زول مهترش ^^

النص دا إتكتب في العماده يوم ٥ أو ٦ رمضان تقريبا،،كنت بضحك لمن كتبتو وبقرأ فيهو أسي ما قادر أقراهو، حاولت ما قدرت أضيف ليهو ولا كلمه من الألم الحصل، فمن باب خطوه نحو التعافي حاولو أقروهو وإنتو مبتسمين ❤️ في القيادة في ألفِ قِصة بتحكي للناس المهابه بُكسِي جايِّ يزَكِّي روحو فوقو أطفالاً غلابه طلعُمْ حِس أُمنِياتم حِلمهم يقرو الكتابه شافو في الخُور ألفِ واقع كُلهن نَفس الكِتابة كُلهن بالسُوء بِبوحن جُوع _ وتخويف_ ذُل _ كئابة شالو أقرب لافتة ليهم نادو واحد يقرأ ليهم وقالو بنموت في تُرابا (ح تسقط وح نعرس ح نعرس كنداكة ح تسقط وح نعرس ح نعرس شفاته) قاطعم صوت دوشْكَا بِدْوِي وزول بكورك يلا أجري ضحكو زِّيييينتي قالو للجايات حبابا عَلّوو صوووتهم يلا أضْرُب دي البلد لسه بشبابا * * * في القياده في ألف قصة بتحكي للناس المَحَبّة إلتقاء سحنات عَديده وكلو بِهتف صَبّه صَبّه ما نقص شخلوب وحاتك إلا زادْت الريده حبه أيوا أيوا يا صاحب تعال نحن قِدَّام السفينه أيوا جنبنا رابَّه ربَّه (لو عندك خت ما عندك شيل تلفون بي جاي الضحكه هناك أرفع يدك فووق التفتيش بالذوق أرفع يدك حبه التفتيش بمحبه) قالوا ما دايرين يقولو سَوُّو فَزاعة مظاهر وبكره ح يبين المخبأ بُكره تعْرِفو مين بيقتل ومين ببيع دِينو بدراهم بُكره تكشفو ألفِ كضبه قالوا ديل سُفها وصعاليق جِيل مُفلفِل وما مُرَبَّى قُلنا رَدنا بإختصار نحن جيل بالحُب معبَّى * * * في القياده في ألف قصه بت بترسم وكم ترس ما اتغدا لسه إلا سانداهو الإرادة ديل بِسَوّو الخير سبق وديك قبايل أعلى النفق وكلو خَطوَه تشوف عِياده تضحيات وحبيبه راكزه فاتحة في الروح ألف نافذه فاتحة قلبي انا للسعاده نبكي تِتْشايل غمامه تَحضن الدوشكا الحمامه يبقى كلو كما القياده تفتخر بكره وتفاخر لما هذا الزيف يغادر وتبقى يا نِعْم الوِلاده * * * في القياده في ألف قصة بتحكي للناس السلام خِيمَة تِتمَطى وتشيلنا و عود بدندن يااا سلام قبطي في عِزَّ الهجاير شايل المويه ويرشرش ماري بالصايمين يقشقش ساند النيتو الصيام شُلّه من أقصى لأقصى قاعده تتناقش وتضحك ما فَرَق بينهم كلام مهما تختلف المفاهيم ويعلو في الجو الخصام إن دعى داعي الفداء أدو للوطن التمام قام وِلييد ما تم عشره شالُّو طبشيره وكتب عبد العظيم يا زول عظيم إنت كيفك لسه تضحك؟ نحن هسع جت تمام كَلِّمم وريهم إنو أسي سقطت إطمئنو بكره ح ننول المُرام بكره تسقط مية واكتر يا نجيب تارنا ونزغرد ويضحك الوطن المُضام يا نموت في شان هدفنا ميتة الشهدا الكِرام #القاسم_الامين

