Hule Addis Media ( ሁሌ አዲስ ሚዲያ)

ማንችስተር ሲቲ የሊጉን መሪነት ተረከበ ! ማንችስተር ሲቲ ከቶተንሀም ጋር ያደረገውን የእንግሊዝ ፕርሚየር ሊግ ሰላሳ አራተኛ ሳምንት ተስተካካይ መርሐ ግብር 2ለ0 በሆነ ውጤት በማሸነፍ የሊጉን መሪነት መረከብ ችለዋል። የማንችስተር ሲቲን የማሸነፊያ ግቦች ኤርሊንግ ሀላንድ 2x ከመረብ ማሳረፍ ችሏል። ኬቨን ዴብሮይን አንድ መቶ አስራ ሁለተኛ ለግብ የሆነ ኳሱን አመቻችቶ በማቀበል በሊጉ ታሪክ ብዙ አመቻችቶ ያቀበለ #ሁለተኛው ተጨዋች ሆኗል። ኖርዊያዊው የፊት መስመር ተጨዋች ኤርሊንግ ሀላንድ በውድድር ዘመኑ ሀያ ሰባተኛ የሊግ ግቡን ማስቆጠር ችሏል። ማንችስተር ሲቲ በአዲሱ የቶተንሀም ስታዲየም የመጀመሪያ የፕርሚየር ሊግ ጎል ማስቆጠር ችሏል። በሊጉ ደረጃ ሰንጠረዥ ስንተኛ ናቸው ? 1️⃣ ማንችስተር ሲቲ :- 88 ነጥብ 5️⃣ ቶተንሀም :- 63 ነጥብ ቀጣይ ጨዋታ ምን ይመስላል ? እሁድ - ማንችስተር ሲቲ ከ ዌስትሀም ዩናይትድ እሁድ - ሼፍልድ ከ ቶተንሀም

በኢትዮጵያ 95 በመቶ የሚሆኑት የቴሌቭዥን ተጠቃሚዎች በኢትዮ-ሳት ስርጭት እያገኙ መሆኑ ተገለፀ በኢትዮጵያ ከ18.2 ሚሊዮን ቲቪ ተጠቃሚዎች መካከል 17 ሚሊዮን ወይም 95 በመቶ የሚሆኑት በኢትዮ-ሳት ስርጭት እያገኙ መሆኑን የዓለም አቀፉ የሳተላይት ኮሚኒኬሽን አገልግሎት አቅራቢ (SES) አስታወቀ። በኢትዮጵያ የቴሌቪዥን ተጠቃሚዎች ቁጥር በ 2017 ከነበረበት በ400% አድጎ ተጠቃሚዎቹ 18.2 ሚሊዮን መድረሳቸው ሲገልፅ ከ2021 ጀምሮ የኢትዮ ሳት የኤችዲ ቲቪ ቻናሎች ከ15 በመቶ ወደ 62 በመቶ ማደጉ ተነግሯል። በአሁኑ ወቅት በሳተላይቱ 136 ቻናሎች ለ17 ሚሊዮን የቴሌቪዥን ባለቤቶች እየተሰራጩ ሲሆን ከ136 የሬዲዮና የቴሌቪዥን ቻናሎች መካከል ደግሞ 70 የሚሆኑት የሀገር ውስጥ ቻናሎች መሆናቸው ተጠቁሟል። 'ኢትዮ-ሳት' ን የኢትዮጵያ ሚዲያ ባለስልጣን፣ የኢትዮጵያ ስፔስ ሳይንስ፣ የኢትዮጵያ ብሮድካስቲንግ ኮርፖሬሽን (ኢቢሲ)፣ የኢትዮጵያ ብሮድካስተሮች ማህበር (ኤቢቢ) እና SES በጋራ በመሆን ከ4 አመት በፊት ይፋ እንዳደረጉት ይታወሳል።

በፕሮጀክት ስም የሚወጣው ገንዘብ ? በየዩኒቨርሲቲዎች " ለሥራ ኃላፊዎች የሚከፈል ክፍያ " በሚል የሚመዘበረው ገንዘብ  ከፍ ያለ ነው። ሰዎቹ ከመንግሥት በጀት / አካል ውጭ ተጻጽፈን በሚመጣልን ድጋፍ ፕሮጀክት እየሰራን ብር ይከፈለናል ነው የሚሉት። ክፍያው ግን እጅግ የተጋነነ ከመሆኑ የተነሳ ግልጽነት የጎደለው፣ ብዙ ጥርጣሬንም የሚያጭር ነው። መንግሥት ደመወዛቸውን እየከፈላቸው እያለ " ላስተባበሩበት " በሚል እዛው ግቢያቸው ውስጥ ለሚሰራ ስራ የሚከፈላቸው ብር ብዛት