МЕГИНО-КАНГАЛАССКИЙ УЛУС

КҮҮСТЭЭХ ТЫАЛ ТҮҺЭРЭ САБАҔАЛАНАР Күнү-дьылы кэтээн көрөөччүлэр бу күннэргэ этиҥнээх ардах, 17-22 м/с күүстээх тыал түһүө диэн сабаҕалыыллар. Ытыктабыллаах улууспут олохтоохторо! Тыалга уот барыыта, остуолбалар, араас конструкциялар, мастар сууллуулара тахсыан сөбүн өйдөөн туран сэрэхтээх буоларгытыгар ыҥырабыт‼️ 🔸Уотунан барар тэриллэри розеткаттан араара сылдьыҥ, 🔸остуола, баҕана, өйөбүлэ суох турар оҥоһуулар аттыларынан сылдьымаҥ, массыыналаргытын хаалларымаҥ, 🔸чаҕылхан кэмигэр сөтүөлээмэҥ, таһырдьа сылдьымаҥ. Ыксаллаах быһыы-майгы тахсар түгэнигэр улуустааҕы биир кэлим дьуһуурунай диспетчерскэй сулууспаҕа 📲 89659980604, 8(411-43)47-880 эбэтэр 112 нүөмэринэн биллэрэргит тоҕоостоох. Мэҥэ Хаҥалас улууһун дьаһалтатын пресс-сулууспата

🌿🌿🌿ОТТУУ СЫЛДЬАР ХААРТЫСКАЛАРЫ КҮҮТЭБИТ🌿🌿🌿 Ытыктабыллаах Мэҥэ Хаҥалас улууһун олохтоохторо! Улууспутугар биллэриллибит Тыа хаһаайыстыбатын сылларынан «Бука бары окко!» диэн девизтээх үлэбитигэр оттуу сылдьар хаартыскалары көрдүүбүт😍 Бука барыгытын көхтөөх кыттыны ылаҥҥыт 📍[email protected] электроннай почтаҕа эбэтэр 📍89143037796 нүөмэр ватсап ситимигэр от ыйын 3 күнүгэр диэри хаартыскаларгытын ыытаргытын күүтэбит. Дьоммут-сэргэбит былырыыҥҥы эбэтэр эрдэтээҥҥи табыллыбыт хаартыскаларгытынан үллэстэҥҥит күүс-көмө буолуоххут диэн эрэнэбит💛 Норуот күүһэ – көмүөл күүһэ! 📲Сиһилии билсэр нүөмэргит 89143037796 Мэҥэ Хаҥалас улууһун дьаһалтатын пресс-сулууспата

ИТИРИК ТУРУКТААХ УРУУЛГА ОЛОРУМА Уруулга итирик туруктаах олоруу – сиэрэ суох быһыы. Маннык тус олоҕор дьалаҕай сыһыаннаах киһи бэйэтин олоҕор эрэ буолбакка, атын дьон сырдык тыыныгар аана суох алдьархайы аҕалыан сөбүн хайаан да өйдүөх тустаах. Арассыыйатааҕы ИДьМ Мэҥэ Хаҥаластааҕы Суолга куттал суох буолуутун судаарыстыбыннай инспекцията иһитиннэрбитинэн ааспыт нэдиэлэҕэ улууспутугар 8 итирик туруктаах суоппар тутуллубут, онтон 2 киһи иккис сырыыларын түбэһэн холуобунай дьыалаҕа тардыллыбыттар. ‼️Итирик туруктаах уруулга олорон бастакы түбэһиигэ 1,5 сылга массыына ыытар быраап быһыллар. Ону таһынан 30 000 солк. административнай ыстараап төлөнөр. Бырааба быһыллан баран хаттаан уруулга олорбут киһи массыынатын судаарыстыба былдьыыр кыахтаах. Улууспутугар бастакы сырыыларыттан сөптөөх түмүк оҥостубакка сыл саҕаланыаҕыттан 11 киһи иккис сырыытын түбэспит. Улуустааҕы Судаарыстыбыннай суолга куттала суох буолуу инспекцията түүннэри-күнүстэри маннык куттал тахсыбатын туһугар күүрээннээх үлэни ыытар. Ытыктабыллаах суоппардар, итирик туруктаах хаһан да уруулга олорумаҥ! Киһи олоҕо күндүтүн умнумаҥ! Мэҥэ Хаҥалас улууһун дьаһалтатын пресс-сулууспата

