WorldSkills O'zbekiston Rasmiy Kanali

📢 E’LON WorldSkills Uzbekistan hamkorligida Koreya Respublikasi xalqaro ekspertlari ishtirokida Technical Exchange Week — xalqaro texnik almashinuv haftaligi doirasida master-klass va seminar-treninglar tashkil etilishi rejalashtirilmoqda. 📍 Joy: Samarqand shahri 📅 Sana: 15–19-iyul 2026-yil Mazkur master-klasslar quyidagi kasb yo‘nalishlari bo‘yicha tashkil etilishi rejalashtirilmoqda: 1. Mechanical CAD — mexanik CAD loyihalash 2. CNC Turning — CNC tokarlik ishlari 3. Plumbing — santexnika 4. Web Technology — veb texnologiyalar 5. Beauty Therapy — kosmetologiya va go‘zallik terapiyasi 6. Fashion Technology — moda texnologiyasi / tikuvchilik 7. Automobile Technology — avtomobillarga texnik xizmat ko‘rsatish 8. Information Network Cabling / IT Network Cabling — axborot tarmoqlari kabel tizimlari / IT tarmoqlarini kabellash Dastlabki reja 📌 15.07.2026 — Samarqand shahriga kelish va joylashish. 📌 16.07.2026, 08:00–10:00 — ochilish marosimi, tanishuv va guruhlarga bo‘linish. 📌 16.07.2026, 10:30–17:00 — 1-kun master-klass. 📌 17–18.07.2026, 09:00–17:00 — 2–3-kun master-klasslar. 📌 19.07.2026, 09:00–15:00 — 4-kun yakuniy master-klass. 📌 19.07.2026, 16:00–18:00 — sertifikat topshirish marosimi va xayrlashuv kechasi. 📌 19.07.2026, 19:00 dan boshlab — ishtirokchilarning Samarqand shahridan jo‘nab ketishi. 🎓 Seminar-trening yakunida ishtirokchilarga xalqaro seminar-treningda qatnashganlik to‘g‘risida sertifikat taqdim etilishi rejalashtirilgan. ### Muhim eslatma ✅ Koreya Respublikasiga tajriba almashish uchun borib kelgan ishtirokchilar hamda WorldSkills Shanghai–2026 xalqaro kasbiy mahorat musobaqasiga borishi rejalashtirilgan ekspertlar, o‘qituvchilar va o‘quvchi-ishtirokchilar uchun mazkur master-klasslarda ishtirok etish majburiy hisoblanadi. 🏨 Mahalliy ishtirokchilarning Samarqandga kelish-ketish, yashash va ovqatlanish xarajatlari ishtirokchilarning o‘zlari yoki ularni yuboruvchi tashkilotlar tomonidan qoplanadi. 🌐 Koreya Respublikasidan keladigan xalqaro ekspertlar xarajatlari WorldSkills Uzbekistan va homiylar tomonidan qoplanadi. 🧰 Amaliy topshiriqlarni bajarish imkoniyati bo‘lishi uchun ishtirokchilar imkon qadar o‘z ish qurollari, zarur xomashyo va sarflanuvchi materiallari bilan kelishlari tavsiya etiladi. Mazkur seminar-trening yakuniy seminar sifatida rejalashtirilmoqda. Agar ishtirokchilar faol qatnashsa, xalqaro ekspertlar sizlarning qiziqishingiz, shijoatingiz va amaliy natijalaringizni ko‘rsa, 2027-yildan yangi hamkorlik loyihasini davom ettirish imkoniyati paydo bo‘lishi mumkin. Shu bois, ushbu master-klasslarning davomiyligi, kelajakdagi xalqaro loyihalar va yangi imkoniyatlarning kafolati ko‘p jihatdan siz — o‘qituvchilar, ekspertlar, trenerlar va ishtirokchilarning faolligiga bog‘liq. Yozgi ta’til davri bo‘lishiga qaramay, ushbu imkoniyatdan foydalanishni tavsiya qilamiz. Ishtirok etsangiz, xalqaro kasbiy malakangiz oshadi, WorldSkills standartlari bo‘yicha amaliy va metodik tajribangiz kengayadi. ### Ro‘yxatdan o‘tish Mazkur tadbirda ishtirok etish istagini bildirgan barcha nomzodlar quyidagi maxsus Telegram guruhga qo‘shilishi va elektron anketani to‘ldirishi zarur. 🔗 Telegram guruh: https://t.me/+OgGatnLJ9TllOTMy 📝 Anketani to‘ldirish: https://docs.google.com/forms/d/e/1FAIpQLSdeBJ1agJC7ITZBh6MQ1LdT30EZbzV_1D3eohQrcn5vhsJ5tg/viewform?usp=publish-editor ⚠️ Iltimos, barcha ishtirokchilar guruhga o‘z vaqtida qo‘shilib, anketani to‘liq va aniq to‘ldirishlarini so‘raymiz. WorldSkills Uzbekistan

WorldSkills harakati og‘ir judolikka uchradi Hurmatli hamkorlar, ustozlar va yoshlar! Biz chuqur qayg‘u bilan WorldSkills International tashkilotining sobiq Prezidenti Saymon Bartli (Simon Bartley) vafot etganini ma’lum qilamiz. Uning kasb-hunar ta’limini rivojlantirishga va yoshlarni qo‘llab-quvvatlashga bo‘lgan cheksiz ishtiyoqi hamjamiyatimiz qalbida o‘chmas iz qoldirdi. Saymon Bartli 2011-yildan 2019-yilgacha WorldSkills International tashkilotiga rahbarlik qildi. O‘z faoliyati davomida u yuksak professionallik, samimiylik va yoshlar hayotini yorqin kelajakka o‘zgartira oladigan kasb-hunar kuchiga bo‘lgan chinakam ishonchni namoyon etdi. 💼 Buyuk yetakchining hayot yo‘li Janob Bartli WorldSkills xalqaro miqyosda tanilishidan oldin ham yirik muhandislik loyihalarini boshqargan, Durham universiteti bitiruvchisi, muhandislik fanlari magistri va Buyuk Britaniya hukumati huzuridagi Ko‘nikmalar komissiyasi a’zosi bo‘lgan. U uzoq yillar davomida WorldSkills UK tashkilotiga rahbarlik qilib, 2011-yilda Londonda bo‘lib o‘tgan Jahon chempionatini yuqori saviyada tashkil etishga erishdi. O‘zining xayriya va ko‘ngillilik faoliyati uchun 2015-yilda Buyuk Britaniya Qirolichasining maxsus mukofoti — OBE (Britaniya Imperiyasi Ordeni) bilan taqdirlangan edi. ✨ Yoshlar ovozi va u qoldirgan meros Saymon yoshlarni nihoyatda yaxshi ko‘rardi. Uning har bir harakati ortida *"Har bir yosh yigit-qiz o‘z talantini kashf etish va rivojlantirishga loyiq"* degan olijanob g‘oya yotar edi. Uning WorldSkills’dagi eng sevimli loyihalaridan biri — sobiq ishtirokchilardan iborat WorldSkills Champions Trust tashkilotining tuzilishi bo‘ldi. Bu loyiha bugungi kunda butun dunyo yoshlarining ovoziga aylandi.

"WorldSkills Uzbekistan jamoasi Saymon Bartlining oila a’zolariga va butun xalqaro hamjamiyatga chuqur ta’ziya izhor etadi. Biz uning boshlagan xayrli ishlarini davom ettirib, yoshlarimizga yangi imkoniyatlar yaratishda davom etamiz."

