ادبیات سئونلر

صیاد زیاد پور سحر-سحر دؤی قاپیمی آچیم یوخولو-یوخولو عزیزله‌ییب اربابیمی قوجوم یوخولو-یوخولو قولاغیما اینجه سسین آخیب آدیمی سسله‌سین گلمیشم باریشاق دئسین اوچوم یوخولو-یوخولو ائنی بوْیو قدر یوْل دؤی ائویمین هر کۆنجۆنه دَی قاباغینجا هئی سۆزۆم هئی_ قاچیم یوخولو-یوخولو بارینیب نوروندان اوْردا اؤز روْلومو تاپیم نوردا اؤزۆندن اؤزۆنه، نور دا- ساچیم یوخولو-یوخولو آی یؤنۆ اوزاغا دوْغروم هر گئجه قان اوْلور باغریم دؤنمه‌سن اۆزه‌جک آغریم- آجیم یوخولو-یوخولو https://t.me/Adabiyyatsevanlar

زرین رزندی(طناز) بوناساز کوُنلومه گل،بیرگئجه یار اول،قاداسی غم ومحنتله دولان،قلبه قرار اول قاداسی بئزدیریب منگنه تک فاصله،تبعیض،خفقان صور اسرافیلی چال،محشره جار اول قاداسی اوُرکنین پنجه سی پیس یئرده دوتوب خیرخیرانی اوجو بیز نیزه تکین،ظولمه تاتار اول قاداسی یاتانی سوزلو موغام،بلکه اوُیاندیردی قاقاش گیرمنیم قوُینوما بیر سوُزلو سه تار اول قاداسی دوُنورام،تیتره ییرم من یاپا یالقیزلیقدان گونش اول،شاخ بوزاقا،قیش دا باهار اول قاداسی اود آلوو ایچره بیزه وعده ی جننت وئریلیر!! گل قارانلیق گئجه مه،سیسغا فنار اول قاداسی اولماسا عرضه بشر،باغلانی حئیوان یئرینه گل کمالاتین ایله،خلقه چیخار اول قاداسی بلی قربان دونونو گئیمه،یاراشماز کی سنه بوُیون اگسن دییه جک لر کی:حمار اول قاداسی مین آتی،چک قیلیجی-یاغی لارا گوُز داغی وئر بوُز آت اوستونده اوُ غیرتلی سوار اول قاداسی. https://t.me/Adabiyyatsevanlar

یعقوب_نیکزاد یامان آغیر گلدی داشین، بازارین سویوق باشینا یونگول چکیلدی قادینلیغینین دَیَرلی قاتی اوزولدو ویجدان‌لار قوندارما فیرتینالار قوپدو کوچه‌لرده، یارامادی آزادلیغین گؤزلرینه گیله‌لییین، - حالال بیر پای- کیمسه‌نین الیندن گله‌ بیلمه‌دی، گولوشونو یازسین چکسین آدینی. چییینلرینی چکدی کامئرالار دا کتیلدن ییخیلان رؤیالارینا. ایسقیدی بیر پارا قودوز اورک‌لری گؤتورمه‌دی ملک دادلی گؤروشونو تئلینه زیللندی قارا قاباق‌لار آغیر آیاقلار اوزونه دونوقدو چیرکین باخیشلار آنا امجه‌یینی کسن‌ کیمسه‌لر توخوندولار قوناقلیغینا توخاندیلار بوی، بوخونونا. شوتودولر اوستونه سیرتیلمیش ایبلیس‌لر، باریش پالتاریندا گؤزللییینه گولله آچدیلار چئویردیلر باشینا دوغرو اولای‌لارینی گولوشونو اوغورلادیلار آمانسیز. قوربانلیق اولدون قوردلارا پارام، پارچا اودا چکیلدی خینالی اللرین انیک بارماق‌لارین یایلیغینی سوووردولار شهوتجه‌سینه. دیکلدی مین قوتسال بایراق اورک‌لرده، یاشیل اینانج گؤیسل هارای. خزل‌لندی باهار قوخولو تئللرین پیچاق چکیلدی سیغاللانمیش سسینه آرینمیش دیلینه بولودلارا سیغیشمادی اوستونلویون قورخو چکدی دویغولارین، قانلی آنلار. هؤرویوندن باغلادیلار سئوینجینی تینچه‌لرده آسدیلار آدینی کسدیلر آماجینی سسین تؤکولدو قزئت‌لره سرگی‌لندی باخیشلارین دوراق‌لاردا شکیلین قالارقی‌لاشدی کائناتدا اؤلومون حیاتدا تاریخه یوووشدو کولک‌لی ساچلارین. دوغرادیلار دوغرولوغونو قانین چکمه‌لرله گزدی شهری قایساق‌لاندی تپیک یارالاری دؤشلرینده یاساسیز یاس قوندو گلین‌لییینه اؤلوم چؤکدو ماتم موتیوی آچدیلار اوستونده میتینگ قوردولار قاپاز سالدیلار یولونا دیری، دیری اؤلدوردولر چاغداشلیغینی سویدولار آرزولارینی ایلیم- ایلیم ایتیردیلر رئاللیغینی ایگید قادینلیغینی... یاراشیقسیز اؤلوم جانا سینمه‌دی واختسیز آیریلیق باهارسیز پاییز. https://t.me/Adabiyyatsevanlar