САРСЫАРДААҤҤЫ СЭРГЭХ СЭРЭЭККЭ Бүгүн, от ыйын 2 күнүгэр, Майа сэлиэнньэтин олохтоохторо үүммүт саҥа күннэрин сибиэһэй салгыҥҥа сэрээккэттэн саҕалаатылар. Ол курдук, «Сила России» бүтүн Арассыыйатааҕы марафон уонна Ыччат күнүн чэрчитинэн улуустааҕы спорт, физкультурнай хамсааһын салалтата уонна социальнай бэлиитикэ салалтата Комсомольскай болуоссакка сарсыардааҥҥы эрчиллиини тэрийдилэр. Сэрээккэни «Парус» спорт уораҕайын тириэньэрэ Аграфена Яковлева бэрт сэргэхтик, тэтимнээхтик иилээн-саҕалаан ыытта. Уопсайа эдэриттэн эмэнигэр тиийэ 60-тан тахса киһи кэлэн көхтөөх кыттыыны ыллылар. Мустубут дьон-сэргэ болҕомтону, уунууну тургутар күрэхтэргэ, «Орел и решка», «Белки, орешки» курдук оонньууларга дуоһуйа оонньоотулар-көрүлээтилэр. Кыайыылаахтар «Парус» спорт уораҕайыгар киирэн дьарыктаналларыгар, чэбдигирэллэригэр абонемент бирииһинэн наҕараадаланнылар, сэрээккэҕэ кэлбит бар дьоҥҥо туоһу сурук туттарылынна. Чөл туруктаах, чэгиэн эттээх-сииннээх буолуоҕуҥ! Мэҥэ Хаҥалас улууһун дьаһалтатын пресс-сулууспата

ӨЛҮӨНЭ ЭБЭБИТ КҮНҮНЭН Бүгүн, от ыйын 2 күнүгэр, үс үөллэр үөстээх Өлүөнэ эбэ күнэ бэлиэтэнэр. Бу күн 2013 сыллаахха өрүспүт айылҕатын ураты көстүүлэрин харыстааһыҥҥа болҕомтону тардар, кини уобараһын национальнай бренд быһыытынан өрө тутар, туризмы сайыннарар сыалтан олохтоммута. Эбэбит түҥ былыргыттан саха дьонун-сэргэтин аһатан-сиэтэн, маанылаан, ыраас уунан хааччыйан, бүтүн Сибииргэ айаҥҥа, таһаҕас таһыытыгар тыын суолталаах хорук тымырынан буолар. Өлүөнэ өрүспүт ирбэт тоҥ сиринэн нэлэһийэ устар, кэрэ көстүүлээх, кумах тукулааннаах, ЮНЕСКО быһаарыытынан аан дойду ураты нэһилиэстибэтинэн буолар туруук очуостардаах. Уһунунан Арассыыйаҕа үһүс, Аан дойдуга тохсус буолар. Биһиги, Өлүөнэ өрүс уҥа биэрэгэр олорор улуус дьоно-сэргэтэ эбэбитин киэн тутта ааттаан, харыстаан, кэлэр көлүөнэбитигэр ыраас хаалларар ытык иэстээхпит. Өр сыллар тухары эбэбит оҕолорбутун, сиэннэрбитин, кинилэр хос сиэннэрин ыраас уунан, өлгөм балыгынан хааччыйа турдун! Мэҥэ Хаҥалас улууһун дьаһалтатын пресс-сулууспата

САРСЫАРДААҤҤЫ СЭРЭЭККЭҔЭ ЫҤЫРАБЫТ Күндү Майа сэлиэнньэтин олохтоохторо уонна ыалдьыттара! Сарсын, от ыйын 2 күнүгэр, 08:00 чаастан Комсомольскай болуоссакка «Сила России» Арассыйатааҕы спортивнай марафон чэрчитинэн оонньуулаах, бириистэрдээх сарсыардааҥҥы сэрээккэҕэ ыҥырабыт. Сэрээккэни «Парус» спорт уораҕайын тириэньэрэ Аграфена Яковлева иилээн-саҕалаан ыытыаҕа. ‼️Кэлэргитин бигэргэтэн бу сигэнэн киирэн бэлиэтэнэргитин күүтэбит⏬️ https://sila-rossii.er.ru/area?region_id=14 Буолар сирэ: Майа с., Комсомолскай болуоссат Буолар күнэ-дьыла: от ыйын 2 күнүгэр сарсыарда 8:00 чаастан. Төлөбүрэ суох, босхо Чугас дьоҥҥутун илдьэ кэлэн сибиэһэй сайыҥҥы салгыҥҥа дуоһуйа сэрээккэлээн, эрчиллэн, чэбдигирэн күҥҥүтүн сэргэхтик саҕалаан! Мэҥэ Хаҥалас улууһун дьаһалтатын пресс-сулууспата

