ادبیات سئونلر

خوی تاریخیازاری پرویز یکانی‌نین حضورو https://t.me/@adabiyyatsevanlar

علیرضا ذیحق خوی  شهرین ده "گوروش" آدلی ادبي ییغینجاق‌لار آردیجیل اولاراق بیر ایل دیر دوام ائدیر . بو مراسیم  هر ۱۵ گوندن بیر  ادبیات سئوه‌رلر و موسیقیچی‌لرین ایشتیراکی ایله  مستقل بیر حرکت اولاراق داغچی‌لاری ، شاعیر لری ، یازیچی‌لاری و خوی‌ون خئیرخواه انسان‌لارینی بیر یئره توپلاییب، بیر آدلیم شخصیتی، آغیرلاماق و عزیز له‌مک له، باشلاناراق تاماملانیر . بو ادبي ییغینجاغین ، مدیرلری و بانی‌سی "اسماعیل اسدلو" ( ژورنالیست و "انديشه خوی " و " امید خوی" درگیسی‌نین باش یازاری  ) و موسی محمد جعفری (ژورنایست ، یازیچی و " شفق آذربایجان" قزئتی‌نین صاحیبی و باش یازاری دیر ). " گوروش " ییغینجاعی‌نین سون برنامه‌سینده ، خوی شاعیر لرین دن "میرهادی مظلومی" عزیزله‌نه‌رک ، خوی‌ون پئره باغ‌لاریندا  ، ادبیات  سئونلر آدلی تلگرام گوروپونون  دیرلی امکداش‌لاری  ایسه دعوتلی اولاراق ایشتیراک ائتدیلر . هابئله  کریم قربانزاده،مرجان مناف‌زاده، زکیه دولفقاری، منیژه جم‌نژاد، احد فرهمند ی، ویدا حشمتی، و باشقا تبریزلی قوناقلار ،  ئوز چیخیش لاریلا بو مجلیسه داها آرتیق گوزللیک باغیشلادیلار . خویلو شاعیر و یازیچی‌لاردان ، محمد شاهوردی، حمید واقفی، بهروز نصیری و هاشم عابدی کیمی یارادیجی ادبیاتچی‌لاردا شعرلرینی ویازی‌لارینی تقدیم ائتدیلر . خوی‌ون دیرلی یازیچی‌سی "اوستاد پرویز یکانی " نین ده بو ییعینجاقدا حضورو وار ایدی . خوی‌ون موسیقی‌چی‌لریندن رضا برگشادی، مجید کهنمویی و ایرج رحمانی دا جانلی ایفالاری ایله بیر پارا ماهنی‌لاری ایشتیراکچی‌لارا تقدیم ائتدیلر . ادبي" گوروش " ییغینجاعی‌نین بو برنامه‌سی خرداد آیی نین ۲۰-جی گونو عليرضا ذیحق‌ین آپاریجیلیغی ایله  آخشام اوستو ساعت ۴ ده باشلاییب،   ساعت ۷ یه قدر دوام ائله دی. https://t.me/@adabiyyatsevanlar

خوی شهرینده گؤروش عنوانلی ییغینجاق اوستاد میرهادی مظلومی‌یه آغیرلاما و عزیزلمه تؤره‌نی کئچیرتدی.

دالغا قوروپو

"دومان بختیاری" آچ سینه‌نی پرده پرده حزین حزین آغلا سازیم اوره‌گیمین سینان یئرده یاراسینی باغلا سازیم منه بیر آز آغلا سازیم داغیلمیشام ائلدن ائله یاشات منی گیله-گیله بو حسرته بو نیسگیله اوره‌گینی داغلا سازیم منه بیر آز،آغلا سازیم دوداغیمدا دار هاواسین یارامیزدا یار هاواسین قارا گونده قار هاواسین کؤکله باغچا باغ‌لا سازیم منه بیر آز آغلا سازیم یازیمیزدا آغری گولور نه‌لر چکدیم آلله بیلیر حسرت‌ایله قول چکیلیر آرامیزدا، داغ‌لا سازیم منه بیر آز آغلا سازیم بیر آز یورغون، بیر آز خسته دوشون منی سون نفسده لال دردینی سینه‌م اوسته  چاغلا، چاغلا، چاغلا سازیم منه بیر آز آغلا سازیم https://t.me/Adabiyyatsevanlar

