Bahodir Bahrom (Баҳодир Баҳром)

ТОПИБ БЕРИНГЛАР — Қандай бастакорсиз, ёзмайсиз қўшиқ?!. Биров таъна қилар, биров ҳиринглар… — Мен қўшиқ ёзардим, қайда у ошиқ – Ботир Зокировни топиб беринглар. — Бўлсин қаттиқ-қиров ҳаётингиз ёз. Жаннат боғларида гуллар теринглар. Қайда у, қайдадир илоҳий овоз, Ботир Зокировни топиб беринглар. Самум босиб келар, ҳансирар саҳро, Туя қўнғироғи мискин жиринглар… Газли, излаганинг сабоми, садо?! – Ботир Зокировни топиб беринглар. Сочларин тўлқини — тароққа исён, Кўзларин ёлқини — қароққа исён. Сурати, сийрати муҳаббат инсон – Ботир Зокировни топиб беринглар. Билгувчим, кўргувчим, бирсану борсан, Ҳар ишга ҳамиша қодирсан, дуркун. Раббим, наҳот сен ҳам қўшиққа зорсан, Уни даргоҳингга чорладинг бир кун. Жаннат эшикларин очди сиз-сизлаб: Озурда юраклар, юмшанг, эринглар! .. .Биз ғофил бандалар юрибмиз бўзлаб: Ботир Зокировни топиб беринглар. Муҳаммад РАҲМОН

ТАБИАТ МАНЗАРАСИ Чириллайди тун, ана, шовуллайди дарахтзор, Ҳар замонда сукунат сергакланар, ҳуради. Ахир туннинг бағрида оламжаҳон фараҳ бор, Рангсиз деразаларга ой ўзини уради. Мармардай ялтирайди, сувдай титрар қоялар, Адирларда майсалар чайқалар виқор билан. Юлдузчалар дарёдан чиқмоқликка уялар, Хоҳи қўлингни узат, хоҳи дўқ ур, хоҳ элан. Майнинг майин куйида тебранади табиат, Илғар-илғанмас бўлиб учар тол қазғоқлари. Қари токни кўтариб чарчаганми, ниҳоят Дам-дам қирсиллаб қўяр ишкомнинг оёқлари. Бари ҳам унут бўлар, юракка дард инмайди, Янгитдан туғилгандай ҳайрат тошар, очиғи. Шовуллаган дарахтзор узра бир он тинмайди, Яна-да тиниқлашар булбулларнинг қўшиғи. 🕰 2012 йил ✍ Баҳодир БАҲРОМ 👇👇👇 https://t.me/eng_suluv_armon

ДАРАХТ Неча йил ўтдики, жимсан, тилинг лол. Қисматинг шуми ё сенинг эй дарахт. Сукут сақламоқлик не чоғлик иқбол, Ким билсин, сендан ҳам мосивоми бахт? Мен эса одамман, забоним ўқдир, Исён кўтаради кўксимда юрак. Кўзим шамолларни қоврувчи чўғдир, Лекин қисматимиз эмасдир бўлак. Шукурким, одамман. Одам бўлсам ҳам, Биз ўхшаб кетамиз бир-биримизга. Қанча яшнасанг ҳам, қанча кулсам ҳам, Болта ургувчи кўп илдизимизга. 2010 йил Баҳодир БАҲРОМ 👇👇👇 https://t.me/eng_suluv_armon

#mujda Yangi sonimiz mundarijasi! @yoshlikjurnali yoshlikjurnali.uz

БАҲОРИЙ ИЗҲОР Шамоллар хаёлчан ўсмирдай вазмин, Ўсмир қизлар каби маъсум гиёҳлар. Табиат гулларин урдирмоқда барқ, Булутлар – қўнимсиз эрка сайёҳлар. Пурвиқор тоғларнинг бағрида баҳор Нозик гўдак каби тамшанар, кулар. Фасли навбаҳорнинг тимсоли бўлмиш, Бу мовий осмонлар қалбимга қулар. Шилдирар кечаги қишдан қолган завқ, Қор эриб борадир жилға оралаб. Тош қотган табиат уйғона бошлар, Безанар келиндай юзни оролаб. Муштоқ юракларга чирой мўралар, Эҳтирос жимирлар – ичилмаган май. Оқшомнинг ифорин куйдай таратар, Шамоллар хаёлчан ўсмирдай тинмай. Эҳтимол, дунёни англадим энди, Эҳтимол, қадрингга етдим малагим. Мен баланд тоғлардан боқиб оламга, Баҳорий қалбингга келди қулагим. Бир томчи сувдайсиз – сен, яна баҳор! Туйғулар бергайсан дилимга дилбар. Гуллаган орзунинг манбаси сенсан, Нурдай тўшалгайсан йўлимга дилбар. Муҳаббат – умримнинг инъикосидир, Кўзларинг – лиммо-лим меҳрга, ишққа. Гўзалим муҳрлаб кетурман севгинг, Ҳаёт деб аталмиш кўҳна қўшиққа. 17.04.2024

*** Наъраман, Наъраман, Наъраман, Наъра… Ўкирик, Ўкирик, Ҳа, ўкирикман. Ортингдан шивирлаб ҳайқирдим, Ё Раб, Ўртандим, Йиғладим, демак тирикман. Севгиман, Висолман, Айрилиқ... Сен-чи, Айлана олдингми энг гўзал гулга? Юрагим ўрнида урдингми бир бор, Кўзингни экдингми мен келар йўлга? Шамолман, Камолман, Заволман балки... Титроқман, Тупроқман, Йироқман бахтдан. Кулолман, Мисқолман, Уволман балки, Балки гапиришни билмас дарахтман. Минг тусга кирдим мен, Аслим қаерда? Ўртандим қалбимнинг эрксизлигидан. Наҳот ўчиб борар номим тақдирнинг Аслият аталмиш чексизлигида. Баҳодир БАҲРОМ

