-

أناظر فالسما وأقول يارب السما والقاع عسى اللي صار تكفيرة ذنوب وفاتحة توبه غريبه كيف راودك الندم يابْن آدم الطمّاع يادوب النفس نالت ماتبي والقلب يادوبه صحيح أن الحكي بالفايته مايبري الاوجاع لكن .. أقل شيء يذكّر النساي بذنوبه همومي واجد، وزلاتي كثيره، وعمري ضاع وصبري لا يزال يطارد الآمال بإعجوبه وتقول أن الوحيد اليا تضايق مالقى فزّاع وصدّقتك، وكثرّت أصدقاي وصاروا عقوبه عزاي أني حفيد اللي عزاويهم على المطلاع معاصير الدول يوم الامام يجيّش شعوبه ياكم مره يضيعني التواضع لكن الاوضاع ترد الطيّب اللي مستحيل يغيّر إسلوبه وإذا طاح المطر والبرق لاح وقرب المرباع ذكرت اللي تجيني راضيه وتروح مغصوبه سلام الله على وجهٍ عليه الخاطر الملتاع مايبرد لو نسانيس الشمال ملاعبه ثوبه وجودي يوم راحت من يدي وأنا طويل ذراع وجود الشايب اللي برّ بعياله وباروا به