#bola_tarbiyasi
Ha, ota-onalik og‘ir vazifa, tarbiya eng mashaqqatli burch.
Bolangga faqat yaxshilikni ravo ko‘rasan, uning manfaatini o‘ylab ish qilasan ammo bu unga yoqmaydi. U gapingga kirmaydi, gap qaytaradi, isyon qiladi. Ayniqsa 10 yoshdan keyin isyonkorligi boshlanadi, nega qilishim kerak, boshqalar undoq boshqalar mundoqku deb tortishadi.
Sen o‘zing uchun hech narsa talab qilmaysan. Bor yo‘g‘i darsingni qil, vaqtida namozingni o‘qi, hijobingni to‘g‘ri kiy, o‘zingdan keyin yig‘ishtirilb yur kabi oddiy yumushlarni so‘raysan ammo shu ham og‘irlik qiladi.
Telfonini olib qo‘ysang yoki cheklasang eng yomon dushmaniga aylanasan. Go‘yoki dunyoda sendan yomonroq odam yo‘q. Nega meni tuqqansiz o‘zi, shunchalik yomon bo‘lsam nega tug‘dingiz, o‘lsam qutulasizmi, men bilan ishingiz yo‘q, baribir yomonmanku nima qilsam ham farqi yo‘q sizga, men uchun yaxshi yomonni siz hal qilmaysiz kabi gaplarni eshitasiz. O‘smirlar bilan kelishish juda qiyin, ulardan boshqa hamma nohaq.
Ba’zan xivchinni yoki gavronni olib savalab tashlagingiz keladi. Qayerdan ham shu kompyuter, telfon,planshet va internet chiqdi ekan deb yozg‘irasiz. Ularning quloqsizligi, gap uqmasligi, isyonkorligi va yalqovligi qoningizni qaynatadi, joningizni chiqaradi.
Ammo insof bilan o‘ylab ko‘ring. O‘zingiz ham shunday bo‘lgansiz. Hammamiz insonmiz,xatokormiz, noqismiz. Bizda shunday kutilma va talab bor: aytganim aytgan, deganim degan bo‘lishi kerak chunki men ota-onaman, meni hurmat qilishi va itoat etishi shart. To‘g‘ri, bolalar ota-onasiga quloq solishi va itoat etishi lozim ammo har doim 100% shunday bo‘lolmaydi.
O‘zimizdan so‘raylik. Biz Alloh va Rasuli buyurgan ishlarning qanchasini qilolyapmiz? Qaytariqlarning qanchasidan qaytyapmiz? Qanchadan qancha gunohi kabiralarni qilamiz va Allohning kechirishidan umid qilamiz. Yaxshiyam Alloh Taolo jazosini darhol yubormaydi, muhlat beradi. Ammo biz bolamizni hoziroq jazolashni, ular amrimizga hoziroq bo‘ysunishini istaymiz. Yo‘q, ular ham xuddi bizdek ojiz xatokor inson.
Ular sizni behurmat qilganda, g‘azabingizni qo‘ziganda o‘zingiz ham ota-onangizga hozirgacha osiylik qilib kelishingizni, eringizga itoatsizlik qilishingizni, Allohning son-sanoqsiz amrlariga bo‘ysunmasligingizni bir o‘ylab ko‘ring, shoyad shunda kechirimli bo‘lishni eslasangiz.
Alloh barchamizga tavfiq bersin, farzandlarimizni O‘zi go‘zal tarbiyalab qo‘ysin, chunki U Robb- tarbiya qiluvchi Zotdir.
©YaqinOzbek