Kruispad

Sagte en mooi woorde in die storm https://photos.app.goo.gl/v5dPP9Ehftzd9qRW9 Ek is besig om my in te grawe in een van Jesus se gelykenisse waar Hy vir Sy dissipels vertel dat die kos wat jy eet, jou nie kan besoedel nie, maar eerder dit wat hier van binne af kom. Lelike gedagtes soos moord of ontrouheid of om nie die waarheid te praat nie, ontstaan in ’n mens se gedagtes en hart.  Baie mense se harte en gedagtes is besmet. Hulle besef nie dat hulle die deur van hul harte oopstoot wanneer hulle hul mond oopmaak nie. Selfs deur hul dade kondig mense die toestand van hul hart aan.   Baie keer word ons benadeel deur die mense wie se harte en gedagtes nie so lekker vars is nie. Mense kom in jou wêreld in en sê jou sleg en was jou wasgoed op hulle stoepe. Heeltemal ongevraagd.  Soms word ’n mens se naam ongevraagd en heeltemal onregverdig deur die modder gesleep. Jy was rustig besig met jou eie storie, toe daag iemand sommer by jou op en sê dinge wat glad nie waar is van jou nie.  Hoe hanteer ’n mens so ’n situasie? Met wysheid, is my eerste gedagte. Tog is dit nie so maklik nie, want ’n mens se emosies kom in die pad en dan wil jy dadelik opstaan en begin verdedig.  Jy wil die persoon verkeerd bewys. Jy wil vir hom of haar wys op die besoedeling in hulle lewe en dat dit nou jou wêreld ook aan die besoedel is. Met jou woorde wil jy die persoon in jou wêreld innooi om die waarheid te kom kyk.  Jy kan dit doen. Ja, ons moet dit doen om die olifant uit die kamer te kry, maar ons moet dit nie op dieselfde manier doen soos toe die ander persoon skiet-skiet die werf ingekom het nie.  So maklik word ons opgewerk deur die ander een se emosies en voor ons ons kom kry, woed daar ’n jong oorlog en ons weet mos dat daar geen wenners uit ’n oorlog stap nie. Om vuur met vuur te veg, werk nie.   Nee, daar is ’n baie beter manier: 9As iemand lelik teenoor jou optree, moet jy nie op jou beurt lelik wees nie. Hou jou skerp tong in, al beledig iemand jou. Dis menslik om die ander persoon se stemtoon op te tel en op sy of haar trant aan te gaan.  Die menslikheid maak dit egter nie reg nie. Inteendeel, dis nie hoe kinders van God maak nie. Ons wag eers so ’n rukkie voor ons reageer, want dis in die wagtydjie wat wysheid gewoonlik sy opwagting maak.   Wysheid help ons om te besef dat ons eers die emosies op hok moet kry voordat ons reageer. Baie keer soek mense konfrontasie, want hulle is goed daarin om as wenners uit die stryd te tree.  Hulle is egter nie opgewasse om met sagte wyse woorde gekonfronteer te word nie. Gou blaas hulle die aftog en soek ’n ander plek om amok te gaan maak.   Dié een kom nie vanself nie, maar kom ons maak moeite om sagte en mooi woorde vir ander te hê, al kom hulle skiet-skiet op ons werf aan.   Teks 1 Petrus 3:8-11 https://www.bible.com/af/bible/50/1PE.3.8-11.DB Dink bietjie hieroor Waar is jy in die spervuur? Hoe kan jy reg optree? Wie kan jou help?  Gebed Vader, soms kry ek so seer deur ander se manier van praat en doen aan my. Dis dan vir my nie so maklik om nie ook so te praat nie. Mag U Gees my help om sagte en wyse woorde te spreek. Amen.  Shalom Gerjo Ben Ns. Gaan na www.kruispad.tv om na Gerjo Ben en Renata se eredienste te luister. Skakel Sondae om 9:00. in om gemeenskap van gelowiges te ervaar.

