Расул Кушербоев назарда тутган сайт Kun.uz шекилли. Сайт ходими ушбу мазмунни истисно қилмаган маънода пост қўйди.
Очиғи, бу сайтни кўп танқид қилганман. Хизмат тақозосига кўра турли фронтларда бўлиб тортишганман. Лекин, очиқ-ойдин ҳақиқат буки, Ўзбекистонда сўз эркинлигининг орзудан реал воқеликка айланишида унинг беқиёс ҳиссаси бор.
Kun.uz янгилик қилиб чарчамайдиган, ҳаётнинг ҳамма жабҳасига кириб бораётган, йирик медиа лойиҳа. Бу лойиҳани бошқариш, назоратда ушлашга уринишлар бўлишини тахмин қилардим, сезардим. Аммо, тобора маҳкамроқ, қатъийроқ жаранглаётган яширин цензура босимни кучайтираётгани – тўғридан-тўғри сўз эркинлиги ва матбуот очиқлигига ҳал қилувчи ҳужум. Ўзида, сўзида ҳуши бор журналист ва блогерлар бундай сигналларга қарши биргаликда дадил курашиши керак, вассалом.
Бугунги матбуот майдонига назар ташлайдиган бўлсак, энг кучли ва энг катта аудиторияга эга бўлган нашрни бўғиш, контролга олиш орқасидан барча медиа контентда умумий руҳ, журъат йўқолади. ЎзАнинг беш йил олдинги формати қайтади ва шармандаи жаҳон. Янги Ўзбекистон деган гаплар палағда фикр бўлиб чиқади.
Комил Алламжанов мардлик қилди. Уни юзлаб эпизодларда танқид қилганмиз, яна қиламиз, аммо у энг муҳим нуқтада адолат тарафида турибди. У ОАВ эркинлиги туғилиб келаётган бир пайтда ўлдиришга уринаётганларга шаъма қилиб пост қўйди. Миллат ўз тақдирини янги замон мустабидларини шакллантириш йўлида чиранаётган маддоҳларга бериб қўймаслиги керак. Зотан, чексиз мақтов, бичилган матбуот яхши раҳбарни ҳам бир кун мустабид, диктаторга айлантиради.
Биз юртбошини яхши кўрамиз. Айнан шу мантиқ туфайли ҳам Шавкат Мирзиёевга бундай тақдирни асло раво кўрмаймиз. Уни қўллаб-қувватлаймиз. Лекин, унга тилёғламалик қилиб, матбуотнинг овозини ўчириш пайидан бўлганлар соғлом ва очиқ жамиятнинг душманлари эканлигини баралла айтишимиз керак.
Яна бир истиҳола. Менда жуда ёмон, ачинарли шубҳа пайдо бўлаяпти. Ли Куан Ю умумий кумиримиз эди, раҳбаримиз унингдек реформатор бўлаётгани, барчамизни севинтираётган эди. Энди ориентр ўзгардими? Наҳотки, мустабид Мао Цзе Дуннинг хитой зиёлиларига ишлатган ҳийласи – аввал эркинлик бериш, сўнгра ўша эркинлик пайтида тилга кирганларни қатоғон қилиш сиёсати остонасидамиз?!
Биз сизга ишонган эдик – зотан, номингизни ўз-ўзимизча қайд этиш, мурожаат мазмунида сўз айтиш ҳам хатарли бўлиб қолди...
#Яширинцензурайўқолсин
#Босимнитўхтатинг
#ОАВгаэркинлик
@oltin_voha