🕊 Ta’ziya bildirish Saymon Bartlining oilasiga butun dunyodan hamdardlik xatlari yo‘llanmoqda. Agar siz ham o‘z ta’ziyangizni qoldirmoqchi bo‘lsangiz, maxsus sahifaga o‘tib, xabar qoldirishingiz mumkin. *(Xabar qoldirayotganda davlatimiz nomini (Uzbekistan) yozishni unutmang, bu uning oilasi uchun global birdamlik belgisi bo‘ladi).* Xotirangiz qalbimizda mangu yashaydi, Saymon! #WorldSkills #WorldSkillsUzbekistan #SimonBartley #InMemoriam

WorldSkills Uzbekistan — xalqaro maydonda kasbiy mahorat sari! Web-sayt|Facebook|Telegram|Youtube |Instagram

WorldSkills Shanghai 2026: ekspertlar uchun musobaqa kunlari bo‘yicha muhim tartib WorldSkills International tomonidan e’lon qilingan “Expert Guide 2026 – Roles and responsibilities of the Expert” qo‘llanmasida ekspertlarning musobaqa davomidagi vazifalari C-6 kunidan C+2 kunigacha aniq belgilab berilgan. Unga ko‘ra, ekspertlar musobaqa boshlanishidan bir necha kun oldin Skill Management Plan (SMP) asosida tayyorgarlik ishlarini boshlaydi. C-6 kuni Competitions Committee yig‘ilishi, SMT networking va orientation meeting o‘tkaziladi hamda ekspertlar va tarjimonlar musobaqa joyiga yetib keladi. C-5 kuni yangi ekspertlar uchun New Expert Orientation tashkil etiladi. Bu jarayonda ekspertlarning roli, baholash tartibi, musobaqa qoidalari va platformadagi majburiy vazifalar tushuntiriladi. C-4 va C-3 kunlari ekspertlar musobaqaga tayyorgarlikni davom ettiradi, Mandatory Assessment Training for Experts jarayonidan o‘tadi, baholash mezonlari va Chempionat topshirig‘i bo‘yicha ishlar yakunlanadi. Zarur hollarda topshiriqqa kiritiladigan 30 foizlik o‘zgartirish rasmiy kelishuv asosida tasdiqlanadi. C-2 kuni ishtirokchilar uchun Familiarization jarayoni o‘tkaziladi. Ular ish joyi, asbob-uskunalar, materiallar va xavfsizlik talablari bilan tanishtiriladi. Shu kuni musobaqa ustaxonalari yakuniy tekshiruvdan o‘tkazilib, HSE — Health, Safety and Environment talablari bo‘yicha nazorat qilinadi. C-1 kuni ekspertlar yakuniy tayyorgarlik ishlarini bajaradi. Competition Commencement Form topshiriladi, Marking Scheme yakuniy tasdiqlanadi va bloklanadi. Kechqurun esa Opening Ceremony bo‘lib o‘tadi. C1–C4 kunlari asosiy musobaqa jarayoni bo‘lib o‘tadi. Har kuni ertalab Competitor Communication o‘tkaziladi, so‘ng ishtirokchilar 09:00 dan 17:00 gacha Chempionat topshirig‘ini bajaradi. Kun yakunida zaruratga ko‘ra qo‘shimcha muloqot tashkil etilishi mumkin. C4 kuni ekspertlar musobaqani yakunlash ishlarini bajaradi, CIS — Competition Information System tizimiga barcha natijalar va baholash ma’lumotlari to‘liq kiritiladi. C+1 kuni yakuniy hujjatlar rasmiylashtiriladi: CIS Closure Form, Competition Completion Form, 2028-yilgi Chief Expert saylovi, keyingi Chempionat topshirig‘i va Technical Description bo‘yicha kelishuvlar yakunlanadi. Kechqurun Closing Ceremony and Farewell Party o‘tkaziladi. C+2 kuni delegatsiyalar, ekspertlar va ishtirokchilar jo‘nab ketadi. WorldSkills Uzbekistan ekspertlari uchun ushbu tartib xalqaro standartlarga muvofiq ishlash, baholash jarayonida adolat, shaffoflik va aniqlikni ta’minlash, shuningdek, Shanghai 2026 musobaqasiga puxta tayyorgarlik ko‘rish uchun muhim yo‘l xaritasi hisoblanadi. WorldSkills Uzbekistan — xalqaro maydonda kasbiy mahorat sari!

# WorldSkills Uzbekistan — milliy malaka tizimining muhim bosqichi Bugungi kunda davlatning kasbiy rivojlanish tizimida bir-biri bilan uzviy bog‘liq bo‘lgan muhim poydevorlar mavjud: Milliy malaka ramkasi, tarmoq malaka ramkalari, kasbiy standartlar, texnik standartlar, sanoat korxonalari, ish beruvchilar, texnikumlar va oliy ta’lim muassasalari. Ushbu tizimning asosiy maqsadi — mehnat bozoriga chiqayotgan bitiruvchi yoki mutaxassisning egallagan kasbiy mahorati **ish joyi talabi, kasbiy standart va real ishlab chiqarish ehtiyojiga qanchalik mosligini aniqlash**dir. Texnikumlar va oliy ta’lim muassasalari kasb va mutaxassisliklar bo‘yicha o‘qitadi. O‘quv dasturlari, amaliy mashg‘ulotlar va ta’lim jarayoni Milliy malaka ramkasi, tarmoq malaka ramkasi va kasbiy standartlar asosida tashkil etilishi kerak. Ammo bitta muhim savol bor: Bitiruvchi o‘rgangan bilim va ko‘nikma kasbiy standart talabiga haqiqatan mosmi? Mana shu savolga xolis javob beradigan tizim — bu **malakani baholash markazlari**dir. Malakani baholash markazlari bitiruvchi yoki mutaxassisning kasbiy standartda belgilangan minimum talablarni bajara olishi yoki bajara olmasligini aniqlaydi. Ya’ni insonning kasbiy mahorati ish beruvchi kutayotgan real talabga mos keladimi yoki yo‘qmi — xolis baholanadi. Bu jarayonda eng muhim tamoyil — xolislik. Bir tashkilot o‘qitadi. Ikkinchi tashkilot xolis baholaydi. Uchinchi tomon — ish beruvchi esa natijani tan oladi. Agar o‘zi tayyorlagan tashkilot o‘zi baholasa, lekin ish beruvchi bu natijani tan olmasa, tizimning ishonchliligi pasayadi. Shu sababli malakani baholash markazlari tomonidan beriladigan sertifikatlar ish beruvchilar tomonidan tan olinadigan, kasbiy standartga asoslangan va mehnat bozori uchun ishonchli hujjat bo‘lishi kerak. Bu dunyo tajribasida ham asosiy tamoyildir: o‘qitish alohida, xolis baholash alohida, ish beruvchi tomonidan tan olish alohida jarayon sifatida shakllanadi. WorldSkills tizimi ham aynan shu mantiqqa yaqin ishlaydi. WorldSkills — bu oddiy musobaqa emas. Bu bitiruvchilar, yosh mutaxassislar va kasb egalari xalqaro kasbiy standart — WSOS, ya’ni WorldSkills Occupational Standards talablariga qanchalik tayyor ekanini ko‘rsatadigan xolis va shaffof baholash maydonidir. Milliy kasb qirollari — Milliy kasbiy standartlar natijasi bo‘lsa, xalqaro kasb qirollari — **xalqaro kasbiy standartlar natijasi**dir. Shu bois WorldSkills Uzbekistan milliy malaka tizimida juda muhim bosqich hisoblanadi. U milliy ta’lim tizimi, kasbiy standartlar, ish beruvchilar talabi va xalqaro kasbiy standartlar o‘rtasida bog‘lovchi ko‘prik vazifasini bajaradi. Bugun biz bir narsani aniq tushunishimiz kerak: bitta tizimni barcha yoshga, barcha kasbga, barcha bosqichga bir xil tatbiq etib bo‘lmaydi. Milliy malaka ramkasi bizga darajalarni beradi. Tarmoq malaka ramkasi soha bo‘yicha talablarni aniqlaydi. Kasbiy standart kasb bo‘yicha minimal va zarur kompetensiyalarni belgilaydi. Texnikum va oliy ta’lim muassasalari shu asosda o‘qitadi. Malakani baholash markazlari xolis baholaydi. Ish beruvchi natijani tan oladi. WorldSkills esa eng kuchli kasb egalari xalqaro standartlarga qanchalik tayyorligini ko‘rsatadi. Demak, WorldSkills Uzbekistan — bu milliy kasbiy ta’lim, malaka baholash, ish beruvchi talabi va xalqaro standartlar uyg‘unlashadigan strategik platformadir. **O‘qitish — ta’lim muassasasining vazifasi. Xolis baholash — malakani baholash markazining vazifasi. Tan olish — ish beruvchining ishonchi. Xalqaro darajaga olib chiqish — WorldSkills Uzbekistan missiyasi.** Shundagina milliy kasbiy standartlar asosida milliy kasb qirollari, xalqaro kasbiy standartlar asosida esa xalqaro kasb qirollari yetishadi. WorldSkills Uzbekistan Milliy standartdan — xalqaro kasbiy mahorat sari.