Die coach sê: Doen reg 2 Petrus 1:3-9 Wil jy jou geloof laat groei? Wil jy erns maak met dit waarin jy glo? Doen dan wat die coach sê: Doen die regte dinge. Elke keer! Nie so maklik nie, maar ons is tog hiervoor ge-gear! Gerjo Ben Kruispad247TV https://youtu.be/HrPzpS6KxPk Hier is die link na die lied - The Jesus Way by Phil Wickham https://youtu.be/w9VtMrMCRWg

Eensgesind, medelydend, liefdevol, goedhartig, nederig https://photos.app.goo.gl/QWVLi7JZKVc6QacB6 Daar is al baie boeke geskryf oor hoe ’n mens die lewe reg moet lewe of hoe jy moet lewe om sukses te behaal. Die boeke het baie keer ’n punt of twee beet, maar ’n mens vergeet dit so gou en dan kap jy maar weer op die ou manier aan.  As ’n mens egter die Bybel se raad lees en dit deel maak van jou wese, kan die nuwe lewenstyl werklik ’n blywende impak in jou en ander mense se lewens maak.   Hier is vyf woordjies wat ons uit ons koppe moet leer en bewustelik deel moet maak van ons wese: 8Wees almal eensgesind, medelydend, liefdevol, goedhartig, nederig. Omdat ons uniek gemaak is, met elkeen sy eie idees en manier van doen, is dit nie so maklik om altyd eensgesind te wees nie. Die Engelse praat mos van likeminded. Ons moet almal probeer om eensgesind te wees, al stem ons nie oor alles saam nie. Ons moet oop genoeg wees, sodat ons by ander kan leer.   Sit ’n slaggie jou onbuigbare manier van doen eenkant toe. Doen soos die ander een. Miskien neem dit effe langer, maar daar word nie tyd gemors op oorloë nie. Harmonie kry baie meer punte as die wen van jou manier van dink en doen.  Sien jy ook die woordjie ly in die woord medelye? Dit beteken dat wanneer jy medelye uitoefen, jy saam met daardie persoon ly. Saam swaarkry. Saam trane stort. Saam tande kners.  ’n Vriend bel my en sê dis Vrydagaand en hy het nie geld om kos vir sy gesin te koop nie. Ek het net moeg op die bank neergeval. Medelyding beteken om dan op te staan, die gevriesde wildspastei uit die vrieskas te haal, ’n uur op die pad te wees en met ’n opregte glimlag en ’n dankbare hart die kos af te gee.  Wanneer ’n mens ’n plastiekbottel tot bo toe met water vol maak en jy gee dit dan ’n ligte drukkie, loop dit oor. Wanneer ’n mens vol van liefde is, loop dit maklik oor na ander wat dit nodig het.   Ons moet sorg dat ons liefdestenke vol bly. Ons moet toelaat dat God deur Sy Woord en deur die werking van Sy Gees ons vol maak met Sy liefde.   Hierdie liefde moet ons tenke so vol maak dat dit daagliks oorvloei na ander mense se lewens om ons. Dit sal die wêreld vir seker anders maak.   Dis so jammer dat ons kop ons besluite neem en nie ons hart nie. So maklik begin ons somme maak en dan keer ons kop dat ons hart goed doen. Ons moet dalk ’n stokkie steek voor ons somme en toelaat dat ons hart ons besiel en net doen.   Ons is mos Jesus se hande en voete op die aarde. Wanneer ons harte op die ou end die motivering doen, sal mense vir Jesus vandag deur ons in hul lewe ervaar. En natuurlik moet ons dit doen met die eie ek wat op die agtergrond staan en net toekyk.   Kom ons leer die vyf woordjies uit ons kop. Eensgesind, medelydend, liefdevol, goedhartig, nederig. As ons regkry om altyd so te leef, sal ons en die wêreld om ons heel anders lyk!   Teks 1 Petrus 3:8-11 https://www.bible.com/af/bible/50/1PE.3.8-11.DB Dink bietjie hieroor Maak jou lewe werklik ’n verskil in ander? Hoe kan jy in alle omstandighede hierdie vyf eienskappe leef? Wie kan jou hier help?   Gebed Vader, uit dankbaarheid wil ek ’n verskil maak. Op my eie is dit nie moontlik nie. U sal moet help, asseblief. In Jesus Naam vra ek dit. Amen.  Shalom Gerjo Ben Ns. Jy is welkom om ’n gebedsversoek te stuur na [email protected] en Kruispad se gebedsspan sal vir jou intree.

