Дил синиқлари

#25май КАТТА ТАНАФФУСЛАР Менинг ибтидоий муҳаббатимдан Кулма, қўзғолмасин дард-афсусларим. Сенинг қўлларингга термулиб ўтди Энг узун - энг қисқа танаффусларим. Рўмолча тўқийсан. Иккимиз жиммиз, Мактаб ҳовлисида - ҳайқириқ, шовқин. Бизлар бир-бировга аслида киммиз? Йироқ ҳам кетмаймиз, келмаймиз яқин. Қалбимда бир синф боладек сўзлар - Сиқилиб ётади бағримни тилиб. Умид қўнғироғин чалса бу кўзлар, Бари ташқарига чиқса отилиб. Синфга навбатчи кирар: - Ана, боғ, Боринглар, чиқинглар. - Қовоғин уяр. Боғда аламзада рақибим шу чоғ Шафтоли шохини синдириб қўяр. Аммо рашк қилгулик ҳолат йўқ бунда, Юракда ғимирлар, чиқмас сўзларим. Сенинг рўмолчангга термулиб ўтди Энг узун - энг қисқа танаффусларим. Кўникдим: учинчи соатдан кейин Катта танаффусга бўлар қўнғироқ... Тириклик дарслари бунчалар қийин, Ҳижрон танаффуси бунчалар узоқ! Бизларни ҳайдади Вақт - навбатчи, - Чиқинглар! - деди у турткилаб кифтга. Энди сукут учун бўлса ҳам айт-чи, Қайтиб кирамизми ўша синфга! Йўқ, сукут кетмайди, ниятим барҳақ, Мен ошкор этаман қайтмай шахтимдан: Майли, кимдир кулсин, кулсин бутун халқ Менинг ибтидоий муҳаббатимдан. То ҳаёт синфидан олиб кетмай бош, Сўнгги танаффусга чиқмай айтайин: Мени яхши кўрардим, сени синфдош, Мени яхши кўраман сени, Ватаним! Шеърим парвоз қилсин, сўзларим учсин Юртимнинг ҳаётбахш шамолларида. Сен эса рўмолча тўқийвер маҳзун Умрбод Мирзонинг хаёлларида. О, менинг илк дардим, илк афсусларим, Энг узун - энг қисқа танаффусларим! ✍Мирзо Кенжабек

ЗОРРО НИҚОБИ Қачондир ботирлар яшаган танҳо: Тунлар – от устида, кундузи чоҳда. Мазлум эл истаги бўлсин, деб бажо Ёрлари кутганлар ғамда, фироқда. Тақдир қавартирган икки елкага Халоскорлик юкин ортган – ўшалар. Ҳуррият етгунча ғариб ўлкага Юзга қора ниқоб тортган – ўшалар. Зорро камёб бўлган, узоқ кутганлар Мазлумлар умрига фидо жонларни. Бугун шунчалик кўп ниқоб тутганлар, Таниб ололмайсан қаҳрамонларни. “Мен Зорро!” – қичқирар кечаги сотқин, “Мен Зорро!” – қичқирар ўғрибоши ҳам. Жасорат деб билар эски қилиғин Дўст уйига олов қўйган муттаҳам. Кимдир чайқалади сурон ичинда, “Мен Зорро!” – мадҳ этар гўё ўзини. Гарчи ниқоби бор шу он юзида, Элдан яширолмас бузуқ кўзини. “Мен Зорро” – ғовурдан қулоқлар битар, “Мен Зорро” – чийиллар қўрқоқ ҳам ҳатто. “Мм-ен ҳҳам Зоорро!” дея ғўдранар кимдир... Демак, соқовдан ҳам чиқибди садо. Оломон шовқини етар фалакка – Ҳеч кимнинг ҳеч кимдан кўнгли тўлмайди. Эскирган ниқобин уриб чўнтакка, Зорро жим кузатар, биров билмайди. Гулноз Мўминова

