مش هتفرق ™

تمر الايام والسنين ويتغير كل شئ بأنفسنا ونظرتنا لهذه الحياة يوما بعد يوم، ننظر للحياة بنظرة تسليم لا يأس ونعرف ان مقدارها ضئيل ونحن من نعظمها بداخلنا، نتجبر ونغتر ولكن من علم ذروتها لن يأتيها ادنى اهتمام، هذه الدنيا بكل ما فيها سراب يزينها فى اعيننا ومن يعلم حجمها مبكرا قد انقذ نفسه من الضلال والفتنه، الطريق الوحيد الاوحد فى هذه الحياه هو طريق الله عز وجل ومن سلك هذا الطريق نجا فى دنياه وفى آخراه نرجو من الله ان يغفرلنا لنا ذنوبنا ما تقدم منها وما تأخر ما علمنا منها وما لم نعلم ✍️غَادَة

فيه حاجات حلّها الصبر ، وملهاش حل تاني غير إنك تصبر! الله يهوِّن، ويرزقنا الصبر على ما لم نحط به خبرًا .

- دونيا

أنا مؤمن إن أجمل مرحلة في حياة الإنسان هي لما يبطل يجري ورا الناس، ويبدأ يركز في نفسه وحياته.تلاقيه مشغول بشغله، بأهله، وبمستقبله... تليفونه مش بيرن غير لشغل أو حد قريب منه، ومش عنده وقت للدراما ولا الكلام الفاضي. بيحب بيته وراحته أكتر من الزحمة، ومش عايش على اللي حصل زمان، ولا واقف عند ناس مشيت... كل تركيزه إنه يبني نفسه ويحقق أهدافه ويبقى نسخة أحسن من نفسه كل يوم.الهدوء، وراحة البال، والبعد عن الدوشه دي مش حياة مملة، دي نعمة. واللي وصل للمرحلة دي عارف قيمتها كويس.

⁠بحس أن من كُتر الصدمات اللي الإنسان أتعرضلها بقيٰ حاسس دايمًا أنه عايز يمشي ، وأن المكان ده مش مكانه؛ وحقيقي يعني " مي زيادة " مكدبتش لما قالت : لا يستمر معي أي شيء طويلًا ، كنت أرحل عن كل شيء ، عما أحب ، عما أكره ، عما أريد ، وعما لا أريد ، قضيت عُمري كُله وأنا أشعر دائمًا بأن عليّ أن أغادر .

.

تُصبح الدنيا موحشة حين يريد القلب الصلاح، حين يبحث عن النقاء في زمنٍ كثرت فيه المصالح، وعن الصدق في عالمٍ اختلطت فيه النوايا، وعن الحُب الذي لا تحكمه الشهوة، وعن العلاقات التي تُبنى على المودة لا على المنفعة. لكنني أؤمن أن الخير لم ينتهِ، وأن القلوب الطيبة ما زالت موجودة، وأن من أراد الله به خيرًا، حفظ قلبه من أن يشبه كل ما حوله. فلا بأس أن أشعر بالغربة قليلًا، ما دمت أختار أن أبقى كما أُحب أن ألقى الله. 🤍

- ازاي نروح للحاجة الي وحشانا من غير منضايق منها؟

من أكبر صور القوة إنك تكون قادر ترد، وعارف كويس ترد إزاي، لكن تختار تشتري راحة بالك، لأن بعض المواقف لا تستحق منك حتى ردًا. 🤍

أتمني أن تأخدنا الدنيا جميعاً إلي الأماكن التي نُحب، بطريقةٍ تليق بهذا العمر من الإنتظار، أن تنتهي خطواتنا بنهايات تستحق، نستريح فيها للأبد من السير، وألّا يتعثر أحدٌ إلا في المسرّات، وأن يكون ما مضي من الحُزن كافٍ لئلا يعاد ثانية

- الانسان زهق

عارفين شعور انك بتقاوم وتقاوم وتقاوم وتقاوم وتقاوم وتقاوم وتقاوم كمان

كُل مرة بصادف إنسان ربنا أكرمه و أبدل حياته من العُسر إللي اليُسر .. بنبسط له كإنه أنا. و بالرغم من إن الدور لسه مجاش عليا الإ إني بلاقي نفسي تلقائيًا بدعيله ربنا يبارك له فـ رزقه و نصيبه إللي ربنا عوضه بيه لأني عارفه قد إيه الوصول للحظة ديه مش بالساهل':)) - فا ياربّ اللهُم إجعلنا منهم! أنا و أهلي و كُل حبايبي. ♥️

