ادبیات سئونلر

محمد_رضا_لوایی آخشام ساعت آلتی خاقانی پارکی "بیر آزدان گلیرم، دایان!" -دئمیشدین: او سؤزه دایاندیم اون سککیز ایل من حال بو کی سن بیر آز یالان دئمیشدین... . https://t.me/Adabiyyatsevanlar

سعید_سلطانی "آلتای" گئدیر شهریمیزین قاطاری سن‌سیز بوینوما ساریلان قول‌لارا حسرت سوسور آراز آراز جان تاری سن‌سیز آرخانجا باخدیغیم یول‌لارا حسرت دمیر یول‌لارینین پاخیر  سوروسو آردینجا  هویوخان ناخیر سوروسو ایپک تارلامیزین  چوخور سوروسو تورپاق گیله سینده کول‌لارا حسرت بیر ائلی ایکی یه آییران قاطار. آدین کؤنوللرین قه هرینده وار سینیق قلبیمیزین کؤرپوسو،نه دار! بونیسگیل بو اؤزلم ائل‌لره حسرت ساحیل‌دیر، ساحیله حسرت له  باخیر گئدیرسن  گؤزلریم  اؤزله‌ت له باخیر بیر تانیش اوره‌یی مین دردله باخیر او دوغما باخیش‌دا  دیل‌لره حسرت گئدیر شهریمیزین قاطاری یئنه سن‌سیز دوراق‌لاری بورونوب چنه آردین‌جا سوروشه‌ن کؤرپه‌لرینه توللانان چؤره‌ک‌ده  بال‌لارا حسرت داریخما«آلتای»ییم قووور یول‌لاری داشار آراز یئنه عؤمور یول‌لاری چاتار بیر- بیرینه دمیر یول‌لاری او گونو چاغلایان  سئل‌لره حسرت https://t.me/Adabiyyatsevanlar

سس وسور : دکتر فریبا ابراهیمی( آفاق)

-یولون کناریندا، کانالین باشیندا گؤزله‌یه‌جک.  من ده گئده‌جکدیم. اونو اره وئردیکلری آدامی گؤردوم. چکیجه اوخشاییر باشی بئله- من اللریمی چکیجه اوخشار کیمی توتوب جیحونا گؤستردیم و بیردن تیتریه-تیتریه آغلاماغا باشلادیم. او آدامی خاطیرلاییب یئنه ظریفه‌یه یازیغیم گلمه‌یه باشلامیشدی. -بوردا قال، یا دا یوخ، اوتاغینا گئت. اساس اودور کیمسه اویانماسین، من ظریفه‌نین آرخاسینجا گئده‌جم. آغلاما قالخ، کئچ اوتاغینا... قارانلیق، پنجره‌دن یاواش-یاواش چکیلیردی.   جیحون گلیب چیخماق بیلمیردی و من دایانمادان آغلاییردیم، دیزلریمی قوجاقلاییب، یئرده اوتورموشدوم. ظریفه‌یه «قاچاق» دئییب گئتمه‌مه‌ییم غرورومو زده‌له‌میشدی. ان باشلیجاسی علی‌دن آیری دوشمه‌ییم دئیه ظریفه‌یه بسله‌دیییم نفرت منی اؤز گؤزومدن سالمیشدی. ایندی اؤزومو پیس آدام حساب ائدیردیم. آمّا بِئینیم دونموشدو. داواملی هئچ نه دوشونه بیلمیردیم. فیکیرلره‌ جوموب، بیر-بیرینی یئییردی ائله بیل. قاپی آچیلدی. جیحون ایچه‌ری گیردی. من دیک آتیلیب اونونلا بورون-بورونا دایاندیم. جیحوندان سویوق قوخوسو گلیردی. -یوخدو هئچ یئرده، باخدیم. بایاقدان آختاریرام. -نئجه یوخدو؟- اوزومه ایستی‌لیک یاییلدی. -یقین او دا گلمه‌ییب...  سنین کیمی- جیحونون سسینده‌کی کینایه او زامان هئچ تأثیر ائتمه‌دی. ظریفه‌نین ده گلمه‌مه‌سی، سون آندا واز کئچمه‌سی ایچیمی ساکیت‌لشدیردی.  