የሚገርም ነው። ለአብነት፦ ሰሞኑን ዋቸሞ ዩኒቨርሲቲው ውስጥ ስለሚፈጸም አይን ያፈጠጠ የለየለት የህዝብ ሀብት ምዝበራን በተመለከተ በተሰራጨው የፋና ምርመራ ዘገባ ላይ ዶ/ር ተመስገን ቶማስ በሰኔ ወር 2013 ዓ/ም ብቻ የተከፈላቸው ገንዘብ በርከት ያለ ነው። ዶክተሩ ምንም እንኳን " ቁጥሩም እኮ ሳይገለጽ መነጋገር እንችላለን " ቢሉም አይገለጽ ያሉት ቁጥር ግን ይህንን ይመስላል። ➡ 19,500 ብር (ሰንድ 1) ➡ 11,700 ብር (ሰንድ 2) ➡ 23,212 ብር (ሰንድ 3) ➡ 19,500 ብር (ሰንድ 4) ➡ 7,800 ብር (ሰንድ 5) ➡ 23,400 ብር (ሰንድ 6) ➡ 19,500 ብር (ሰንድ 7) ➡ 19,500 ብር (ሰንድ 8) ➡ 15,600 ብር (ሰንድ 9) ➡ 14,644 ብር (ሰንድ 10) ➡ 14,644 ብር (ሰንድ 11) ➡ 22,000 ብር (ሰንድ 12) ➡ 17,500 ብር (ሰንድ 13) ➡ 23,400 ብር (ሰንድ 14) ➡ 39,000 ብር (ሰንድ 15) ➡ 19,500 ብር (ሰንድ 16) ➡ 14,644 ብር (ሰንድ 17) ➡ 19,500 ብር (ሰንድ 18) ➡ 14,644 ብር (ሰንድ 19) ➡ 21,450 ብር (ሰንድ 20) እኚህ ሁሉ በሰኔ ወር 2013 የተከፈሉ ናቸው። ዶክተሩ ግን እስቲ ልየው 😳 በሰኔ ወር ነው የተከፈለው ? ብለው ይጠይቃሉ ዶክመቱም ይሰጣቸዋል፤ በኃላም ዶክመንቱን ያገላብጡና " እስቲ 2013 የሚለው የታለ ? " ሲሉ ድጋሜ ይጠይቃሉ " ይኸው ! " ይባላሉ ፤ በዝምታ ከተዋጡ በኃላ " እ ! " ብለው ዶክመንቱን መልሰዋል። ዶ/ር ተመስገን በተለያየ ጊዜ የተባከ ክፍያ የፋይናንስ ባጀት ስለሌለ በአመቱ መጨረሻ ባጀት ሲያገኝ ገብቶ ነው እንጂ በአንዴ የተላከ አይደለም ብለው ተከራርክረዋል። ሌላው የዩኒቨርሲቲው የፋይናንስ ዳይሬክተር ማርቆስ ዮሐንስ ብዙ ገንዘብ የተከፈላቸው ሲሆን " እኔ ብዙ ፕሮጀክት ስለምሰራ ነው። ቀንም ማታም ቅዳሜና እሁድም በፕሮጀክት  ላይ ሰራው ከመንግስት ስራ ሰዓት ውጭ ለዛ ነው የተከፈለኝ ባይ ናቸው። ዳይሬክተሩ በቀን 18 ሰኔ ወር 2013 ዓ/ም 13,650  ብር እንዲገባላቸው የታዘዘበት ዶክመት የተገኘ ሲሆን በቀን 23 / 2013 ዓ/ም 15,600 ብር እንዲገባላቸው ታዟል በተመሳሳይ ቀን 19,600 ብር እንዲገባላቸው ተደርጓል። ሌሎችም በርካቶች ናቸው ነው ያሉት። ዶ/ር ተመስገን ጨምሮ አሁን ስልጣን ላይ ያሉትን ዶክተር ሀብታሙ አበበ ጋር የፋይናንስ ዳይሬክተሩ ስም በክፍያ ዶክመት ላይ " ፕሮጀክት " ተብሎ ተገኝቷል። በአጠቃላይ በዋቸሞም ሆነ በመሰል ተቋማት በፕሮጀክት ስም የሚወጣው ብር እጅግ ብዙ ፣ ከደመወዛቸው እጥፍ፣ ግልጽነት የጎደለው ነው። ሌሎቹ ዩኒቨርሲቲዎችስ ?

