ادبیات سئونلر

اوشاق ادبیاتی یئدی یاشیندا مییانا شهریندن https://t.me/Adabiyyatsevanlar

قوش لا بالینا چئویرمه: منیژه جم‌نژاد بیرگون واریدی، بیرگون یوخودو. بیر زمانلار، بیر قوشلا بیر بالینا وار ایدی. بَی قوش خانیم بالینانی چوخ سئویردی. و خانیم بالینا دا بَی قوشو چوخ سئویردی. بَی قوش خانیم بالینانین گؤزل گولوشونو سئویردی. دنیزده گؤزلجه اوزمه سینی سئویردی. خانیم بالینا بَی قوشون گوزل آغ قانادلارینی سئویردی. گؤیده اوچوشونا باخماغی  سئویردی. ایکی‌سی‌ ده چوخلو بالاجا بالیق یئمه‌یی سئویردیلر. یای گونلرینده، بَی قوش لا خانیم بالینا بوغازا گؤروشمه‌یه گلردیلر. دانیشاردیلار، دانیشاردیلار. آی‌دان، سویون ائنیش قالخیشیندان،  دنیزده‌کی گمی‌لردن صحبت ائدردیلر. بَی قوش لطیفه‌لر دئییب خانیم بالینانی گولدوروردو. خانیم بالینا ائله گؤزل ماهنی‌لار اوخوردو کی، بَی قوشون گؤزلریندن یاش آخیردی. "بیر گون منیم عایله می دنیزده گؤره‌بیلرسن" - دئدی خانیم بالینا. "سن ده منیم قایا‌لارداکی دوستلاریمی گؤره‌بیلرسن" - دئدی بَی قوش. هر شئی موکممل ایدی. آما دونیا، بیر قوشلا بیر بالینانین عاشیق اولماسینا گؤره دورماز. یای قورتولوب پاییز گلدی، پاییزدا قیشا چوندو. دنیز سویوقلاشدی و بالینالار ایستی سو‌لارا دوغرو گئتدیلر. "منیم‌له ایستی سو‌لارا گل!" - دئدی خانیم بالینا. "اورا جلال لی بیر یئردیر. هر زمان ایستی دیر، چوخلو بالیق وار." "بالیق یئمه‌یی چوخ سئویرم!" - دئدی بَی‌قوش. " سنین‌له اولماغی دا چوخ سئویرم. هر یئره سنین آردیندان گله‌جم. آمما اؤنجه منه بالینا اولماغی اؤیرَت!" "بئله!" - دئدی خانیم بالینا، "آردیمجا گل!" چوخ درین دنیزلره دالدی. "یاخشی!" - دئیه-دئیه بَی قوش دا درین دنیزه دالدی. او داها دا درینه دالدی. "او٘زورم!" - دئیرکَن گولدو. "من بالینایام!" آمما چوخ کئچمه‌دن نفس آلانمادی. سویون اوزونه چیخیب نَفَس نَفَسه دوشدو. تکرار دالماق ایسته‌دی، آمما هر دفعه نفس‌سیز قالدی. "دئیه‌سن، بیرقوش بالینا اولابیلمز" - دئدی بَی قوش. "ائله ده سن منیم‌له گل. من قایا‌لار اوسته یاشاییرام. اورا جلال‌لی بیر یئردیر. ایستی،  راحات‌دیر، هر صاباح گون‌دوغومونو گؤزله‌یه بیلرسن." "گون‌ دوغومونو چوخ سئویرم" - دئدی خانیم بالینا. "سنی ده چوخ سئویرم. هر یئره سنین آردیندان گله‌جم. آمما اؤنجه منه قوش اولماغی اؤیرَت!" "بئله!" - دئیه-دئیه بَی قوش قاناد چالیب، گؤیه قالخدی. "یاخشی!" - دئیه‌رک خانیم بالینا گؤزلرینی یوموب بَی قوشون ائله‌دییی کیمی یوزگه‌لرینی چالدی. چوخ-چوخ چالدی، یوخاری