စစ်သွေး

အစိုးရ၏ ပထမဦးစားပေးသည် ငြိမ်းချမ်းရေးဖြစ်ဟုဆို --------------------------- အစိုးရသစ်လက်ထက်မှာ ပထမဆုံး ဦးစားပေးဟာ ပြည်တွင်းငြိမ်းချမ်းရေး ဖြစ်တယ်လို့ နိုင်ငံတော်သမ္မတရုံးရဲ့ ပြောရေးဆိုခွင့်ရှိသူ ဒေါက်တာ ခိုင်ခိုင်စိုးက ပြောပါတယ်။ ဇွန် ၃၀ ရက်က နေပြည်တော်ရှိ နိုင်ငံတော်သမ္မတရုံးမှာ ပြုလုပ်တဲ့ နိုင်ငံတော်သမ္မတရုံး၏ သတင်းစာရှင်းလင်းပွဲမှာ Sky Net ရဲ့ မေးမြန်းမှုအပေါ် အခုလို ပြောကြားခဲ့ တာပါ။ ပြည်တွင်းငြိမ်းချမ်းရေးနဲ့ပတ်သက်ပြီး အစိုးရသစ်ရဲ့ ရက် ၁၀၀ အတွင်းမှာ အောင်မြင်အောင်လုပ်ဆောင်မှာ ဖြစ်သလို ရက် ၁၀၀ ကျော်ပါကလည်း ငြိမ်းချမ်းရေး ဆွေးနွေးမှုတွေကို ကမ်းလှမ်း ကြိုဆိုနေတယ်လို့ ဒေါက်တာ ခိုင်ခိုင်စိုးက ပြောပါတယ်။ ပြီးခဲ့တဲ့ ရက်ပိုင်းတွေက ဗိုလ်ချုပ်ကြီး ရာပြည့် ဦးဆောင်တဲ့ ငြိမ်းချမ်းရေးကိုယ်စားလှယ်အဖွဲ့တွေဟာ “ဝ” နဲ့ မိုင်းလားဒေသတွေကို သွားရောက်ပြီး ငြိမ်းချမ်းရေး၊ ပညာရေး၊ ကျန်းမာရေးကိစ္စတွေ ဆွေးနွေးခဲ့တယ်လို့ ဆိုပါတယ်။ ဒါ့အပြင် တိုင်းရင်းသားလက်နက်ကိုင် ဘယ်အဖွဲ့အစည်းမဆို ကြိုတင်ကန့်သတ်ချက်မရှိဘဲ ငြိမ်းချမ်းရေးအတွက် ဆွေးနွေးလိုပြီး ငြိမ်းချမ်းရေး လိုချင်ရင် လာရောက်ဆွေးနွေးကြဖို့ နိုင်ငံတော်သမ္မတကြီး ဦးမင်းအောင်လှိုင်က ဇွန် ၂၆ ရက်က နေပြည်တော်ရှိ နိုင်ငံတော်သမ္မတရုံးတော်၊ အစည်းအဝေးခန်းမမှာကျင်းပတဲ့ နယ်စပ်ဒေသနှင့် တိုင်းရင်းသားလူမျိုးများ၏ ဖွံ့ဖြိုးတိုးတက်မှု အကောင်အထည်ဖော်ရေး ဗဟိုကော်မတီ အစည်းအဝေးမှာ ဖိတ်ခေါ် ထားပါတယ်။