Malikov | Blog | Notes

Milliy Bank 71 milliard so'mga yangi mobil ilova tayyorlatyapdi, tender g'olibi oldindan aniq bo'lgan bo'lishi mumkin 5-oktyabr kuni yakunlangan tender g’olibi Milliy bankning Milliy 3.0 mobil ilovasini tayyorlab berishi kerak. Mobil ilova 11 yo’nalish bo’yicha 100 dan ortiq texnik imoniyatlarga ega bo’lishi kerak: xalqaro pul o’tkazmalari, turli to’lovlar imkoniyati, interfeys va boshqalar. Tenderda uchta kompaniya ishtirok etdi: - “ALEX information technology Servise” - ExApp L.L.C-FZ - “Full Stack Solution” Hujjatlarni tekshirish jarayonida “ALEX information technology Servise” chetlatildi, ExApp L.L.C-FZ 71 milliard so’m taklif qilib g’alaba qozondi, “Full Stack Solution” esa 76 milliard so’m taklifi bilan zaxiradagi g’olibga aylandi. Bu jarayonda bir qancha qiziq holatlar bor. Kompaniyalarni chuqurroq o’rganib, Full Stack Solution turli yo’llar bilan Milliy bankka bog’liqligi bor degan gumon paydo bo’ladi. Qanday qilib? “Full Stack Solution” 2022-yil 13-aprelda tashkil etilgan, hozirda ta’sischisi Izrailbekov Shuxrat Shavkatovich. Tashkil etilganidan bir oy o’tib “Full Stack” o’zining ilk tenderida qatnashadi va g’olib bo’ladi - bu Milliy bankning deyarli 560 ming dollarnik tenderi edi. Birinchi muvaffaqiyatdan keyin Full Stack Solution keyingi tenderlarda “KEYSOFT” MChJ bilan raqobatdosh bo’lishni boshlaydi. “KEYSOFT” “Ful Stack Solution” tashkil etilganidan bir kun o’tib tuzilgan kompaniya. Uning rahbari biz taniydigan Izrailbekov Shuxrat Shavkatovich. Bir oz o'tib bu bir biri bilan bog’liq kompaniyalar Milliy bankning turli tenderlarida g’olib bo’lishni boshlaydi. Ikkita tenderda hatto yagona raqobatdosh bo’lishadi. Xo’sh, “Keysoft” va “Ful Stack Solution” o’zaro bog’liqligini bilamiz. Endi “Keysoft”ning ta’sischilariga e’tibor bersak: “Expera Digital IT Consulting” - biz taniydigan Izrailbekov Shuxrat Shavkatovichga tegishli, Milliy bank va Xalq bankining turli tenderlarida g’olib bo’lgan “NBU Invest Group” Aksiyadorlik Jamiyati - Milliy bankka tegishli, kuzatuv kengashida asosan Bank xodimlari o’tiradi. Rahbari Xodjayev Azizbek Shavkatovich - u 70 milliard so’mlik Milliy 3.0 ilovasini tayyorlovchi kompaniyani aniqlash uchun o’tkazilgan tender komissiyasi a’zosi ham. Xo’sh, “Full stack Solution” va “Keysoft” o’zaro bog’liq, “Keysoft” esa Milliy bank bilan bog’liq. Shundan kelib chiqib “Full Stack Solution” ham Milliy bank bilan bog’liq degan tahmin qilish mumkin. “Full Stack Solution” Milliy bank mobil ilova bo’yicha o’tkazgan tenderda zaxira g’olibi hisobanadi. “ALEX information technology Servise” chetlashtirilgan. G’olib Dubayda joylashgan ExApp L.L.C-FZ kompaniyasi. Agar “Full stack Solution” Milliy bank bilan bog’liqligini mutasaddi organlar o’rganib tasdiqlasa, tenderni bekor qilishga to’g’ri keladi, chunki uni ham chetlashtirish kerak edi va bir nafar ishtirokchi qolgani uchun raqobatni ta’minlash maqsadida tenderni qayta o’tkazish talab etiladi. Yuqoridagilardan kelib chiqib tenderning texnik talablarida narx so’mda emas, balki dollarda ko’rsatilgani ham tenderni chet el kompaniyasi yutishi oldindan bilingan degan tahminni keltirib chiqaradi. Milly bankning avvalgi mobil ilovasi (Milliy 2.0) google playda 1 million martadan ko'p yuklangan. Nega yangisi qilinyapdi - alohida savol @gazna1