Kruispad

Saai liefde, nie oorlog https://photos.app.goo.gl/9P2RCA8pM56dcCXv8 Voor ek stil word, val my oog op ’n berig van ’n Afrika-land wie se regering alweer omvêr gegooi is. Steeks manne in die weermag het die nag ingesluip en die land oorgevat. Die een ou se kommentaar: Afrika se demokrasie in werking. Die ou met die grootste geweer is in beheer.   Dis nie God se idee nie. ’n Vriend van my wil graag die Zimbabwe ruïnes vir ons gaan wys. Dit is heel merkwaardig hoe die mense die klomp stene honderde jare gelede daar in hoë rye gepak het en dat dit vandag steeds staande bly.   My oog vang die dorpie Morgenster net so 5 kilometer verder. Ek wil dit terstond besoek, want my pa en ma het mekaar daar ontmoet. Dit was nogal vir my emosioneel om daar te kon rondloop en natuurlik word daar ’n preek geskiet.   Soos gewoonlik vlieg ek met die hommeltuig om videomateriaal vir die preek te kry. Ek staan verwonderd wat ek van bo af sien: ’n skool vir dowes en ’n skool vir blindes. ’n Laer- en ’n Hoërskool. ’n Kerk en ’n teologiese skool. ’n Groot onderwys kollege en ’n klomp huise.   Alles tot stand gekom deur ’n paar sendelinge in 1891 wat nie anders kon as om die liefde van Jesus met ander te deel nie. Wat nie anders kon as om op ’n praktiese manier ’n verskil in mense se lewens te maak nie.   Vandag nog maak dit ’n reuse verskil in hierdie Afrika-land.   Dit is God se idee!  Nog ’n idee van God is dat ons sag met mekaar sal werk. 4... Hoe mooi is dit nie as ’n vrou sag en vriendelik optree nie! Of ’n vrou nou oud of jonk is, hierdie soort mooiheid kan jy nie van haar af wegvat nie. In God se oë is dit die kosbaarste juwele wat ’n vrou kan dra. En soos ek elke keer sê, dit geld vir mans ook. Dis God se idee dat ons sag en vriendelik teenoor mekaar sal optree. Nee, nie oorloë en omvêrwerping van regerings nie. Selfs nie ’n ligte oorlog in ons verhoudings nie.   Kyk maar so bietjie om jou, mense skiet gate in mekaar met hulle tonge. Daar lê lyke orals rond van huwelike waar eggenotes mekaar verwoes het. Dis beslis nie God se idee van verhoudings nie.  As elkeen van ons net hierdie een reël kan afdruk op ons verhoudings en sag en vriendelik teenoor mekaar optree, sal die wêreld anders lyk. Onthou, dit gaan nie oor hoe mooi ons vir die wêreld lyk nie. Ons optrede praat harder as ons looks. Dis die mooi dade, die uitleef van Jesus se liefde wat ’n glimlag op God se gesig sit. Die sigbaar maak van Jesusliefde is die droom wat nagejaag word en meer as honderd jaar later gebruik God steeds Christen onderwysers in ’n Afrika-land wat sag en vriendelik teenoor mekaar optree.  Mag ons elkeen in ons lewe die ware skoonheid najaag en mag ons manier van lewe die wêreld ’n plek van vrede maak.  Teks 1 Petrus 3:1-7 https://www.bible.com/af/bible/50/1PE.3.1-7.DB Dink bietjie hieroor  Wat pas nie in God se idee vir jou wêreld nie? Wat pas in God se idee in jou wêreld? Hoe kan jy dit gaan uitleef Gebed Vader, ek weet ek doen dinge wat nie ’n glimlag op U gesig sit nie. Help my om eerder te doen wat binne U wil vir my lewe is. Ek vra dit in Jesus se Naam. Amen.  Shalom Gerjo Ben

