تیم

وەڵامی مەسعود مەلا پەرویز بۆ غازی کەرکوکی کامە بەر؟ مەسعود مەلا پەرویز لە سۆسیال میدیا، هەندێک جار کەسانێک دەردەکەون کە پێشینەیان پڕە لە گەندەڵی، بەڵام بە زمانێکی پڕ لە هەڵە و غەوش هەوڵ دەدەن خۆیان بە پاک و بێگەرد پیشان بدەن. لەم ڕۆژانەدا یەکێک لەو کەسانەی کە پێشتر نیمچە دەسەڵاتێکی هەبوو، بەردەوام لە هیچ هەنگاوێک بۆ تێکدانی خێر و بێری ئەم شارە دوا نەکەوتووە؛ هەر لە فرۆشتنی زەویی گەڕەکی پەنجە عەلییەوە، تا داگیرکردنی پانتاییەکانی گەڕەکی دەروازە و دروستکردنی گەراج بۆ سوودی گیرفانی شەخسی خۆی. جێی سەرنجە، ئەو کەسەی کە تا دوێنێ چاوی تەنها لە زەوی بەتاڵ بوو، ئێستا هاتووە هەڵشاخاوەتە قاچی مندا و بە هەموو ئاراستەیەکدا وڕێنە دەکات. ئەوانەی من بناسن، باش دەزانن خاوەن چ باوەڕ و بیرکردنەوەیەکم. لای من، جگە لە کاری ڕێکخراوەیی حزبی، تەنها یەک بەرە هەیە و ئەویش بەرەی کوردستانە. هەروەها، ئەوانەی ڕۆژێک کاریان لەگەڵم کردووە، دەزانن هەمیشە بەوپەڕی دڵسۆزی و باوەڕی نەتەوەیی کارم کردووە. من سیاسیم و لە چوارچێوەی کاری ڕێکخراوەیی و سیاسی خزمەت کردووە و هێشتاش هەر بەردەوامم. گەرچی دەرفەت زۆر هەبوون، بەڵام هەرگیز ڕێگای مقاولکاری و بازرگانیی شەخسیم هەڵنەبژارد، وەک ئەو برادەرەی کە ئەو جۆرە کارە بەشێک بوو لە پێشینەی ڕۆژانەی. ئێستاش بە شانازییەوە لە ڕیزی یەکێتیی نیشتمانیی کوردستانم و لە چوارچێوەی باوەڕی شەخسی خۆم هەوڵ دەدەم خزمەت بە حزبەکەم و شاری کەرکووک بکەم. ئەگەر کەسێک خۆی بە بەرپرسیار دەزانێت، سەرەتا دەبێت بەرپرسیار بێت لە خۆی و لە پاراستنی کەسایەتی و پێگەی خۆی، نەک لە شوێنی بەرپرسیارێتیدا بۆ کەسانی دیکە سیخوڕی بکات. ئەم سەرلێشێواوی و هەڵسوکەوتە وای کردووە کە ئێستا نە ئەمبەر متمانەی پێی ماوە و نە ئەوبەریش گرنگی پێ دەدات. لە کۆتاییدا، کەسێکی گەندەڵ ناتوانێت بە هێرشکردنە سەر تێکۆشەرێک خۆی پاک بکاتەوە. هەروەها، قارەمان و تێکۆشەر لە سۆسیال میدیا دروست نابێت؛ قارەمانی بە پێشینەی پاک، کردەوەی باش و متمانەی خەڵک دروست دەبێت، نەک بە دەنگبەرزی و هێرش.