سئچیلمیش شعرلر

خلیل_آدی_گؤزل گل اوتور یانیما، دردلشک بیراز! داها گیزلنمه‌یین آدی قالماییب چیخ آرتیق او داشین دالیندان، گۆلوم! سنسیز یاشاماغین دادی قالماییب قورخما! هئچ‌ کیم گؤرمز، گیزلین گلمیشم آرخامدا قالاجاق ایز ده قویمادیم هامینی قلبیمدن قوودوم بیر یوللوق گئری‌یه دؤنه‌جک اۆز ده قویمادیم باشقا نه بیر آرزوم، نه دیله‌ییم وار بو سؤنن‌ اوجاقدان بیرجه کؤز قالا...! بو اویون او‌ قدر اوزون سۆردو کی من ده اینانیرام بونا آز قالا اوشاقلیق ائله‌مه! عمر_گۆن گئدیر هر ایل یاش گتیریر هر یاشین اۆسته سنین یوخلوغونا اینانیم دئیه_ آدینی یازمیسان بو داشین اۆسته؟ یاخشی دۆشمه‌میسن شکیلده یئنه گۆلوشون اۆزونده دوْنوب ائله بیل اللرین اۆزولوب سانکی هر شئیدن اۆره‌یین هامیدان سینیب ائله بیل منی اویناماغا وادار ائتمه، گل! من آرتیق سن بیلن یاشدا دئییلم آز قالیر اۆستوندن بیر عمر کئچه همینکی عاغیلدا_باشدا دئییلم تامام دَییشمیشم حیات طرزیمی قایتار، قوربان اولوم، خیر_شرّیمی! یورغون گؤزلریمین ایچینه باخیب دئ کی اوخویوردون شعیرلریمی... https://t.me/Adabiyyatsevanlar https://t.me/secilmiseirler

▫️آداداکی آدام ایسسیز بیر آدادا، سسسیز بیر آدام، باخار اوفوق‌لره... اوفوق‌لر قارا. کئچمیشی آندیقجا، آخار دورمادان- اؤلو گؤزیاشلاری جانلی سولارا. آلیب قارشیسینا اوشاقلیغینی، باخار، دانیشاماز، دیلی توتولار. اوزادار اللرین شفقتلی، ایستی، یازیق! اوشاقلیغی قاچیب قورتولار. سؤیکه‌نر داشلارا یوخولو، یورغون آنیدن گنجلیگی یانینا گلر. دوشونر «خیال‌می، گئرچک‌می؟» دئیه، گئرچک سون نفسین سونونا گلر. لوزومسوز آیدینلیق گونلره عیناد، توتار قارانلیغی سئور بیر سوره. اونودار اؤزونو اؤزو-اؤزونده، گئدر بیلینمه‌ین، مجهول یئرلره. آدادا یئل اسسه، قوشلار اؤتسه ده، او باشقا عالمده یاشار و دۇیماز. ایللر قورتارسا دا، عؤمور بیتسه ده، کلیدلر یازیق کی قاپی‌یا اویماز! #عبدالرحیم_قاراقوچ #شعر_اوجاغی @SheirOcagi https://t.me/secilmiseirler

حیات‌دیر آخار چشمه. حیات‌دیر آخار چشمه، یئتر آه، داستان دئمه! کئچن گون، کئچن گئجه، بیر داها دؤنمز گئری. یوخولارکن کؤهنه شهر، پارلارکن گؤیده اولکر. اوخورکن سوسری‌لر، آن منی، گؤزل پری! سحرین روزگاریندا، دَییرمان سولاریندا، تبریزین باهاریندا، رنگیم وار، سؤزوم واردیر. مخملی چیچه‌یینده، ائللرین اوره­‌‌یینده. فرشلرین ایلمه­‌یینده، ناخیشیم، ایزیم واردیر. مهتابین چیراغینا، «سورخاب»ین آل داغینا. او کهلیک بولاغینا، چوخداندی حسرتم من. ائللره آلقیش اولسون، دوشمنه قارغیش اولسون! قار یاغسین، یاغیش اولسون، گول‌لنسین بیزیم وطن! یوللاردیر چالا-چولا، ساغدان دؤن، چاپاق سولا! او گئدر-گلمز یولا، تیکمه گؤز، یئتر، گؤزل! داغلارین باشیندا قار، سفَرده حادثه‌ وار. یول چتین، کئچیدلر دار، هئی‌له! آت کئچر، گؤزل!  #حبیب_ساهر @qanadli_duyqular https://t.me/secilmiseirler

