف گئتمهیه باشلادی. وئدرهلر چوخ آغیر ایدی، نازیک قولپلاری اللرینی کسیردی. آمّا بونا باخمایاراق بیر کمدن آرتیق یولو گئدندن سونرا بو وئدرهلری جمعی ایکی دفعه یئره قویوب، قیسا مدت دینجینی آلدی. چوخ تلهسیردی. یئنه قاییتماق لازیم ایدی. چونکی، بو ایکی وئدره اوزوم، اونون نظرده توتدوغو ایش اوچون آز ایدی.
ایکینجی دفعه باغا گیرمیشدی. هر ایکی وئدرهیه اوزوم ییغمیشدی. آنجاق وئدرهلری تام دولدورمامیشدی کی، اوستلرینه کیشمیشی سورتوندان دا ییغسین. کیشمیشی آختارا-آختارا باغین درینلیکلرینه گلیب چیخمیشدی. هردن کیشمیشی سورتوندان اولان تنییه راست گلسه ده، اوزوملری هله تام یئتیشمهمیش اولوردو. نهایت، بیر کول تاپدی، سیخ گیلهلری، ایری سالخیملاری وار ایدی. ایکی گیله قوپاردیب، آغزینا قویدو. قند کیمی شیرین ایدی. سالخیملاری تئز-تئز قوپارداراق وئدرهلرینی آغزینا کیمی دولدوردو. سرعتله هوندور اوتلاری یارا-یارا باغدان چیخماغا باشلادی. آخیرینجی جرگهنین سونونا آز قالیردی، آرتیق طاقتدن دوشموش، چوخ یورولموشدو. وئدرهلرین قولپلاری اللرینی کسیردی.
دایاندی، وئدرهلری یئره قویوب، دریندن نفس آلدی. بیر آز دینجلمک ایستهدی. اییلیب کیشمیشی سالخیمیندان ایکی-اوچ گیله قوپاریب آغزینا قویدو. بو زامان آلاباش هوروب، ایرهلی آتیلدی. قوربان باشینی قالدیراندا، جرگهنین سونوندا قارا آتین سرعتله اونا طرف گلدییینی گؤردو... جلد وئدرهلری گؤتوروب، اوزوم جرگهلرینی بیر-بیریندن آییران، تنک زوغلارینین باغلاندیغی اوچ سیرادان عبارت مفتیللرین آراسیندان دیگر جرگهیه کئچدی. اوردان نؤوبتی جرگهیه کئچمک ایستهینده، قامچی بئلیندن ديدی. آنجاق او، جلد ترپندیییندن، قامچی تام توتمامیشدی، اوجو ديمیشدی.
