cornfield chase

how can i explain i don't belong this city?

архивда колиб кетмасин

бугун жуда кўп тушимда кўрадиган, болалигимдаги ёзги таътиллар ўтган уйга — аннам ва катта отамнинг уйларига бордик. умуман, у ерда кўп бўламиз, айниқса байрам ва дам олиш кунлари. негадир оҳирги вақтларда мана шу йўл бўйи манзараларни — баланд бўлмаган қирликларни, уларнинг ортидан қад кўтарган, мен ҳеч бўлмаган ва қорлари ҳали оқариб турган мовийсифат тоғларни, яшил кенгликлар бағрида қўзиқориндек турадиган оддийгина пахса уйларни, уларни атрофидаги ёш сарвқомат теракларни — худди ёдимда яхшироқ сақлаб қолишга, тасвирларни мухрлашга харакат қиламан гўё. бирор нарсанинг қадрини билиш учун одамзод уни йўқотиб кўрмагунча амин бўлиши қийин аслида. осий бандамиз-да. бу жойларда ўтган болалигимни, ўзлигимни, тарихимни қанчалик йўқотиб улгурибманки, унга қайтгандаги ҳар бир яқинимнинг илиқ нигоҳи, хар бир боғлаб турувчи хотира, ҳар бир яшил ер қулочи, ҳар бир унинг тоза ҳавосидан нафас олаётган дақиқам мен учун қадрли энди? билмадим. балки биларман ҳам, шунчаки тан олиш бироз оғриқли. лекин табиий. табиий холат бу. шукр шунисига ҳам. бугун аммам ва аннам билан дўконга чиқдик. Маржонбулоқ асли кичик шаҳар. унга элтувчи йўл анча ўнқир-чўнқир, баланд-пастликдан иборат, лекин унга яқин инсон учун унинг ҳар бир асфальтдаги "яма"си, кўча бўйлаб кетган коттеджларнинг ҳар бир бироз қийшайган дарчаси, ҳар бир офтобда ўйнайвериб қорайиб кетган, машинада ўтиб кетсангиз сизга хиёл тикилиб турадиган болакайи — барчаси қадрдон. мана шу шаҳарчанинг ўз маркази бор — табиийки инфраструктура бироз бўлсада мавжуд бўлган жой — аниқ эсимда йўқ неча ёшда тушунганман унинг номи "горт" эмас, "город" бўлганлигини. городга келдик учаламиз. кўплаб эски "панельный" домларнинг орасида жойлашган, пастгина қилиб қўрилган ва оддийгина қилиб охакда оқланган бир неча бир қаватли "помещение"лар. бир қарашда, ўрганмаган кўзга ёки каттароқ шаҳардан келган кишига хатто қандайдир вайронадек кўриниши мумкин бу савдо мажмуаси. лекин бу ерларда ҳаёт хаттоки қайнайди. айниқса тушдан кейин ва кечки пайт. ва албатта йилнинг иссиқроқ фаслларида. ичкарига оёқ босар эканман, дўкон ичида турган қизалоқни кўрдим. қўлидаги ялтироқ безакли кичик туфличани олган жойига қайтаргиси келмаётган, дадаси олиб бериши билан уни дугоналари билан ўйнашга кийиб чиққиси келаётгандек эди гўё. одатий дўконлардаги каби, бу ер ҳам ўртача бир раста билан икки қисмга бўлинган — харидор ва сотувчи тараф. бошидаги рўмолини қисиброқ ўраб олган ёши аннамлар қатори бир аёл қизчанинг қўлидаги оёқ кийимни олиб жойига қўйди. кейин бизга юзланди. сотувчи хола қорачадан келган. нигохи ўткир. хаёлимдан "уддабурон эканлар, бизнес юритишга қобилиятлари бор" деган фикр ўтди. хамманинг ҳам қўлидан келавермайди. деворга илинган кийимларни кўздан кечирдим. кичик шаҳарча ва қишлоқларга хос нарсалардан бири — бу уларнинг мода ва трендларга бўлган бардавомийлиги. сиз ўтган ёки ундан олдинги йилги кўйлакни "мода"си эскирди деб киймаслигингиз мумкин, холбуки шаҳарлар асосан мода ортидан қувади. лекин қишлоқда бошқача — бу ерда ҳар бир мода тинчгина умргўзаронлик қилади, ҳозиргиси ҳам, эскиси ҳам. байрам шарофати билан битта кўйлак-лозимли бўлиб қайтдим дўкондан. худди ўн йил аввалги каби. айтгандай, бу кетишда миллий кўйлаклар коллекциясини йиғадиганга ўхшайман. энди фақат кийиш қолди уларни. уйга қайтар эканмиз, кўчамиздаги ховлиларга разм солиб кетдим. ҳар бирида бўлган эканман, тахминан ичкари уйлари қандай эканлиги эсимда экан. кўчамиз-ку хали холва. кичиклигимда аннам билан акам доим бирор ерга отланиб туришса, "мен ҳам бораман" деб дум бўлиб эргашар эдим, шунинг учун кўпинча "бор, устингни алмаштириб чиқ" дейишари. чиқсам йўқ. кетиб бўлишган бўларди кўпинча. ёки кичиклигимизда нарсалар ростанам анча каттароқ ва хайбатлироқ бўлган, ёки биз кичик бўлганимиз учун шундай кўринган. иккинчиси тўғри бўлса керак, чунки орқа ховлимиз юз тутган қир тепалик хали хам жойида. лекин энди у негадир жуда кичик ва accessible. кичикиналигимда у ерга чиқиш бутун бошли чарчоқли хобби эди. чиққач эса акам ва мен анча ўтирар эдик чарчоқни чиқариш хисобига. қуёш ботишига тикилиб нималар хақида ўй қилган эканман ўша вақтлар?

innit too early for the holiday mood