# WorldSkills standartlariga o‘qitish dasturlari WorldSkills Uzbekistan tizimida xalqaro maydonga tayyorlash oddiy o‘quv kursi emas. Bu — **WSOS, xalqaro baholash mezonlari, amaliy modul, xavfsizlik, vaqt, sifat va natijaga asoslangan professional tayyorgarlik tizimi**dir. Asosiy maqsad — milliy terma jamoa a’zolarini WorldSkills International maydonida raqobatlasha oladigan darajaga olib chiqish. Buning uchun tayyorgarlik 10 bosqichli o‘qitish modeli asosida tashkil etiladi. 1. WorldSkills metodologiyasiga kirish Ishtirokchi va ekspert WSOS, Technical Description, Chempionat topshirig‘i, baholash tizimi va xalqaro hujjatlar bilan ishlashni o‘rganadi. 2. Kasb bo‘yicha WSOS asosida o‘qitish Har bir kasb xalqaro kompetensiyalar, amaliy ish jarayonlari, asbob-uskunalar, natija sifati va standartlar asosida o‘rgatiladi. 3. Chempionat topshirig‘i bilan ishlash Topshiriqni tahlil qilish, ishni rejalashtirish, vaqtni taqsimlash va xatolarni kamaytirish ko‘nikmalari shakllantiriladi. 4. Baholash mezonlari bo‘yicha tayyorgarlik Ishtirokchi Measurement, Judgement, Marking Scheme, sifat va aniqlik talablarini tushunib ishlashga o‘rgatiladi. 5. Xavfsizlik va mehnat madaniyati PPE, ish joyini tayyorlash, xavf boshqaruvi va ergonomika xalqaro talablar asosida o‘rgatiladi. 6. Vaqt bilan ishlash va tezlik Ishtirokchi bosqichma-bosqich ishlash, muddatga ulgurish, ustuvor vazifalarni belgilash va yakuniy tekshiruvni amalga oshirishni mashq qiladi. 7. Simulyatsion musobaqa Real vaqt, real modul, ekspert kuzatuvi va xatolar tahlili orqali chempionat muhiti yaratiladi. 8. Ekspert va trenerlar dasturi Topshiriq ishlab chiqish, xolis baholash, apellyatsiya, etika va xalqaro metodologiya bo‘yicha trenerlar zaxirasi tayyorlanadi. 9. Individual tayyorgarlik xaritasi Har bir ishtirokchining kuchli va zaif tomonlari, mashg‘ulot rejasi hamda mentorlik yo‘nalishi belgilanadi. 10. Xalqaro tayyorgarlik dasturi Xalqaro ekspertlar bilan ishlash, kasbiy ingliz tili, psixologik tayyorgarlik va medal strategiyasi yo‘lga qo‘yiladi. Bu modelning mantiqi oddiy: **Avval metodologiya. Keyin kasbiy ko‘nikma. Keyin modul. Keyin milliy saralash. Keyin xalqaro tayyorgarlik.** Kutilayotgan natija — xalqaro standartga mos ishtirokchi, kuchli milliy ekspertlar zaxirasi, barqaror tayyorgarlik tizimi va WorldSkills Internationalga tayyor terma jamoa. WorldSkills Uzbekistan uchun asosiy vazifa — xalqaro maydonga tasodifiy ishtirokchini emas, balki o‘qitilgan, mashq qildirilgan, baholash mezonini tushunadigan va xalqaro standartga mos kasb egasini olib chiqishdir. WorldSkills Uzbekistan Avval metodologiya — keyin ko‘nikma — keyin xalqaro natija.

# WorldSkills Uzbekistan: hududiy iste’dodlarni aniqlash va xalqaro maydonga tayyorlash strategiyasi WorldSkills Uzbekistan oldidagi yangi maqsad — 14 ta hududdan har bir kasb bo‘yicha eng kuchli iste’dodlarni yoshlar kesimida aniqlash, ularning bazasini shakllantirish va bosqichma-bosqich xalqaro maydonga olib chiqishdir. Bu tizimning markazida bitta katta g‘oya turadi: kasb yulduzlari ko‘paygan sari kasbga qiziqish ortadi, kasb qirollari yetishadi, natijada iqtisod, sanoat va ijtimoiy hayot rivojlanadi. Tasavvur qiling: bir ishchi yoki mutaxassis bir joyda 20 yil mehnat qiladi. Lekin uning haqiqiy mahorati ko‘pincha keng jamoatchilikka ko‘rinmay qoladi. Ana shunday yashirin salohiyatni chempionat, saralash va ochiq baholash tizimi orqali kashf etish, ko‘rsatish va e’tirof etish mumkin. Shuning uchun WorldSkills Uzbekistan faqat musobaqa tashkil qiluvchi platforma emas. Bu — **iste’dodni topadigan, saralaydigan, tayyorlaydigan, chiniqtiradigan va xalqaro maydonga olib chiqadigan milliy tizim**dir. 2027-yildan boshlab mamlakatimizning 14 ta hududida doimiy faoliyat yuritadigan 14 ta WorldSkills Uzbekistan tayyorgarlik markazi faoliyati yo‘lga qo‘yiladi. Ushbu markazlar: hududlardagi iqtidorlarni aniqlaydi; kasblar kesimida nomzodlar bazasini shakllantiradi; texnikum, oliy ta’lim, tarmoq va hokimlik yo‘nalishlari orqali saralashni tashkil etadi; eng kuchli yoshlarni Milliy WorldSkills terma jamoasi zaxirasiga tayyorlaydi; xalqaro standartlar asosida doimiy mashg‘ulot olib boradi. WorldSkills Internationalga chiqish bir kunlik tayyorgarlik bilan bo‘lmaydi. Buning uchun kamida 1 yil davomida Milliy WorldSkills terma jamoasi markazlarida maqsadli tayyorgarlik zarur. Bu jarayonda ishtirokchilar: texnik mahorat, tezlik, sifat, xavfsizlik, psixologik barqarorlik, xalqaro baholash mezonlari bo‘yicha chuqur tayyorlanadi. Bu harakatlar tasodifiy emas. Ularning strategik asosi 2019-yildagi PF-5635-son Farmon bilan qo‘yilgan. Mazkur Farmonning 139-bandida WorldSkills International metodologiyasi bo‘yicha ishchilarni o‘qitish tizimini joriy etish, 140-bandida WorldSkills Uzbekistan uyushmasini tashkil etish va milliy chempionatlarni o‘tkazish, 141-bandida esa xalqaro standartlarga muvofiq kasbiy malakani baholash tizimini joriy etish vazifalari belgilangan. Bugun esa keyingi bosqichga o‘tish vaqti keldi. Endi masala shunchaki chempionat o‘tkazishda emas. Endi masala — **respublika miqyosida tizimni globallashtirish, hududiylashtirish va amalda joriy etish**da. 14 hudud — 14 markaz — minglab iste’dodlar — yuzlab kasb yulduzlari — kuchli milliy terma jamoa — xalqaro maydonda O‘zbekiston. WorldSkills Uzbekistan Kasbni kashf etishdan — kasb qirollarini yetishtirishgacha.

