ڤِينْكَا

مش قادر أواجه نفسي علشان ظلمتها كتير، فبقيت بتدارى ورا حيطان ولا أبص لنفسي في مرايا علشان مبانش ضعيف! بسنت سيد .

عرف إني حزينة ومجاش دور عليا في المدينة يا جدعان! بسنت سيد .

يا غُلبي .

هحكيلكم موقف يأكدلكوا إن الصحاب مش بالعشرة . أنا لحد من كام يوم بس كنت واخدة القرار إني هأجل سنة تانية ومش هدخل الامتحانات بسبب ظروف سيئة مريت بيها ولحد الآن أنا مش عارفة أتعافى منها، الحقيقة إن مكنش في أي نصيحة بسمعها علشان خلاص أنا قررت وأنا اللي في الموقف، صحابي بتوع الجامعة اللي معرفتي بيهم وقت ضئيل جدا لما عرفوا قرروا ينزلوني ونتقابل علشان نحل الموضوع وأنا أصلا نازلة وأنا مفيش حاجة هتتغير معايا، اللي حصل إني روحت من بيتي وأنا بعافر مع نفسي علشان أدخل الامتحانات ومجاش في بالي غير حاجة واحدة وهي إني مش هبقى معاهم ودا الهدف اللي قررت أسعى علشانه ودا لأن مش هلاقي زيهم يخاف عليا كدا . كل شوية يسألوني ذاكرت لفين ومتابعين معايا في سبيل إن صحابي اللي من سنين مفرقش معاهم بالعكس فكروني بهزر ومجرد كلمة اتقالت وسط عتمة وخلاص . الحقيقة إن الفترة دي محدش وقف جمبي فيها غيرهم حتى في إني أرجع في قراري من بيع القناة علشان هما قدروا إن دا حلمي في سبيل إن محدش من أصحاب السنين قالي إزيك حتى . الصحاب فعلا مواقف مش كلام ولا سنين ولا لمة . اختاروا صح، اختاروا ناس تحبكم بجد . ومتقلقوش الدنيا لسا فيها خير وناس كويسين . - وفي النهاية كل حاجة هتعدي 🤍!

جماعة والله دا مش كوميكس وهاها وكدا بس أنا مبيجليش برد غير في الصيف بس .

وأنا بقلب في الرسايل لقيت دي والحقيقة إنها أكتر مسدج ضايقتني برغم كل الانتقادات والكلام اللي كان بيتبعت . أولا؛ كلمة نفاق دي كلمة كبيرة جدا متليقش غير على اللي زيك لأن الشخص السوي ميئذيش غيره ويجري . ثانيا بقى؛ أنا قولت إني بأيدهم فكريا وأنا والله أشد إنك عارف يعني إيه فيمنست أصلا يعني، ومش معنى إني بأيدهم أبقى معاهم لأن أنا بشخصيتي كبسنت بفتقد حاجات كتير من شخصيات النسويات الفيمنست يعني أنا بتقبل كلام كتير هما مطهدينه، مقتنعة جدا إن الست زي الراجل في حاجات كتير ولكن برضو مقتنعة إن في حاجات مباحة للراجل أكتر من الست، أنا لا متشددة ولا بفرض رأي إني زيي زي شريك حياتي في كل حاجة بالعكس تماما أنا كبسنت حتى لو عندي القدرة أعمل كل حاجة الراجل يقدر يعملها هسيبله مساحته يعيش شخصيته الذكورية اللي ربنا خلقه بيها مش أحسسه إنه ملوش لازمة، ودا أصلا ضد مبادئ الفيمنست!! ثالثا بقى والأهم؛ حضرتك إنسان جاهل علشان دي قناة كتابات مش تجسيد حياة يعني كل حاجة بتنزل سواء من مبادئي أو لأ دي موهبة بظهرلها مش مكان بعرف فيه الناس على شخصيتي . وحتى نصايحي بتبقى على حسب الموقف مش فرض رأي شخصي وإجبار 😊👌🏻 ارتقوا بقى من الجهل والتسلط دا .

خلاص خلصتوا؟ البنت أصلا ملهاش غير بيت جوزها فعلا! بسنت سيد .

..