علی رشتبر قاییب جانیم دوستوم اوجا سسه ، کؤکون گرک زیل اولمالی. قوپوزوندا بیر خوش تاختا، اوچ موکممل تئل اولمالی. سؤزو قلبه یئریتمگه، عیناد کؤکون چوروتمگه، داغی داغدا کیریتمگه، بیر اورکلی  ائل اولمالی. گرکلیدیر اکین-بیچین، باغلاماغا دونیا کؤچون... قیشدا مئیوه‌ یئمک اوچون، یازدا باغین گول اولمالی. شخصه باغلی هر بیر علّت، باش اوجالیق یادا ذلت... کئچمیشنی آتان ملت، اؤزگه لره قول اولمالی. قاییب واخت یوخ یوبانماغا، حقیقتی دوز آنماغا، حاق یولونو قازانماغا، اینسان اؤزو یول اولمالی. https://t.me/Adabiyyatsevanlar .

توحید نامور"آدلیم" اۆره‌ییم دؤزمه‌ییب یولا چیخدی، گل! نییه گلمه‌ییرسن؟ یول آچیقدی، گل! یوخوم داغ باشیندا آلاچیقدی، گل! گئجه‌لر یوخودا گؤروشک باری! گؤینتدی باغرینی ایزیم یوللارین سارالدی آغیندا گؤزوم یوللارین اولمادی قووشاغی بیزیم یوللارین گئجه‌لر یوخودا گؤروشک باری! یوخولار دئییل‌کی دره، قورخاسان بیر ایت یوخ اۆستونه هۆره، قورخاسان آدام یوخ غفیلدن گؤره قورخاسان گئجه‌لر یوخودا گؤروشک باری! بو گئجه یوخودا بیر آه چکمیشم گل، آهدان من سنه یولاق چکمیشم! کؤهنه خاطره‌دن آراق چکمیشم گئجه‌لر یوخودا گؤروشک باری! سئوگیلیم! هر شئیی خیره یوزاق: دنیادا نه درد وار، نه هجران، نه داغ حیاتی آلداداق حیاتدان اوزاق گئجه‌لر یوخودا گؤروشک باری! گئجه‌لر یوخودا یوخو یاتمایاق گئجه‌لر بیر داستان اوخو! یاتمایاق گئجه‌لر شهری یوخودا قویاق گئجه‌لر یوخودا گؤروشک باری...! https://t.me/Adabiyyatsevanlar

فیکرت_قوجا گیزلی سئوگی سئوگیمدن قاچمیشام اوزاق شهره، بوردا دا حسرتین گلیب دایانیب. عطرین سپه‌له‌نیب بوتون گوللره، گؤزونون رنگینه گؤیلر بویانیب. سنینچون دونیادا بلکه یوخام من، سنی سئودیییمی هئچ بیلمه‌ییرسن. گوندوز خیالیمدان، گئجه یوخومدان، بیر آن دا، بیر آن دا چکیلمه‌ییرسن. اوره‌ییم، داشا دؤن، بو سیرری ساخلا! بو سئوگی، بو بلا هاردان ائنیبدیر؟! بیزیم طالعیمیز ائوله-اوشاقلا، هره‌سی بیر یانا زنجیرله‌نیبدیر. اؤلونجه عشقین‌له اولاجاغام من، من سنین روحوندا، قانیندا وارام. اوستونو کول اؤرتموش بیر اوجاغام من، بالاجا بیر مئه‌دن قاینایار یارام... https://t.me/Adabiyyatsevanlar

افسوس که این مزرعه را آب برده ... رسانه های جهان افکار عمومی را به همین سادگی بازی می دهند و میلیونها آدم را به تله میندازند....