آشاغی. آما آنجاق سویو چیله دی. "اوچورام!" - دئیه‌رَک گولدو. "من بیر قوشام!" آما گوزلرینی آچینجا، گویده اوچموردو. هله ده سو دا ایدی. گئنه نئچه یول اللشدی، آما اوچا بیلمه دی. "دئیه سَن، بیر بالینا قوش اولابیلمز" - دئدی خانیم بالینا. "سن اوچا بیلمیرسن، من ده درینلره دالا بیلمیرم. بیز هارادا بیرلیکده یاشایا بیلریک؟" - دئدی بَی قوش. "بورادا قالاق — دالغالارین ایچین‌ده!" - دئدی خانیم بالینا. آمما بَی قوش اوزگون باشینی آشاغی سالدی. "سن دنیزین درینینده اوزمه‌یی چوخ سئویرسن" - دئدی. "بو سنین ان چوخ ایسته‌دییین شئی‌دیر. بورادا هئچ زمان خوشبخت اولمایاجاقسان." "سن ده گویده اوچماغی چوخ سئویرسن" - دئدی خانیم بالینا. "بو دا سنین ان چوخ ایسته دییین شئی‌دیر. بورادا سن ده هیچ وقت خوشبخت اولمایاجاقسان." بئله‌لیکله، بَی قوش‌لا خانیم بالینا بیر-بیری‌نی چوخ سئویردیکلری ایچین، آیریلدیلار. آمما هیچ وقت بیر-بیری‌نی اونوتمادیلار. هر دفعه خانیم بالینا گویده بیر قوش گؤردوکده، بَی قوشونو یادا سالدی. اونون گؤیده خوشبخت اولدوغونو امید ائدیردی. ائله بئله. هر دفعه بَی قوش دنیزه دالان بیر بالینا گؤردوکده، خانیم بالیناسینی یادا سالیردی. اونون دنیزده خوشبخت اولدوغونو امید ائدیردی. ائله بئله. https://t.me/Adabiyyatsevanlar

اوشاق ادبیاتی اوشاق ادبیاتی هر هفته پنجشنبه گونو ادبیات سئونلر کانالیندا . اوشاق ادبیاتینا دایر یازیلارینیزی بیزه گوندرین . https://t.me/Adabiyyatsevanlar

✅✅✅سایین کانالداشلار چرشنبه گونلری ادبیات سئونلر قروپوندا یالنیز نثر یازیلارین پایلاشیریق . https://t.me/Adabiyyatsevanlar

هوش و هوش مصنوعی "سخنران "احمد جواهریان"

یوخاریدا کیشی دایانمیشدی. آشاغی‌دا، او سویوغون ایچینده سئودییی قادینین روحو... عینی شئیلری ایسته‌ییردیلر آمما مومکونسوز اولانی‌‌‌... اصلینده یاشادیغلاری واختلار یانلاریندا، اللری‌نین آلتیندا اولان، آمما یاشایا بیلمه‌دیک‌لرینین حسرتینی چکیردیلر..‌. ایندی اللری‌نین آلتیندا هئچ نه یوخدور.‌‌ بیر گون یئنه پنجره‌یه گلدی. کیشی یوخ ایدی، پنجره‌دن باخیب اونو آختارمیردی. گؤزله‌دی، کیمسه اونو گؤرموردو، گؤرمزدی ده..‌. ماشین سسی ائشیدیلدی، باخدی کیشی دوشدو، بیر قادینلا یوخاری قالخدی. یئنه گؤزله‌دی. بللی اولانلارا اینانماق ایستمه‌دی. پنجره‌ده کی ایشیق یاندی، کیشی گؤزه دَیمیردی، آمما گؤزله‌ییردی..‌. خیلی ده گؤزله‌دی..‌. بللی اولانا اینانماق لازیم ایدی... داها پنجره‌دن باخیب، گئجه‌نین قارانلیغیندا اونو آختاران یوخدور.‌‌.. او بو گون اؤلدو‌. داها کیمسه‌نین کدرینده، داریخمالاریندا، گؤزلرینده، نیسگیلینده، گئجه‌لرین قارانلیغیندا پنجره‌دن باخان باخیشلاریندا یوخدور..‌. اونو، دونیاسینی دییشمک یوخ، اونودولماق اؤلدوردو... اؤز مزارینی ایلک دفعه زیارت ائتدی، یئنی ائوینی قبوللاندی و کوسدویو بو دونیانی همیشه‌لیک ترک ائتدی. سون. https://t.me/Adabiyyatsevanlar