بایاقدان قورخاق ظنّ ائدیب اؤزومه ائتدیییم طعنه‌لرین یوکو، بیردن قالخدی. -هه گلمه‌میش- آنجاق بونو دئیه بیلدیم. سحر بیر آزدان آچیلاجاقدی. من یوخوسوز و حالسیزدیم. یاتاغیما گیریب درین یوخویا‌گئتدیم. *** -فاضیل- آنام آتامین آدینی اوزادیب چاغیردیغیندان نه‌سه اولدوغونو بیلدیم- تئز اول حکیمه زنگ وور. اوشاق الدن گئدیر- آنامین سسی ائوی باشینا گؤتوردو. من یاتاقدان آتیلیب جیحونون اوتاغینا گیرمک ایسته‌ینده آتام ائله‌جه آلت پالتاریندا منیم یانیمدان کئچیب جیحونا چاتدی. غضبلی، جیحونا قیشقیران آدامدان اثر یوخ ایدی.  جیحونو قوللارینا آلیب، اوتاقدان چیخدی، آنام اونون نه ائتدییینی آنیندا آنلاییب بیر آندا گؤرونمز اولدو. آتامین شالواری ایله قاییتدی.  آتام هوش‌سوز اولان جیحونو دیوانا قویوب شالوارینی گئییندی و تکرار جیحونو آلیب قاپیدا گؤرونمز اولدو. آنام دا اونون آرخاسیندان گؤزدن ایتدی. بوتون بونلار ائله سرعت‌له باش وئردی کی، من نه اولدوغونو آنلایا بیلمه‌دیم. https://t.me/Adabiyyatsevanlar

  ائوه آددیمی‌می آتار-آتماز ضعیف کیف‌قوخوسو ووردو منی. دهلیزده دؤشه‌مه‌یه آتیلمیش، رنگی چوخدان سولموش پالازین کنارلاری دیددیک-دیدیک ایدی. دیوارلاری دا بیزیم ائوده‌کی کیمی هامار و رنگلی دئییلدی. کله-کؤتور و آغ رنگده ایدی. ائوین دیوارلاری پالچیقلا سوواندیغیندان اهنگ‌له رنگلنمیشدی و آز قالا هر ایل بو سوواغین قوپان یئرلرینی جمیله خالا قازیییب تؤکور، یئنیدن پالچیقلا سوواییردی. بیز دار دهلیزدن کئچیب داها گئنیش بیر اوتاغا کئچدیک. کندده عادتاً، هامی‌نین ائوی بیر-بیرینه بنزه‌ییردی. ایری اوتاقدان بیر نئچه اوتاغا قاپی آچیلیردی. من حتی کندده هامی‌نین بیر-بیرینه بنزه‌دییینی  عئینی شکیلده دانیشیب، عئینی گئییندییینی دوشوننده بو قرارا گلمیشدیم کی، عئینی ائولرده یاشایان اینسانلار بلکه بونا گؤره بو قدر اوخشاردی.  جمیله خالا ساغ طرفده‌کی قاپینی  ایته‌له‌ییب آچدی. من یاری قارانلیق اوتاغا گیردیم. ظریفه ان باشدا قویولموش دمیر تخت‌ین اوستونده اوتورموشدو. اوزو اوتوردوغو تخت‌ین اوزه‌رینه آتیلمیش اؤرتویون سولموش رنگی کیمی ایدی. اوتاغا ایکی تخت آنجاق سیغیشمیشدی. علاوه‌ ده بیر آز قاپییا یاخین یئرده یئر سالینمیش و اونون اوزه‌ری اؤرتوکله بئله اؤرتولمه‌میشدی.  ظریفه آناسی‌نین اوزونه باخیب اونون نه دئیه‌جه‌یینی گؤزله‌دی. - آتان یوخدو. جمیله خالامین ایکی کلمه سؤزو، ائله بیل ظریفه‌نین اوزونه ایشیق کیمی دوشدو. آز جانلانیب، ایره‌لی گلدی و من دوشوندوم کی، او آتاسیندان عیناً من اونون آتاسیندان، بوغازینداکی حولقومدان قورخدوغوم کیمی قورخور. -درسه گلمیرسن- هاردان باشلاییب نه دئیه‌جه‌ییمی بیلمیردیم. اصلینده  ایکی گوندور وورنوخدوغوم حالدا بورا بئله نییه گلدیییمی تام بیلمیردیم. -هه، گلمیرم-  ظریفه‌نین اوزو اَییلدی و او باشینی یاخینداکی یاستیغا سیخیب هؤنکوردو. من دونوب قالمیشدیم. همیشه ظریفه سسسیز آغلاییردی و من اونون سسینی ایلک دفعه‌ ایدی کی، بئله برکدن چیخدیغینی ائشیدیردیم. اَییلیب تخت‌ین آلتیندان نه‌ ایسه آختاردی. دیکله‌ننده الینده‌کی شکلی منه گؤستردی. ساچلاری تؤکولموش، باشی چکیج کیمی دؤرد کونج اولان بیر کیشی باخیردی منه. -بو کیمدی؟