گراناز موسوی حتا تمام ابرهای جهان را به تن كنم  باز ردایی به دوشم می افكنند  تا برهنه نباشم این جا نیمه ی تاریك ماه است دستی كه سیلی می زند  نمی داند گاهی ماهی تنگ  عاشق نهنگ می شود بی هوده سرم داد می كشند  نمی دانند دیگر ماهی شده ام  و رودخانه ات از من گذشته است  نمی خواهم بیابان های جهان را به تن كنم و در سیاره ای كه هنوز رصد نكرده اند                                                  نفس بكشم  حتا اگر باد را به انگشت نگاری ببرند  رد بوسه ات را پیدا نمی كنند به كوچه باید رفت  گرچه ماشین ها از میان ما و آفتاب می گذرند  به كوچه باید رفت  این همه آسمان در پنجره جا نمی شود. می خواهم در جنوبی ترین جای روحت                                          آفتاب بگیرم  چراغ سقفی به درد شیطان هم نمی خورد  آن كه پرده را می كشد                                  نمی داند  همیشه صدای كسی كه آن سوی خط ایستاده                                                  فردا می رسد بگذار هر چه می خواهند                                   چفت در را بیندازند امشب از نیمه ی تاریك ماه می آیم   وتمام پرده ها و رداها را  تكه تكه خواهم كرد  بگذار برای بادبادك و شب تاب هم اتاقی حوالی جهنم اجاره كنند  من هم خواهم رفت  می خواهم پیراهنم را به آفتاب بدهم.                      https://t.me/Adabiyyatsevanlar

ائمیل_راسیم‌اوغلو منی شکیل-شکیل اؤلدورن آدام! منی شکیل-شکیل اؤلدورن آدام! نئجه شکیللرین دلی‌قانلیدی! سنین گؤزلریندن قان اییی گلیر، سنین گؤزلرینین الی قانلیدی. گؤزومو چیرپیرام آی ایشیغینا، نه هؤروم ییخدیغین ائوه... بیلمیرم. سنه اؤله-اؤله وورولورام من، سنی دیری-دیری سئوه بیلمیرم. منی شکیل-شکیل اؤلدورن آدام! منی تانری-تانری دیریلتمه، نولار! قوی ایتیم گئجه‌نین ائله ایچینده، صاباحین قاپیسین کیلیدله‌، نولار!... https://t.me/Adabiyyatsevanlar

باش ساغلیغی سئویملی قلمداش" اومای خانیم راد مهر" مهریبان آتانیزین حیاتدان کوچمه سی بیزی ده اوره ک ائویندن سارسیتدی ، سیزه ،حورمتلی عاییله نیزه باش ساغلیغی وئریریک. ادبیات سئونلر(اوشاق ادبیاتی)1403,3,19 https://t.me/Adabiyyatsevanlar

