ادبیات سئونلر

سوسن نواده رضی : منیم مهد آزادیده هر گون یازدیغیم سؤزلوک ستونو، هم فارسجادان تورکجه یه و هم تورکجه دن فارسجایا چوخ غاوغالار یاراتدی. بیر چوخ اوستادلار قوللاندغیم و ایشلک ائتمک ایسته دیگیم سؤزجوکلره قارشیی چیخدیلار. من اوندا چوخ جوان ایدیم . باشارا بیلمیردیم نئجه حاق اولدوغومو و دیلین جانلی بیر اولقو اولدوغونو ثبوت ائدم. بیلگیلریم ده چاتمیردی. چوخ جفالار چکدیم بو قونودا. ایندی همن سؤزجوکلری بول بول ایشله دیرلر! https://t.me/Adabiyyatsevanlar

سوسن نواده رضی : 1369دان 1376 ایلینه کیمی ان چوخ مهد آزادی و اراسیرا باشقا نشریه لرده یازلاریم و شعرلریم چاپ اولوردو. نثر یازییا چوخ اؤنم وئریردیم. البته باشارمیردیم. اما حقیقتا چالشیردیم. پریزاد آدلی رومانی ترجمه ائتمیشدیم فارسجادان. قاراقوچاق آدییلا 46 گون 46 بؤلومو گئتدی، سونرا بعضی سورونلار چیخدی و چاپی دوردورولدو. کتاب دا اولان بیلمه‌دی او رومان. 76 دان سونرا بیر نئچه ایل یازی یاساغی یاشادیم!... ایللر سونرا یئنه ده قلم الییمه الدیم اوغلومون تشویقی و حتی اصراری ایله. وئبلاگ یازماغا باشلادیم. سونرا دا شعر کتابییمی، اننه‌م نن من و آرزولارین گولشان باغینی یازدیم. ایندیسه اردیبهشت آیندان مهد تمدن روزنامه‌سینین تورکجه صفحه‌سینی یؤنتمکله مشغولام. https://t.me/Adabiyyatsevanlar

سوسن نواده رضی : ادبی حیاتیمدا بیر چوخ آدلار تاثیر بوراخیب. داها دوغروسو اوخودوغوم هر بیر یازیدان ائتگیلنمیشم دئیه بیلرم. اما رحمتلیک یحیی شیدا ان پارلاق اولدوز ساییلیردی قارانلیق گئجه لریمده. https://t.me/Adabiyyatsevanlar

سوسن نواده رضی : بیر هاندا گؤردوم اوزاقدان اوزاقا تانیدیغیم ادیب، یازار و شاعیر استادلاریمیز و قلم اهلی منی «شاعیره خانیم»، «حؤرمتلی قلمداش» خطاب ائلیرلر! یادیما گله لی ایلک شعریم 1369 ایلینده مهد آزدینین تورکجه صفحه‌سینده چاپ اولدو. سونرالار دا 1376-یه کیمی داوام ائتدی. کریل الفباسیندان بیر چوخ کتابلار، رومان، مقاله، آراشدیرما... ساحه‌سینده کؤچوردوم. آماجیم اؤیرنمک و دیله سلطه تاپماق ایدی. سونرالار لاتینجه درگیلر یا کیتابلار الیمه چاتدی و اونلاری کؤچوردوم. رحمتلیق یحیی شیدا یازیلاریما چوخ دیر وئرردی و دئمک اولار بوتون یازیلاریمی بیه‌نیب، چاپا وئرردی. او زامان دوشونمک، قادین اولماق، تورکجه یازماق، تقریبا سوچ ساییلاردی! https://t.me/Adabiyyatsevanlar

سوسن نواده رضی : یازیلاریمدان ائتکیلندیکلریندن خوشوم گلردی. گؤزل بیر حیس ایدی. بعضا نسه‌یه چیرکین‌دیر دئیردیلر دوستلار، آنجاق من ان چیرکین دئدیکلری شئیده ده گؤزللیک آثاری گؤره بیلردیم. همیشه دورو و شفاف اولموشام، اؤزوم و یاشام ایله. بیلمیرم هاچان یا نه تهر شاعیر اولدوم! https://t.me/Adabiyyatsevanlar

سوسن نواده رضی : همیشه یاخجی انشالار یازاردیم. گوجلو تخیلاتیم واریدی. گؤزللیکلردن لذت آلماغی آتامدان اؤرگشدیم؛ گوللره سو وئرنده، حووضوموزدا بایرام بالیقلارینا چؤرک آتاندا، نه بیلم قوس و قزحه باخاندا، آیین گؤیده دوروشونو گؤرنده... درین بیر لذت چؤکردی روحوما و چؤکر ده. همکلاسلاریمی یازیلاریملا گولدوروب آغلادا بیلردیم. حتی معلمی ده! https://t.me/Adabiyyatsevanlar

