مٌحِبة للِسٌنةَ وَ أهْلهـَا ١٤١٤ هـ 🇩🇿🇸🇦

عيد مبارك تقبّل الله منّا و منكم صالح الأعمال يا طيبات تعيدو بالصحة و الهنا و الفرحة .🌹

لي عندها شغل تكملو . كي يلحق وقت السحور تتسحر باش تصوم و ربي يغفرلها ذنوب تع عامين باذن الله 🌹 كي يدخل وقت الفجر تريح في سجادتها تقرا قرآن وتدعي و تذكر . تصلي الفجر و الصبح و تكمل تريح في سجادتها تهلل و تكبر و تسبح و تحوقل حتا يلحق وقت الشروق و تقوم تصلي ركعتين يتحسبولها بأجر عمرة و حجة مع الرسول صلى الله عليه و سلم .💧 ادا بغيتي ارقدي ساعة بنية ربي يقدرك تكلمي يومك بالعبادات .. ولا قدرتي الأفضل ما تضيعي ولا دقيقة من يومك 🌹 صلي على الأقل اربع ركعات في وقت الضحى ^^ وبقاي تدعي و تقراي قرآن .. حتا لوين يلحق المغرب و دعي ربي يكون كتبك من العتقاء من النار .🌹 و متنسايش أذكار المساء ما تضيعي حتا ثانية على تهمبير الدار .. شغل عمرو ما يخلاص .. مي يوم عرفة الله اعلم لا يقدرك عليه مرة اخرى ما تخليش فرصة ربي يستجيب لدعائك تضيع .. و دعيلي معاك ختي الزينة .🌹

📌 القاعدة الذهبية في تربية الأطفال : " ماشي كل ما يطلبه الطفل يُعطى له .. وماشي كل رغبة لازم تُلبّى " لأن الطفل إذا تعوّد أن كل شيء يجيه بسهولة ، يكبر وهو يظن أن الدنيا مدينة له بكل شيء ،فإذا مُنع غضب ، وإذا تأخر عليه شيء سخط ،وإذا تعب قليلًا تذمّر .. أمّا الطفل الذي يتربّى على التوازن ،مرّة يُعطى ومرّة يُمنع ،مرّة ينتظر ومرّة يصبر ،يتعلّم الرضا ، ويعرف قيمة النعمة ،ويكبر وقلبه ممتنّ لا جاحد . الإفراط في التلبية ما يصنعش طفل سعيد ،بل أحيانًا يصنع نفسًا لا تشبع أبدًا ..كلما أخذت طلبت أكثر ،وكلما لُبّيت رغبة ظهرت أخرى . علّم طفلك أن : ليس كل ما يُشتهى يُنال ،وأن الصبر جزء من الحياة ، وأن كلمة " لا " ليست قسوة دائمًا ،بل أحيانًا رحمة وتربية . اضبط العطاء .. تزرع القناعة ، وتربي الامتنان ، وتقتل الأنانية والجحود قبل أن تكبر في قلبه .🌹

كيف نعرف الله عزّ وجل؟ كيف نعبده؟ كيف ندّعي محبته ونحن لا نتفقه في دينه؟ كيف سيعمر ذلك القلب بالإيمان وحلاوة الطاعة والمهابة من رب العالمين؟ أليس بطلب العلم؟ كيف نخشى الله ونحن لا نعلم عن ديننا سوى القشور، اجتهادك في طلب العلم الشرعي يوصلك لجنان الخلد، يوصلك لمحبة لقاء الله يوصلك لعبادة الله على بصيرة، لم يكن طلب العلم أفضل النوافل سُدى وربّي، أين هو بجانب علوم الدنيا، علوم الدنيا كلّها جميعها لا تساوي ذرة واحدة من علوم القرآن والسنة أبدًا أبدًا، كيف يثبتك الله على السؤال في قبرك؟ المنكب على حفظ القرآن وتعلم العلم ويخشى من الإنزلاق فكيف أنت يا عبد الله يا من تدّعي أن هذا العلم مضيعة للوقت ومجهود مندثر ستُحاسب عليه أفِق .🌹

أحيانًا يُرهق الإنسان نفسه بالتفكير في المستقبل… في الأشياء التي لم تحدث بعد، وفي الأيام القادمة،وفي احتمالاتٍ لا يعلمها إلا الله. فيحمل همّ الغد قبل أن يأتي، ويتعب قلبه بأمورٍ قد لا تقع أصلًا ،لكن الحقيقة التي تُطمئن القلب: أننا لسنا مطالبين بأن نكون مستعدين لكل شيء، ولا قادرين على التحكم في كل شيء، فهناك أمور لا يُصلحها إلا التوكل، ولا يُهدّئها إلا قول: "يا رب، اختر لي ما فيه الخير." اتركها على الله… فكم من أمرٍ أخافك، ثم جاء أجمل مما توقعت ، وكم من ضيقٍ ظننته نهاية، فجعله الله بداية فرج ورحمة. الطمأنينة ليست في معرفة ما سيحدث، بل في اليقين أن الله لن يتركك وحدك. "وكما جاءت تأتي" ليست ضعفًا ولا استسلامًا، بل راحة قلبٍ آمن أن تدبير الله أرحم وألطف من تدبير الإنسان لنفسه. 🌹