یانار_قاراداغلی سوروشما     حالیمی    آشیق کئف کوک  داماغ   چاغ  اولمورکی باشیمیزدا   مین  اویون  وار دردلریمیز           ساغالمیرکی زامان     برباد     طالع  کم لی ائللریمیز     گوزو      نم لی بیری  شادسا  مینی  غم لی بیر گول  ایله  باغ     اولمورکی رییادی    بویادی      تامام سوسور-سوسمور  اولمور  آدام! ازلدن     بئله دیر    مودام دوشونن  باش  ساغ  اولمورکی قالدیریر   حیات      ییخیردا سورویور     چیغیردا-چیغیردا چوخلارین   گوردوم  آخیردا هامی    اوزو  آغ      اولمورکی "یانار"    گوردو     هر   اوزونو گئجه سینی    -   گوندوزونو تیتره تسه     فلک  دیزینی بیر   نفر    دایاغ      اولمورکی...! https://t.me/Adabiyyatsevanlar

«کؤرپوده‌کی قوجا» «یازان : ارنست همینگوئی» «چئویرن: تامئللا عبدی‌یئوا» «کؤچورن: ویدا حشمتی» یولون کناریندا گؤزونده دمیر چرچه‌وه‌لی گؤزلویو اولان، تپه‌دن دیرناغاجان توز-توپراغا باتمیش بیر قوجا اوتورم‌شدو. بوردا، چایین اوزه‌رینده ایسه آرابا، یوک ماشینلاری ایله برابر، آیاق‌یالین اینسانلارین-قوجا، قادین، اوشاقلارین دا کئچمه‌سی اوچون اوزن کؤرپو قورولموشدو. عسگرلرین اذیت‌له تکرلرین قولپالاریندان یاپیشیب، ایته‌لمه‌سی حسابینا ائششک آرابالاری چتینلیک‌له ده اولسا دیک ساحیل‌لرده سنده‌له‌ییردی. یوک آرابالاری ایچینده‌کیلرله بیرگه او طرف، بو طرفه ییرغالانا-ییرغالانا گئدیر، کند جماعتی ایسه توپوغاجان توز ایچینده آغیر-آغیر لنگه‌له‌ییردی. بایاقدان بوردا اوتورموش قوجا کیشی ایسه هله ده هئچ یئره ترپنمه‌میشدی. اونا آرتیق بیر آتدیم دا آتماغا طاقت قالمامیشدی. منیم ایشیم ایسه کؤرپونون او تایینا کئچمک، قارشیداکی دؤیوش مئیدانینی یوخلاماق و دشمن‌ین هانسی نقطه‌ده‌کی ایره‌لیله‌دییینی معین ائتمکدن عبارت ایدی. اوزه‌ریمه دوشن ایشی بیتیریب، یئنیدن کؤرپویه گئری قاییتدیم. آرتیق بوردا بیر-ایکی آرابا و چوخ آز اینسان قالسا دا قوجا هله ده همین یئرده ایدی. «سن هاردان گلیرسن قوجا؟» -من سوروشدوم. «سن کارلوس‌دان» -او، دئدی و گولومسه‌دی. سن کارلوس اونون دوغما شهری اولدوغوندان بو آدی چکمک قوجایا ائله بیر خصوصی ذوق وئریردی کی، سانکی چؤهره‌سینه آنی بیر گولوش قوندو. «من حیوانلارا یئتیشیردیم» -او، سؤزه باشلادی. «دوغرودان؟» -من سوروشدوم باخمایاراق کی، نه دئدییینی تام انلامامیشدیم. -هه. سن آللاه شاهیدی‌سن کی، هله ده بوردایام. سن کارلوس‌‌و دا ان سون من ترک ائله‌میشم. ایش اوراسیندادیر کی، او، نه چوبان، نه ده ناخیرچییا اوخشاییردی. من اونو قارا توز باسمیش اوز-گؤزوندن، اوست-باشیندان توتموش، دمیر چرچه‌وه‌لی گؤزلویونه کیمی سوزه‌ندن سونرا سوروشدوم، «هانسی حیوانلارا؟» «مختلف حیوانلارا ایدی»، او دئدی و باشین سیلکه‌لدی، «ایکی کئچی، بیر پیشیگ، بیر ده سونرادان