ОЙУУРГА БАҺААРТАН СЭРЭХТЭЭХ БУОЛУУ ИРДЭБИЛЛЭРИН ТУТУҺУОХХА Күнү-дьылы кэтээн көрөөччүлэр иһитиннэрэллэринэн, от ыйа уонна атырдьах ыйа куйаас, кураан буолаллара күүтүллэр. Ону кытта тэҥҥэ ойуурга уот турар куттала үөскүүр. Билиҥҥи туругунан улууспутугар муҥутуур үрдүк V кылаас баһаар үөскүүр куттала, өрөспүүбүлүкэбитигэр баһаартан сэрэхтээх буолууга ыксаллаах быһыы (ЧС) балаһыанньата биллэриллэн турар. ‼️Маннык тыа баһаара үөскүүр ураты үрдүк кутталлаах кэмҥэ бөҕү-сыыһы уматыы, тыаҕа, сиргэ аһаҕас уоту туттуу булгуччу бобуллар. Баһаартан сэрэхтээх буолуу быраабылаларын кэһээччилэргэ РФ Административнай кодексынан 30 000 – 400 000 солкуобай суумалаах ыстараап олохтонор. Онтон уоту сэрэҕэ суох туттан тыаҕа баһаары ыыппыт буруйдаах киһи холуобунай дьыалаҕа тардыллан 200 000 – 400 000 солкуобай диэри суумаҕа ыстарааптанар, суут быһаарыытынан атын миэрэҕэ тардыллар эбэтэр көҥүлэ быһыллар. Онно эбии ойуур баһаарын таһаарбыт буруйдаах киһи оҥорбут материальнай хоромньутун төлүүр эбээһинэстээх. Ытыктабыллаах улууспут олохтоохторо, отчуттар-масчыттар, айылҕаҕа сынньана тахсааччылар! Бука барыгытын олорор сирбитин-уоппутун харыстааммыт баһаартан сэрэхтээх буоларгытыгар ыҥырабыт! Мэҥэ Хаҥалас улууһун дьаһалтатын пресс-сулууспата

Бэс ыйын 29-30 күннэригэр Туймаада ыһыаҕар өбүгэ үгэһинэн быһыйы, сымсаны, бастыҥы быһаарар араас күрэхтэр, күөн көрсүүлэр тэриллэн ыытылыннылар. Биир умсугутуулаах күрэһинэн чулуу оһуохай этээччини быһаарар «Ытык оһуокай» түһүлгэтэ буолла. Манна биһиги улуустан сэттэ уһун тыыннаах, баай тыллаах этээччилэрбит кыттыыны ыллылар. Тыллара-өстөрө чочуллан истээччи сэҥээриитин ылан 🔸1-кы Тыллыматтан Виталий Никифоров «Уран тыллаах оһуокайдьыт», 🔸Майаттан Станислав Иванов «Олус улахан түһүлгэ», 🔸Тараҕайтан Галина Зыкова «Кылыһахтаах этээччи» анал ааттары сүктүлэр, 🔸Дьаҥхаадыттан Татьяна Неустроева «Чуор куолас» ааттанан Саха сирин үтүөлээх этээччитинэн буолла. 🏆Ону тэҥэ, Денис Оконешников бу күрэс БАСТЫҤ ЭТЭЭЧЧИТИНЭН ааттанан «Саха Өрөспүүбүлүкэтин Дархан этээччитэ» үрдүк ааты ылары ситистэ. Бары оһуохайдьыттарбытын төрүт үгэспитин илдьэ сылдьан, үөрэтэн дьоҥҥо-сэргэҕэ, ыччаттарбытыгар тарҕатаргытыгар махтанан туран ситиһиилэргитинэн эҕэрдэлиибит! Мэҥэ Хаҥалас улууһун дьаһалтатын пресс-сулууспата