‌ اونودولماق(قیسا حیکایه) ✍یازان: زومرود یاغمور کوچورن: سحرخیاوی بو گون قالخا بیلمه‌دی، ائله‌جه یوخوسوندا اؤلدو، نه ائتدیلرسه، باشی‌نین اوستونده‌کی‌لر نه قدر قیشقیرسالار دا اویانمادی، روحو عیناد ائتدی، بدنه قاییتمادی، سان کی یورغون دوشموشدو. الینه دوشَن فورصتدن استفاده ائتدی، اوچدو گئتدی، بیر ده گئری قاییتماق ایستمه‌دی. بدنی اورتادا قالدی، کیم نه قدر آغلاماغیندان آسیلی اولمایاراق بدن اشیاء کیمی یاتاقدان اورتالیغا ائندیریلدی. اونو دفن ائده‌نه قدر چوخ یئره قویوب گؤتوردولر. بدنی تورپاغا تاپشیردیلار، او گئتدی، قالانلارین درددن آز قالیردی اوره‌یی پارتلاسین. آمما کیمسه‌نین اوره‌یی پارتلامادی. درد کیمسه‌نی بیردن اؤلدورمور، ایچیندن یئییر. بو دفعه ده ایچیندن یئییب، بیتیره‌جک‌لرینی سئچیب، سئچدیک‌لرینین اوره‌یینده اوتوردو. روحون‌سا بو اولانلارا نه عاییدیاتی وار  ایدی، نه ده بیر قاییدیشی، دونیانین بو واختیندا، بو قدر گوناهلارین ایچینده، ساخلایا بیلمیشدی اؤزونو‌، نه کیمسه‌نین قلبینی قیرمیشدی، نه ده کیمسه‌نین چؤره‌یینی الیندن آلمیشدی. ان باشلیجاسی سا کیمسه‌یه پیسلیک ائتمه‌میشدی... دونیانین قارالمیش اوزونه داها دا بیر لکه سورتمه‌میشدی... اونا گؤره ده آغ دونیاسیندا سوزوردو... اینسان اولماق بو ایدی، بیر گون گلیر هامی، ان آزیندان آتا- آناسی اونو گؤزله‌ییر، سونرا دا کیمسه‌نین گؤزلَمه‌دییی بیر واخت‌دا گلدییی کیمی ده گئدیر. گلیش- گئدیش آراسینداکی مسافه‌ده نه‌لر اولورسا او گلیب گئدنله ده بیتیر. بعضن حتا توکه‌نیر، سنین یوخلوق کدرین سندن سونرا چوخ آز موددتده موجود اولور، دوغمالارین بیر- بیر گئدیش یولونو توتدوقجا سنین یوخلوغون دا او قدر گرچکله‌شیر... و نهایت بیر گون سن تمامن بیتیرسن، کیمسه‌نین یادداشی، کدری، داریخماسی، خاطیره‌لرینده قالمیرسان... سنین یاشادانلار، سنین موجود اولدوقلارین دا موجود اولمور... بونا دا حیاتین قانونو دئییرلر. بئله‌جه هر شئی عوضلنمه‌لر و بیتمه‌لر اوزریندن یورودولور... بو گون ده او چکیلیب گئتمیشدی، آرخاسیندا دا اونو خاطیرلایاجاق، کدرینه، دردینه، نیسگیلینه، داریخمالارینا کؤچوره‌جک بیریسینی بوراخمیشدی... سئودییی کیشی...