زرین رزندی(طناز) مملکتیم باغ جنان دیر جنان، اوباش اراذل ائوی اولموش تالان یوخدو وطن ده بئکار-ائوسیز قالان ماهوارالار زینت هربام دیر آخ نئجه کئف چکمه لی ایام دیر ارزاق اوجوزدور،اولابیلمز گران میوه قالیب دیر باشینا،یوخ آلان یوخ زوریله صاندیغا راُی-ماُی سالان عدلیله صادر اولان احکام دیر آخ نئجه کئف چکمه لی ایام دیر یوخ کئچری،پول-پلووون،پارتی نین یوخ رواجی،رشوه ومیز آلتی نین عزتی واردیر بو جیره کارتی نین مللته هر گون یئنی بایرام دیر آخ نئجه کئف چکمه لی ایام دیر بوردا نه کللاش نه ده وار شارلاتان خسته خانا اسمی دئییل،ائل چاپان شکر نه لوت وار،نه ده شام سیز یاتان یورد باشا باش مرکز اطعام دیر آخ نئجه کئف چکمه لی ایام دیر ای فبهاالوفق مراد روزگار اصناف ائدیر انصافیله کسب وکار محودی دوز وکلک واحتکار اختلاسین کیفری اعدام دیر آخ نئجه کئف چکمه لی ایام دیر سودلر آغ آپباغ،تیتیریر قایماغی قاتغی سی یوخ ذره جه پالمال یاغی گوُردو تخلف ائله ین،گوُزداغی کرخانالار هاممیسی خوش نام دیر آخ نئجه کئف چکمه لی ایام دیر تبریز آراز،اهوازی اروند پلاک دولدورولور یوز مین ایله بیرجه باک دوست سئوینیر،دوشمنیمیزدیرهلاک تحریم ائدن بیزلری ناکام دیر آخ نئجه کئف چکمه لی ایام دیر ترک ائله ییب تیریئکی لر شیره سین اجرایا قویمور قاری مهریه سین لغو ائله ییب مدرسه شهریه سین محکمه لر ساکت وآرام دیر آخ نئجه کئف چکمه لی ایام دیر شاه گوُلوده صبح یوخودان تئز دوران انلییی بول،کیرشانی دوُرد قات ووران نازلا قاچان قیزلاری یوخ دوردوران مانتووو دار کاربن اندام دیر آخ نئجه کئف چکمه لی ایام دیر اولموشوق آنجاق اوُزوموز خودکفا چین مالینا ائیله میریک اکتفا تولید اولور،آینا،داراخ،چاخچاخا مقصدیمیز عزت اسلام دیر آخ نئجه کئف چکمه لی ایام دیر ایشلره‌ صاحب دیر امام زمان هرنه قیلیق دا سئویسن چیخ دولان قامچی واشکنجه،یالان دیر یالان گشتین ایشی مللته اکرام دیر آخ نئجه کئف چکمه لی ایام دیر هرنه سئویرسن،شعریوه یازگیلن خودکاریله اوُز گورونو قازگیلن احوالیمیز یاخشی اولار دوُزگیلن خوش دوُنه مج مللته برجام دیر آخ نئجه کئف چکمه لی ایام دیر. https://t.me/Adabiyyatsevanlar

کریم قربانزاده نظیره توت الیمدن آپارمنی تبریزه آنا تبریز گؤزو یولدا قالیبدی گؤتور آخشام «شهریار»ی گل بیزه! «سلیمان»ی،« راحیم»ی ده اونوتما، جوقا قوراق شعیرلشک دیز- دیزه، توت الیمدن آپار منی تبریزه! سلام یئتیر «حیدرخان»ا، «ستار»ا، «شیخ ممد»ه، «میر جعفر»ه، «سالار»ا، «راضیه»یه، «مرضیه»یه، «نیگار»ا، یولداش‌واری اوتوراغین اوز- اوزه، توت الیمدن آپار منی تبریزه! خبر وئرین سولاسینلار شه‌هری، حاضیرلایین «کلیبر»ی، «اهر»ی، گؤزله‌ییرلر دان سؤکولن سحری، کؤنول وئریب قیزیل لاله، نرگیزه، توت الیمدن آپار منی تبریزه! هاردا کار وار، هاردا کور وار آییلسین، بئیین‌لردن خام خیالی دئ سیلسین، ماحالدی کی آذربایجان اگیلسین، گئجه غالیب گله بیلمز گوندوزه، توت الیمدن آپار منی تبریزه! https://t.me/Adabiyyatsevanlar