Hoe gemaak met die ongelukke in jou lewe? 2 Korintiërs 4:7-18 God wil hê dat ons ons vrese en uitdagings op ’n spesifieke manier moet hanteer, sodat ons nie terneergedruk, radeloos, verlate of vernietig moet voel nie. Dis nie maklik nie, maar kom ons probeer wel. Gerjo Ben Kruispad247TV https://youtu.be/sy9jbIZqrX4 Hier is die link na die lied - Hard Season by Matthew West https://youtu.be/cKpaKaIzAq8

Soos ‘n moederhen … https://photos.app.goo.gl/T9W9LfGcE1T1ZzED8 My Ma sê vandag steeds vir my en my broer en suster hoe lekker dit vir haar is wanneer al haar kuikens onder haar vlerk is. Wanneer die lewe met sy uitdagings ons in trane gehad het, was sy op haar gelukkigste as ons by haar kom inloer. Dan het sy enige iets gedoen om ons las ligter te maak.   ‘n Ma wil, soos ‘n moederhen, haar kuikens teen die aanslae van die lewe beskerm en hulle veilig hou. ‘n Ma wil haar kuikens toevou en naby haar lyf hê sodat sy kan weet hulle is ok.  Ongelukkig is daar baie moederhenne wat vandag ‘n hartseer verhaal het oor haar kuikens wat gekies het om nie by haar te leer hoe om weg te bly van gevaar nie en ook nie by haar skuiling soek nie. Om dan die gevolge van daardie kuikens se verkeerde keuses te aanskou, is hartverskeurend.   Jesus het soveel begrip. Hy het Sy eie begeertes en gevoelens teenoor die hardkoppige mense in Jerusalem met dié van ‘n hoenderhen vergelyk. In Matteus 23:37 lees ons: “Jerusalem, Jerusalem! Jy wat die profete doodmaak en die boodskappers stenig wat na jou toe gestuur is, hoe dikwels wou Ek jou kinders bymekaarmaak soos 'n hen haar kuikens onder haar vlerke bymekaarmaak, maar julle wou nie!” Wanneer die hen 'n roofdier sien aankom, maak sy 'n harde geluid om haar kuikens bymekaar te maak, sodat sy haar vlerke om hulle kan vou en só teen die gevaar kan beskerm.  Net soos 'n moederhen haar kroos onder haar vlerke wil wegsteek wanneer daar moeilikheid kom, net so wil God Sy volk teen die gevare van die lewe beskerm deur hulle te nooi om naby Hom te bly.  Jesus se woorde aan die einde van vers 37 is egter hartverskeurend: “… maar julle wou nie!”  Die geskenk van God om self te kies, is dikwels die oorsaak van ons eie dood. God dwing ons nie om Hom lief te hê en te gehoorsaam nie. Dit bly ons keuse. Net so kan ‘n hoenderhen ook nie haar kuikens dwing om onder haar vlerke in te beweeg wanneer die gevaar dreig nie.    Op Moedersdag wil ek jou herinner dat God aan jou spesiale kwaliteite as moeder gegee het om te beskerm en te lei, maar al kies jou kuikens dalk verkeerd, glo ek jy sal, soos Jesus, altyd daar wees as hulle besluit om die veiligheid van jou nabyheid op te soek.   God, ons Vader, was die Skepper van elke moeder. Elke moeder is dus na God se beeld geskep. Daarom sê ons vandag dankie dat Hy aan ons die kapasiteit gegee het om te beskerm en te lei, maar ook om die verwerping te kan hanteer, soos wat Hy die verwerping van Sy Skepsels steeds elke dag hanteer.   Teks Matteus 23:37 https://www.bible.com/af/bible/6/mat.23.37 Dink bietjie hieroor Is jy ‘n moederhen wat teleurstelling moet hanteer? Hoe word jy vandag deur God vertroos? Is jy ‘n kuiken wat gekies het om nie Sy beskerming te geniet nie? Watter troos en hoop het jy vandag gevind? Gebed Hemelse Vader, dankie vir die kwaliteite van ‘n moederhen wat U in moeders gedeponeer het. Jesus, dankie dat U die hartseer van verwerping ken en dat daar altyd vir ons ‘n veilige plekkie onder U vleuels is. Heilige Gees, herinner ons almal dat hardkoppigheid hartverskeurende gevolge kan hê, maar dat ons kan kies om terug te beweeg na U vleuels van veiligheid. Ons bid in Jesus se Naam. Amen. Shalom Renata