والسلام... تکجه اونون اوچون موجود ایدی..‌. باشقا کیمسه مزاریندا گیزله‌دیلندن سونرا نیسگیل‌له اونو آختارمامیشدی، کیمسه ده کیچیک بیر اوتاغین پنجره‌سیندن باییردا یاغان یاغیشا باخا- باخا اونو آختارمامیشدی. کیمسه اللری قوینوندا گئجه‌لرین قارانلیغیندا اونو خاطیرلامامیشدی، کیمسه اونون قوخوسونو هله ده ساخلایان گئییم‌لری بورنونا توتوب هؤنکور- هؤنکور آغلامامیشدی. بیر او کیشی‌دن باشقا..‌. کیشی‌نین وارلیغی اونون توکنمه‌مه‌سی ایدی و بو اونو ممنون ائدیردی‌. اؤلوموندن سونرا کیمین‌سه اونون گئجه‌نین قارانلیغیندا آختارماسینی حیس ائدیردی. او کیچیک پنجره‌نین قارشیسینا گلیردی، اونو آختاران کیشی‌نی سئیر ائدیردی، کیشی اونو یوخ، او کیشی‌یه تاماشا ائدیب بعضن کدرله، بعضن ده سئوینجله اورادان اوزاقلاشیردی. کیشی‌نی سئویردی، اونون اوچون داریخاجاغینی دا بیلیردی، آمما بونون بو قدر نیسگیللی، کدرلی، بعضن ده مست ائدیجی اولاجاغینی بیلمیردی. او حیاتین دونیا دئییلن مکانیندا بو کیشی‌دن باشقا کیمسه‌نی قلبینده اؤزو ایله آپارمامیشدی. کیشی‌نین بونو بیلدییی‌نین فرقینده ایدی و اونو دا بیلیردی کی، کیشی محض بونو بیلدییی اوچون گئجه‌نین قارانلیغیندا اونو آختاریر... بو سئوگی ایدی... بو اونا ایندی داها چوخ بللی ایدی..‌ بیر ده پشیمان ایدی، بو سئوگینی داها باشقا یاشایا بیلردی. او کیشی‌نین اللرینی هئچ بوراخمادان، گؤزلرینی گؤزلریندن آییرمادان.‌‌.. آمما نه ائتمک اولاردی، او بیر اینسان ایدی و اینسانلار اؤلوم‌له یاشامادیقلاری اوچون بونون دا فرقینده اولمورلار... هر شئی بیتندن سونرا آنلادیقلاری ایسه آرتیق اونون کی دئییلدی، اونا توخونماق، یانیندا اولماق، اللرینی، ایستی‌سینی دویماق، بوینوندا گزن هنیرتینی حیس ائتمک... بونلار بیر اینسانین یاشادیغی، آمما دگرینی بیلمه‌دییی خوشبختلیک‌لر ایدی. او، دگرینی ایندی آنلامیشدی، آمما آنلادیقلارینی یاشایا بیلمیردی... اینسان اولماقدا نه قدر خوشبختلیک‌لر واریمیش... بونو ایندی آنلادی، ائله ایندیجه، سویوق گئجه‌نین آیازیندا، کیشی‌نین قارانلیغا تیکیلمیش باخیشلارینی ایزله‌ینده. اوشوین کیشی‌نی ایسی‌ده، اُوودا بیلمیه‌جه‌یینی، آغوشوندا عزیزله‌یه بیلمیه‌جه‌یینی آنلایاندا بیلدی... کیشی باخیشلارینی قارانلیغا تیکمیشدی، اورادا سئودییینی آختاریردی، اوشویوردو، آمما یاتماق، ایسینمک ایسته‌میردی. سئودیینین اونو اوودوب ایسیتمه‌سینی، آغوشونا آلماسینی ایسته‌ییردی، آمما بونلار اولا بیلمزدی. بونو آنلاییردی، آمما عینادلا دا پنجره‌ده سئودیینی آختاریردی...