Liefde uitleef nie altyd so maklik nie https://photos.app.goo.gl/DacPyGV2FS8i14TUA Ek laai iemand by die lughawe af. Op pad soontoe sien ek dat die N2 van vooraf lekker dik staan en besluit om eerder die Stellenbosch Arterial te vat. Die pad wikkel deur ’n paar voorstede, maar is toe ook erg verstop.  Ek sit die musiek harder, maar die klomp taxies wat op die linkerkant se skouer verbyskuur, begin aan die temperatuur van my bloed te timmer. Ek sit later die lugversorger hoër en konsentreer op die ritme van die dromme wat doef-doef uit die luidsprekers blaas.  Na ’n bitter lang ruk kom ek voor by die robot en ek sien wat die probleem veroorsaak. Dis die taxies wat op die linker skouer verby gebeur het, wat voor regs wil draai. Daardie pad is ook verstop en die taxies kan nie indraai nie. Nou blok hulle al die lane waarin ek staan om net reguit oor die verkeerslig te ry.   Ietsie het êrens in my gepop.   Die lig was nog rooi vir my toe probeer ’n ou met sy taxi van links voor my indruk. Met spoed skiet ek vorentoe en blok sy pad. Hy wou iets sê, maar ek vermoed hy kon lippe lees en het toe gedwee gewag om eerder voor die volgende ou in te druk.  Die res van die pad het ek my optrede ’n bietjie in oënskou geneem en hoe verder ek gery het, hoe skamer het ek geword. “Jy’s dan die ou wat ander vertel wat die Bybel sê, maar hier het jy ’n toets of twee liederlik gedop!” het ek myself aangevat.  Ja, ek moes my kop in skaamte laat sak. Hierdie een het ek 6-0 verloor. Ek besef maar net weer dis nie so maklik om die Bybel se taal in die wêreld te praat nie. Die lewe gebeur en dan kap ’n mens mos agter jou eie voetspore aan en dit lei nie altyd na die regte pad nie.  Dit vat energie om in alle situasie in Jesus se voetspore te volg. Dit vat opleiding en inoefen. Dit vat val en weer en weer opstaan. Na jy weer jou kop in skaamte laat sak het, moet jy terug na die tekenbord om te kyk hoe jy dit volgende keer anders kan en moet doen.  Die eerste reël op die tekenbord is: 8...Soos jy jou eie broer of suster liefhet, moet julle mekaar liefhê. Die tweede is: Gee vir mekaar om en dit word gevolg met die laaste ene: moenie te veel van jouself dink ten koste van ander nie. Liefde was nie sigbaar nie en nog minder het ek omgegee en vir seker het ek net aan myself gedink. Eintlik alles die teenoorgestelde wat ek gedink het deel van my manier van lewe in die wêreld is.   Ek besef maar net weer dat die klap wat ons van die sonde wat ons met die sondeval gekry het, dieper in ons vassit as wat ons dink. Hier voor die tekenbord besef ek dat ek heel anders te werk sal moet gaan om die eienskappe altyd deel te maak van my lewe.  Ek sal eerstens moet besef dat daar situasies in my lewe gaan wees waaroor ek nie altyd beheer gaan hê nie. Dis so asof my default skeeftrek, in die teenoorgestelde rigting trek.  Ek sal dan die situasies waar ek weet ek nie goeddoen nie, gaan uitsnuffel en dan juis daar op my hoede wees. Ek sal vir die Heilige Gees moet vra om te help, want op my eie gaan ek dit nie maak nie.    Teks 1 Petrus 3:8-11 https://www.bible.com/af/bible/50/1PE.3.8-11.DB Dink bietjie hieroor Waar het jy al jou geduld verloor? Waar sukkel jy met liefde uitleef? Hoe kan jy anders maak om orals liefde uit te leef?   Gebed Vader, ek moet bieg dat ek dit soms ten koste van ander optree. Ek sukkel om liefde orals uit te leef. Vergewe my asseblief en help my tog hier. Ek vra dit in Jesus se Naam. Amen.  Shalom Gerjo Ben

