مشاري الصغيّر

‏على شان خاطر عينك أمر هاك البيت ‏لو انه مهو بيتي ولا هوب بيت أهلي ‏وأغني لـ شبّاكك طواريق ليت وليت ‏وانا اللي صعيبٍ في بيوت الشعر سهلي ‏بـ طبعي سريعٍ كل مارحت ولّا جيت ‏وأجي شارعك وأمشي على اقل من مهلي ‏كبيره عليْ ما تنتبه لي ليا مريت ‏أنا مستحيل أمر .. مـ حد يتنبّه لي َ

https://t.me/m_alsgher .

لك الله يا قلبٍ تعنّى و شاف و عاف ولا عاد باقي به كثر ما خذوا منّه بدا أوّل سنينه عاشقٍ هاويٍ ميلاف يروّح له بـ موال .. و يعوّد بـ ونه فضح حزن عينه دمعها الواضح الشفّاف تحدّر .. مثل وضحٍ بـ حدرى و مستنّه ليا ابحر خياله شاف له شي ما ينشاف لو إنه على جمر الغضا .. شاف له جنه بالارض اللي أهلكها الدهر يرسم الارياف يروف و يحنّ ولا لقى شخصٍ يحنّه هل الفكر و كبار الشواعير و العرّاف تعجّب من ابداعاته و من صغر سنّه خذا كل رحله فالعمر، علم واستكشاف قبل تنصقل موهبته و يبرز بـ فنه وانا اليوم مالي لا مصدّه ولا محراف عن اللي لها في خاطري مربط أعنّه يا عذب السجايا، بك تزيّن حروف القاف ما عادت مواعيدك معي ب اوّل الكنّه يا ظبيٍ رعى طرّاف قلبي و قلبي جاف نضب عدّه ، و زمل الهقاوي لها حنّه وش مذيّرك ، مابه ذيابه ولا مشراف لو إنّ به مشاريف و ذياب اهربت جنّه أخذها بعين العقل والقلب والانصاف و فكّر و رد العلم .. بـ رساله و رنّه يعود الحصا تمر و تعود السمان عجاف وحبك بقلبٍ عشّمه حدسه و ظنه من يحطّ لك عينٍ فراشٍ وعين لحاف ما يرضى يجي منك العطا لاحقه منّه تذكرني إن جاتك ظروف الحياه احلاف و تلقى شجاعٍ يشهر السيف و يسنّه يا لولا إني أخاف الجفا ماني بـ خواف أنا قلبي إن جا طاري البعد فيه إنّه مشاري الصغيّر

‏قال لي بتزين قلت الله كريم ‏جلّ من بـ أيده حلول المشكله ‏لاني بْـ متذمّر ، ولاني حليم ‏ولا آعرف همّي ولانيب أجهله ‏لا تعاتبني يابو قلبٍ سليم ‏ما حملت من الليالي ما أحمله ‏صايرٍ قلبي مثل بيت الكريم ‏كل همّ يمر بابه .. يدهله .

‏جعل دارٍ مشى فيه أتلع الجيد ‏غيمها .. ينثر الما في سهلها ‏ودام ما شفت زوله بـ اوّل العيد ‏سلموا لي على الديره واهلها

صيبًا نافع يا ربي و مدرارٍ غزير بـ آمرك تسابق بروقه برد وسميّته ما تلدّه ريحٍ إن هبت تعكس المسير هاديٍ وبله .. يشيل السعد في جيّته يْغسل صدري بعد وعكة الجرح الاخير لين تشفى علةٍ .. دمّرت نفسيته أنا عبدٍ يمشي الدرب، و يغرّ المصير لو وثق في نفسه وعقله وشخصيّته أقفت سنيني وأنا أشوّف عيون الضرير وأتحمّل هرجةٍ سامّه .. و مزيّته يالله التوفيق والصبر والرزق الوفير العمر مدري وش اللي بقى في طيّته أتوسّم خير فالناس لكن ماش خير كل واحد حدّ سيفه على جنبيّته دبرةٍ ماهيب سنعه و رايٍ ما يصير وأغلب اللي يرجمون الجبل، في فيّته في زمانٍ يحقر الشهم و يعزّ الحقير يحشم الإنسان على حسب ماليّته شايف وعايف ومقفي ولاني مستدير لو تحتيْ القاع شوكه يساند حيّته القفيّا بعض الاحيان راحه للضمير وش لي بـ دربٍ حسانيه تشبه سيّته لو قدرت احيي شغف عمرٍ أيامه تطير كيف ابا احيي لي قلوبٍ حطامٍ ميّته مشاري الصغيّر

‏من خطاياك ويش أترك وويش أعدّ ‏ وأنت غلطتك رمح وكلمتك حربه ‏ما للاعذار باب ولا الخطايا حدّ ‏ولا بقى حل .. ولّا عذرٍ أعذر به ‏رحت ما أبغى رساله منّك ولا رد ‏الخٌطى ثابته ، والنفس منطربه ‏ما يرد العزيز إن عاف وليا صدّ ‏غير منهو يرد السيل .. عن دربه ِ

يا سقى الله قلبي الغرّ قدام احبي قبل يطعم طعنة احبابي وغدر اخوياي قبل لا يتناولونه و يسبونه سبي كل ليل يحط به ثقب حتى صار ناي كم تمنيته على ناعم الرمله ظبي تجفل بـ وديانٍ اوسع عليها من مداي والله انه شيخ قومٍ ما شيّخته عبي بس هذا مكسبي فالحياه و ذا شقاي يا الله بـ رزقٍ يعوضني سنين تعبي و اتحرر من قيودي ومن جمرة عناي ايه انا ابغي من حياتي ولا ادري ويش ابي كيف ابحقق طموحاتي وْ بـ بلغ مٌناي اتشتت لين اضيّع لزومي و طلبي وأجمع شتاتي ولا افلح ولا اعيّن دواي ديرتي .. مريت فيها مرور الاجنبي كنّ ماهي ديرةٍ لي ولا هذا حماي والحبيب عنه كل مذموم .. يهبي اللي آشوفه حيا أرضي، ومزنٍ في سماي شفته الليله يغنّي على اللحن الغبي عقب ما كان متأثر بـ شعري وبـ غناي وقلت له وانا دموعي تناثر لـ آركبي انتظرني، لين ارتّب على دربي خطاي واترك الدنيا بـ ظهري تسوّ اللي تبي لاذكرت انك بـ وجهي نسيت اللي وراي مشاري الصغيّر

وش الجديد https://t.me/m_alsgher