BySabirun

Дуое, ки имрузҳо бештари мо ба он ниёз дорем...

Ё Аллоҳ, дар ин охирин соатҳои рузи ҷумъа аз Ту мехоҳам, ки қалбамро танҳо барои Худат пок ва холис гардони. Ё Аллоҳ, муҳаббати Худатро маҳбубтарин ва бузургтарин муҳаббат дар қалбам қарор бидеҳ, муҳаббате, ки ҳеҷ кас ва ҳеҷ чиз ҷойи онро нагирад. Ё Парвардигор, агар муҳаббати касе ба қалбам ворид шуд, нагузор он муҳаббат маро аз Худат дур созад, нагузор қалбамро бишканад ва нагузор ҷойи муҳаббати Худатро бигирад. Ҳар муҳаббатеро, ки миёни ман ва Худат парда мегардад, аз қалбам берун кун, ва ҳар муҳаббатеро, ки маро ба Худат наздиктар месозад, бароям муборак гардон. Ё Аллоҳ, қалбамро ба ҳеҷ бандае чунон вобаста магардон, ки набуданаш маро аз пой дарорад, рафтанаш маро аз Худат дур кунад ё муҳаббаташ бар муҳаббати Худат ғолиб гардад. Ё Гардонандаи қалбҳо, қалбамро ба Худат вобаста гардон. Нагузор касе дар қалбам ҷойгоҳеро бигирад, ки танҳо сазовори Худат аст. Нагузор ба хотири муҳаббати махлуқ, муҳаббати Холиқамро фаромкш кунам. Ё Парвардигор, агар ҳамаи мардум аз ман дур шуданд, Худат маро ба ҳоли худ вомагузор. Агар қалбам шикаст, онро бо наздикии Худат шифо деҳ. Агар касе рафт, нагузор ҳамроҳи рафтани у оромиш, имон ва вобастагии ман ба Худат низ аз байн биравад. Ё Аллоҳ, ман қалберо мехоҳам, ки Худатро аз ҳар кас бештар дуст дошта бошад, қалберо, ки бо зикри Худат ором гирад, бо тоати Худат зинда бошад ва ҷуз дар баробари Худат ба бандаги сар хам накунад. اللَّهُمَّ إِنِّي أَسْأَلُكَ حُبَّكَ، وَحُبَّ مَنْ يُحِبُّكَ، وَحُبَّ عَمَلٍ يُقَرِّبُنِي إِلَى حُبِّكَ. Ё Аллоҳи Субҳонаҳу ва Таъала, муҳаббати Худатро бароям аз худи ман, аз хоҳишҳоям ва аз ҳамаи касоне, ки дусташон медорам, маҳбубтар гардон. Амин, Ё Раббал Ъаламин!