2027-yildan yangi bosqich: 14 hudud — 14 ta WorldSkills Uzbekistan tayyorgarlik markazi 2027-yildan boshlab WorldSkills Uzbekistan tizimida yangi strategik bosqich boshlanadi. Endilikda mamlakatimizning 14 ta hududida WorldSkills Uzbekistan milliy terma jamoasi zaxirasini tayyorlaydigan doimiy faoliyat yurituvchi 14 ta hududiy WorldSkills tayyorgarlik markazi faoliyat yuritadi. Bu markazlarning asosiy vazifasi — xalqaro maydonga tasodifiy ishtirokchi emas, balki yillar davomida saralangan, o‘qitilgan, mashq qildirilgan va xalqaro standartlarga mos tayyorlangan kasb egalarini yetishtirishdir. Markazlarning strategik vazifalari 1. Hududiy kasbiy salohiyatni aniqlash Har bir hududda kuchli texnikumlar, oliy ta’lim muassasalari, korxonalar, tarmoq tashkilotlari va iqtidorli yoshlar bazasi shakllantiriladi. 2. 4 yo‘nalishda parallel saralashni tashkil etish Nomzodlar bir vaqtning o‘zida quyidagi yo‘nalishlar orqali aniqlanadi: Texnikum bosqichi — 16–18 yosh; Oliy ta’lim bosqichi — 18–21 yosh; Tarmoq bosqichi — 18–30 yosh; Hokimlik bosqichi — 18–30 yosh. 3. Milliy terma jamoa zaxirasini shakllantirish Har bir hududiy markaz o‘z hududidagi eng kuchli nomzodlarni aniqlaydi va ularni **WorldSkills Uzbekistan milliy terma jamoasi bazasi**ga tayyorlaydi. 4. WSOS asosida tayyorgarlik Markazlarda ishtirokchilar WorldSkills Occupational Standards — WSOS, xalqaro modul, vaqt me’yori, sifat, xavfsizlik, aniqlik va baholash mezonlari bo‘yicha tayyorlanadi. 5. Doimiy mashg‘ulot va monitoring Bu markazlar faqat musobaqa oldidan ishlaydigan vaqtinchalik baza emas. Ular yil davomida doimiy mashg‘ulot, ichki saralash, ekspert baholashi, xatolar tahlili va simulyatsion musobaqalar olib boradigan amaliy tayyorgarlik maydonlari bo‘ladi. Yangi strategik natija 2027-yildan boshlab har bir hududda: hududiy WorldSkills terma jamoasi zaxirasi, kasblar bo‘yicha kuchli nomzodlar bazasi, amaliy mashg‘ulot tizimi, ekspert va mentorlar guruhi, xalqaro standartga mos tayyorgarlik muhiti shakllantiriladi. Bu yondashuv orqali WorldSkills Uzbekistan milliy terma jamoasi endi bir martalik saralash asosida emas, balki 14 hududda doimiy ishlaydigan tayyorgarlik tizimi orqali shakllanadi. Asosiy maqsad 14 hudud — 14 tayyorgarlik markazi — yagona milliy terma jamoa — xalqaro maydonga tayyor kasb egalari. WorldSkills Uzbekistan uchun yangi bosqichning mazmuni shundan iborat: **Hududlarda aniqlash. Markazlarda tayyorlash. Milliy terma jamoaga saralash. Xalqaro maydonga olib chiqish.** Bu tizim O‘zbekistonning har bir hududida kasbiy iqtidorlarni aniqlash, ularni yo‘qotib qo‘ymaslik va xalqaro darajadagi professional kasb egalariga aylantirish uchun xizmat qiladi. WorldSkills Uzbekistan Milliy kasbiy salohiyatdan xalqaro professional maydongacha.

# Yangi strategiya: WorldSkills Uzbekistan milliy terma jamoasini shakllantirish WorldSkills Uzbekistan yangi bosqichda tasodifiy ishtirokchi emas, tizimli tayyorlangan milliy terma jamoa modeliga o‘tmoqda. Asosiy maqsad — O‘zbekiston nomidan xalqaro maydonga saralangan, o‘qitilgan, mashq qildirilgan va WorldSkills standartlariga mos tayyorlangan kasb egalarini olib chiqish. Strategik maqsad Milliy kasbiy salohiyatni aniqlash, eng kuchli yoshlarni saralash, ularni yagona terma jamoa bazasiga jamlash va WorldSkills Internationalga tizimli tayyorlash. Bu jarayonda asosiy e’tibor musobaqaning o‘ziga emas, balki **musobaqagacha bo‘lgan tayyorgarlik tizimi**ga qaratiladi. Yangi taktika: 4 ta parallel saralash WorldSkills Uzbekistan milliy terma jamoasi 4 ta yo‘nalish orqali shakllantiriladi 1. Texnikum bosqichi 16–18 yoshdagi texnikum o‘quvchilari orasidan amaliy ko‘nikmasi kuchli nomzodlar aniqlanadi. 2. Oliy ta’lim bosqichi 18–21 yoshdagi talabalar orasidan kasbiy fikrlash, innovatsion yondashuv va chuqur amaliy salohiyatga ega yoshlar saralanadi. 3. Tarmoq bosqichi 18–30 yoshdagi korxona, tashkilot, sanoat, servis va xususiy sektor vakillari orasidan real ish tajribasiga ega mutaxassislar tanlanadi. 4. Hokimlik bosqichi 18–30 yoshdagi hududiy iqtidorlar ochiq saralash orqali aniqlanadi. Bu 4 yo‘nalish bir vaqtning o‘zida ishlaydi. Har bir bosqichdan aniqlangan eng kuchli nomzodlar Milliy WorldSkills terma jamoasi bazasiga kiritiladi. Harakat bosqichlari 1. Hududiy va tarmoq xaritasi Qaysi hududda, qaysi sohada, qaysi kasb bo‘yicha kuchli salohiyat borligi aniqlanadi. 2. Nomzodlar bazasi Texnikum, oliy ta’lim, korxona, xususiy sektor va hokimliklar orqali nomzodlar ro‘yxati shakllantiriladi. 3. Saralash tanlovi Nomzodlar amaliy ko‘nikma, xavfsizlik, sifat, vaqt, aniqlik, intizom va natija bo‘yicha baholanadi. 4. Milliy terma jamoa bazasi Eng kuchli nomzodlar yagona milliy bazaga jamlanadi. 5. Individual tayyorgarlik xaritasi Har bir nomzod uchun kuchli va zaif tomonlar, zarur mashg‘ulotlar, modullar va mentorlik yo‘nalishlari belgilanadi. 6. WorldSkills tayyorgarlik markazlari Nomzodlar hududiy va milliy markazlarda WSOS talablari, xalqaro modul, vaqt me’yori, sifat va xavfsizlik bo‘yicha tayyorlanadi. 7. WorldSkills Uzbekistan yakuniy saralashi Terma jamoa ichidan xalqaro maydonga eng tayyor nomzodlar tanlanadi. 8. Xalqaro tayyorgarlik Ishtirokchilar xalqaro ekspertlar, sanoat hamkorlari va milliy mentorlar bilan chuqur tayyorgarlikdan o‘tadi. Yangi yondashuvning mazmuni Kuchli natija musobaqa kuni tug‘ilmaydi. Kuchli natija: to‘g‘ri aniqlash, to‘g‘ri saralash, to‘g‘ri o‘qitish, to‘g‘ri mashq qildirish, to‘g‘ri tayyorlash orqali yaratiladi. WorldSkills Uzbekistan uchun yangi maqsad — O‘zbekistonning milliy kasbiy salohiyatini xalqaro professional maydonga olib chiqish. **Yangi strategiya — tizimli terma jamoa. Yangi taktika — 4 yo‘nalishda parallel saralash. Yangi harakat — individual tayyorgarlik xaritasi. Yangi natija — xalqaro maydonga tayyor kasb egasi.** WorldSkills Uzbekistan Milliy kasbiy salohiyatdan xalqaro professional maydongacha.