ማይክ ሀመር ከኦሮሞ የተቃዋሚ ፖለቲካ ፓርቲ አመራሮች ከፕሮፌሰር መረራ ጉዲና እና ዳውድ ኢብሳ ጋር መምከራቸው መከሩ የአሜሪካን መንግስት የአፍሪካ ቀንድ ልዩ ልዑክ ማይክ ሀመር #ከኦሮምያ የተቃዋሚ ፖለቲካ ፓርቲ አመራሮች ጋር ተወያዩ። ሀመር የመከሩት ከኦፌኮ ሊቀመንበር ፕሮፌሰር መረራ ጉዲና እና ከኦነጉ ሊቀመንበር ዳውድ ኢብሳ ጋር መሆኑም ታውቋል። የኦፌኮ ሊቀመንበር ፕሮፌሰር መረራ ጉዲና ከማይክ ሀመር ጋር በሀገራዊ እንዲሁም በኦሮምያ ክልል ወቅታዊ ጉዳዮች መምከራቸውን ለአዲስ ስታንዳርድ አረጋግጠዋል። በሀገራዊ እና በኦሮምያ ወቅታዊ ጉዳዮች ዙሪያ ለማይክ ሀመር ሙሉ ገለጻ እንዳደረጉላቸው ፕሮፌሰር መራራ ለአዲስ ስታንዳርድ አስታውቀዋል። ከማይክ ሀመር ጋር በነበረን ቆይታ ዋነኛ አጀንዳ የነበረው ሀገራዊ ምክክሩ ነበር ሲሉ የገለጹልን ፕሮፌሰር መረራ ሀገራዊ የምክክር ኮሚሽኑ "ኢትዮጵያን የትም አያደርሳትም፣ ምክንያቱም ደግሞ ሁሉን ያሳተፈ አይደለም፣ በሁሉም ዘንድ ደግሞ እምነት የሚጣልበት አይደለም" ሲሉ እንደገለጹላቸው ለአዲስ ስታንዳርድ አስታውቀዋል። ሌላኛው ከማይክ ሀመር ጋር በነበረን ውይይት የተነሳው ነጥብ የበቴ ኡርጌሳ ግድያ ነበር ያሉት መረራ ጉዲና የፈጠረባቸውን ድንጋጤ እና የቤተሰቦቹ እስር እንዳሳዘናቸው በመግለጽ ስሜቴን ለልዩ ልዑኩ አጋርቻለሁ ብለውናል። በተያያዘ ዜና የአሜሪካ መንግስት ልዩ ልዑኩ ማይክ ሀመር በአዲስ አበባ በሚገኘው የአሜሪካን ኤምባሲ ከኦነጉ ሊቀመንበር ዳውድ ኢብሳ ጋር መምከራቸውም ከፓርቲያቸው ቃል አቀባይ ለሚ ገመቹ የኤክስ ማህበራዊ ገጽ ያገኘነው መረጃ ያሳያል። ዳውድ ኢብሳ እና ማይክ ሀመር በምን ጉዳዮች ላይ እንደመከሩ ቃል አቀባዩ ያሉት ነገር የለም።   

በሰሜን ሸዋ ዞን ሁለት ወረዳዎች ዉስጥ በሚገኙ ት/ት ቤቶች የድሮን ጥቃት መፈጸሙ የተነገረ ሲሆን በጥቃቱ ንጹሃን ገበሬዎች ሲገደሉ ፤ አንዲት መምህርት ተጎድታለች ተባለ 👉🏼 ጥቃቱ በቀወት እና ጣርማበር ወረዳዎች ተፈጽሟል በትናንትናው ዕለት በአማራ ክልል ሰሜን ሸዋ ዞን ቀወት ወረዳ ተሬ ቀበሌ ልዩ ስሙ ጉሎ ተብሎ በሚጠራ ስፍራ የድሮን ጥቃት መፈጸሙን ነዋሪዎች ለአል ዐይን አማርኛ ተናግረዋል፡፡ ለደህንነቱ በመፍራት ስሙ እንዳይጠቀስ የፈለገ የተሬ ቀበሌ ነዋሪ እንዳለው “ትናንት ግንቦት 4 ቀን 2016 ዓ.