- اصلینده جاوابی بیلیردیم. نفسیم دارالدی. ظریفه شکلی یئنه ده آیاقلاری‌نین آلتینا آتدی. کیشی‌نین اوزو خالچایا طرف دوشوب قاپاناندا آز ساکیت‌لشدیم. -سن ائودن قاچ، قوی سنی او چکیج‌باش کیشی ایله ائولندیرمه‌سینلر. منیم پولوم وار. ییغمیشام، جیحونون دا وار. سنه وئره بیله‌ریک. ایسته‌ییرسن من ده سنینله گلیم؟- سون سؤزلری دئیه‌نده جسارتیمین قیریلدیغینی خینجیم-خینجیم اولوب تؤکولدویونو حسّ ائتدیم. عینی آندا اوووجدا سیخیب ساخلادیغیم پوللاری ظریفه‌نین الینه‌ سیخیشدیردیم. *** آخشام آنام کیمسه‌یه دئمه‌دن ظریفه‌نی گؤرمه‌یه گئتدیییمی بیلسه ده آتاما شکایت ائتمه‌دی. اوزومه شوبهه ایله باخیب دریندن کؤکس اؤتوردو. اوتاغیما چکیلیب تلاشلا هامی‌نین یاتماسینی گؤزله‌ییردیم. ائوه سسسیزلیک چؤکنده عمللی‌جه واهمه‌لندیم. ایندییه قدر بو واختلاردا یوخودا اولدوغوما گؤره ائوین بو قدر سسسیز حالینی ایلک دفعه‌ ایدی دویوردوم. عمللی‌جه قورخماغا باشلامیشدیم.   آمّا اصل مسئله‌ باشقا ایدی. ساعتا باخدیم.  نازیک عقربه‌نین حرکتی اوره‌گیمین آتیشلارینی دا سرعت‌لندیریردی و من یاتاغیمین آلتیندا گیزلتدیییم کیچیک چانتامی چیخاراندا هیجان‌دان بوغولاجاقمیش کیمی ائله‌جه اوتوردوم. یئنه ساعتا باخدیم. گئتمه‌لی ایدیم. آنجاق یئریمدن قالخا بیلمیردیم‌. ساعتین عقربه‌لری ائله بیل بئینیمه دؤیه‌جله‌ییردی. ایندی ائودن قاچماغین قورخوسوندان دا آیری بیر قورخو ایچیمه اوتورموشدو. من ائودن گئتسه‌یدیم علی منی هاردان، نئجه تاپا بیله‌جکدی؟ آنی اولاراق اؤزومو قوربانلیق کیمی حسّ ائتدیم و علی‌دن آیری دوشسه‌یدیم بونون گوناهکاری دا ظریفه اولاجاقدی دوشونجه‌سی، ایچیمده اونا قارشی کین یاراتدی. او آن ظریفه‌نین سسسیزیلییینه، عاجیزلییینه نفرت ائدیردیم. نهایت، قالخیب قاپییا یاخینلاشدیم. چانتانی آلمادیم. ساکیتچه جیحونون اوتاغینا یاخینلاشدیم. جیحونون یاستیغینی دارتیب آستاجا سسله‌ندیم. -نه وار؟- جیحون گئری قانریلیب گیلئیله‌ندی  بللی کی، او دا یاتمامیشدی. -من گئتمه‌لییم، یعنی گئتمه‌لی ایدیم، آمّا قورخورام. ظریفه ده گؤزله‌ییر. -هارا گئتمه‌لی‌سن؟ ظریفه هاردا گؤزله‌ییر؟-  جیحون یئریندن دیک آتیلدی. -بو گون ظریفه ایله گؤروشدوم، اونا  قاچاق ائودن دئدیم، ییغدیغیم پوللاری دا اونا وئردیم. باخ سنین داخیلینداکیلاری دا گؤتوردوم-  من گون اورتا جیحونون داخیلینی گیزلینجه آلیب ایچینی بوشالتدیغیمی دئیه‌نده جیحون یورغانی اوستوندن آتیب، قالخدی. -ظریفه هاردا گؤزله‌یه‌جک سنی؟ تئز دئ.