Mooi mense https://photos.app.goo.gl/ZB7crbBDC29bGhtM8 Ek sê gereeld dat ek gelukkig is om ’n man te wees. Ons mans spandeer nie baie tyd om man te wees nie. Ons staan op, spring in die stort, borsel ons tande en stoot ’n kam of borsel deur ons hare. En daar trek ons die dag in.  Vrouens doen dit nie so vinnig nie. Wel, die meeste van hulle nie. Daar word behoorlik geskrop in die stort, so asof hulle die vorige dag onder ’n kar gelê het of deur die lande geploeg het.   Nadat die dag se pakkie uiteindelik sy verskyning uit die kas gemaak het, breek die tyd vir hare doen en mooimaak aan.   Op en af beloer sy haar dan in die spieël en die meeste van die kere is daar nie iets wat goed genoeg lyk nie. Dalk ’n ander pakkie of nog ’n druk aan die hare, totdat sy met ’n tevrede stappie die dag aanvat.  Teen daardie tyd het ek al ’n lang stuk van my dag agter die rug.  Ek vermoed ons mans slaan nie genoeg ag daarop dat ons vrouens hulle so mooimaak vir ons nie. Dalk moet ons dit oorweeg om so nou en dan ’n mooi kompliment in hulle rigting te stuur. Ek vermoed hulle sal dit erg waardeer.  Tog is daar iets wat nog meer werd is as 'n goed versorgde vrou. Dit voeg soveel waarde by en word deur almal met wie sy skouers skuur, raakgesien. Dit is die mooiheid wat van binne af uitstraal.   3Ek vra julle: Wanneer is ’n vrou regtig mooi? Vir ’n Christen sit skoonheid nie aan die buitekant nie, maar dit kom van binne. Dis seker waar dat skoonheid vir ons wat kinders van God is, van binne kom. As iemand jou met mooi en sagte woorde groet, voel ’n mens sommer welkom en weet jy hier is iemand wat omgee.   Wanneer iemand jou dadelik die hand gee as jy êrens langs die pad van die lewe staan, ervaar ’n mens ’n plekkie van hoort. As iemand vir jou ’n stukkie tyd uit hul besige lewe gee, sonder om haastig te lyk om weer die pad te vat, voel ’n mens spesiaal.  Dis alles skoonheid wat van binne kom. So ja, al waardeer ons vrouens en natuurlik mans wat goed versorg is en moeite maak met hul voorkoms, is dit belangriker hoe dit binne die mens lyk.   Dis die binneste skoonheid wat eintlik tel. Die buitenste skoonheid dop so met die tyd af. Plooie kom, hare val uit en boepense stoot.  Maar dis die binneste skoonheid wat met die grysheid net meer word. Dis die ondervinding wat ’n mens leer hoe om toe te sien na die binneste skoonheid en eerder meer tyd daarin te belê.   Mag ons, mans en vrouens, meer belê in die skoonheid binne-in ons, sodat die wêreld ook die liefde van Jesus kan sien en daarvan kan beleef.   Teks 1 Petrus 3:1-7 https://www.bible.com/af/bible/50/1PE.3.1-7.DB Dink bietjie hieroor Skyn jy van binne af? Is dit mooi vir ander? Maak dit ander beter?  Gebed Vader, ek weet dat skoonheid eintlik van binne kom. Mag my skoonheid ander mense nader aan U trek. Ek vra dit in Jesus se Naam. Amen.  Shalom Gerjo Ben