دؤرد جوت گؤیرچین ده گتیردیم». «ایندی دئییرسن اونلاری ایسته‌مه‌دن قویوب، گلدین؟» -سوروشدوم. «بلی، مرمی یاغیشینا گؤره. کاپیتان ایسه دوشمنین هوژمونه گؤره شهردن چیخماغی امر ائتدی». «بس عاییله‌ن؟» بیر گؤزوم کؤرپونون آخیریندا ساحیلین یاماجینا دوغرو تله‌سه‌رک ائنن سونونجو آرابالاردا اولاراق سوروشدوم. «عاییله‌م یوخدو» او، دئدی. «یالنیز حیوانلاریم وار ایدی. پیشیکدن اوره‌ییم آرخاییندی‌. او، تک باش چیخاراجاق. آمما او بیری‌لری‌نین وضعیتینی دوشونمه‌یه بئله قورخورام». «نه‌سه بیر نقشه‌نیز وار؟» من سوروشدوم. «هئچ بیر نقشه‌م یوخدور» -او دئدی. «منیم آرتیق یئتمیش بئش یاشیم وار. من بو یاشیمدا دوز ایگیرمی کیلومتر یول گلمیشم و دوشونورم کی، بوندان آرتیق گئده بیلمه‌یه‌جم». «منجه دایانماق اوچون هیچ ده یاخشی یئر سئچمه‌ییبسن، قوجا» دئدیم. «یاخشی‌سی بودور سن یولون باشینا «تورتوس»ایا گئده‌جک یوک ماشینلارینا طرف تله‌سه‌سن». «بیر آز دا گؤزله‌ییم، سونرا گئده‌جه‌یم» - دئدی. «بو ماشینلار هارا گئدیر بئله؟» قوجا سوروشدو. «بارسلونا» «من او طرفده هئچ کیمی تانیمیرام. هر شئیه گؤره چوخ ساغ اول، اوغلوم. آللاه کؤمه‌یین اولسون» . او چوخ یورغون و لاقئید باخیشلارلا باخدی و داها سونرا سانکی ناراحات‌چیلیغینی بؤلوشمک اوچون سؤزه باشلادی: «پیشیگ عهده‌سیندن گله‌جک، امینم. اونا گؤره هئچ ناراحت اولماغیما دگمز. آمما او بیری‌لری... سنجه اونلارین حالی نئجه اولاجاق؟». او سوروشدو. -یقین کی، بیر یوللا باشلاری‌نین چاره‌سینه باخاجاقلار. -دوغرودان بئله دوشونورسن؟ «نیییه ده یوخ» آرتیق هئچ بیر ماشین گؤرونمه‌ین ساحیله باخا-باخا دئدیم. -اگر منی بو توپ-توفنگه گؤره شهردن چیخارسالار، بس اونلار نئینه‌یه‌جک؟ -هئچ اولماسا گؤیرچینلرین قفسینی آچمیشدینیز چیخاندا؟ -هه. -او زمان گؤیرچین‌لر اوچوب، جانلارینی قورتاراجاقلار‌. -هه اونلار یقین اوچوب گئده‌جکلر. بس او بیری‌لر؟ یاخشیسی بودور گئریده قالانلار باره‌ده دوشونمه‌ییم. -اگر دینجینی آلدین‌ گئدک. قالخ آیاغا، یاواش-یاواش یئریمه‌یه چالیش. او آیاغا قالخسا دا او طرف، بو طرفه سنده‌له‌ییب، یئنیدن آرخاسی اوسته توز-توپراغین ایچینه اوتوردو. -منیم حیوانلاریم وار ایدی، آمما سن دئمه، بورایا قدر ایمیش. من یالنیز اونلارین قایغیسینا قالیردیم، باشقا هئچ نه‌... آرتیق ائده‌جه‌ییمیز بیر شئی یوخویدو. پاسخا بایرامی(عید پاک) ایدی و فاشیست‌لر «ایبرو»یا دوغرو سرعت‌له ایره‌لی‌له‌ییردی. آنجاق بو گونکو بوز-بولانیق هاوا و بولودلارین آلچاقدان اوچماسی، طیّاره‌لره هاوایا قالخماغا امکان وئرمه‌دی. بلکه ده بوندان سونرا حیاتدا بو حادثه و پیشیکلرین اؤزلرینه قوللوق ائتمکدن باشقا ایش باجارمایان بو زاواللی قوجانین بختی هئچ واخت گتیرمه‌یه‌جکدی. https://t.me/Adabiyyatsevanlar