✅✅✅سایین کانالداشلار بو شعیره ادبیات سئونلر کانالیندا نظیره یازماق ایسته میشدیک ایکی دوستون نظیره سینی تقدیم ائدیریک نظیره سحر_خیاوی داریخیرام عئینالی‌نین باشینا داریخیرام تورپاغینا داشینا گؤزلریندن گیزلی آخان یاشینا توت الیمدن آپار منی تبریزه گَل دولاناق کوچه- کوچه شَهَری گؤستر منه شهیدلر دوشَن یئری حتمن قالیب تاریخیندن اثری توت الیمدن آپار منی تبریزه اوردا منیم کئچمیشیمدن ایزیم وار اوردا منیم چؤزولمه‌ین گیزیم وار نه دئییرم؟ اوردا منیم " اؤزوم" وار توت الیمدن آپار منی تبریزه قوربان اولوم دیلیم- دیلیم دیلینه قوربان اولوم آیری دوشَن ائلینه قوربان اولوم تورپاغینا، گؤلونه توت الیمدن آپار منی تبریزه بیر بدندن ایکی روحو بؤلدولر بئینی بوشلار عاغلیمیزا گولدولر آرامیزدا آیریلیقلار سالدیلار نه‌لر گلدی بیر اوره‌گه، بیر بیزه؟! توت الیمدن آپار منی تبریزه او شوم گونده قورقولار قورقولاندی بؤیوک ائلیم شوم اللرله تالاندی شرّ آتدیلار، یازیق " آراز" قیناندی بیرلیگیمیز سان کی گلیب دیر گؤزه توت الیمدن آپار منی تبریزه من بیلیرم بیر گون آراز گوله‌جک باکی قارداش تبریزه گول وئره‌جک من بیلیرم آپ- آیدین دیر گله‌جک نورلو گونلر قاباقدا دیر سیز- بیزه توت الیمدن آپار منی تبریزه https://t.me/Adabiyyatsevanlar

اوشاق ادبیاتی اوشاق ادبیاتی هرهفته پنجشنبه گونو ادبیات سئونلر کانالیندا، اوشاق ادبیاتینا دایر یازیلارینیزی بیزه گوندرین. https://t.me/Adabiyyatsevanlar