العشرينات بإختصار: ‏اهلك عاوزينك تتجوز ‏صحابك فاكرينك شوفت نفسك ‏جسمك محتاج ينام بليل ‏حلمك محتاح سعي ومفيش شغف خالص ‏نفسيتك محتاجه سفر ومفيش فلوس ‏موقعك الجغرافي مضيع عليك فرص حياتك

لا تتعلّق بالماضي 🤍 متتعلقش بالماضي، مهما كان فيه من ذكريات، أشخاص، مواقف، أو حتى أخطاء بتتمنى لو كنت اتصرفت فيها بشكل مختلف. اللي فات انتهى، ومهما فضلت ترجع له في تفكيرك، مش هتقدر تغيّر فيه حاجة. لكن تقدر تغيّر نظرتك ليه، وتقدر تختار إنك متخليش حاجة انتهت تفضل عايشة جواك وتاخد من عمرك وحاضرك ومستقبلك. متقفش كتير عند الأشخاص اللي مشيوا، ولا عند اللي خذلوك، ولا عند العلاقات اللي انتهت، ولا عند الفرص اللي ضاعت. مش كل حاجة راحت كانت خسارة، ومش كل شخص خرج من حياتك كان المفروض يكمل فيها. أحيانًا ربنا بيبعد عننا حاجات كنا متعلقين بيها جدًا، لأن وجودها مكانش خير لينا، حتى لو إحنا وقتها مش قادرين نفهم ده. ومتفضلش تعاقب نفسك على أخطاء قديمة. أنت وقتها كنت بتتصرف بالوعي اللي كان عندك، والخبرة اللي كانت عندك، والظروف اللي كنت بتمر بيها. دلوقتي أنت اتغيرت، واتعلمت، وبقيت تعرف حاجات مكنتش تعرفها زمان. سامح نفسك. سامح نفسك على قراراتك القديمة، وعلى الوقت اللي ضاع، وعلى الأشخاص اللي وثقت فيهم، وعلى المرات اللي سمحت فيها لحد يقلل منك، وعلى كل مرة اخترت فيها نفسك متأخر. مش معنى إنك ندمان إنك تفضل عايش في الندم. اتعلم… واتوب… واصلح… وكمل. ومتقارنش حياتك الحالية بالماضي، ولا تفضل تسأل: "يا ترى لو كنت عملت كذا كان حصل إيه؟" لأنك ببساطة مش هتعرف. والحياة مش بتتصلح بـ "لو". الحياة بتتصلح بـ دلوقتي. دلوقتي تقدر تبدأ من جديد. دلوقتي تقدر تقرب من ربنا. دلوقتي تقدر تهتم بصحتك. دلوقتي تقدر تصلح نفسك. دلوقتي تقدر تتعلم. دلوقتي تقدر تحط حدود. دلوقتي تقدر تختار السلام بدل التعلق، والرضا بدل الندم. وخلي قلبك متعلق بربنا، مش بالماضي. لأن لما علاقتك بربنا تقوى، حاجات كتير كنت فاكر إنك مستحيل تتخطاها بتبدأ تصغر في عينك. مش لأن اللي حصل مكنش مؤلم، ولكن لأن قلبك أخيرًا لقى مكان يحس فيه بالأمان. مش لازم تنسى كل حاجة حصلت لك، يكفي إنها متبقاش قادرة تتحكم فيك. هي كانت جزءًا من قصتك، لكنها مش كل قصتك. أنت مش أخطاءك القديمة، ولا علاقاتك السابقة، ولا أسوأ فترة عشتها، ولا كلام الناس عنك. أنت إنسان لسه عنده فرصة يبدأ من جديد. فبلاش تفضل واقف عند باب اتقفل، وربنا فاتح لك أبواب تانية. ارفع عينيك لقدام، وخلي عندك يقين إن القادم ممكن يكون أجمل بكتير من اللي فات. سيب الماضي مكانه… وخد منه الدرس، مش الوجع. وارحم نفسك، وابدأ من جديد، وامشِ ناحية الحياة اللي نفسك فيها بقلب أهدى، ونفس أطمن، وثقة أكبر في ربنا. يمكن أجمل أيامك لسه مجتش. يمكن الشخص اللي هتبقى عليه بعد كام سنة هيكون فخور جدًا إنك قررت تكمل النهارده. فمتتعلقش بالماضي… ربنا لسه كاتب لك أيام، وأبواب، وأرزاق، وأقدار جميلة لم ترها عيناك بعد. 🤍 gh

انا وحشتنى الناس اللى كانت ف التشانل دى زمان واختفو💀

-فيه ناس وحشانا بس مينفعش نكلمهم.

☁🤍