ም ከቀኑ 7፡30 ላይ በመንደራችን ከባድ ፍንዳታ ተፈጥሮ ነበር። እኔን ጨምሮ የሰፈራችን ነዋሪዎች ፍንዳታው ወደ ተሰማበት ስፍራ ስንሄድ ጥቃቱ ጉሎ የመጀመሪያ ደረጃ ትምህርት ቤት ላይ እንደተፈጸመ አየን” ሲል ተናግሯል፡፡ አስተያየት ሰጪው አክሎም “በዚህ የድሮን ጥቃት ሶስት አርሶ አደሮች ወዲያውኑ ህይወታቸው ሲያልፍ በትምህርት ቤቱ ውስጥ ትኖር የነበረች ሴት መምህር ከባድ ጉዳት ደርሶባት ወደ ሆስፒታል ተልካለች” ሲልም አክሏል፡፡ “አንድ ሌላ አርሶ አደር በተመሳሳይ ከባድ የአካል ጉዳት ደርሶበት ወደ ሆስፒታል መወሰዱን አውቃለሁ” ያለን ይህ የአይን እማኝ አንድ አርሶ አደር ደግሞ ቀላል ጉዳት እንደደረሰበትም ተናግሯል፡፡ በአካባቢው በመንግስት እና በፋኖ ታጣቂዎች መካከል ውጊያ ከተጀመረ አንድ ዓመት እንደሆናቸው የሚናገሩት እኝህ ነዋሪ የመንግስት የጸጥታ ሀይሎች አልፎ አልፎ ብቅ እያሉ ንጹሃን ሰዎችን ፋኖን ትረዳላችሁ እያሉ ወጣቶችን ይገድላሉ ብሏል፡፡ በዚህ ምክንያት የመንግስት የጸጥታ ሀይሎች መጡ ሲባል በተለይም ወጣቶች ወደ ጫካ እንደሚሄዱ እና እንደሚደበቁም ይህ አስተያየት ሰጪ ተናግሯል፡፡ በተመሳሳይ በዞኑ በጣርማበር ወረዳ በሚገኘው የመዘዞ ሁለተኛ ደረጃ ትምህርት ቤት ላይ የድሮን ጥቃት መፈሙን ስማቸውን እንዳይጠቀስ የፈለጉ ነዋሪ ለአል ዐይን አማርኛ መናገራቸውን ሁሌ አዲስ ሚዲያ ከዘገባው ተመልክቷል። ነዋሪው እንደገለጹት በዚህ የድሮን ጥቃት በሰዎች ላይ ጉዳት ደርሷል። ጥቃቱ ትናንት ግንቦት 5 ቀን 2016 ዓ.ም ከቀኑ ሰባት ሰአት ላይ መድረሱን የገለጹት እኝህ ነዋሪ በጥቃቱ የተጎዱ ሰዎች ወደ ጤና ጣቢያ ሲገቡ መመልከታቸውን ተናግረዋል። የሰሜን ሸዋ ዞን ኮማንድ ፖስት ሰብሳቢ እና የሀገር መከላከያ ሰራዊት ተፈጸሙ ስለተባሉ የድሮን ጥቃቶች ያለውን ምላሽ ለማካተት ያደረግነው ጥረት አልተሳካም ብሏል የዜና ምንጩ፡፡ በአማራ ክልል በተደጋጋሚ በተፈጸሙ የድሮን ጥቃቶች ንጹሃን ዜጎች መገደላቸውን የኢትዮጵያ ሰብዓዊ መብት ኮሚሽንን ጨምሮ ዓለም አቀፍ የሰብዓዊ መብት ተቋማት እና ምዕራባዊያን ሀገራት ባወጧቸው ሪፖርቶች ላይ ጠቅሰዋል፡፡እነዚህ ተቋማት እና ሀገራት የድሮን ጥቃቶች እንዲቆሙ ንጹሃን ዜጎችም ከጥቃት እንዲጠበቁ ቢጠይቁም የሀገር