## WorldSkills Uzbekistan uchun Kasblar chempionati — bu faqat musobaqa emas. Chempionat — bu **o‘qitilgan, o‘rgatilgan, mashq qildirilgan va amaliy ko‘nikmaga aylangan kasbiy mahoratni baholash tizimi**dir. O‘qitilmagan, o‘rgatilmagan, mashq qildirilmagan, hali shakllanmagan ko‘nikmalar asosida haqiqiy chempionat tashkil etib bo‘lmaydi. Chunki chempionatning mohiyati — inson bilmaydigan narsani tekshirish emas, balki **o‘rgatilgan bilim va ko‘nikmaning qay darajada sifatli, tez, xavfsiz va standartga mos bajarilishini baholash**dir. Oddiy misol: yozishni bilmagan o‘quvchidan diktant olinmaydi. Avval unga harf o‘rgatiladi, so‘z yozish o‘rgatiladi, gap tuzish o‘rgatiladi, yozish tezligi, chiroyli yozish, imlo qoidalari va yozuv texnikasi shakllantiriladi. Shundan keyingina diktant olinadi. Eng yaxshi yozadigan, imloga amal qiladigan, tez va chiroyli yozadigan o‘quvchilar o‘rtasida bellashuv bo‘lishi mumkin. Kasblar chempionatida ham aynan shu mantiq amal qilishi kerak. Avval kasb o‘rgatiladi. Avval xavfsizlik qoidalari tushuntiriladi. Avval asbob-uskunadan foydalanish madaniyati shakllantiriladi. Avval mashq qilish uchun sharoit yaratiladi. Avval kasb standarti, modul, mezon va baholash talablari o‘rgatiladi. Shundan keyingina chempionat o‘tkaziladi. Bugun o‘ylab ko‘rish vaqti keldi: biz nima qilyapmiz? Qilayotgan ishlarimiz metodologik jihatdan to‘g‘rimi? Agar bola hali kasbni o‘rganmagan bo‘lsa, unga professional modul berish adolatli emas. Agar ishtirokchi xavfsizlik talablarini bilmasa, uni murakkab uskunaga qo‘yish xavfli. Agar o‘quvchi topshiriq standartini tushunmasa, undan xalqaro darajadagi natija kutish noto‘g‘ri. Shu bois Kasblar chempionati tizimi Milliy malaka ramkasi, tarmoq malaka ramkasi, milliy kasb standartlari va WorldSkills Occupational Standards — WSOS bilan uyg‘un bo‘lishi shart. Har bir yosh toifasi uchun: alohida tayyorgarlik bosqichi, alohida modul murakkabligi, alohida xavfsizlik talabi, alohida baholash mezoni, alohida kasbiy o‘sish yo‘li belgilanishi kerak. Chunki 10 yoshli maktab o‘quvchisi, 17 yoshli texnikum o‘quvchisi, 21 yoshli talaba va tajribali mutaxassisni bir xil topshiriq bilan baholab bo‘lmaydi. Bu na ilmiy, na pedagogik, na metodologik, na xavfsizlik nuqtayi nazaridan to‘g‘ri. Chempionat — bu yakuniy sinov. Chempionat — bu tayyorgarlik natijasi. Chempionat — bu o‘qitish, mashq qilish va kasbiy o‘sish tizimining ko‘zgusi. Shuning uchun asosiy savol shunday bo‘lishi kerak: Biz avval o‘rgatyapmizmi yoki faqat sinayapmizmi? Biz bolani kasbga tayyorlayapmizmi yoki tayyorlanmagan holatda baholayapmizmi? Biz adolatli saralayapmizmi yoki barcha yoshlarni bir xil mezonga solyapmizmi? WorldSkills Uzbekistan uchun eng muhim vazifa — chempionatni shunchaki musobaqa sifatida emas, balki maktabdan texnikumga, texnikumdan oliy ta’limga, oliy ta’limdan mehnat bozoriga olib chiqadigan bosqichma-bosqich kasbiy rivojlanish tizimi sifatida shakllantirishdir. **Avval o‘qitish. Avval o‘rgatish. Avval mashq qildirish. Keyin adolatli baholash. Shundan keyin haqiqiy chempionat.** Mana shu yondashuv Kasblar chempionatini oddiy tadbir emas, balki **milliy kasbiy mahorat maktabi**ga aylantiradi.

