❗️ALIMЕNT UNDIRISH TO‘G‘RISIDAGI ARIZA SUD TOMONIDAN NЕCHA KUNDA KO‘RIB CHIQILISHI KЕRAK ?
⚡️SAVOL:
Men aliment undirish uchun sudga bundan bir yarim oy oldin ariza bergan edim. O‘sha arizamni haligacha natijasi bo‘lmadi. Savol shuki, o‘sha arizam sud tomonidan necha kunda ko‘rib chiqilishini bilmoqchiman.
⚡️JAVOB:
Fuqarolik protsessual kodeksining 207-moddasi 2-qismiga asosan,
➖ aliment undirish haqidagi ishlar sud muhokamasiga tayyorlab bo‘lingan kundan e’tiboran yigirma kundan kechiktirmay birinchi instansiya sudi tomonidan ko‘rilishi kerakligi belgilangan.
✏️ Savol tug‘ilishi mumkin, ishni sud muhokamasiga tayyorlash uchun qancha vaqt ketadi ? Yuqoridagi kodeksning 202-moddasida, fuqarolik ishlarini sud muhokamasiga tayyorlash ariza qabul qilingan va fuqarolik ishi qo‘zg‘atilgan kundan e’tiboran o‘n kunlik muddatdan kechiktirmay amalga oshirilishi kerak deb ko‘rsatilgan.
✏️ Demak, ishni sud muhokamasiga tayyorlash uchun ko‘pi bilan 10 kun va sud muhokamasiga tayyorlab bo‘lingan ishni ko‘rib chiqish uchun ko‘pi bilan 20 kun. Shunda hammasi bo‘lib aliment undirish haqidagi sudga bergan arizangiz sud tomonidan 30 kun ichida ko‘rib chiqilib tegishli sud buyrug‘i qabul qilinishi kerak. Sizni ariza berganingizga bir yarim oy bo‘lgan bo‘lsa shu vaqtgacha sud tomonidan ijro xujjatidan Sizga ko‘chirma yuborilgan bo‘lishi kerak edi. Sizga suddan ko‘chirma xujjat kelmagan bo‘lsa Siz MIBga yoki o‘sha sudning o‘ziga borib arizangiz natijasini talab qilsangiz bo‘ladi.
✏️ Sud tomonidan Sizga arizangiz natijasi shu vaqtgacha yuborilmaganligi bu ularning aybi ekanligi aniq (FPK 270-modda). Nima xam deymiz, hozir ayrim sudlar muddatlarni buzish kabi qonunbuzilish holatlariga umuman e’tibor bermay qo‘yishgan. Ha desa ishimiz haddan tashqari ko‘p deydi. Unda joyingni bo‘shat deyilsa tish-tirnog‘i bilan yopishadi. Tuyani shamol uchirsa, echkini osmonda ko‘r deganlaridek, sudlarni o‘zida qonunbuzilishlari ko‘p bo‘lsa boshqa joylardan nimani kutish mumkin...