Марий Эл (газета на марийском языке)

Таче Курыкмарий районышто XVI Марий самырык тукым слёт почылтын.

14-21 июльышто Йошкар-Олаште пӧръеҥ ден ӱдырамаш-влакын командышт коклаште лапта дене Российын кубокшо эрта. Торжественно почмаште спортсмен ден нунын наставникыштлан сеҥымашым Республикысе марий тӱвыра рӱдерын директоржо Василий Петров тыланен. Таҥасымашлаште Россий Федерацийысе субъектла (Тюмень, Томск, Москва, Тула, Волгоград, Челябинск, Рязань, Воронеж, Ульяновск, Белгород, Курск, Омск областьла, тыгак Башкортостан, Татарстан, Удмурт республикла, Санкт-Петербург ола да Краснояр кундем) гыч сборный команде-влак вийыштым тергат. Г.Кожевникова Фотом Республикысе марий тӱвыра рӱдерын сайтше гыч налме

25-27 июльышто Татарстан Республикыште Кукмор районысо Сэҥерын «Ший памаш» базыштыже Марий самырык-влакын «Йӱла-влакым арале» республик кӱкшытан слётышт лиеш. Тудын программыже оҥай да пайдале. Участник-влакым грантлан тӱрлӧ проектым ямдылаш, марла публикацийым возаш туныкташ, социальный сеть дене кылдалтше шинчымашым пуаш, марий йылмым да тӱвырам арален вияҥдыме опыт дене палдараш тӱҥалыт. Тыгак нуным интеллектуал да марий модыш, национальный кочкышым ямдылыме мастер-класс-влак вучат. Слётым Татарстан Республикысе марий-влакын калыкле тӱвыра автономийже, регионысо Калык-влакын молодёжь ассамблейышт да «Ший эҥер» тӱвыра рӱдер эртарат. Г.Кожевникова

Марий Элыште «Йошкар-Оласе 1-ше №-ан школ» тӱвыра поянлыклан шотлалтше объектым арален кодымо шотышто паша ышталтеш. Кугыжаныш тунемме тӧнежын оралтыжым шотыш кондымо дене кылдалтше йодышым эртыше кечылаште республик правительствын заседанийыштыже каҥашеныт. Рӱдолан Советский уремыштыже верланыше школын оралтыжым 1903 ийыште чоҥымо, тудын конструкцийжын посна ужашыже-влакым ик гана веле огыл аварийныйлан шотлымо да олмыктымо. Тений февральыште школын ик кабинетшын пырдыжшын да тыгак икымше пачашыже ик ужашыште конструкцийын йӧршеш пытымымым палемденыт. Марий Элым вуйлатыше Юрий Зайцев научно-проектный документацийым ямдылаш, аварий лӱдыкшӧ ваштареш ик эн кӱлешан олмыктымо пашам ышташ кӱштен. Тудо палемден: тӱвыра объектлам арален кодымо кугу окса роскотым да проектым ыштыме пашалан кугу тӱткышым ойыраш йодеш. Марий Эл Республик вуйлатышын пресс-службыжын уверже негызеш Г.Кожевникова ямдылен

Лӱмгече Пашашт дене чапланат Марий Турек посёлкышто районым ыштымылан 100 ий темме лӱмгечым палемденыт. Марий Турек район – Марий Эл Республикын ик эн сылне, ӧрыктарыше вершӧран кундемже. Тыште руш, марий, татар, удмурт-влак келшен, ваш умылен да полшен илат. Тений нуно районыштым ыштымылан шӱдӧ ий теммым палемдат. Россий Федерацийын сенаторжо, Федераций Советын обороно да безопасность комитет председательын икымше алмаштышыже С.Мартынов, Марий Эл Республик правительстве председательын икымше алмаштышыже М.Васютин, Марий Эл Республикын образований да науко министрже Л.Ревуцкая ял шотан илем-влакын погымо, чумырымо кумдыкыштым, сурт-печыштым онченыт. Нуно марий, удмурт да татар тӱвыра дене палыме лийыныт, тӱрлӧ кочкышым тамлен онченыт. В.Смоленцев Снимкыште: кинде-шинчал дене вашлиймаш. Марий Турек район администрацийын фотожо