"سوسن نقدی" من گم شده ام در پشت غبار شعرهایم‌را باد برده از یاد پروانه ها نه روشنایی درخشانی نه گلی که بروید در خزان درگریزند روزهایم سلسله وار پر پر می شوند سروده هایم در آغوش باران    دست آویز تیرگی هایند خاطره هایم پیچیده زندگی طومارش را برای همیشه نصیب من دراین بین تکه نانی است سیاه   پیچیده در  پرده دریوزگی https://t.me/Adabiyyatsevanlar

مصطفی‌اسلام‌اوغلو گؤیه باخدیم، گؤزو یاشلی. یئره باخدیم، یئر یاسلی. سولار بوگون قان دادیندا. اسکی، یئنی، بؤیوک، کیچیک، قارا، قیزیل- بوتون دردلریم بوردا. سن هارداسان؟ سن و قوشلار، گؤزیاشینین گؤزیاشینا بنزه‌دییی قدر بنزه‌ییرسینیز. وورولان بیر جئیرانین، بالاسینا سؤیله‌دییی نغمه‌نی سؤیله‌ییر اونلار؛ بو صاباح یئنه قوندولار تئل هؤرگویه، منی آجیملا باش باشا بوراخمادیلار. سن هارداسان؟ هاوا سویوق، دیشاریدا قار یاغیر. هر زامان اللریم اوشویوردو، بو گون ایچیم اوشویور. حسرتین گلدی، خیالین گلدی، باااخ، عطرین ده گلیر! بو گون «یعقوب» اولدوم؛ هئئئی...! ائی آجیلارین قادینی! سن هارداسان ؟ https://t.me/Adabiyyatsevanlar

"مهناز صابونی" اسیرگه‌مه الینی تئللریمدن، آی قاداسی ! گل ایندی مین یارامی شانه_شانه  سای ،قاداسی!   دیدرگینم قلمیم سانکی قان سپیر کاغیذا دئشیر اورکده‌کی باسدیردیغیم هارای ،قاداسی! نه واخت‌دیر کی اؤلوم یونتاییر اولای‌لارینی سارایلی کؤنلومه قونداقدی آرپا چای، قاداسی! بولودکیمی دولانیر گؤزلریمده یاغمورلار اورک سیخینتیما مهمان گلیب اوخای ،قاداسی! زمانه میز ائله آلت، اوست اولور گؤرورسن کی باتیبدیر آل قانینا اؤلکه‌ده سونای، قاداسی! باغیردی سوردوگوم عؤمروم ،حاییفلادیم جانیمی جهنم ایچره بهشت آختاریب هر آی ،قاداسی! سوسوبدو سؤزلری سس سیز، سمیرسیز آردینجا گلنده « آیتای» ایچون ساخلا گیزلی پای ،قاداسی! https://t.me/Adabiyyatsevanlar

ناصر داوران حیات پاییم ائویمین آدرسی سیلینیب کپنک لرین دفتریندن. شعریمین قاپیسیندان نه بیر گونش گیریر ایچری نه بیر چیچک. یامان یئرده گونوموز آخشام اولوب یاغیشین جنازه سین ماهنی لارین چیینینده داشیییریق ده ده قورقودون دیلینه یاساق یازیلمیش قوپوزوندا. دنیز یالوارا یالوارا قالیب یالاندان گورولدایان قیسیر بولودلارا. * قارا چوخورون ائولادیییک اونودولموش چای لارین بوغولموش سسی. توتورسان الیمدن کؤنوللو داوران قورخوسوز، تمناسیز گئجه لرین اولدوزو دوستومون اؤزو کیمی موشتولوق قوخویان وطنداش کیمی. * یول لارین بیر ایشی قارانلیغی خاطره لشدیرمک دیر اوزومو معنالاشدیرماق. من نه بختیارام حیاتی بؤلوشدوردولر پاییما یولچولوق دوشدو! ۱۴۰۳/۰۷/۲۴ https://t.me/Adabiyyatsevanlar

خبر تبریزمکتبینین یئتیردیگی پیانیست" ناصر جهان آرا" بوگون 1403,8,3 تبریزده حیاتا گوز یومدو. ناصر جهان آرا تانیمیش بین الملی پیانو اوستادی بوگون1403,8,3 تبریزده ایکی آی خسته لیکدن سونرا ایست قلبی اثرینده حیاتا گوز یومدو ، اوستاد" جهان آرا" دفه لریله دونیا سویسنده داور اولموشدو ، اوستادان اوز خالقینا یادیگار قالان اثرلر چهل آهنگ سی آهنگ بیست آهنگ پیانو آسان ...کیتابیندان آد آپارماق اولار. ادبیات سئونلر اوستادین ابدی خاطیره سینه عشق اولسون دئیه ره ک ،آذربایجان موسیقی مکتبینه باش ساغلیغی وئریری. ادبیات سئونلر1403,8,3 https://t.me/Adabiyyatsevanlar