መከላከያ ሰራዊት ጠቅላይ ኢታማዦር ሹም ፊልድ ማርሻል ብርሃኑ ጁላ የድሮን ጥቃቱ እንደሚቀጥል እና ኢላማውን የጠበቀ ጥቃት ማድረሳችንን እንቀጥላለን ሲሉ ምላሽ መስጠታቸው አይዘነጋም፡፡ በክልሉ በፋኖ ታጣቂዎች እና በመንግስት ወታደሮች መካከል የተቀሰቀሰውን ግጭት ተከትሎ ከሐምሌ 28 ቀን 2015 ዓ.ም ጀምሮ የአስቸኳይ ጊዜ አዋጅ መታወጁ የሚታወስ ሲሆን ለተጨማሪ አራት ወራት የተራዘመ መሆኑ አይዘነጋም። ሆኖም ይህ አዋጅ አሁን ላይ ሊጠናቀቅ ሶስት ሳምንታት ቀርቶታል።

በሱዳን ጥገኝነት ለጠየቁ የቀድሞ ሰላም አስከባሪዎች ጥበቃ እንደሚያደርግ የስደተኞች ተቋሙ ገለጸ! በሱዳን በጥገኝነት እየኖሩ ያሉ የቀድሞ የኢትዮጵያ ሰላም አስከባሪ አባላት፣ ተፋላሚው የሱዳን "ፈጥኖ ደራሽ ኀይሎች"፣ በሰሞኑ መግለጫው ካቀረበው የጣልቃ ገብነት ክስ ጋራ ተያይዞ የደኅንነት ስጋት እንዳደረባቸው ገለጹ፡፡ ለደኅንነታቸው በመስጋት ስማቸው እንዳይጠቀስ የጠየቁን የትግራይ ተወላጅ የሰላም አስከባሪ አባላት፣ ለአሜሪካ ድምፅ በሰጡት ቃለ መጠይቅ፣ የሱዳን "ፈጥኖ ደራሽ ኀይሎች" ባወጣው መግለጫ፣ የህወሓት ታጣቂዎች በሱዳኑ ጦርነት እየተሳተፉ እንደኾነ ያቀረበው ክስ፣ “በመጠለያ ጣቢያዎች ያለነውን ስደተኞች ለጥቃት እንዳይዳርገን ስጋት ፈጥሮብናል፤” ብለዋል፡፡ ስለ ጉዳዩ ለአሜሪካ ድምፅ በኢሜይል አስተያየት የሰጠው የተባበሩት መግሥታት የስደተኞች ጉዳይ ከፍተኛ ኮሚሽነር በበኩሉ፣ “የስደተኞቹን የደኅንነት ስጋት እረዳለኹ፤ ኹኔታውን የተመለከተ መፍትሔም እያፈላለግኹ ነው፤” ብሏል፡፡ [VoA]

በጅግጅጋ ከተማ የመኪና መገጣጠሚያ ፋብሪካ ተመረቀ! በጅግጅጋ ከተማ የመኪና መገጣጠሚያ ፋብሪካ በሶማሌ ክልል ርዕሰ መስተዳድር ሙስጠፌ መሀመድ ተመርቆ ስራ ጀምሯል።በ250 ሚሊየን ብር ካፒታል የተከፈተው ፋብሪካው በቀን እስከ 10 መኪኖችን የመገጣጠም አቅም እንዳለው ተገልጿል። ርዕሰ መስተዳድር ሙስጠፌ መሀመድ ፋብሪካውን መርቀው በከፈቱበት ወቅት እንዳሉት በክልሉ የኢንቨስትመንት እንቅስቃሴ ከጊዜ ወደ ጊዜ እየጎለበተ ይገኛል። ፋብሪካው ለዜጎች የስራ እድል ከመፍጠር ባለፈ የውጭ ምንዛሬ ወጪን በመቀነስ ረገድ ፋይዳው የላቀ መሆኑን ጠቁመው የክልሉ መንግስትም ለግሉ ዘርፍ የሚያደርገውን ድጋፍ አጠናክሮ ይቀጥል ብለዋል።