WorldSkills Uzbekistan uchun xalqaro e’tirof va yangi hamkorlik istiqbollari Bugun WorldSkills Uzbekistan nomiga Beijing Botok Qiancheng Information Technology Co., Ltd. kompaniyasidan rasmiy minnatdorchilik xati kelib tushdi. Mazkur xat Botok Tech Co., Ltd. xalqaro loyihalar rahbari Gao Hui tomonidan yo‘llangan. Ushbu xat — nafaqat tashkilotimiz uchun, balki WorldSkills Uzbekistan rasmiy kanalini kuzatib borayotgan barcha ustozlar, ekspertlar, ishtirokchilar, ta’lim muassasalari va kasbiy ta’lim fidoyilari uchun katta sharafdir. 2025-yil 23-may kuni WorldSkills Uzbekistan vakillari Xitoyda joylashgan Botok Tech kompaniyasiga tashrif buyurib, kasbiy ta’lim, xalqaro kasblar musobaqalari, trening, baholash va sertifikatlash tizimlari bo‘yicha hamkorlik masalalarini muhokama qilgan edi. Bugun kelgan rasmiy xatda Botok Tech tomoni ushbu tashrif va uchrashuv uchun alohida minnatdorchilik bildirib, WorldSkills Uzbekistan bilan uzoq muddatli hamkorlikni rivojlantirishga tayyorligini bildirdi. Uchrashuv davomida Botok Tech tomonidan so‘nggi olti yil davomida o‘tkazib kelinayotgan “Botok Cup” xalqaro kasbiy ta’lim muassasalari innovatsiya va tadbirkorlik tanlovi, shuningdek, kompaniyaning raqamli kasblar, sun’iy intellekt, elektron tijorat, dron texnologiyalari va amaliy o‘quv markazlari yo‘nalishidagi tajribasi taqdim etildi. Tomonlar quyidagi muhim yo‘nalishlar bo‘yicha hamkorlik imkoniyatlarini muhokama qildi: 1. Xalqaro kasblar musobaqalari bo‘yicha hamkorlik Botok Tech tomoni “Botok Cup” xalqaro tanlovini tashkil etishdagi tajribasi va resurslari bilan o‘rtoqlashishga tayyorligini bildirdi. Shuningdek, kelgusida Xitoy – Markaziy Osiyo kasblar musobaqalarini tashkil etish, musobaqa standartlari, kasb yo‘nalishlari va tashkiliy jarayonlarni birgalikda ishlab chiqish imkoniyatlari muhokama qilindi. Bu tashabbus yoshlarning kasbiy mahoratini oshirish, xalqaro tajriba almashish va Markaziy Osiyo mamlakatlari o‘rtasida kasbiy kompetensiyalarni o‘zaro tan olish imkoniyatlarini kengaytirishga xizmat qiladi. 2. Trening, baholash va sertifikatlash tizimini rivojlantirish Botok Techning mavjud o‘quv resurslari va “Qinling Workshop” platformasi asosida raqamli kasblar, elektron tijorat, dronlarni boshqarish, sun’iy intellekt ilovalari kabi yo‘nalishlarda qisqa muddatli o‘quv dasturlarini ishlab chiqish bo‘yicha hamkorlik istiqbollari ko‘rib chiqildi. Shuningdek, “trening – baholash – sertifikatlash” modeli asosida o‘quv dasturlari, baholash mezonlari va ikki tomonlama tan olinadigan sertifikatlarni joriy etish imkoniyatlari muhokama qilindi. 3. O‘quv dasturlari, ekspertlar almashinuvi va ta’lim-ishlab chiqarish integratsiyasi Tomonlar o‘quv dasturlarini birgalikda ishlab chiqish, ustoz va ekspertlar almashinuvi, standartlarni muvofiqlashtirish hamda ta’lim va ishlab chiqarish integratsiyasi asosida qo‘shma loyihalarni amalga oshirish bo‘yicha fikr almashdi. Bugungi rasmiy minnatdorchilik xati shuni ko‘rsatadiki, WorldSkills Uzbekistan xalqaro maydonda tobora ishonchli hamkor, zamonaviy kasblarni rivojlantirish bo‘yicha ochiq va faol platforma sifatida e’tirof etilmoqda. Bu e’tirof — barcha ustozlarimiz, ekspertlarimiz, ishtirokchilarimiz va kasbiy ta’lim tizimida fidokorona mehnat qilayotgan insonlarning umumiy mehnati natijasidir. WorldSkills Uzbekistan xalqaro hamkorlar bilan birgalikda yoshlarning amaliy kasbiy mahoratini rivojlantirish, zamonaviy kasblarni ommalashtirish va O‘zbekistonning xalqaro kasblar musobaqalari maydonidagi nufuzini yanada oshirish yo‘lida izchil ishlarni davom ettiradi.

# Nega kasblar chempionatida barcha yoshlarni bir xil modul bilan saralab bo‘lmaydi? Kasblar chempionati — bu oddiy musobaqa emas. Bu yosh, ta’lim bosqichi, malaka darajasi, kasb standartlari, xavfsizlik, SanQvaN va ergonomik talablar asosida quriladigan baholash tizimidir. Shu sababli 10 yoshli maktab o‘quvchisi, 17 yoshli texnikum o‘quvchisi, 23 yoshli universitet talabasi va 30–50 yoshdagi professional mutaxassisni bir xil modul, bir xil topshiriq va bir xil mezon bilan saralash metodologik jihatdan to‘g‘ri emas. Ayrim modullarni 17 yoshli o‘quvchiga ham, 30 yoshli mutaxassisga ham bir xil murakkablikda berib bo‘lmaydi. Chunki elektr jihozlari, kesuvchi uskunalar, kimyoviy moddalar, og‘ir mexanizmlar, yuqori harorat, payvandlash yoki ishlab chiqarish liniyalari bilan ishlashda yosh, jismoniy tayyorgarlik, xavfsizlik ruxsati va mehnat muhofazasi talablari albatta hisobga olinadi. Bu borada huquqiy asoslar ham mavjud. “Ta’lim to‘g‘risida”gi O‘RQ-637-son Qonun ta’lim jarayonini davlat ta’lim standartlari, malaka talablari va o‘quv dasturlari asosida tashkil etishni belgilaydi. PQ-345-son qaror milliy malaka tizimini takomillashtirish va kasblarni mehnat bozori talablariga moslashtirish vazifalarini belgilagan. VMQ-290-son qaror esa 18 yoshga to‘lmagan shaxslar uchun og‘ir, zararli va xavfli mehnat sharoitlaridagi ishlar bo‘yicha cheklovlarni tasdiqlagan. VMQ-647-son qaror professional ta’limda dual ta’lim mexanizmlarini takomillashtirishga qaratilgan. Demak, kasblar chempionatida har bir modul Milliy malakalar ramkasi, kasb standartlari, yosh xususiyati, ta’lim bosqichi va xavfsizlik talablari asosida ishlab chiqilishi kerak. Milliy malakalar ramkasi biz uchun “lokator” vazifasini bajaradi. U qaysi yosh, qaysi bosqich, qaysi malaka darajasi va qaysi modulga tayyor ekanini aniqlashga yordam beradi. Shu bois 2027-yilda milliy kasblar chempionatini quyidagi yo‘nalishlar asosida tabaqalashtirish taklif etilmoqda: JuniorSkills Uzbekistan — 10–16 yosh, 30 ta kasb. Maqsad: maktab o‘quvchilarida kasbga qiziqish uyg‘otish va ularni texnikum bosqichiga yo‘naltirish. TechnikumSkills — 16–18 yosh, 200 ta kasb. Maqsad: texnikum o‘quvchilarining boshlang‘ich kasbiy ko‘nikmalarini baholash, kuchlilarni xalqaro yo‘nalish yoki oliy ta’limga tavsiya etish. Rector Skills — 18–25 yosh, 200 ta kasb. Maqsad: oliy ta’lim talabalarining nazariy bilim, loyiha yondashuvi, innovatsion fikrlash va amaliy ko‘nikmalarini baholash. TarmoqSkills — 18–50 yosh, 1000 ta kasb. Maqsad: ishlab turgan professionallar, ustalar, texniklar, operatorlar va muhandislar orasidan eng kuchlilarni aniqlash. HokimSkills — 18–50 yosh, 100 ta kasb. Maqsad: hududlarning iqtisodiy ehtiyoji va mahalliy mehnat bozori talablariga mos kasblarni rivojlantirish. Ushbu yo‘nalishlarning eng kuchli ishtirokchilari yakuniy Respublika bosqichi — PresidentSkills bosqichiga yo‘llanma oladi. PresidentSkills — milliy kasblar chempionatining yakuniy bosqichi bo‘lib, u Prezident kubogi bilan yakunlanadi. 3-bosqich — Respublika bosqichi yakunida g‘oliblarga quyidagi unvonlarni berish taklif etiladi: Kasb qiroli; Texnikumning kasb qiroli; Universitetning kasb qiroli; Tarmoqning kasb qiroli; Hududning kasb qiroli. PresidentSkills yakunidan so‘ng yoshi, kasbi va tayyorgarlik darajasi xalqaro talabga mos keladigan g‘oliblarga WorldSkills Uzbekistan orqali xalqaro kasblar chempionatlariga yo‘llanma beriladi. Bu model kasblar chempionatini bolalikdagi qiziqishdan professional ustalikkacha bo‘lgan uzluksiz kasbiy rivojlanish yo‘liga aylantiradi. Kasbiy mahorat — raqobat ustunligimiz, yuksak kelajagimiz!

