📚 تامی کتێب | Tamî kitêb 📚

شتێڤان تزڤایک دەڵێت «ئەوەی سەربەخۆ بیربکاتەوە، لە هەمان کاتدا باشتر و کۆمەککارتر بۆ هەمووان بیردەکاتەوە». بەم پێیە مرۆڤی ئازاد و سەربەخۆ تەنیا بە خەسڵەتی ئازادیی و جودایی و جیابوونەوە لە گرووپ وەسف ناکرێت. مرۆڤی سەربەخۆ کەسێک نییە گۆشەگیر کە تەنیا پێ لەسەر ئازادی فەردی خۆی دادەگرێت، بەڵکوو بوونەوەرێکە جیاواز لە هەموو  ئەوانیدی، ئەوانەی لە نۆرم و ئەخلاقی کۆمەڵگادا تواونەتەوە باشتر و بەسوودتر بیردەکاتەوە. لە دونیای ئێمەدا کە کۆمەڵگاپەرستی و قودسییەتی ئەخلاقی زۆرینە باڵادەستە، بیرکردنەوەی سەربەخۆ، ڕۆحی ئازاد وەک شتگەلێکی ناکۆمەڵایەتی و دژەهۆز سەیردەکرێن. لێرەوە ترس لە تەنیایی، لە تاکبوونەوە، لە نەفرەتی هۆز یەکێکە لە ترسە بنەڕەتی و گەورەکانی ڕۆحی ئێمە، بەڵکوو دەتوانم بڵێم ئەم ترسە گەورەترین هێزی پێکهێنە بۆ کەسایەتی مرۆڤی ئێمە، لە مرۆڤە سادەکانەوە بیگرە تا ڕۆشنبیران و منەوەرانی کورد هەموو هەڵگری ئەو ترسەن کە ناوی دەنێم «فۆبیای کۆمەڵگا». ترسێک نییە لە ڕۆحی ئێمەدا وەک ترس لە نەفرەتی کۆمەڵگا بەهێز بێت، لێرەوە بەردەوام خۆمان بە دەیان قەڵغان و سوپەری ئەستوور دادەپۆشین تا لەو نەفرینە هەڵبێین و وەک کوڕی کۆمەڵگا دەربکەوین. هەموو ئایدۆلۆژیاکان بەردەوام بەرەو باوەشی کۆماڵگا بانگماندەکەن، هەتا سیاسەت لای ئێمە بەر لەوەی زانستی بەڕێوەبردنی کۆمەڵگا بێت، زانستی گرێدانەوەی تاکە بە کۆمەڵگاوە، هونەری بەستنەوەی تاکەکانە پێکەوە بە زنجیرێکی ئەستوور کە زنجیری دەروەستی و هەڵوێست و ئینتیمایە، هەر لێرەشەوەیە کەم جار ئازادی لە سیاسەتەوە سەر دەردەهێنێت. چونکە خودی سیاسەت بۆتە جێگایەک بۆ کوشتنی بیرکردنەوەی سەربەخۆ، بۆ دروستکردنی ئینتیمای زۆرەملێ. ... گەڕان بۆ ئازادی تەنیا لە ڕێگای سیاسەتەوە، هەڵەیەکی دژوار و گەورەیە. لە کاتێکدا خودی سیاسەت بە هەموو ئایدیا و فۆرمەکانییەوە تەنیا شوێنی تواندنەوەی تاکە لە کۆمەڵدا، شوێنی خنکانی «منە» لە «ئەویدی» دا.

🏙 #ڕۆژانی_نوێ

✍🏻 #شێرکۆ_بێکەس 📚 ئێستا کچێک نیشتمانمە

ئەم باڵندە کوێر و سەر لێشواوانە، ئەم ڕەسمە کۆن و هەڵپڕووکاوانە، ئەم یادە کاڵ و بێڕەنگانە، ئەم ڕۆژە دوور و فەرامۆشکراوانە، ئەم ساتانەی دەم با و گەردەلوول چۆن کۆ دەبنەوە؟ ئەم ڕووداوە قەوماو و نەقەوماوانە چۆن یەک دەگرنەوە؟ ئەم جسەتە پارچەپارچەبووانە چۆن دەبنەوە بە یەک جەستە؟ ئەم زەمەنە پرژ و بڵاوانە چۆن دێنەوە سەر هێڵێکی ڕاست؟ ئەم هەموو چیرۆکە فەرامۆشبووانە چۆن وەبیر دێنەوە و چۆن لە چوارچێوەی چیرۆکێکدا دەنووسرێنەوە؟

ئازاد وەڕەزی لەو دنیا مەجازییە کە لە هیچ شتێکی تاسەت ناشکێ و تێر نابی بەڵکوو تەنیا هەستی تێربوون بەدی دێنێ. ئاشقت ناکا، بێ تامانە هەست دەکەی ئاشق بووی. دنیای مەجازی زانیاریت ناداتێ بەڵام هەست دەکەی شتێک دەزانی و خوێندەواری. ناخوێنیەوە، بەڵام ڕستەکان و کورت‌کراوەکان هەستی ئەوەت پێ دەدەن کتێبەکانت خوێندبێتەوە. هیچ چالاکییەک ناکەی بەڵام بە بۆمبارانی خەبەرەکان و ڕووداوەکان پێت وایە زۆر بە هەڵوێست و ڕووناکبیر و سیاسیی. هیچ نابینی بەڵام وێنەکان و گیفەکان و ئیمۆوجی و ستیکێرەکان چاوت تێر دەکەن و هەست دەکەی فیلمی زۆر بەهێزت دیوە. دنیای مەجازی بەهەشتی زەین‌کورتەکانە ئازاد. دروستە زمانت ئاوایە و بۆ تۆش باشە کە پەیوەندی گرتنت بۆ سەختە، بەڵام ڕووحی تۆ بەوانە تێر نابێ و زوو دەبێزرێی چونکوو ڕووحی تۆ ڕۆمان و فیلم و شێعر و گۆرانی داگیریان کردووە.

هەر کاتێک نووسەر بۆ خوێنەرێکی ئاست نزم شتی نووسی، وەک نووسەر کۆتایی پێهاتووە. نووسەر ئەو کەسە نییە کە دادەبەزێت بۆلای خوێنەر، بەڵکو کەسێکە خوێنەر ناچاردەکات سەرکەوێت بۆ لای ئەو.