دِل سِروهاى عزيزنادرى

شعر "لُرِسو" به مناسبت روز نکوداشت "خرم آباد" تقديم به همه هم استانی های عزیز.♥️ شاهِ مُلكيا زِمى لُرِسونَ كوه و بِركِش مرى گُلِسونَ ❁ چشمه یاش پُر دِ آو شيرينَن آسِمونِش وِ پاکییِ جونَ ❁ همه جاش با صفا وُ رَنگینَ مردُمونِش گُلَن خدا دونَ ❁ كوهِ گرینِ چی کیچه عطارُ پُر دِ عطر چوير وُ رِيحونَ ❁ وَختى دَسِ نسيمِ پُر شونِم زِلفِ بيدياشِ ميزنه شونَ ❁ كمره سى دِ دَس بادِ بهار جومه سوزِ قشنگی می سونَ ❁ گُلياش وا مُؤن دِ سيصد رنگ بُلبُلش عاشق وُ غزلخونَ ❁ گهرِش نِصم شويى چی عكاسى عكس ماه وُ ستاره ن مونَ ❁ پاچه کویا دِ خينِ گُل سُرخَن آسِمونِش ستاره بارونَ ❁ سر سراويا قشنگ وُ جوراجور تا بحايى فِت وُ فراوونَ ❁ سى نمونه يكيشو گرداوَ يكى شهوا یکی گلسونَ ❁ زَز وُ زارِم، امير وُ  چنگایی کیاو وُ گلهو وُ كيهمونَ ❁ لُرِس چی بِهشتِ دنیاءَ قلمم ناتَوون وُ بى زونَ ❁ مردِم لُر دِ اوج دستنگی سفره شُ پُر دِ نُو سى میهمونَ ❁ شاهدى سى تَمدن لُريا اَر رويى بينى غار كوگونَ ❁ لُرِسو اَر تفنگچیه ،فِرزَ هى وِ ىِ گُلَه دُشمِنِ مونَ ❁ بِرنويا لُر اگر بیان وِ صدا كوه وِ اى كوئينَم ميلرزونَ ❁ طُمِ مردى مِيَن پیایا لُر زَنِشو هَم چی شیرِ ميدونَ ❁ لُر چی بَردَ، چی آهِنَ، سِفتَ لُر گُتِ ىَ وِ زونَ آسونَ ❁ وَخت جَنگ عینِ بازِ پَر، وازَ وَختِ دوسى كموترِ بونَ ❁ جُز لُرِسو تَموم خاكِ زِمى وِ چَشِ لُر چی کُنج زِندونَ ❁ وَختى پی میزنى لَكم وا لُر چی بِرارِ تنى دِ ىِ لونَ ❁ لُر و لَك نارَ لك لُرِ،لُرِلك تفرقه هركه بونَ نايونَ ❁ دِ لُرسو گُتِم ولى هركس تا نيا بينَ واچَشش چونَ ❁ سى "عزيز" افتخاريَه كه لُرَ پا ای حَرفِش هميشه مى مونَ #عزیز_نادری @AzizNaderi