خبر ادبیات سئونلر عاییله‌سی‌نین تانینمیش اؤیه سی شاعیر ،یازیچی سحر خانیم خیاوی‌نین یئنی ترجومه سی ،" زنی شبیه باران "عنوانیندا "نشر روزگار "طرفیندن ایشیق اوزو گؤردو، بو اثرین مؤلفی زومرود خانیم یاغموردی بو رومان 262صحیفه دن عبارتدیر ، رومان قاراباغ محاریبه‌سینه عایید یازیلییب دیر. یازیچی‌نین اؤز ایسته‌یی اساسیندا فارسجایا چئویریلیب، بوتون ایراندا و فارس دیللی اؤلکه‌لرده اوخونسون. بو دیرلی اثری تهران کیتاب سرگیسیندن نشر روزگاردان الده ائده بیلرسینیز. ادبیات سئونلر ایستکلی قلم داشلاریمیز زمرودخانیما ائله جه ده سحر خانیم خیاوی‌یه یئنی قلم نائلیتی آرزو ائدره ک اوخوجوسو بول اولسون دئییر. ادبیات سئونلر 1404,2,23 زنی_شبیه_باران یازان : زومرود_یاغمور ترجمه : سحر_خیاوی ناشر:نشر_روزگار قیمت:320 تومن نمایشگاه_کتاب :مصلی - شبستان - راهرو 22 - غرفه 14 - نشر روزگار

مهتاب_میرقاسمی دست نگه دار! این پایان راه نیست هنوز جعد گیسوانم را نبافته‌ام و بر چشم‌های خمارم سرمه نکشیده‌ام از مگسک به مزرعه نگاه کن! و ببین کلاغ‌ها را که چگونه بر مترسکِ شانه‌ های من به صلح رسیده‌اند... https://t.me/Adabiyyatsevanlar

  پوئتیکا   شعرلرین یازیلماسی امکان‌سیزدیر آرتیق،  پوئزییا نفسی دگمه‌ین یئرلرده دولاشیر ایندی، گئرچکلیگین آیری آیری قطره‌‌لری شعره چئوریلیر داها.   گئرچکلیگین مایاسی کدردیر   یعنی اگر کدرلنیرم‌سه، دئملی وارام. وارلیغین یگانه تملی‌یمیش کدر...‌   کدر گؤزل‌لیگین ایلکین شرطیدیر گؤزللیک ایسه ابديّتین.     تاکاهاسی سینکیتی ۱۹۰۱-۱۹۸۷ آیتی پرئفئکتوراسیندا دوغولوب، تجارت تئکنیکومونداکی تحصیلینی یاریمچیق قویوب، توکیویا گله‌رک بورادا ژورنالیست کیمی فعالیّته باشلاییب. ۱۹۲۳-جو ایلده چاپ ائتدیردییی آبسورد مضمونلو «دادایست سینکیتی‌نین شعرلری»  توپلوسو سایه‌سینده ژاپون دادایست‌لری‌نین لیدئرینه چئوریلیب.   یارادیجیلیغی‌نین ان پارلاق دؤورو ۱۹۳۰-جو ایل‌لره تصادف ائدیر.  اونون یارادیجیلیغی محاربه‌‌یه قدرکی پوئزییادا موجود اولان آنارخیست مئییل‌لره و ۱۹۵۰-۶۰-جی ایل‌لرین مودئرنیست شاعرلرینه عینی درجه‌‌ده جدّی تأثیر گؤستریب.       بالیق‌قولاغی‌لار هئچ نه موجود دئییل‌سه، دئملی، اوندا نه یارانیش مومکوندور، نه ده اؤلوم. بالیق‌قولاغی‌لارین ایچی بوشدور. مولیوسکلارین(نرم‌تنان) قوخوموش بدنینی  دالغالار یودو آپاردی. ایندی آی ایشیغیندا یویونان بالیق‌قولاغی‌لار گونش‌ده قورودوقدان سونرا  قوملوق‌دا دویونجا اویویاجاقلار. بیر داها دنیزدن حامله قالمایاجاقلار. باشقا بیر اوماجاقلاری دا اولمایاجاق داها. دالغالار دورمادان قاباریر و گئری چکیلیرلر. بو اثنادا بوش بالیق‌قولاغی‌لارینی دا  ساحلدن آلاراق گئدیرلر...   https://t.me/Adabiyyatsevanlar