WorldSkills Shanghai-2026 uchun tayyorgarlik Ekspertlar uchun asosiy terminologiya 1. Competition Rules Quiz *(Kompetishn Ruls Kviz)* — Chempionat qoidalari bo‘yicha test 2. Role and responsibility of Experts *(Rol end risponsibiliti ov ekspertz)* — Ekspertlarning roli va mas’uliyati 3. Expert *(Ekspert)* — Ekspert 4. Competition *(Kompetishn)* — Chempionat / musobaqa 5. Question *(Kveshchin)* — Savol 6. Correct *(Korrekt)* — To‘g‘ri 7. Answer *(Anser)* — Javob 8. Task *(Task)* — Vazifa 9. Mandatory task *(Mendatori task)* — Majburiy vazifa 10. Complete *(Komplit)* — Bajarish / yakunlash 11. Submit *(Sabmit)* — Topshirish / yuborish 12. Industry-specific Test *(Indastri-spesifik test)* — Kasbga oid maxsus test 13. Competition Rules Quiz *(Kompetishn Ruls Kviz)* — Chempionat qoidalari testi 14. Access Programme *(Akses Program)* — Kirish dasturi / platformaga kirish dasturi 15. Curriculum Vitae (CV) *(Kyurikulum Vitay / Si-Vi)* — Tarjimai hol / CV 16. Mandatory Assessment Training *(Mendatori Esesment Treyning)* — Majburiy baholash treningi 17. Assessment *(Esesment)* — Baholash 18. Training *(Treyning)* — Trening / o‘quv mashg‘uloti 19. Discussion Forum *(Diskashn Forum)* — Muhokama forumi 20. Code of Ethics and Conduct *(Koud ov Etiks end Kondakt)* — Etika va xulq-atvor kodeksi 21. Boarding pass *(Bording pass)* — Samolyotga chiqish taloni 22. Return trip home *(Ritorn trip houm)* — Uyga qaytish safari 23. Sponsor *(Sponsor)* — Homiy 24. Skill competition *(Skill Kompetishn)* — Kasb bo‘yicha chempionat / musobaqa 25. Track the progress *(Trek ze progress)* — Bajarilish jarayonini kuzatish 26. Progress of completion *(Progress ov komplitshn)* — Bajarilish holati / bajarilish foizi 27. Expert Centre *(Ekspert Senter)* — Ekspert markazi 28. Percentage *(Persentej)* — Foiz ko‘rsatkichi 29. Window *(Vindou)* — Oyna 30. Close this window *(Klouz zis vindou)* — Ushbu oynani yopish 31. Take Quiz again *(Teyk Kviz egen)* — Testni qayta topshirish 32. Passed *(Passd)* — Muvaffaqiyatli o‘tdi / topshirdi 33. You have passed *(Yu hev passd)* — Siz muvaffaqiyatli topshirdingiz 34. Answers correct *(Anserz korrekt)* — Javoblar to‘g‘ri 35. All Experts *(Ol ekspertz)* — Barcha ekspertlar 36. At the Competition *(Et ze Kompetishn)* — Chempionat davomida 37. Before attending the Competition *(Bifor etending ze Kompetishn)* — Chempionatga borishdan oldin 38. Once a task is complete *(Vans e task iz komplit)* — Vazifa bajarilgandan so‘ng 39. Update *(Apdeyt)* — Yangilash / yangilanmoq 40. Technical Delegate *(Teknikal Delegit)* — Texnik delegat

# WorldSkills Conference 2026: Shanxay deklaratsiyasi Kasblar kelajakni kuchaytiradi. 2026-yil 23–25-sentabr kunlari Shanxay shahrida WorldSkills Conference 2026 bo‘lib o‘tishi rejalashtirilgan. Ushbu konferensiya doirasida “Skills empower the future: Building an inclusive development landscape for all” mavzusidagi Shanxay deklaratsiyasi qabul qilinishi kutilmoqda. Mazkur deklaratsiya jahon miqyosida kasblarni rivojlantirish, yoshlarni kelajak mehnat bozori talablariga tayyorlash, inklyuziv taraqqiyot muhitini shakllantirish hamda kasbiy ta’limning xalqaro ahamiyatini yanada oshirishga qaratilgan muhim strategik hujjat bo‘ladi. Deklaratsiyada kasblar inson kapitali, iqtisodiy o‘sish, sanoat transformatsiyasi va ijtimoiy farovonlikning asosiy omili sifatida e’tirof etilishi nazarda tutilmoqda. Bugungi globallashuv, sun’iy intellekt, raqamli texnologiyalar va yashil iqtisodiyot davrida har bir davlat uchun eng muhim vazifa — yoshlarni zamonaviy, amaliy va xalqaro standartlarga mos kasblarga tayyorlashdir. Shanxay deklaratsiyasida quyidagi ustuvor yo‘nalishlar aks etishi kutilmoqda: 1. Raqamli, yashil va AI yo‘nalishlaridagi kasblarni rivojlantirish Kelajak kasblari sun’iy intellekt, raqamli texnologiyalar, yashil iqtisodiyot va innovatsion ishlab chiqarish bilan chambarchas bog‘liq. Shu bois kasbiy ta’lim tizimi zamonaviy texnologik o‘zgarishlarga mos ravishda rivojlanishi zarur. 2. Davlat, ta’lim va sanoat hamkorligini kuchaytirish Kasblar ekotizimi faqat ta’lim muassasalari bilan emas, balki davlat organlari, ish beruvchilar, sanoat korxonalari va xalqaro hamkorlar ishtirokida shakllanadi. Aynan shu hamkorlik real mehnat bozori talablariga mos kadrlar tayyorlash imkonini beradi. 3. Kasblarga barqaror investitsiya kiritish Kasbiy ta’lim infratuzilmasi, zamonaviy ustaxonalar, laboratoriyalar, ekspertlar tayyorlash va yoshlarni amaliy kasblarga jalb qilish doimiy moliyaviy hamda institutsional qo‘llab-quvvatlashni talab etadi. 4. TVET va kasbiy ta’lim nufuzini oshirish Texnik va kasbiy ta’lim jamiyatda munosib o‘rin egallashi, kasb egalarining mehnati qadrlanishi va yoshlar orasida amaliy kasblarga bo‘lgan qiziqish yanada kuchaytirilishi kerak. 5. Xalqaro hamkorlik va global kasblar hamjamiyatini kengaytirish WorldSkills harakati davlatlar o‘rtasida tajriba almashish, ekspertlar salohiyatini oshirish, xalqaro standartlarni joriy etish va yoshlarni global mehnat bozoriga tayyorlashda muhim platforma bo‘lib xizmat qiladi. WorldSkills Vision 2035 maqsadlari doirasida ushbu deklaratsiya barcha uchun sifatli kasbiy ta’lim tizimini yaratish, umr bo‘yi o‘rganish madaniyatini rivojlantirish va kasbiy mahorat orqali inson salohiyatini ro‘yobga chiqarishga xizmat qilishi kutilmoqda. WorldSkills Uzbekistan ushbu global chaqiriqlarni milliy kasbiy ta’lim tizimiga olib kirish, yoshlarimizni xalqaro standartlar asosida tayyorlash va WorldSkills Shanghai 2026 sari munosib tayyorgarlik ko‘rish yo‘lida izchil harakat qiladi. **Kasb — bu kelajak kaliti. Kasb — bu taraqqiyot poydevori. WorldSkills — bu xalqaro imkoniyatlar maydoni.** WorldSkills Uzbekistan WorldSkills Shanghai 2026 sari!