طب سسس سللا سسس سلااام 😂😂😂😂😂😂😂😂

جماعة والله الموضوع جي على نفسيتي أوي 😂🙂 ابعتولي أغنية هنا أو برايفت http://passant213.sarhne.com @passantsayed أنا عارفة إن الاهتمام مش بيطلب بس أنا بطلبه عادي 😂😂🤍

يا طنط بدل ما أنت فاضية كدا وعماله تقارني عيالك بينا علشان يبقوا أحسن مننا أشغلي نفسك في تربيتهم وعلميهم إزاي يبقوا أحسن لنفسيهم مش لحد أو تعالى لأمي تعلمك إزاي تبقى أم سوية! بسنت سيد .

جماعة أنا أتغدر بيا . بسنت سيد .

أنسب مكان ممكن الواحد يقعد فيه بالصيف وهو مش شايل هم حاجة هو الحمام . بسنت سيد .

مش محتاجة حضن من حد أنا عندي دراع بيحتويني . بسنت سيد .

أحيانا بيبقى في علاقات متستحقش فرصة تانية مش بس علشان بيكون نسبة فشلها أكبر من نجاحها، وكمان علشان الأشخاص نفسهم بيبقى بينهم حاجز كبير أوي مهما حاولوا يتخطوه المشاكل اللي بتحصل بتزود مقدار الحاجز . فالفرصة التانية دي بقى تديها لنفسك أنت في علاقة تانية مريحة مفيهاش أي حواجز ولا ضغوطات . بسنت سيد .

ياااه😂😂💔 مرة نزلت السوق وأنا العادي بتاعي بحب أنقي كل الحاجة بإيدي مش بحب حد يفرض عليا أخد حاجة . المهم كنت محتاجة كبوتش جدا وهو راجل واحد عنده بتاع ٩٠ سنة ولا حاجة اللي كبوتشه حلو فروحتله وهو مصمم يديني على مزاجه وأنا موتي وسمي كدا قلتله لأ هنقي أنا المهم طلعت عينه لحد ما أخدت اللي أنا عايزاه وبعدين روحت قلتله صباحك فل يا حاج،، علشان يعني أنسيه المجهود اللي بذله معايا وكدا راح قالي الناس اللي يطلعوا عين الواحد زيك لا عايز منهم صباح ولا مسا 😂😂🙄 . حقيقي دي كانت أكتر حاجة محرجة بالنسبالي علشان أنا أصلا مببحبش الجو اللطيف اللي يبقى بيني وبين البياعين فإني أقدره وأصبح عليه وهو يقولي كدا دي كانت حاجة قوية عندي من ساعتها وأنا لو هموت من الكبوتش مجبش من عنده أبدا ولا أهلي يجيبوا من عنده علشان كرامتي معلش 😂😂

ممكن أبسط الحلويات الخفيفة الجلاش . ممكن تعمليه بالمكسرات أو سادة بيكون أخف وأحلى بكتير . ممكن تعملي بودينج شيكولاته خفيفة برضو ونوع حلويات خفيف . أبعدي عن البسبوسة والكنافة والحاجات دي . ممكن رز بلبن برضو بالمكسرات حاجة حلوة خفيفة وفي نفس الوقت قيمة لأنك هتزوقيها حلو . والأخف من دا كله بقى صنية كيكة حلوة برتقال أو شيكولاتة وزوقيها على خفيف .

معلش عالتأخير . هو الطبيعي إن أي إنسان بينجح لنفسه وميهموش كلام حد وأي حد يحاول يوقعه أو يحبطه يستغنى عنه . من واضح من كلامك إن سنك صغير يعني كله كلام فاضي المفروض تركزي في مستقبلك وحياتك وتكوين شخصيتك مش تفكري في فرص الجواز ليكي هتبقى قليلة ولا كتيرة . الجواز عمره ما كان بيتقيم بتعليم ولا بمديات ولا لون ولا غيره دي كلها شكليات ومظاهر مش أكتر،، ربنا كاتب لكل واحد فينا رزقه في كل حاجة . اهتمي بنفسك وبس وأي حد مش شرط ولاد عقبة قدام طريقك تخرجيه برا حياتك وبلاش وجع دماغ علشان محدش بيحب لحد الخير .

http://passant213.sarhne.com فرحتي بأني عرفت أفتح الاكونت أعلى من فرحتي بنجاحي مثلا😂 . يلا نتسلى 💃🏻 . بلاش مشاكل إلا لو كانت ضرورية واحكوا مواقف مضحكة حصلت معاكم أو مواقف اتعلمتوا فيه درس مهم . أو مواقف محرجة مثلا😂!! خد المايك يا فنان وعيش 🎤🗣 .

مش لو كنتوا ذاكرتوا من الأول كان زمانا مرتاحين من صياحكم دا! بسنت سيد .