ایستی سودا سویوق گونش یازان:" زومررود یاغمور" کؤچورن:" ویدا حشمتی" دؤردونجو بؤلوم اؤلمه‌سینی ایسته‌ییردیم. آنجاق بونو کیمسه‌یه دئمیردیم.  ایکی گون ایدی تعطیل باشلامیشدی. ائو تلفونو چالاندا تعجب‌لندیم. دسته‌یی قالدیریب یاواش سسله «آلو» دئدیم.  علی‌نین سسینی ائشیده‌نده، بدنیم‌ده یایدا حسّ ائتدیییم گیزیلتیدن داها آرتیغینی حسّ ائتدیم و اونون سسی قولاغیمدان کئچیب قانیما قاریشدیقجا بدنیمده‌کی قان، ائله بیل دریمی یاندیرماغا باشلادی.  علی‌نین سسی یاواش گلیردی، ائله بیل نه‌ایسه کیمدن‌سه گیزلتمه‌یه چالیشیردی. -علی!. ظریفه‌نی آتاسی، آدام واردی ها، افغان  او، اره وئریر- من کؤوره‌لدیم. علی‌نین گوجله ائشیدیلن سسی کسیلدی. من دسته‌یی قولاغیما داها مؤحکم سیخدیم. علی‌نین بیر کلمه سؤزو ایله آغلایاجاقدیم بلکه... -ظریفه‌نی؟- سسی ایندی داها آیدین ائشیدیلدی -او بالاجادیر آخی. -هه، منیم‌له عئینی صینیفدادیر، درسه ده گلمیر. یئنه سکوت چؤکدو. -گونش، سنی کیمسه اره وئره بیلمز- علی دایاندی، -آغیر-آغیر نفس آلدیغینی ائشیدیردیم، اونون داوام ائتمه‌یینی ایسته‌ییردیم. -من قویمارام. علی‌نین زنگ ائتمه‌یینی کیمسه‌یه دئمه‌دیم. آخشام یئمه‌یی‌نین دادینی بئله حسّ ائتمه‌دیم. یاتاغیما گیریب اوزاناندا ظریفه نیشانلاناندان بری ایلک دفعه‌ ایدی کی، قورخمادیم، یاتاغیمدا گؤرونمز اولاجاقمیش کیمی بوزوشوب یاتمادیم.  سحر اویانان کیمی «بس جیحون ظریفه‌نین ائولندیریلمه‌سینه نییه امکان وئریر؟» فیکری بِئینیمه هجوم چکدی. هئچ نه‌یی گؤتور-قوی ائتمه‌دن، جیحونون اوتاغینا جومدوم. -دینله، بیلیرم یاخشیسان، اونو سوروشمورام. سن نییه ظریفه‌نین ائولندیریلمه‌سینه امکان وئریرسن؟    قاشلاریمی چاتیب، کینلی-کینلی اونا باخدیم. او علی کیمی دییلدی و نئچه گوندور منی ده ائولندیره‌جکلرمیش کیمی قورخومدان یاتاقدا بئله قیوریلیب یاتماغیمین سببی هم ده جیحون‌موش کیمی بو آندان، اوندان بئله نفرت ائتدیییمی حسّ ائتدیم.  -نه ائده بیله‌رم مثلا؟  جیحونون اوزونده چاره‌سیزلیک دولاشدی،  سسی کدرلی ایدی. بیر آز اوّل حسّ ائتدیییم نفرت اونون سسینده‌کی کدره ديیب، چیلیک-چیلیک اولدو ائله بیل.  -نه ائدک؟ ائودن قاچاق... -بو ایشلر ائله اولمور. -علی‌دن سوروشاق. -علی‌دن نییه؟