دونیا ادبیاتی یاپون مودئرنیست پوئزییاسیندان سئچمه‌لر چئویرن:آزاد یاشارین کوچورن:ویدا حشمتی حاضیرلایان:ادبیات سئونلر شاعر: توکی دزؤممارو (-1885)1980   ادبی تخلّوصو «آیکاد»یر  آتاسی راهیب ایمیش و عنعنه‌وی پوئزییا ژانری ساییلان رئنقادا یازدیغی شعرلری‌یله مشهورلاشیمیش. واسئدا اونیورسیتی‌نین اینگیلیس ادبيّاتی فاکولته‌سینده عالی تحصیل آلیب.  یارادیجیلیغی‌نین ان محصولدار مرحله‌‌سی ۱۹۱۰-جو ایل‌لره تصادف ائدیب، همین دؤورده یازدیغی شعرلرده وطنداشلیق پافوسو و سوسیال اعتراضلار باشیلجا یئر توتماقدادیر. سونراکی دؤورده، یعنی «آساهی» قزئت شیرکتینده مسئول وظیفه‌‌لر توتارکن، ت. دزؤممارو بیر سیرا ادبی-تاریخی آراشدیرمالار اوزه‌رینده چالیشماغا اوستونلوک وئریب و شاعرلیکدن تاماماً اوزاقلاشیب.        «آلاتوران چاغی» آدلی  شعر کیتابیندان   هئچ جور آنلایا بیلمیرم ده-   ایشله‌مک اوچون یاشاماق لازیمدیر. یوخسا کی، یاشاماق اوچون ایشله‌مک...   *** «ایشلمه‌سم کاسیب اولاجاغام» «آمّا ایشله‌سم بئله،  یئنه قورتولمایاجاغام یوخسوللوقدان». «هر نئجه اولسا ایشسیز-گوجسوز  دولاشان دئییلم من!»   *** «ژاپون»دا یاشاییب، فیکیرلرینی ژاپونجا، هم ده قورخوسوز-هورکوسوز دیله گتیرمک آرتیق تهلوکه‌‌لی ساییلمیر.   *** آیاقلارینی چارپاییدان ساللاماقلا چکلک‌لرینی آرادی و تاپمادیغی اوچون تکرار باشینی آتیب، یاتدی...     سوماکو فوکاو ۱۸۸۸-۱۹۷۴   بو تانینمیش شاعر و ناثر اؤزونو هم ده فرانسیز ادبيّاتی اینجی‌لری‌نین ژاپون دیلینه ماهر ترجمه‌چی‌سی کیمی تانیدیب.   گئرچک آدی اوگینو شیگئنودور. هؤگو پرئفئکتوراسیندا(بیر منطقه کی، نظارتچی‌لرین گؤزو آلتین ادیر) دوغولوب و اوشاق یاشلاریندان یئتیم‌لیک چکیب. کیوتودا قیزلار مکتبینی بیتیردیکدن سونرا آکیکو یؤسانودان اؤزل درسلر آلیب. ۱۹۱۲-جی ایلده عائله‌‌ قوردوغو شاعر و مهندیس توکینو فوکاو ۸ ایل سونرا وفات ائدینجه، اونون شعرلرینی «سمانین آچارلاری» آدلی کیتابدا توپلاییب. همین توپلویا او، اؤزونون واختی‌له یازدیغی ۵۴ شعری و «سونونجو سیاحت» آدلی نثر اثرینی ده داخیل ائدیب.  س. فوکاو ۱۹۷۴-جو ایلده معده خرچنگیندن دونیاسینی دگیشیب.         دوداقلارین   دایما نه ایسه دوشونورلر، ائله هئی نه‌یین‌سه آرزوسوندادیرلار او گول لچگینه بنزر دوداقلارین.   سنین دوداقلاریندا، او سرین دوداقلاریندا اویویور بو دونیانین قوصّه‌سی، گؤرن او بیر جوت لچگه نئجه سیغیب دونیانین مین بیر سیرّی سوالی!؟   دوداقلاریندا کینایه ایله یاناشی اویویار احتیراس ائله سنین طالعین ده بیر معنادا اؤز دوداقلاریندان آسیلیدیر.   