Slegs Jesus in die middel https://photos.app.goo.gl/ktUtQr87KLodMwbn6 Wat is bekommernis? Wanneer begin ons stres? Wanneer ons nie meer in beheer is nie. Wanneer dinge buite beheer raak.   As ek genoeg geld in die bank het, stres ek dan? Nee, want ek is in beheer van my geldsake.   Maar as ek onseker is of daar genoeg geld teen die einde van die maand in die bediening se rekening gaan land om al die uitgawes te dek, rol ek rond.   As die dokter daar in die spreekkamer die nuus vertel, op ’n manier die vervaldatum sticker op ons lyf kom plak, slaan ons in koue sweet uit.  Vrae pop op. Wat van die? Wat van daai? Jy sien, ons is dan buite beheer. Ons kan nie die roes wat hier binne aan die vreet is, beheer nie. Ons weet nie of die dokter ons ongesteldhede met sy salfies sal kan beheer nie en dit veroosaak spanning vir ons en ons families.   Wanneer die wiele van ons huwelik na al die jare se probeer afkom, raak selfs dit buite beheer en ...  Dan worry ons. Dan trek dit baie amps. Ons fokus net op die uitdaging in die pad. Ons slaap sleg. Ons voel sleg en baie keer moet die mense langs ons die pak vat vir ons wat in tamatiestraat is.   Eintlik wil ek sê: welkom by die lewe, want dis presies wat in die lewe aangaan. Die lewe is gesaai met uitdagings. Sonder uitnodiging kom lê die uitdagings in ons pad. Sommerso ongevraag.  Die probleem kom in waar ons die deur van ons hart oopstoot vir die uitdaging om sy lêplek te kom maak. Nou is dit ons verantwoordelikheid om dit op ons eie te hanteer en dis hier waar die stres oplaai.  Want ons kan dit nie op ons eie hanteer nie. Dis juis hier waar ons buite beheer raak en nie ’n groot genoeg vurkhyser het om die uitdagings uit die pad te sleep nie. So wat nou?  Ons moenie toelaat dat die bekommernisse in ons hart kom blyplek maak nie. Dis nie hulle plek nie. Daar is eintlik net vir een plek: 15Julle moet eerder wys dat daar in julle lewe net vir Een plek is, naamlik vir Christus, die Here. Hierdie klink nou amper soos ’n geestelike sousie wat ons oor ’n probleem wil smeer of ’n pleister wat te klein is, probeer plak oor ’n groot seer. Maar dit is nie so nie. Jesus moet die fokuspunt wees en bly. Enige iets of iemand anders gaan net die dinge binne ons opfoeter.   Jy sien, wanneer Jesus alleen in ons harte woon, help Hy ons om die uitdagings wat in ons pad is, te hanteer. Nee, Hy tel hulle nie op en skuif hulle uit die pad uit nie. Hy help ons met Sy Heilige Gees om hulle in die regte perspektief te sien.  God is baie kragtiger as enige probleem in ons pad. Jesus en die Heilige Gees help ons om die uitdagings met ’n nuwe bril te sien en saam planne te maak om dit te takel. So nee, as Jesus die enigste een in jou hart is, gaan jou probleme nie soos mis voor die son verdwyn nie. Hy gaan jou wel help, wysheid en krag gee om daaraan te werk en te help om dit aan te spreek.   Probeer dit!  Teks 1 Petrus 3:12-17 https://www.bible.com/af/bible/50/1PE.3.12-17.DB Dink bietjie hieroor Hoe lyk die uitdagings in die pad? Is Jesus alleen in jou hart? Hoe kan jy die ander in jou hart wegjaag?   Gebed Vader, dankie vir hierdie boodskap, want ek sukkel met die uitdagings. Ek laat baie ander toe in my hart. Help my om hulle uit te kry en Jesus alleen daar te laat woon. Amen. Shalom Gerjo Ben Ns. Jy is welkom om ’n gebedsversoek te stuur na [email protected] en Kruispad se gebedsspan sal vir jou intree.