كاين لحظات في الحياة تتعب فيها بزاف، تحاول، تصبر، تدعي، وتجري وراء حاجة تتمناها من قلبك ، وفي الأخير ما تصراش كيما حبيت. هنا لازم الإنسان يوقف شوية و يقول بقلب راضي: "ربّي سبحانه هذا واش عطاني." ماشي كل حاجة نتمناوها تتكتب لينا،وماشي كل باب تسدّ يعني النهاية،أحيانًا ربي يبعد عليك حاجة لأنو يشوف ما لا تراه أنت. إذا ضميرك مرتاح…و متأكد أنك ما قصّرتش،و حاولت لآخر لحظة، فخلاص… سلّم أمرك لله و ارتاح. الدنيا ماشي ديما تمشي على حساب رغباتنا،كاين أقدار لازم نتقبلوها،و كاين أوجاع ما يبردها غير الرضا. أرحم روحك شوية…ما تضغطش على قلبك أكثر من اللازم،أخرج من داك العالم الصغير لي حبست فيه نفسك، تنفس،وعيش ، ودير عكس الحزن لي يحاول يكسرك… قاوم، تمرّد على اليأس،و آمن أن العوض الجميل يجي في الوقت لي يكتبه ربي. وفي الأخير أجمل شعور يقدر يوصلو الإنسان: أنو يكون راضي مرتاح… و قلبه بارد لأنو سلّم أمره لله .🌹

بلاكي تخلي خالقك على جال مخلوق… بلاكي ترضي الناس وتغضبي رب الناس… واش من حاجة فالدنيا تستاهل تضيعي عليها صلاتك؟ واش من عبد يقدر ينفعك كي توقفي قدام ربي وحدك؟ الدنيا هذي عرض زائل… اليوم عندك وغدوة تروح، بصح صلاتك… هي اللي تبقى، هي اللي تنجيك، هي اللي ترفعك. ما تبدليش رضا ربي بنظرة، بكلمة، بعلاقة، ولا بخدمة… كلش يفوت… وربي يبقى. خلي قلبك مربوط بربك، وخلي صلاتك أول حاجة فحياتك، ماشي آخر حاجة. ربي ما يضيع حتى خطوة تمشيها ليه… فما بالك بصلاة تحفظيها؟ 🌹

لا تعيشي على وهم "غدًا أتغيّر".ولا تخدعي نفسك بحكاية "كي نتزوج نولي صالحة"...أختي، الموت ما يستناش ظروفك،والهداية ما تجيش على حسب مزاجك، والطاعة ما تتأجلش حتى يجي وقت مناسب! كم من واحدة كانت تقول: "نبدأ كي نرتاح"... "نحفظ القرآن كي يكون عندي وقت"... "نلتزم كي تتبدل حياتي" لكن سبقها الأجل قبل ما تبدا أصلاً! راه الشيطان يضحك عليكِ بالتسويف… يقولك: مزال بكري، مزال عندك وقت، عيشي شبابك ،حتى تلقاي روحك ضيّعتي أيام وسنين، وقلبك ولى ثقيل على الطاعة! أختي، راه الطريق واضح: جاهدي نفسك اليوم قبل غد، قاومي ضعفك، حاربي الكسل، وابدئي ولو بالقليل. ما تستنايش إنسان يبدلك،وما تربطيش صلاحك بشخص ولا بمرحلة في حياتك ، لأنو ممكن ما يجيش، أو يجي وهو أضعف منك! إذا اليوم، وانتي فارغة نسبيًا، ما قدرتيش تقربي لربي، كيفاش غدوا مع المسؤوليات، الزوج، الدار، والأولاد؟! كوني صادقة مع روحك: واش درتي لدينك؟ واش قربك لربي؟ واش زادك نور ولا غير ضيّعتي الوقت؟ راه السقوط ماشي النهاية بصح البقاء في الأرض هو الهلاك! طيحي، بصح قومي…ضعفي، بصح جاهدي… تأخرتي، بصح مازال الباب مفتوح! اعمري وقتك بالخير: قرآن، ذكر، علم، دعاء، صدقة ،حتى تلقاي روحك تبدلتي بلا ما تحسي حياتك قصيرة، والجنة غالية ،والله ما يضيع حتى خطوة صدق مشيتيها نحوه 🌹