Wees ’n saamtrekker https://photos.app.goo.gl/ZH82fCXhuTNyq4L2A Die woord dwarstrekker kom uit die ossewaens se tyd. As een van die beeste nie saam met die span wil trek nie en sy eie ding die heeltyd doen, word hy onmiddellik beslaan met die naam dwarstrekker.   Die kans dat hy sy pos in die span sal behou, is nie goed nie. Hy word vir ‘n tyd afgesaal om eers sy eie ding te doen. Dan sal hy later weer ingespan word, maar as hy nie vinnig deel word van die span nie, is die rooster sy voorland.   Die Bybel sê ons moet eensgesind wees, die teenoorgestelde van ’n dwarstrekker. In Engels sê hulle ons moet likeminded wees. Ons moet in harmonie met mekaar leef, sonder om toe te laat dat ons verskille ‘n kloof tussen ons veroorsaak.   Eintlik moet ons mekaar toelaat om in die ander een se wêreld in te kom, sodat ons kan sien hoe doen die ander dit. Dan kan ons van mekaar leer en dalk ons skewe manier van lewe reguit trek en in gelid stap met mekaar.   Ons is mos eintlik op pad na dieselfde plek. Ons het dieselfde doel en daarom moet ons saam in dieselfde rigting trek. Wanneer ons saamtrek, gebruik ons veel minder energie as wat een heeltyd die ander kant toe trek.  Tog is ons almal nie dieselfde nie. God het ons elkeen uniek gemaak. Ons elkeen sien die wêreld anders en ons ervaar dit nie noodwendig soos die ander nie. Dit is nie verkeerd nie.   Ek werk met musiek in die agtergrond en my voete loop die heeltyd rond onder die tafel. As dit stil is, raak ek onrustig en wonder wat is fout. Renata is weer die teenoorgestelde. Sy het stilte nodig en sal sommer met armpies in die sy kom staan as ek die water fonteintjie in ons agterplaas laat loop.   Die geraas van die water maak my rustig. Vir haar pla dit.   Maar ons jaag dieselfde doel na. Ons wil God dien met alles in ons. Ons wil ons roeping oral uitleef en ’n verskil maak waar ons gaan. Ons doen dit net effe op ’n ander manier en hiervoor moet ons ruimte hê.   Soms sit ek my musiek sagter en soms laat sy my gaan met die doef-doef wat die ruite laat rattle. Maar in ons uniekheid het ons ruimte vir ander en kom ons by dieselfde doel uit: om ander by te staan waar hulle dalk swaar deur die lewe ploeg.  Hiervoor het jy ’n hart nodig. Eintlik alle kinders van God moet met so ’n hart op hulle mou loop. Mense moet kan sien dat ons ander mense se swaar wil help dra. Ander moet dit aan hulle lywe ervaar dat ons werklik omgee en sensitief is vir ander se seer.   Dis moeilik om vandag waar ons so hard baklei vir ons eie sonnige plekkie in die wêreld, om ook op ander ingestel te wees. As jy egter besef wat Jesus vir jou gedoen het en jou uit die modder van die lewe kom sleep het, wil jy mos van hierdie genade aangee vir die mense wat saam met jou in die modder geploeter het.   Dan raak jou hart sag en soek jy gereeld ’n plekkie waar jy werklik ander wat swaar sleep, se las ligter kan maak deur te help sleep. Ja, dan is ons nie dwarstrekkers nie, maar saam-trekkers.  8Vir julle almal kom dit hierop neer: moenie dwarstrekkerig wees en elkeen sy eie kop volg nie. Wees sensitief vir mekaar se gevoelens.  Teks 1 Petrus 3:8-11 https://www.bible.com/af/bible/50/1PE.3.8-11.DB Dink bietjie hieroor Is jy soms dwarstrekkerig? Hoe kan jy nie meer dwarstrek nie? Waar moet jy nou saam trek?   Gebed Vader, ek weet U wil nie hê ek moet dwarstrekkerig wees nie. Help my asseblief om meer sensitief vir ander se gevoelens te wees. Ek vra dit in Jesus se Naam. Amen.  Shalom Gerjo Ben