آنه تیلیم | Ona tilim

بدخشان سفریده یازیلگن منظوم سلامنامه جوزجاندن بیز آلیب باردیک بدخشانگە سلام، معنویت خطه سیدن اهل عرفانگه سلام. قره آلتین تفراغیدن بیز چوقور اخلاص ایله، ساوغه لر قیلدیک گوزه ل ملک زرافشانگه سلام، ایرته لب بیشده شبرغان شهریدن ایتدیک سفر، ایتکوزیلیک دیب بوتونلە ی خلق تورانگە سلام. بلخ شهریگه کېلیب اویېردە قیلدیک ناشتا، هم ایتیب اخلاص بیرله شاهمردانگه سلام. تاشقورغان کېنتیدن اۇتدیک تاتیب انجیریدن، نان - قتیق ییدیک ، بېریب شهر سمنگانگه سلام. پلخمریگه یول آلدیک نیچه ساعت دن کیېن، توش چاغی تقدیم ایلب ینگی بغلانگە سلام. عصر وقتیدە یېتیب باردیک قطغن ملکیگه، یۇله دیک امام صاحب ‌ودشت آبدانگه سلام. کېچە سی قندوزدە تونلب تانگ چاغی تخار تامان، جونە دیک عرض ایتگە لی تخاروتالقانگە سلام. ناشتا قیلدیک بواېرتە تالقان نینگ شهریده، هم قیلیب تقدیم اویېردە تخارستانگە سلام. باشلە دیک یۇل چقیریلگن توی وتویخانە سری، اېتگە لی تقدیم ملک لعل ومرجانگه سلام. مخفی یۇرتیگە کیریش چاغی بیرینچی مرتە بیز، قۇل قاووشتیریب اداقیلدیک کفلکانگه سلام. آتی اۇزگرگن زمان جوری بیلن بو ملک نینگ، (کته توزکان )دیر بوگون بولگن کلفلکانگە سلام. کشم شهریگه ییتیشگنده (کته کان)دن اوتیب، اونده هم تقدیم ایتدیک هر بیر انسانگه سلام. فیض آباد کینتی عجایب فیضلی بیر کینت ایکن، ارزیگه‌ی یوز قتلە قیلسک خلق تورانگە سلام. قنچە لر منزل یېراق هم بولسه کونگیللر یاووق، بیزاوزاق یۇلدن کېتیردیک برچه یارانگە سلام. کېکسە لرگە حرمت اېتگە ی میز قوییب کوکرککە قول، هم ادب سېور ییگیتلر،فخر دورانگه سلام. میر غیاث الدین غیاثی روحیگه یۇللب دعا، همدە قیلدیک تربت میر یاربیک خانگه سلام. بیرطرف دریا سویی بیریانده یامغیر لذتی. دمبدم ایتگوم کېلر بو لطف رحمانگه سلام. فیض آبادشهریگه اینیقسه آرتیرگن چېرای، « بام دنیا »دېب اتلگن قصروایوانگە سلام. قدردانلیک ایله دیلرلطف و ‌احسان کورسه تیب، ارزیگه ی تقدیم ایتیش عزتلی میزبانگه سلام. چین کونگیلدن باغله گنمیز دوستلیک پیمانینی، قانع ایستر هرزمان بو اېزگوپیمانگه سلام. قانع، بدخشان شاه یولی ۱۴۰۵ ییل ، جوزا آیی ۱۳-سی. @onatilim892gmail