طنز: بویوک آغا افندی نه توسباغا، نه قورباغا / رئیس جمهوردو بؤیوک‌آغا شیطان دئییر من ده بیر دست نیمداشت کت شلوار سید اسماعیل بازاریندان آلیم، بئش آلتی نفر ده میداندان بئکار آدام کرایه ائله‌ییم، گئدیم وزارت کشوره، رئیس جمهورلوغا کاندید یازیلیم! کیم کیمه‌دی؟! مگر سیزه موهوم‌دی کی، من رئیس جمهور اولام یا باشقاسی؟ سیزه رئیس جمهور لازیمدی، من ده کی بئکارام؛ برنامه‌م ده جئبیمده حاضیردی. هامیسی دا تندیردن تزه چیخمیش ایستی ایستی برنامه‌لردی: 1.  هفته سکگیز من دوققوز شهرستانلارا سفر ائده‌جم؛ 2.  اون ایلدن بری نئچه دفعه افتتاح اولان طرح‌لری دوباره افتتاح ائده‌جم؛ 3.  مملکتین بوتون موشگوللرینی آمریکانین و خارجی دوشمنلرین بوینونا آتاجام؛ 4.  میللتین حل اولمامیش مسئله‌لرینی و موشگوللرینین هامیسینی کئچمیش دؤلتین باشینا ییخاجام؛ 5.  اون ایل بوندان سونرا دا دوشمانلارین بیزه ائده‌جکلری توطئه‌لری افشا ائده‌جم؛ 6.  میللته دوشمان اولان مستکبرلرله دالدادا سئویشیب، اوزده یاخالاشاجام؛ 7.  بیر آیا کیمی ائوسیزلره، یوخسوللارا و کارمندلره اون میلیون ائو دوزلده‌جم، ائله ائو کی دونیا اهلینین آغزی آچیق قالسین؛ 8.  اون گونه کیمی ارز بازارین ائله تنظیم ائده‌جم کی، دولاری مین تومنه ده آلان اولمویاجاق؛ 9.  دستور وئره‌جم بی‌سرپرست خانواده‌لره سحردن آخشامادک پهپادلارلا ارزاق داشینسین؛ 10.  قورویان گؤللریمیزه خلیج فارسدان شیرین سو چکدیره‌جم؛ اورمو دریاچه‌سینه ده خاریجدن اون مین فیلامینگو وارد ائده‌جم؛ 11.  بازنشسته‌لرین، کارمند‌لرین و کارگرلرین هامیسی‌نین حقوقونو اوچ قات آرتیراجام کی نئچه خانواده‌نی دولاندیرماغا قادیر اولسونلار؛ ارزش افزوده‌نی، مالیاتی و جریمه‌لری آرتیرماقلا، حقوقلاری ّو مسئله‌نی ائده‌جم؛ 12.  خانیملارین شانینده دئییل گشت ارشاد اونلاری توتاندا کؤهنه ونه میندیرسینلر. من بو مسئله‌نین حللینه آلمانیادان گشت ارشادا آخرین مدل فولوکس واگن آلاجام کی خانیملاریمیز پلیس اخلاق مرکزینه گلینجک اینجیمه‌سینلر؛ 13.  ترافیک مسئله‌سینی حل ائتمک اوچون تعطیل گونلرینی چوخالداجام؛ منجه تعطیلات هر نه قده‌ر چوخ اولسا بیر او قده‌ر میللت یاخشی یاشایار؛ ایداره‌لر و خیاوانلار خلوتله‌شر؛ سو، برقین مصرفی آزالار؛ هاوا تمیزله‌نر، دورکاری و گردشگری رونق تاپار و جاماعاتین وضعی یاخشیلاشار. اصلن نیگران اولمایین تعطیلات چوخالسا نه تولید آزالاجاق، نه صادرات واردات آزالاجاق، نه ده بیر اتفاق دوشه‌جک؟ منیم دؤلتیم پاخیل دؤلت دئییل. من شراییط یاراداجام کی باشقا مملکتلر ده بیرزاد صادیر ائده بیلسینلر، اقتصادلاری رونق تاپسین؛ 14.  خانیملارین مسئله‌سی منجه اصلن موهوم بیر مسئله دئییل. منجه دونیانین ایکی مهم مسئله‌سی واردی: بیر ساعات مسئله سی ایدی کی آللاها شوکور اونو قارداشلاریمیز اونوچونجو دؤلتده چوخ درایت ایله حل ائله‌دیلر؛ ایکینجی مسئله ده آخر هفته‌نین تعطیلی‌دیر کی فعلن دؤلت، مجلیس، شورای نگهبان، مجمع تشخیص مصلحت و ارکان نیظامی اسیر ائدیب، هامی اونا مشغولدو. من بو مسئله‌نی سو ایچیم کیمی حل ائده‌جم. 15.  منیم دؤلتیمده یالان پالان اولمایاجاق. منیم یالان دانیشماقدان زهلم گئده‌ر. کیشی کیمی وئردیگیم وعده‌لرین اوستونده دوراجام؛ امما سیزین ده گره‌ک بیر آز دؤزوموز اولسون. یالاندان دوروم دئییم بو ایشلرین هامیسینی بیر هفته‌ده گؤره‌جم یوخ، آللاه دئین اولسا قیرخ گونه‌جک، لاپ بئله چوخ اوزانسا 100 گونه کیمی هرزادی یئر به یئر ائده‌جه‌یم. انشالله صاباح وزارت کشورین قاباغیندا گؤروشریک. شعاریمیز دا بئله‌دیر: نه توسباغا، نه قورباغا رئیس جمهوردو بؤیوک‌آغا https://t.me/Adabiyyatsevanlar