Dade trek vêr https://photos.app.goo.gl/tjTgncQx8pJtQkpN8 Ek sê gedurig dat ons nie noodwendig met woorde mense moet vertel van die Here nie, maar veral met ons dade. Die spreekwoord sê mos: woorde wek, maar voorbeelde trek.   ’n Mens stap makliker agter ander se dade aan as wat ons hul woorde volg. En nog minder help dit as iemand sê moenie maak soos ek maak nie, maak soos ek sê. Dit maak mense en veral kinders net woes deurmekaar.   Ek kuier saam met vriende by hul vriende. Ons kuier baie lekker en ons geniet die mense se geselskap. Later vind ek uit dat die een paar nie gelowig is nie. Hulle was in die kerk, maar is so seergemaak dat hulle glad nie meer glo nie.  Om met die mense in gesprek te gaan en hulle te probeer oorreed om hul besluit om nie meer te glo nie, te heroorweeg, sal heel waarskynlik nie werk nie. Die seer dade aan hulle het te hard gepraat en verwoesting gesaai.  Ek het die volgende oggend in my bed gelê en gewonder of my dade gehelp het om die mense te laat wonder oor hulle besluit. Of het my dade hulle rustig laat slaap oor hul besluit om hul geloof in God vaarwel te roep?  Die Woord van God moedig vrouens wat nie gelowige mans het nie, aan om hul geloof prakties en te alle tye uit te leef. 1... Die manier waarop julle in die gesin leef, is belangrik. As daar byvoorbeeld ’n man is wat nie na die Woord van God wil luister nie, 2moet die manier waarop jy as vrou leef, hom oortuig dat dit waarin jy glo, die waarheid is. Jou lewe praat baie harder as jou woorde. Dit is eintlik nie eens nodig om baie met jou man oor God te praat as jy leef soos Hy wil hê nie. So sal jy vir jou man wys hoe wonderlik God is. Hierdie geld natuurlik vir mans wie se vrouens ook nie gelowig is nie.   So trou ek ’n jong man wat ongelooflik lief is vir sy nuwe vroutjie. Hulle pas soos ’n handskoen. Sy ouers is gelowig, maar ongelukkig kom die vroutjie uit ’n ouerhuis waar daar geen geloof in God was nie.  In ons gesprekke voor die huwelik het ons keer op keer by geloof ’n draai gemaak, maar omdat die vroutjie geen blootstelling daaraan in haar ouerhuis gehad het nie, kon sy nie saampraat of selfs vrae vra nie.  Ek het baie mooi vir haar eggenoot verduidelik watter reuse taak hy het om as gelowige man vir haar te wys wat Jesus se liefde werklik beteken. Deur sy dade moes sy vroutjie dit aan haar lyf voel.  Natuurlik geld dit nie net in die huwelik nie, maar in alle verhoudings. Daar by die werk moet mense kan sien en ervaar ons is anders. Hulle moet deur ons dade kan ervaar wat dit beteken om ’n gelowige in God te wees.  God se wonder moet deur ons dade sigbaar word in die wêreld. Woorde raas deesdae in mense se koppe, want daar is soveel strooi stories. Woorde wek en verdwyn in die donker, sonder dat dit enige impak maak. Maar dade strek, dit maak ’n impak en kan met die werk van die Heilige Gees mense se oë oopmaak en lewens verander.   Teks 1 Petrus 3:1-7 https://www.bible.com/af/bible/50/1PE.3.1-7.DB Dink bietjie hieroor  Hoe lyk jou woorde? Hoe lyk jou dade? Sien mens die wonder van God in jou dade raak?  Gebed Vader, ek weet dat my dade nie altyd reg is nie. Vergewe my asseblief en help my om ander van U te vertel met my dade. Ek vra dit in Jesus se Naam. Amen.   Shalom Gerjo Ben Ns. Jy is welkom om ’n gebedsversoek te stuur na [email protected] en Kruispad se gebedsspan sal vir jou intree.