سئو‌ منی، ائی وارلیغین ان سئویملی قادینی! عشق یاندی، او قدر کی سنه عاشق اولدوم. جوغرافیام، سنین ووجودون‌دور، داها دونیا جوغرافیاسینین اؤنمی یوخدور منه. من کدرین ان اسکی باش‌کندی‌یم، یارام فرعونی بیر ایزدیر، دردیم بیر دسته گؤیرچین کیمی «بغداد»دان «چین»ه قدر اوزانیب. ائی قلبیمین سئرچه‌سی...ائی آغلار-گولر آییم... ائی جانیمین جانی... ائی زیتون باغلاری! ائی قار طامی...ائی اود دادی... ائی کوفرومون، اینانجیمین عطری! بیلینمز بیر شئیدن قورخورام، قوی سنه سیغینیم! قارانلیقدان قورخورام، قوجاقلا منی! اوشویورم، بورو منی، یانیما گل! منه اوشاق ناغیلی دئ، اوزان یانیمدا، ماهنی سؤیله منه! من، ازلدن بری آلنیم اوچون بیر وطن آختاریردیم، منی دووارلارا یازیب، سونرا پوزان بیر قادینین ساچلارینی آختاریردیم. منی گونشین سینیرلارینا قدر آپاریب آشاغی آتان بیر قادینین سئوگیسینی آختاریردیم. ائی عؤمرومه نور ساچان... گئجه‌مین چیراغی، بوستانیمین عطری، لیمون عطریندن بیر کؤرپو یارات منه! منی بیر داراق ائدیب قارا ساچلارینا تاخ! اونوت منی! عشقین بیر قفقازی دلی آت کیمی، آیاقلارینین آلتینا آلدی منی. سنین اوچون بوتون قادینلاری بوراخیب تاریخیمی آتدیم، دوغوم بلگه‌می جیریب بوتون دامارلاریمی کسدیم... #نزار_قبانی https://t.me/adabiiyatfenomenlari https://t.me/secilmiseirler

سن، منیم ایچیمده شعر : دکتر حسن ریاضی ( ایلدیریم ) سن منیم ایچیمده اویویان بولوت‌سان؛ اویاناندا تورپاق یاشیللانار، اویویاندا سونبول‌لر، گول‌لر یانار. سن منیم ایچیمده اویویان حسرت‌سن؛ اویاناندا باخیش‌لاریم مفتیل‌‌لری قیریب کئچر، اویویاندا دورنالار قارانقوش‌لار له‌لک تؤکر. سن منیم ایچیمده اویویان فیرتیناسان؛ باغیرسان داغ‌لار دیسکینر، سوسان دنیزلر کوسر. سن منیم ایچیمده اویویان آرزوسان؛ اویانسان اوشاقلار قوشلارا قوشولوب اوچوشار، دونیا باشقالاشار. سن منیم ایچیمده اویویان من‌سن؛ اویانسان هردوداقدان بیر نغمه قوپار، هر باخیشدان بیر گؤیرچین اوچار، سؤزلرده بولاق‌لار جوشار. سن اویاناندا، آغ کاغیذدان شعرلر منه ساری بویلانار!

#باغلی_دیر قفس‌ده، قانادی سينميش بير قوشام، وارليغيم داغ- داشا، چؤله باغلی‌دير. یاشارام گله‌جك باهار عئشـقينه، حياتيم چمنه، گـوله باغلی‌دير... قفسـده اولسام دا كسيلمز سسيم، سؤنمز بوقفسده، عئشقيم، هَوَسيم. اؤلنده دئيه‌جك بو ســــون نفسيم: اؤره‌ييــم  بير شيرين ديله باغلی‌دير. قورتولوش آتشـی قلبيـــمده يانير، ييخيلماز هركس كی، ائله باغلی‌دير. شئیدايام، ائليمه- وطنه وورغــون، بولبــــول تك باهارا، چمنه وورغـــون گؤل‌لره، گول‌لره، گولشــنه وورغــون اوره‌ييم ساز كيمی، تئله باغلی‌دير  #يحيی_شئيدا @qanadli_duyqular https://t.me/secilmiseirler