WORLDskills SHANGHAI 2026: RAQAMLAR ORTIDA ULKAN TAYYORGARLIK TURIBDI 48-jahon kasblar chempionati — WorldSkills Shanghai 2026 sari tayyorgarlik jarayonlari tobora keng ko‘lamli bosqichga chiqmoqda. Rasmiy ma’lumotlarga ko‘ra, 2026-yil 21-may holatiga: 12 000 ga yaqin turdagi infratuzilma jihozlari; 1 000 000 dona infratuzilma elementi; 118 ta homiy tashkilot bilan texnik muzokaralar; 7 000 ga yaqin homiylik asosidagi jihozlar; talab etilgan infratuzilmaning 57 foizi homiylar orqali qoplanmoqda. Eng e’tiborli jihati shundaki, homiylik asosida taqdim etilayotgan jihozlar: Tier A toifasidagi infratuzilmaning 92 foizini, Tier B toifasidagi infratuzilmaning 77 foizini tashkil etmoqda. Bu oddiy tayyorgarlik emas. Bu — xalqaro miqyosdagi eng yirik kasbiy mahorat maydonini yaratish, millionlab detal va minglab texnik yechimlarni yagona tizimga birlashtirish jarayoni. WorldSkills Shanghai 2026 ijrochi byurosi homiylik shartnomalarini yakunlash, yetkazib berish, xarid va ijara rejalarini shakllantirish hamda barcha infratuzilma elementlarini sifat va miqdor jihatidan kafolatlash bo‘yicha ishlarni jadallashtirmoqda. WorldSkills tizimining kuchi ham shunda: har bir kasb ortida — xalqaro standart, har bir modul ortida — aniq infratuzilma, har bir ishtirokchi ortida — katta tayyorgarlik, har bir chempionat ortida esa — butun dunyo bo‘ylab hamkorlik ekotizimi turadi. WorldSkills Uzbekistan uchun bu jarayon alohida ahamiyatga ega. Chunki Shanghai 2026 nafaqat musobaqa, balki O‘zbekiston yoshlarining xalqaro kasbiy maydonda o‘z salohiyatini namoyon etishi, milliy ekspertlarimizning global standartlar bilan ishlashi va mamlakatimiz professional ta’lim tizimini yangi bosqichga olib chiqishi uchun ulkan imkoniyatdir. Shanghai 2026 sari har bir qadam — O‘zbekiston kasbiy ta’limining xalqaro maydondagi yangi qadami demakdir.

Ta’lim Transformatsiyasi: Shunchaki "Vaqtni Qisqartirish" Emas, Yangi Ekotizim Yaratish Davri! Ta’lim eksperti Keti Martin (Katie Martin) o‘zining yangi maqolasida bugungi kun uchun juda dolzarb bo‘lgan masalani o‘rtaga tashladi: "Agar o‘quvchilar an’anaviy sinfxonalarda kamroq vaqt o‘tkazishsa, biz buni o‘rniga nima quryapmiz?" Bugungi kunda sun’iy intellekt (AI) va raqamli texnologiyalar tufayli akademik bilimlarni 2 soat ichida shaxsiylashtirilgan tarzda o‘zlashtirish imkoniyati paydo bo‘lmoqda. Ammo ta’limni isloh qilish — shunchaki sinfxonadagi vaqtni qisqartirish (ayirish) degani emas. Asosiy innovatsiya — o‘sha bo‘shagan vaqt evaziga yoshlar uchun qanday imkoniyatlar yaratayotganimizda! WorldSkills Uzbekistan jamoasi sifatida biz ham doimo shu g‘oya ustida ishlaymiz: Ta’lim faqat parta ortida o‘tirishdan iborat bo‘lmasligi kerak. An’anaviy modeldan "O‘quvchiga yo‘naltirilgan ekotizim"ga Ushbu tub burilishni ilova qilingan rasmida yaqqol ko‘rishimiz mumkin. Chap tomonda biz ko‘nikkan, qat’iy qoidalarga asoslangan va faqat "baho olish"ga yo‘naltirilgan an’anaviy sinfxona. O‘ng tomonda esa WorldSkills falsafasiga to‘liq mos keladigan **kelajak ekotizimi** tasvirlangan. Ushbu ekotizimning 4 ta eng muhim ustuni: * Amaliy ko‘nikmalar (Applied Skills): Nazariyani yodlash davri o‘tdi. Sun'iy intellekt ma'lumotni tezkor yetkazib bera oladi, ammo uni hayotda qo‘llashni, asbob-uskunalar bilan ishlashni va muammolarni hal qilishni faqat amaliyot o‘rgatadi. * Real hamkorlik (Real-World Partnerships): Maktab va korxonalar o‘rtasidagi ko‘prik. Yoshlar darsdan soatlab bo‘shagan vaqtlarida kompaniyalarda stajirovka o‘tashi, haqiqiy loyihalarda qatnashishi zarur. * Mentorlik va "Ustoz-shogird" an’anasi (Mentorship & Coaching): Yoshlarga shunchaki dars beruvchi ma’ruzachi emas, balki ularning salohiyatini ochib beruvchi, yo‘l ko‘rsatuvchi ustozlar kerak. * Muvaffaqiyatning yangi mezoni: Endilikda muvaffaqiyat kundalikdagi baholar bilan emas, o‘quvchining real ishlar jamlanmasi (raqamli portfolio), uning kreativligi, moslashuvchanligi va jamoada ishlash qobiliyati bilan o‘lchanadi. --- > *"Kelajak ta'limi — kontentni tezroq tugatish haqida emas. Axborot allaqachon hamma joyda bor va hamma uchun ochiq. Asosiy vazifa — yoshlarga o‘zligini anglash, boshqalar bilan qanday ishlashni o‘rganish va oldindan aytib bo‘lmaydigan dunyoda to‘g‘ri yo‘l topishga yordam berishdir."*— Katie Martin Biz shunchaki texnologiyalarni maktabga olib kirishimiz yetarli emas, biz ta'lim muhitini o‘zgartirishimiz shart. Yoshlarimiz mehnat bozoriga kirib kelganida "quruq diplom" bilan emas, real kasbiy mahorat va mustahkam xarakter bilan kirib kelishlari uchun bugundan boshlab amaliy ekotizimlarni qurishimiz lozim! Sizningcha, bugun o‘zbek maktablarida amaliy ko‘nikmalarni rivojlantirish uchun birinchi navbatda nimani o‘zgartirish kerak? 🤔💬