- جیحونون اوزو داها دا جدّی‌لشدی. من علی‌نین زنگ ائتدییینی دئمه‌دیم.   -بیلمیرم، او بیزدن بؤیوکدو. بلکه او نئجه ائتمه‌یی بیلیر. دئیر بیزه. - علی بیزدن اوزاقدادیر، نه ائده بیلر علی؟- دوروخدو -ظریفه‌نی گؤرموسن؟ ائودن چیخیر؟ من مکتبه گلمه‌دییینی، ایکی گوندور ائیواندان اونلارین حیه‌طلرینی ایزله‌دیییمی، ظریفه‌نی گؤرمه‌دیییمی دئدیم. -آمّا جمیله خالا دا ایسته‌میر بونو... او آداملار گلنده ده اوزو کدرلی ایدی. قاپییا سؤیکه‌نیب، ائله‌جه قالمیشدی، هئچ گولموردو. -بلکه سن اونلارا گئده‌سن، نه‌یی بهانه ائده بیله‌ریک؟ -بیلمیرم، آنام دئدی کی، داها پالتارلاریمی دا اونا وئرمه‌یه‌جک. اونا او کیشی یئنی پالتارلار آلاجاق. یعنی او آدام- بوینومو قیسیب سسیمی آلچالتدیم. جیحونون یاناقلاریندا قیرمیزی لکه‌لر عمله گلدی و من اونون ساغ الی‌ایله یورغانی سیخدیغینی گؤردوم. آخشام اوستو ظریفه‌گیله گئتمک اوچون سبب تاپماغی دوشوندوم. حیه‌طدن چیخیب هاراسا گئتمک منه قاداغان ایدی. آنام منیم بئله شئیلره گؤره بؤیودویومو دئییردی، آمّا مثلا نه‌یسه اعتراض ائتدیکده «اوشاقسان اوتور اوشاق یئرینده» دئییردی و من بؤیوک یا دا اوشاق اولدوغوما بیر شکیلده قرار وئره بیلمیردیم. آمّا او آخشام بیر یولونو تاپمالی ایدیم. ساعت ایره‌لی‌له‌ییردی، عاغلیما هله ده بیر فیکیر گلمه‌میشدی. چیخیش داروازاسینا یاخین ایدیم، بیر آزدان آتام گله‌جکدی، اوندان سونرا چیخماق هئچ مومکون اولمایاجاقدی.  او آخشام من ظریفه‌نی گؤره بیلمک اوچون هئچ بیر بهانه تاپا بیلمه‌دیم.  سحری گون بئینیم بهانه اویدورماقدان یورغون دوشنده بیردن-بیره قرار وئردیم کی،  هئچ بیر بهانه ده لازم دییل. من قالخیب ظریفه‌نی گؤرمه‌یه گئده بیله‌رم. آنام حیه‌طده گؤزه ديمیردی. داروازانین کیچیک قاپیسینی ایته‌له‌ییب چیخدیم، یولو کئچدیم و جمیله خالاگیلین حیه‌ط قاپیسینی ایته‌له‌یه‌نه قدر هر شئی یاخشی ایدی. اونلارین قاپیسینا چاتاندا دایاندیم، افغانین ائوده اولوب اولمادیغینی دوشونمه‌میشدیم. دوروخوب قالمیشدیم و گئری دؤنوب-دؤنمه‌یه‌جه‌ییمه بئله قرار وئره بیلمیردیم. -گونش- جمیله خالانین سسینده داها گولوش یوخدو- اوردا نییه دوروبسان؟ گل‌سنه... -گلدیم کی... ظریفه‌نی گؤرمک ایسته‌ییرم.  درسه گلمیر.