https://t.me/adinadarixirdodagim2 #حکیم_ملامحمد_فضولی

سینه‌می یاندیریر ییغیلان سؤزلر نه گرک زورونان دوغولان سؤزه نه چوخ بورولغاندا بوغولان سؤزلر اومید اللرینی اوزالدیر بیزه بیرجه سؤز اؤلوم‌دن آلارسا شاعیر او سؤز ده یاشادار مین ایل شاعیری سؤزون اؤره‌یینه  دولارسا شاعیر البت‌ده اولاجاق کؤنول شاعیری سؤزون قایغیسینی نازینی چکسن سؤز اؤزو دوزولوب شعیرین اولاجاق نه قده‌ر معنانی سن اوزه چکسن شعیرین ده اوقده‌ر درین اولاجاق اولدوزلو گؤیلرده قول قانادیمیز یئرین باغرینداکی کؤکوموزدو سؤز بو گون حیاتیمیز آغیز دادیمیز دونن‌دن صاباحا یوکوموزدو سؤز... #عدالت_دومان #گون_آیدین @qanadli_duyqular https://t.me/secilmiseirler

▫️گؤزل قوجالیغی، گول تؤکولوشو آغ‌آپپاق ساچینین اؤرپه‌یی قارا، بیله‌یی اۆزۆیه یئرلشه بیلر. دیزینین گوجو یوخ یوللاری یورا، آیاغی تۆکه ده ایلیشه بیلر. تا قوجماز بئلینی گوموش توققالار، آلیشماز آلنیندا پاپاق‌قاباغی¹. دۆزۆلمز دؤشونه الوان جیققالار، دولانماز قولونا قیزیل قول‌باغی. گولوشو سئیره‌لیب... داغا باخ، داغا! قلبی ده بوش یئره غوبارلانماییر. سهَنگی سؤیکه‌ییر سیسقا بولاغا، بولاغین اوستونده تومارلانماییر. یامان آوازیییب² یاناغی، اۆزۆ، اؤزونه یاراشمیر غملی قاش‌قاباق. قیوریم قیریشلارلا چپرلی گؤزو، دۆشۆن کی، نئجه‌یمیش آلتمیش ایل قاباق! هارا بوخارلانمیش اونون چاغلیغی، خیالی گزیرمی قیز آرزوسوندا؟ یاپیشیب قالیبدی اوتانجاقلیغی، قیزیلی قایانین قیزارتیسیندا. یاپیشیب چیینینه قالین بورونجک، اوشویور ایستیده، قیرمیزی گونده. تامام اوزگون اولوب، تامام ارینجک. هاوا بیر بالاجا قارالان کیمی، داغلارین باشینی قار آلان کیمی، یاسلانیب یاس توتور ائوین ایچینده. او نییه کؤکسونو بئله اؤتوردو؟ حیاتا حئیرت وار سؤال‌لاریندا. تاختیندان تئز دوشن بختینی گؤردو ساههمانی پوزولان سیغال‌لاریندا. اونون کدرینی سئوینجه یوزون! اونون گئده‌جه‌یی قلبینه دامماز. اونون آرزو یولو عؤمروندن اوزون، عؤمرو کؤچ ائله‌یر، اؤزو اینانماز. گوزگویه باخاندا سوسار گولوشو، آغ ساچ دا اینسانین اوجالیغی‌دیر. گؤزل قوجالیغی، گول تؤکولوشو، عئیناً طبیعتین قوجالیغی‌دیر. #آغا_لاچینلی ¹- قادین عاراقچین‌لارینین قاباق حیصّه‌سی ²- رنگی سولماق #شعر_اوجاغی @SheirOcagi https://t.me/secilmiseirler

یوخلوغون چتیندیر منه، عزیزیم! بلکه قاییداسان، دوشون دریندن! بیر مکتوب یازیرام سنه، عزیزیم! آیریلیق گونونون ایلک سحریندن. بو ائوده هله ده وار، آیاق ایزین- اوتاقدان اوتاغا آپاریر منی. داراقدا ساچلارین، گوزگوده اوزون، من نئجه بیر یئره توپلاییم سنی؟ اومیدیم اریییر داها گئت-گئده، قلبیمین کونجونه قیسیلیب قالیب. سنین ان سئودییین کؤینه‌ییمده ده، ساچینین بیر تئلی آسیلیب قالیب. گؤزوم بیر نؤقطه‌یه باخیر آن‌با‌آن، دیقّت ائت، گؤر هاردان هارا گلمیسن! ان اوزون جومله‌یه سیغمایان آدام! کیچیک بیر نؤقطه‌یه سیغا بیلمیسن. گئدَنه آغلاماق غریبه ایشدیر، گولومسه گلنده، آغلا گئدنده! سندن ده هئچ گؤزوم سو ایچمه‌میشدی، بو قدر گؤز یاشی هارداندی منده؟ #خزر_سلیمانلی https://t.me/SANSIZDUNYAM https://t.me/secilmiseirler