Arnasoy.uz | Rasmiy kanal

Zarbdor tumanida aholi bandligini ta’minlash, yangi daromad manbalarini yaratish, tadbirkorlik tashabbuslarini qo‘llab-quvvatlash hamda investitsiya loyihalarini amalga oshirishga qaratilgan ishlar izchil davom ettirilmoqda. Shu maqsadda hududda bir qator investitsiya loyihalarining holati va ularni amalga oshirish imkoniyatlari o‘rganildi. O‘rganishlarda AT “Aloqabank” boshqaruv raisi o‘rinbosari F. Maxkamov, AT “Aloqabank” departament direktori J. Uzakov hamda tegishli mas’ullar ishtirok etdi. Xususan, “Oybek” MFYda fuqaro To‘rayev Olim Nuraliyevichning xususiy maktabgacha ta’lim muassasasini tashkil etish loyihasi ko‘rib chiqildi. Qiymati 2 milliard so‘m bo‘lgan mazkur loyiha amalga oshirilishi natijasida 25 ta yangi ish o‘rni yaratilishi rejalashtirilgan. “Navoiy” MFYda faoliyat yurituvchi “Ibrohimjon taomlari” MChJning to‘y va marosimlar tashkil etish loyihasi ham o‘rganildi. Qiymati 3 milliard so‘m bo‘lgan ushbu loyiha bank balansidagi bo‘sh turgan binodan bo‘lib-bo‘lib to‘lash sharti asosida foydalanishni nazarda tutadi. Loyiha doirasida 20 ta yangi ish o‘rni yaratilishi ko‘zda tutilgan. “Nurobod” MFYda faoliyat yurituvchi “Detskiy Mir” MChJning xususiy maktab tashkil etish loyihasi ko‘rib chiqildi. Loyiha qiymati 3 milliard so‘m bo‘lib, uning ishga tushirilishi natijasida 20 nafar fuqaroning bandligi ta’minlanishi rejalashtirilgan. “Taraqqiyot” MFYda faoliyat yurituvchi “Mirzohid Mirsaddam” fermer xo‘jaligining chorvachilik faoliyatini yo‘lga qo‘yish loyihasi ham o‘rganildi. Qiymati 2 milliard so‘m bo‘lgan loyiha doirasida 10 ta yangi ish o‘rni yaratish ko‘zda tutilgan. Shuningdek, “Oybek” MFYda faoliyat yurituvchi “Damir Sadiya” MChJning sut va sut mahsulotlarini qayta ishlash faoliyatini kengaytirish hamda qandolat mahsulotlari ishlab chiqarishni tashkil etish loyihasi o‘rganildi. Qiymati 300 million so‘m bo‘lgan loyiha natijasida 5 ta yangi ish o‘rni yaratilishi rejalashtirilgan. “Yangikent” MFYda faoliyat yurituvchi “MM STARWAYS GROUP” MChJning parrandachilik faoliyatini tashkil etish loyihasi ko‘rib chiqildi. Qiymati 500 million so‘m bo‘lgan loyiha doirasida 5 ta yangi ish o‘rni yaratish belgilangan. “Sharq Yulduzi” MFYda faoliyat yurituvchi “Milliy Oq Oltin Agro” MChJ qo‘shma korxonasining issiqxona faoliyatini kengaytirish loyihasi ham o‘rganildi. Qiymati 118 milliard so‘m bo‘lgan mazkur loyiha ishga tushirilishi natijasida 70 ta yangi ish o‘rni yaratilishi rejalashtirilgan. “Ravot” MFYda faoliyat yurituvchi “Zarbdor Asset Green Hous” MChJning paxta tozalash punkti faoliyatini kengaytirish loyihasi yuzasidan ham o‘rganish olib borildi. Loyiha doirasida 80 ta yangi ish o‘rni yaratish ko‘zda tutilgan. Umuman, mazkur loyihalar to‘liq amalga oshirilishi natijasida jami 300 ga yaqin yangi ish o‘rni yaratilishi va fuqarolar bandligini ta’minlash uchun qo‘shimcha imkoniyatlar yaratilishi ko‘zda tutilgan. Loyihalarning amalga oshirilishi hududda ishlab chiqarish va xizmat ko‘rsatish sohalarini kengaytirish, tadbirkorlik faolligini oshirish hamda aholi daromadlarini ko‘paytirishga xizmat qiladi. Zarbdor tumanida investitsiya loyihalarini qo‘llab-quvvatlash, tadbirkorlik tashabbuslarini rag‘batlantirish va yangi ish o‘rinlarini yaratishga qaratilgan ishlar izchil davom ettirilmoqda.