Саламлена Марий Эл вуйлатыше Юрий Зайцев 2024 ий 12 июльышто икмыняр еҥлан "Марий Эл тӱвыран сулло пашаеҥже" чап лӱмым пуымо нерген указыш кидпалыжым пыштен. Нунын коклаште Марий Элысе Мер-политик рӱдерын 1-ше разрядан специалистше Галина Алексеевна Ласточкина (Марий юмыйӱла ушемын кагаз пашажым вӱдышӧ), И.С.Палантай лӱмеш республикысе тӱвыра да сымыктыш колледжын национальный сымыктыш гимназийжын преподавательже Лилия Александровна Семенова, Звениговысо калык усталык пӧртын специалистше Ирина Витальевна Чугунова да молат.

Звенигово район Красногорский посёлкысо 2-шо №-ан школын 6-шо классышкыже вончышо Елизавета Запевалова сайын тунеммыже да мер илышыште чолга улмыж дене веле огыл ойыртемалтеш. Тиде ӱдыр ынде кокымшо ий ротанг дене тӱрлӧ арверым пидын ужала, тений кеҥеж каникул жапыште пӧръеҥ ӱпым тӱредме курсым тунем пытарен да кызыт парикмахерын опытшым пога, ончыкыжым бизнесым почаш шона. Кожмак ӱдыр иктаҥашыже-влаклан веле огыл, южо кугыеҥланат пример.

Тойымо верлам муыныт Марий Эл гыч археолог-влак марий-влакым тойымо ожнысо верым муыныт. Тений Чувашийысе Моргауш районышто верланыше Чебоксар водохранилище кумдыкысо отрошто раскопкым эртарыме годым МарНИИЯЛИ-н отрядше XI–XII курымласе шым шӱгарым верештын. Л.Камалетдинова Фотом интернетысе соцкыл лаштык гыч налме https://газетамарийэл.рф/tojymo-verlam-muynyt/

Кундемлам тӱзатат Марий Элыште эше ик у турист объект чоҥалтеш – тиде Кужэҥер районышто Немда эҥерын тӱҥалтышыштыже купель. Кызыт тушто, Изи Чарнур ял воктене, памаш кумдыкым тӱзатат. Але марте купельыш да пуч-влак мучашке бетоным шарыме, беседкым, туалетым, подсобный пӧлемым ыштыме. Кодшо кечылаште пурам конденыт да тудым купель ӱмбаке вераҥдат. Шернур район Тиман ял воктенат Казанский Шочынаван Юмоҥаже лӱмеш шнуй купельым чоҥат. Кок арня утларак ончыч тудын негызшым святитленыт. Кызыт тушто паша чулымын шукталтеш. Кӧн кумылжо уло гын, окса полышым пуэн кертеш. Л.Камалетдинова Фотом интернетысе соцкыл лаштыкла гыч налме https://газетамарийэл.рф/kundemlam-tӱzatat/

13 июльышто Волжский районысо Приволжский посёлкын кечыже эртен. Тыгак Зеленый Дол – Краснококшайск кӱртньыгорным ыштымылан 100 ий темме лӱмеш пыштыме Шарнымаш-Чапкӱм торжественно почыныт. Пайремыш погынышо калыкым посёлкылан 44 ий темме дене Марий Эл Кугыжаныш погын вуйлатышын алмаштышыже Лариса Яковлева, Марий Элын пӱртӱс поянлык, экологий да йырым-йырысе средам аралыше министр Алексей Киселев, Волжский муниципальный район вуйлатыше Владимир Сергеев саламленыт, палдара Волжский район администраций. https://vk.com/gazeta_mari_el?w=wall-22456269_27478%2Fall