آه، دوداقلار، دوداقلار- لاله‌لرین ان شاهانه‌سی!     هوریقوتی دایقاکو ۱۸۹۲-۱۹۸۱   سیموولیزم جریانی‌نین سون مرحله‌‌سینی تمثیل ائدن ان تانینمیش شاعرلردن بیریدیر. آتاسی دیپلومات اولدوغوندان اوشاقلیق و گنجلیک ایل‌لری آوروپانین و آمریکانین ان مختلف اؤلکه‌لرینده کئچیب. بیر سیرا دیل‌لره آشنا اولدوغوندان ۲۰-۲۱ یوز ایل فرانسا و بلژیک شاعرلری‌نین اثرلرینی ایلک دفعه‌ ژاپون دیلینه او چئویریب، بونلاردان عبارت بیر نئچه آنتولوگییا چاپ ائتدیریب.   ۱۹۳۰-جو ایل‌لرین ایکینجی یاریسیندان اعتباراً دایقاکو پوئزییادان اوزاقلاشیب.           کؤنول   قلبیم درده بله‌نیب، کؤنلومدن قارا داش آسیلیب، داماغیمدان‌سا گئتمک بیلمیر  او کؤهنه دردین آجیسی.   بس ایندی نئیله‌ییم من؟ باشیمی آلیب هارا گئدیم؟ ایسته‌دییین نه‌دیر، دئ‌سنه  ائی منیم دلی-دولو قلبیم؟   بس سن نییه، ائی کؤنول، هئچ جور تسکین اولمورسان؟  یوخسا، بو عشق، بو شعرلر  سنه یئترلی دئییل!؟   باخ، ایندی، من بئله جاوان، بو جور ساغلام و زنگین ایکن، بونجا استعدادلی ایکن...  دونیا نئجه ده گؤزلدیر! آمّا یئنه، یئنه ده،   آه، یئنه ده، یئنه ده... قلبیم درده بله‌نیب، کؤنلومدن قارا داش آسیلیب، داماغیمدان‌سا گئتمک بیلمیر  او کؤهنه دردین آجیسی...        نیسیواکی دزوندزابورو ۱۸۹۴-۱۹۸۲   ژاپون پوئزییاسیندا سوررئالیزمین هم نظريّه‌چی‌سی، هم ده باشلیجا تمثیلچی‌سیدیر. نییقاتا پرئفئکتوراسیندا آنادان اولوب. توکیوداکی کئیو اونیوئرسیتی‌سینده سوسیولوگییا و اقتصادیّات اوزره عالی تحصیل آلیب. قزئت امکداشیندان توتموش، تا خارجی ایشلر ناظرلییی‌نین ممورو وظیفه‌‌سینه قدر بیر سیرا ایشلرده چالیشیب. ۱۹۲۲-جی ایل‌ده تحصیل آلماق اوچون اینگیلتریه یوللانیب. اورادا بیر اینگیلیس خانیم‌لا عائله‌‌ قوروب و ایلک شعرلر کیتابی «آمباروالیا»نی دا اینگیلیس دیلینده چاپ ائتدیریب.    ایکینجی دونیا محاربه‌‌سیندن سونراکی ژاپون پوئزییاسینا دانیلماز تأثیر گؤسترن ن. دزوندزابورو ترجمه صنعتی‌یله ده جدّی مشغول اولوب، آوروپا و چین شعری‌نین ان دگرلی نمونه‌لرینی آنا دیلینه قازاندیریب.   

هادی قاراچای هرزامان دوشوندوم سنی، هر زامان، سئوگیلی دوستوم، هر زامان آرزولو گؤزلرله دوشوندوم سنی. یایی‌نین اولدوزلو گئجه‌لرینی قیشی‌نین اودلو کورسوسونو آندیم. آرازی‌نین بالیغینی داغ‌لاری‌نین اووونو دوزلرینده دنلی بوغدانی آندیم. اللری قابار دؤیموش قادینلارینی دوشوندوم کوبورد ساققالینا دن دوشموش کیشی‌لرینی آندیم، قیزلاری‌نین گول دوداقلارینی دوشوندوم اوزون- اوزون. هر زامان، سئوگیلی دوستوم هر زامان آرزولو گؤزلرله دوشوندوم سنی. https://t.me/Adabiyyatsevanlar