سوسن نواده رضی : آذربایجان قادینین بو گونکو دورومو، تاریخیمیزده یاشایان و ایز بوراخان قادینلارا و قادینلیغا باخدیغیمدا مع‌الاسف یاخجی گؤره بیلمیرم. معین سیاسی مدنی سورنلار بیر یانا، بیزیم قادینلاریمیز، و البته ارککلریمیز ده اوخومورلار، اوخومایینجا دا دوشونمورلر. بیر شئی مود اولونجا، آغینا بوزونا باخمایاراق اؤزلرینی اوندا بوغورلار. ایندی تکنولوژی بومبا کیمی حیاتیمیزا دوشوب. بیز بو بومبادان چوخ یاخجی و یارارلی استفاده‌لر ائلیه بیله‌ریک. اوخولسوز ائلیمیزه اوخول اولا بیلر بو امکانلار. نه یازیق کی، بیز نه دوشونوروک، نه دوشونجه اوره‌تیریک، نه ده دوشونجه اوره‌دنلری دوغرو دوروست اوخویوب اؤیره‌نیریک... بئله‌لیکله ده بیر سیرا بایاغی و سیرادان بیلگیلری اوردان بوردان تاپیب چئینه‌ییریک. بیز دوشک سویه‌ده معلوماتلارین توکه‌دیجیسینه بدل اولموشوق. هر زامان دئمیشم‌دیر، بیر جامعه‌نین هر آچیدان سویه‌لنمه‌سی اوچون او جامعه‌نین قادینلاری سویه‌لنمه‌لی‌دیرلر چونکی بوتون انسانلار آنا قوینوندا بسله‌نیر. https://t.me/Adabiyyatsevanlar

سوسن نواده رضی : من ده 8 مارتی بوتون قادینلارا و البته ایگید ارککلره ده، تبریک دئیرم. من ذاتا جنسیت آیریمینا قارشییام هر عنوانلا اولور اولسون. https://t.me/Adabiyyatsevanlar

شاعیر و یازیچی سوسن خانیم نواده رضی

سوسن نواده رضی : بیر بالا اومود قیغیلجیمینی اینام گونشینه چئویرمک اولار، آنجاق دؤزوملولوکده عینادجیل اولماق گرک. دؤزمک چتین دیر اما اؤنونده سونوندا بارا اوتورار. انسانلار گؤزل بیر یارین اوچون نقدی نسیه یه ساتیرلار، بو گونو اونوداراق یاشامیرلار. یاشاما چاتماق اوچون یاشامدان مایا قویورلار! یاشامی اودوزورلار! یاشام، چاتاجاغیمیز یئر دئییل، همن گئتدیگیمیز یولدور. https://t.me/Adabiyyatsevanlar

سوسن نواده رضی : من 1341-ین قیشیندا آنادان اولموشام. آرخامدا بوراخدیغیم بیر عؤمر وار. اؤنومده ایسه، بیر مجهول... ذهنیم و اوره‌ییم زامانسیز و مکانسیزدیر. و ایپه- ساپا گلمه‌ین! عصیانچییام دا، وام‌روحلویام دا. گاهدان طوفان قوپار ایچیمده، و دیشیما دا سیچرار البته، گاهدان قوزو قدر ساکین و سئویملی اولارام! یئنیش- یوخوشلو یاشامیم اولوب. آنجاق بونو بیلمیشم کی، یاشام چوخ آسان شیرین اولا بیلر انسان کامینا. منجه انسانلار عموما باشارمیرلار یاشاماغی. https://t.me/Adabiyyatsevanlar

سوسن نواده رضی : بو گون بوتون دونیادا قادینلار اوچون عزیزلمه‌لر و شن مراسملر توتولار. آماج ایسه، قادین حاقلارینی ساوونماق، قادینلاری عزیز ساییب اونلاردان قدیربیلن‌لیک ائتمک، و قادینلارین اقتصادی- سیاسی و اجتماعی باشاریلارینی تانییب تانیتماقدیر. https://t.me/Adabiyyatsevanlar

سوسن نواده رضی : قوللوغونوزدایام عزیز ادیبلر و قلمداشلار. بوتون قلم توتان اللر، هله هله بیزیم جفایا اوغرامیش ائلیمیزده اؤپولمه لی دیر. https://t.me/Adabiyyatsevanlar