Бухорои шарифга ...ва барча бухороликларга бағишлайман. Не бахт келди, сени топдим азизим, Жоним дедим, жонимга кирдинг оро. Фармон бердим, бор оламлар тингласин: Дунёнинг тўрт томони ҳам Бухоро. Минорлардек қадди баланд азизим, Минорлардан ҳадди баланд азизим, Осмон қадар қадри баланд азизим, Бил, руҳимнинг осмони ҳам Бухоро. Борсам фақат...Зиёратга борарман, Таваллога, ибодатга борарман, Бир ҳузурга, ҳаловатга борарман, Дардларимнинг дармони ҳам Бухоро. Сабоқ берди ишқ дарсидан Етти пир, Ишқдан келар балони еб кетди пир, Нафсдан қочиб... Худойимга етди пир, Ки, руҳларнинг равони ҳам Бухоро. Самарқанддан боқсам бир ранг кўринар, Бир инжа ишқ ва гўзал жанг кўринар, Қайга боқсам, сенинг чеҳранг кўринар, Кўзларимнинг ҳайрони ҳам Бухоро. Тўрт томонинг қибла, дединг кетдим мен, 18 минг олам кезиб ўтдим мен, Бухородан Бухорога етдим мен, Оламларнинг айвони ҳам Бухоро! Дунёнинг тўрт томони ҳам Бухоро! 26.03.21й @Guljamol_Asqarova

*** Bir yashin tilar ko'ngil Yoqsin va Ortidan yomg'ir yog'ib Qorishtirsin sevgim kulini qumga Bir shamol istayman qo'shig'ini tinglagach Unutayin xotiralarni Yulduzlarga bog'lasin meni Yoki bir tuman bo'lsin quyuq Chiqib uning yelkalariga Quchoqlayin qattiq Eltsin meni Ko'hi Qofga Parilarla suhbat etayin Jinlar bilan o't yoqib Ko'rayin zumrad toshlarning jilvasini Ko'z tashlay u yerdan bir sirti tog'larga suyanmish chorasiz dunyoga

MEMENTO* Дўстим Парвина Омонга Кўз ёш қилиб олинг. Юрак ювилсин. Кўзгуни артганда тиниқлашган каби ёруғ тортсин хотира. Бўшашманг ва ундан тортиб чиқаринг олти ёшли содда болани. У сизга ажабланиб қарар, термулар умидли кўзлари билан. Журъат топа олинг ўша лаҳзада ва унга пичирланг: “ҳали улғайишга шошма, болакай!” Мементо! О, мементо! Деразани очсангиз агар, тонгда қуёш, тунда юлдузлар боқар, боқар табиатнинг энг ёруғ қисми. Осмонда бир сиқим ёруғлик оқар. Нима эди унинг исми? Биласизми сиз? Ёнингизда эса болакай бу ғамгин алфозни тушунмай турар. Сиз унга кўрсатинг, мана, дераза ортида бўйсунмас ҳаёт югурар! Гулга қараб муҳаббатни эсланг, қушга қараб болаликни, кўзгуга боқиб эса ўзингизни! Ичаётган қаҳвангиз каби чайқалар ўткинчи ҳислар. Қани ул юракка ўрнашган излар? Кўрсатинг, болакай кўрсин. Шу чандиқлар унинг қалбига ҳам кўчар, У тайёр турсин. Хотиралар юкин ортган бу юрак у митти вужудда тинмай чопади. Болакайга қаранг – қандай беғубор, аммо у кўп йўқотар ва оз топади. Мементо. Ёқимли хотиралар томон боринг, Болакай ҳам кўрсин бу дамларни, ва шу лаҳзаларда кўпроқ яшасин. * Memento – эсла. 👉 @xurshidabdurashid

Қалбим менинг Бир сув париси Сени излаб қирғоққа чиққан Тупроқ шафқатини Сира раво кўрмас Оёқсизларга - Уларни аёвсиз Қўяр судратиб Тубанликка этар мубтало Қалбим Севги тубанлаштирган Илк сув париси Тун бағрида Хунук йилтирар Лой илашган тангачалари

*** ...га Сен Шаккокликдан Бир арқон Чийратиб олгансан Ҳар кун Бу арқонда Сакрамачоқ Ўйнайсан – Сакрайсан, Куласан, Сакрайсан, Куласан Қўлларинг Ёзилар дафъатан Тараққий этмаган Қанотлардай Гоҳ Бу арқон билан Ўжар сочларингни Қўясан боғлаб Қачондир Бу арқон бўйнингга мос Келишидан Қўрқаман жуда. 03.05.2021

⚡️ Хушхабар, азизлар! Жавлон Жовлиев "Қўрқма" романи учун Афғонистоннинг "Олтин қалам" - Golden Reed Prize мукофоти билан тақдирланди! 👉@xurshidabdurashid