Wees ’n goeie eggenoot https://photos.app.goo.gl/gbj4cuZMMLDL6Fhp8 Dis vir my so lekker om die kalwerliefde van jongmense dop te hou. Hulle is die heeltyd in mekaar se space bubbles. Soms wonder ek of my seun nog weet dat hierdie sy ouerhuis is en nie net ’n pitstop vir skoon klere en sakgeld nie.  Dis vir my net so lekker om betrokke te wees by jong paartjies wat wil trou. Hulle sit so styf teen mekaar op die bank en hou hande vas. Hulle is al te geneë om te leer en saam aandag te gee aan die werksareas wat die program geïdentifiseer het.   Dis vir my so lekker om God se Woord te bring by die troues waar die twee trou aan mekaar belowe. Hulle oë skitter en in die toesprake belowe hulle om deur dik en dun mekaar te dien.  Dan is dit nie vir my lekker om te sien hoe hierdie pragtige paartjie se wiele afkom sodra die lewe te bedrywig raak en die kinders al hoe meer aandag vereis nie. Ja, ek weet daar is huwelike waar die een party heeltyd skeeftrek en die ander een mishandel. As die een nie sy streke laat staan nie, is daar ’n groot kans dat die ander uit hierdie onveilige mure gaan breek.  Waar steek die eerste krakie sy kop uit? Ek het dit al gesê, maar ek sê dit weer. Dis so belangrik. Wanneer ’n paartjie by my pa se spreekkamer opgedaag het, was sy eerste vraag aan hulle: “Bid julle nog saam?”  Wanneer ’n paartjie gereeld saam bid, is dit nogal nie so maklik om te baklei nie. Wanneer jy deur gebed vir God en die Heilige Gees daagliks in jou huwelik innooi, is dit makliker om sagte woorde vir mekaar te hê, al is die weer bewolk.  Dan is dit so belangrik dat ons mekaar dien. Let wel: mekaar. 1... Wees ’n goeie vrou (en man) vir jou man (en vrou). Doen wat hy (of sy) van jou verwag. Die 1983-vertaling praat van onderdanig.   Vrou én man moet aan mekaar onderdanig wees. Daar is sekere afdelings in die huis wat ek oorgee aan my vrou, want sy is eenvoudig beter daarin. Sy call the shots daar en ek aanvaar dit met liefde so.   Daar is weer ander afdelings wat ek weer beter doen en sy aanvaar dat ek daar in beheer is. Dit is belangrik dat ons albei ons deel in die huis en in ons huwelik doen, want dit verseker ‘n gelukkige lewe.   Wanneer ’n mens besluit om te trou, offer ’n mens ’n stuk van jouself op. Die “ek wil hê” word vervang met wat “ons wil hê”. Wat vir my belangrik is, verander na wat vir ons belangrik is. Maar dit lyk vir my hoe langer ’n mens getroud is, hoe meer word die ons na die agtergrond geskuif en kom staan die eie ek kordaat regop.  Die huwelik is nie give and take nie. Jy gee ’n bietjie en ek gee ’n bietjie nie. Nee, die huwelik is gee en gee en gee. As jy iets terug ontvang, is dit ’n bonus. Kom ons maak tyd vir mekaar en kyk waar kan ons skaaf om ’n goeie eggenoot te wees. Kom ons kyk waar ons aan die ander een se verwagtinge kan voldoen. Kom ons kyk hoe ons die wêreld kan wys hoe werk ’n gesonde huwelik en hoe ons mekaar regtig kan geniet.  Teks 1 Petrus 3:1-7 https://www.bible.com/af/bible/50/1PE.3.1-7.DB Dink bietjie hieroor  Waar is daar haakplekke in jou huwelik? Waar is werksareas? Hoe kan julle mekaar beter dien?  Gebed Vader, dankie vir my huwelik. Ja, ek weet daar is plekke waar ons moet skaaf. Gee aan my asseblief meer wysheid en versterk ons liefde vir mekaar. Amen.  Shalom Gerjo Ben Ns. Jy is welkom om ’n gebedsversoek te stuur na [email protected] en Kruispad se gebedsspan sal vir jou intree.