**** Мен қандай кечирим сўрайин сендан, Не қилиб кўнглимни тўкай пойингга. Шунчалар ҳам хафа эдингми мендан Ҳоли хилофимдан ранжлар райъингда. Мангу уятдаман сенинг қошингда... Мангу музликларни эритар зорим. Не савдолар ўтди содда бошимдан Одам бўлолмадим, парвардигорим. Қанча олис кетди яқин юлдузлар, Елларга совурдим туйғуларимни. Жондай зирқирайди дилда илдизлар, Ўзгага сотдимми қайғуларимни. Ғамгин борадирман чақмоқ тиғида Сўнган алангадай азми қарорим. Лолман икки дунё оралиғида Одам бўлолмасдан, парардигорим! 2020 йил 2-январ. ✍️ Эшқобил ШУКУР @Eshqobil_Shukur_ijodi

ЧЎЛПОННИНГ РУҲИ ҲАҚҚИ Ким отди, ким кўмишди, Кўриб кўзин юмишди. Чўлпон оғам, жон оғам, Ичим узилиб тушди, Томошабин бўлди эл, Сени шу тупроқ қучди. Қуладинг, атрофингга Майсадан шабнам учди. Ғазабли юрагингни, Чангаллаб тўсиб турдинг, Кесаверди, сен эса Чинордай ўсиб турдинг! Аямасдан кўмдилар, Ташладилар гулханга. Қаҳрамонлик тугади, Зуғм нечун ўлганга?! Билсам, Жонсиз вужудинг, Чорловинг тирик экан! Ўқ теккан юрагинг ҳам, Заминдан йирик экан. Зарблари келиб турар, Ҳар замон титрайди ер! Ўлмас наъра: “Халқ денгиздир, Халқ тўлқиндир, халқ кучдир”. “Қайдан билсин ёғийлар, Мард боласи ўлмайди. Туркий она эр туғар, Агар кўнгли тўлмайди. Ўқ текса, тик қарайди, Йиғламайди, кулмайди. Туркистоннинг боласи, Бировга қул бўлмайди”. Ўзимизни алдадик, Шу ҳайқириқ сўз билан! Қулликни ҳам кўрдик биз, Тарсак тушган юз билан Лабимизни тишладик, Улуғ билдик сукутни, Отишдилар Чўлпондай, Қанча-қанча бургутни! Руҳимнинг қаватида Мизғибгина жим ётган, Аламли туйғуларни Бобом руҳи уйғотган. Шу туйғудан бўй чўзиб Ёнар кўнглим ноласи. Балки сотган, балки отган, Балки кўмган Чўлпонни Чўлпон жонидан суйган, Бир ўзбекнинг боласи. Ардоқла, фарзандларинг, Суянчиқ бўл, эй халқим, Уйғон, елиб-югургин, Боланг учун ўл, халқим! Яшаш керак Темурдай, Дунёни зир титратиб, Ёки Навоий каби Ҳақдан сабоқ ўргатиб. Тўлғонмасин шу Ватан, Чўлпон каби ўртаниб, Муносиб бўл, Ватанни Ватан қилар кучинг бор, Шаҳидларнинг мероси Неваралик бурчинг бор. Халқим, кўзинг ўнгида Яшайверсин пинҳона, Боласин мурдасини Қучиб йиғлаган она! Баҳодир БАҲРОМ

Бир тулпор Бир тулпор чопиб борар, Фаромуш хаёллари?! Шамолни кесиб борар, Тиғдай кескир ёллари. Кўкда чақин чаққандай, Гумбурлайди, ер титрар. Тулпор бўм-бўш эгарда Билмадим, не келтирар. У тинмай чопиб борар, Вақту замон оралаб. Наъраси кезиб юрар, Еру осмон оралаб. Жанг кўрган, жадал кўрган, Бош эгмаган душманга. Соҳибига содиқ ул, Ҳам содиқдир Ватанга. Ўша куни не бўлди, Тулпор бағрин тиғлайди. Тунлар ойга термулиб, Кишнаб-кишнаб йиғлайди. Боботоғдай кўксида Сўнмас бир дам аланга. Соҳибидай, мард, қалқон Фарзанд қани Ватанга?! Хиёнатни билмас у, Аммо танир хоинни. Минг йилки, тополмайди Султон Жалолиддинни! Баҳодир БАҲРОМ

*** Алвидо! Мен ҳижрон куйини чалдим, Руҳимни чирмади бир сокин қайғу. Майин-майин ёғди, бир текис ёғди, Ёмғир сим-сим ёғди, авжланмади у. Мен кетдим, Ортимдан қараб қолдингми, Қайрилиб боқмоққа топмадим чидам. Қаердан ҳолатинг эслаб қололсин, Ёмғирлар остида ёнаётган одам. Йўқ бўлдим, Қай бурум мени яширди, Деворлар овутди синган соямни. Рўбарў қолдирдим бахтсизлик билан, Ортимдан мўлтираб қолган одамни. Кечиргин! Юрагим маҳзун тебранар, Айрилиқ куйида оғир олар тин. Шивирлаб айтаман севаман дея, Сенсиз ёғаётган ёмғирларга мен! Алвидо... ✍️ Баҳодир БАҲРОМ