منشورات: "الشيخ الفلاني مات"... خبر واحد... لكن يخرج أسوأ ما في بعض القلوب! كل مرة يموت واحد من أهل العلم أو الدعوة، المفروض القلوب تخشع... العيون تدمع... والنفوس تتذكر أنها هي التالية. بصح وش نشوفو؟! سب... شتم... شماتة... تصفية حسابات! وكأن الموت ولى فرصة باش نفرغو سمومنا، ماشي لحظة نرجعو فيها لربي! يا أختي راه الموت ماشي موضوع نقاش ولا ساحة جدال... راه موقف عظيم يهز الجبال، فكيف بقلب ضعيف؟ قبل ما تكتبي كلمة... حبسي لحظة واسألي روحك: "هل هذي الكلمة ترضي ربي؟ ولا غير تشفي غلي في قلبي؟" الميت خلاص... راه بين يدي الله ، لا يضره كلامك ولا ينفعه سبك لكن أنتِ... راح تتحاسبي على كل حرف كتبتيه! واش ذنب أم تقرأ كلامك على ولدها الميت؟ ولا زوجة مكسورة تشوف تعليق يقطر قسوة؟ ولا بنت يتيمة يزيد جرحها بسبب كلمة طايشة؟ الكلمة راهي سهم... كي تخرج ما ترجعش ، ويمكن توجع قلوب ناس راهم أصلا محطمين! اسمعي مليح: اللي شافت الخير من إنسان → تترحم عليه وتسكت ، واللي عندها مآخذ → تسكت وتسلم الأمر لربي ، ماشي شطارة تفضحي ميت ولا قوة أنك تشمتي فيه . القوة الحقيقية أنك تمسكي لسانك... وتخافي من ربك! النبي ﷺ قال: "اذكروا محاسن موتاكم" ،يعني حتى لو كان في القلب كلام... الصمت عبادة في هذي اللحظة ، المشكل ماشي اختلاف المشكل لما يتحول الاختلاف إلى حقد وفتنة! واش استفدنا من هاد الجدال؟ لا زادنا علم... لا قربنا لربي ، غير قلوب تقسّت... وحسنات طارت! موت أهل العلم لازم يخوفنا على رواحنا ، اليوم هو... وغدوة أنا ولا أنتِ . بدل ما تقيمي فلان وعلان ، قيمي روحك: وش حضرتي لنهار تحطي في القبر؟ وش خليتي من أثر طيب؟ خلي يدك تكون سبب خير ماشي سبب فتنة ، وخلي كلماتك نور... ماشي نار كوني مفتاح للخير... مغلاق للشر ،وقولي كلمة طيبة تلقايها قدامك يوم القيامة .. اللهم ارحم موتانا وموتى المسلمين وأصلح قلوبنا واهدينا لما تحب وترضى .. #وتذكري... الدنيا رايحة... والكلمة باقية... فاكتبي ما يسرك تلقايه ..💧

كلما شفينا جراحنا بعلمائنا الباقين، عدنا نفجع في من بقي. 💧 الله يرحم شيوخنا، ويجعلهم في أعلى درجات جنانه، ويعوض الأمة عن فقدهم خيرًا. إنا لله وإنا إليه راجعون.

إِنَّا لِلَّهِ وَإِنَّا إِلَيْهِ رَاجِعُونَ توفِّيَ الشَّيخُ لَزْهَر سُنِيقَرَة الجزائري -رحمهُ الله-، فنسألُ اللهَ أن يَغفرَ له، ويَرحمَه، ويُسكنَه فسيحَ جَنَّاتِه. اللَّهُمَّ اجعل ما قدَّم من علمٍ ودعوةٍ في ميزانِ حسناتِه، وحجة له ، واغفر له وارفَع درجتَه في المهديين. 💧🌹

لعلّ أحدكم أقربُ إلى الله مني منزلة.. أمرّ بفترةٍ أشعر فيها أن الدنيا قد ضاقت عليّ بما رحبت، ولا ملجأ من الله إلا إليه. أسألكم بظهر الغيب دعوة صادقة: أن يفتح الله عليّ فتحاً مبيناً، ويهبني من فضله وكرمه بغير حولٍ مني ولا قوة. فربّ دعوةٍ منكم لا ترد، وربّ (آمين) تفتح لي أبواب السماء. جزاكم الله عني كل خير."🌹

في كل الحالات… راكِ راح تتعبي! ماكانش راحة كاملة في هاذ الدنيا، وماكان حتى طريق مفروش بالورود ،بصح الفرق الوحيد: واش من تعب تختاري؟ كاين تعب يطلعك الفوق: تعب الطاعة، الصبر، تربية روحك، وغض البصر واللسان…هذاك التعب اللي يوجع شوية، بصح من بعد يجيب راحة، طمأنينة، ورضا من ربي. وكاين تعب يهبطك لتحت: تعب الفراغ، تعب القيل والقال، تعب التبع والفضول في حياة الناس،تعب الغيبة والحسد والمقارنات… هذاك التعب ما يزيدك غير همّ فوق هم،ويخليك دايما ناقصة، دايما تعبانة، ودايما مش راضية. افهميها مليح: راكِ راح تتعبي سواء اخترتي الصح ولا الغلط… بصح واحدة تعبها يوصلك للجنة، ووحدة تعبها يضيعك ويشقيك. اختاري تعب يكرّمك… ماشي تعب يذلك ،اهربي من تعب الشقاء، وروحي لتعب فيه بركة، فيه نور، فيه نهاية تفرّح قلبك .🌹