في النويح يقول راني فرح .. لا داير أجيكي وأبدا لا قادر أكون لي وحدي ما داير أخون المبدا وأحفر بي رجوعك لحدي لا داير أفوت وأنساكي لا دار تقتنع يا سهدي لا دار يا أحاسيس تهدي ... على كيفك على مهلك هداك طيفك هداك عقلك إذا دايره القعاد أهلآ بحب بي كل ما أملك وإذا دايره الفراق أمشي هداك أتر المشن قبلك ... لا فتا البحر بي غادي لا جاني التساب لا تم القمر في داخلي لا أكتمل النصاب لا كل الحزن راجيكي في يوم الحساب ومؤمن بالحصل من الله والمؤمن مصاب كنت مع الأمل في الجنه بين قوسين وقاب لكن فجأه حبك صنه من جواي غاب لا قبلك هويت لا بعدك إتكشف النقاب وانا في الريد بحب فد مره زي عود الثقاب ... اتلاقينا يا الضل الدخل كالطفلة واتفارقنا عن صوت الضمير في غفلة بيناتن زمن عشناهو بين دمعة وتتاصص ورفلة الله يعين قلوبنا الهسي متخذين عنادك ماوى حاولنا وفشلنا الغايتو يا وجع الغرام الفايتو ياما للتفرق لاوى لا قلبك عذرني البتة لا راسك معاي اتحتة لا كان في الغلط نتساوى كان للفرقة اسباب شتى كلها تنحصر في عندك وهسي خلاص نسيت العندك مارق وفيني شئ من حتى ... الدنيا أصعب ما تكون يوم فيها يحصل تفرقه والصدفه أجمل ما يكون يوم البيجمعو من لقا ... فتي خليتي العيون تلصف بروقا بالرحيل وزعتي رعدك والدموع امطار تدفق كيف تفوتي وابقي وحدي وانتي عارفه الايد وكت ما تبقى واحده ولا بتصفق كنتي ولسه جواي احتمالات تبقي انتي فيني اقدس من تقبل اي كلمه بتجرح الحاجه البتمرق مني ليكي اصلي يوم اخترت انك تصبحي المسئوله عن تنظيم مشاعري وتضعي دستور كيف بتبقى علاقتي بيكي اندلقت وجبت كل الكون عليكي ليه بدون عينيكي ترمش حتى للناس الوراها خطوتك تعلن رحيلا محبط احساس انو روحك دايره حاجه ويبقى ما باليد حيله وبرضي في الحالتينن عفيتلك اي في الحالتين مسامحك ما عشان حابيك يا حلو التقاطيع والملامح او عشان لحاجه طامح بس عشان جواك تاكد فكره انو ( البحب بالجد بسامح)

سلامات أسفين علي الغياب كلكم نظر وعارفين الحاصل شنو لكن رجعنا ليكم تب يا كلبين 😘

⭕️ مظاهرات بالمسيكتاب - شندي ١٠ فبراير ٢٠١٩ #مدن_السودان_تنتفض #تسقط_بس #موكب10فبراير

المسيكتاب 😘😘😍❤

وريني فد مانع ليه اسي إنت هنا ما بره في الشارع ؟ خايف من البُكره ؟ هو الاسي ذل في ذل يات بكره يا فالح وانت بتموت راكع نفسك أعز عليك من كل من ماتو ؟ ولا الضمير عندك كُتر الظلم شاتو ! بقى أصلو ما نافع (أحييييي يا نافع) لا بتمسكك أعراف لا بمنعك جامع جيناك شباب وشيوخ سودانا هو الجامع ما فينا من يخشاك مافينا زول خانع .. لو لِسّه فيك ضمير لِسّاك سوداني قوم هسي بالعندك قوم يا أخوي طالع وريني فد مانع ليه أسي إنت هنا ما بره في الشارع ؟ #القاسم_الامين

الحبايب تعالو النستفيد من سماعاتكم دي حبه 😂😂 نتلاقى الساعه 7 اي البعد شوية دي علي(راديو هلا 96 ) مع شباب سمحين كدا أسمعو وورونا دايرين شنو وأدونا رايكم ❤

يا تفاصيل مابْتَعدي إلا رُوحْنا وراها تمرق نِحن والشوق لو تَعرفي حُضنِ لي الدايرنو يصدق لهفة الخايف تَروحي رعشة الضو في النفق خُوفِي أفْقِد مَره روحي حين يحاصرني الغرق 😢 #القاسم_الامين

سمحة وراكبه قِدام ؟ يعني نَصيحَة إنتي !! إيه ذَنب الدكاكين واللافتات تصدع ! إن بِقَى بُكره غِبۡتِي ؟ إن غَيَّرتِي شارعك أو ساي إنشَدَهۡتِي عايني عليك (سماحتك) كم شارع ( بِرَاكِ ) وانتي ولا إنۡتَبهتِي وكم سواق بِيِرجِف وكتين ما تَنُطِّي دقداق زاتو حاسد ومطب ما بيفهم هو شوية العَملتِي !؟ قالت دايره تنزل كل الحافله نزلت وانتي ولا نزلتي غشيتينا يعني !؟ زاتو ولا قدرتي 😌 نحن ركبنا تاني #القاسم_الامين