The buck stops here! https://photos.app.goo.gl/Q6AnJhbXRtnkbmUq9 Wanneer ’n mens ’n besigheid begin, doen jy alles self. Jy doen die aankope en die verkope. Jy maak jou hande vuil en sit die produk aanmekaar. Jy ontvang die geld en spandeer dit weer. Dit noem ’n mens ’n eenmansaak.   Soos die besigheid groei, begin jy meer mense aanstel. Mense om te help met die bemarking, aankope en vervaardiging. Mense wat help om die produk by die kliënte uit te kry en administratiewe personeel om te help dat die kantoorsake vlot verloop.   Ewe skielik doen jy glad nie meer wat jy aan die begin gedoen het nie. Jy dra nou netjiese klere en maak nie eintlik meer jou hande vuil nie. Meer kere sit jy met syfers en beplan die toekoms van die besigheid. Ja, en later is jy die personeelbestuurder wat almal se persoonlike stories ken en hul behoeftes moet aanspreek.  As daar fout kom, hardloop almal na jou toe. As die finansies steier, moet jy pa staan. As die kliënte ontevrede is, bel hulle jou. As die produk nie op standaard is nie, moet jy die planne maak. Soos die Engelsman sê: The buck stops here! Alles word op jou tafel gesit en jy is die laaste een wat dit kan hanteer.   Dit maak ’n mens moeg en later wonder jy hoekom jy so groot geraak het. Kan jy nie maar net weer teruggaan na ’n eenmansaak nie?  Dis egter ’n posisie waarvoor Jesus Sy hand opgesteek het. Hy is die Herder wat omsien na die welstand van Sy skape. Hy is die Een wat graag vir elkeen wil help met hul probleme en uitdagings. As daar enige foute is, wil Hy help met die oplossing.   Jesus, die Herder, gee werklik om. Hy wil sorg dat jou lewe nie in gevaar gestel word nie. Hy wil jou lei na groen weivelde waar dit goed sal gaan met jou. Hy wil toesien dat daar waar jy in die wêreld woon, werk en speel jy nie uit die bus sal val nie.   25Julle het immers soos skape rondgedwaal, maar nou het julle teruggekom na julle Herder en die Bewaker van julle lewe. (1983-vertaling) Ons het rondgeploeter in die donker. Soms het ons onsself te pletter geloop weens keuses wat nie so lekker vars was nie. Ons het die littekens, maar gelukkig het ons as verlore skape teruggekom na die Skaapwagter.   Hy is ons bewaker. Die Griekse woord wat ons hier gebruik vir bewaker, beteken letterlik toesighouer of selfs biskop of hoof van die kerk. Dit is presies wat Jesus is. Dis Sy werk om toe te sien na God se mense in die wêreld.  Hy sien toe dat God se kerk, God se besigheid in die wêreld reg verloop. As daar probleme is met enige van die lede van God se kerk, kan hulle na Hom gaan. Hy wil graag help. Hy is die personeelbestuurder wat graag na elkeen wil omsien. Hy wil help en Hy wil wysheid gee. Ja, the buck stops here! Trek jy swaar? Het jy uitdagings in jou pad wat te groot is om te hanteer? Het jy seer? Het jy wysheid nodig? Gaan na die hoof, die bestuurder, die toesighouer, die een wat al die toue bymekaarhou. Hy wil graag help.  Teks 1 Petrus 2:22-25  https://www.bible.com/af/bible/50/1PE.2.22-25.DB Dink bietjie hieroor  Wie bestuur jou lewe? Waar moet jy nader aan die Bewaker beweeg? Hoe kan jy die hoof van die kerk in die wêreld meer tyd in jou lewe gee?  Gebed Jesus, ek kan nie sonder U nie. Ek erken U as die Bewaker, die CEO van my lewe. Ek wil graag meer en meer tyd in U teenwoordigheid deurbring. Amen.  Shalom Gerjo Ben Ns. Jy is welkom om ’n gebedsversoek te stuur na [email protected] en Kruispad se gebedsspan sal vir jou intree.