បណ្ណាល័យអនឡាញ📚

តើអ្នកដឹងទេ? ប្រឡងភ្លាម ប្រកាសលទ្ធផលភ្លាម! អនុវត្តតាមគោលការណ៍ «ប្រឡងភ្លាម ប្រកាសលទ្ធផលភ្លាម» ដំណើរការប្រឡងវិញ្ញាសាសួរផ្ទាល់មាត់ សម្រាប់ជ្រើសរើសមន្ត្រីកិច្ចព្រមព្រៀងការងារនៅវិទ្យាស្ថានជាតិស្ថិតិ នៃក្រសួងផែនការ ត្រូវបានអនុវត្តយ៉ាងលឿនរហ័ស ម៉ឺងម៉ាត់ និងតម្លាភាពបំផុត។ ចាប់ពីព្រលឹម ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានអញ្ជើញដល់មណ្ឌលប្រឡងសាលាភូមិន្ទរដ្ឋបាលផ្ទាល់ ដើម្បីជួបសំណេះសំណាល និងផ្តល់ការណែនាំយ៉ាងម៉ឺងម៉ាត់ពីយន្តការ និងនីតិវិធីប្រតិបត្តិ (SOP) ដល់អនុគណៈកម្មការមេប្រយោគ មុនពេលបេក្ខជនទាំង ២៦រូប ចាប់ផ្តើមប្រឡងពីម៉ោង ៨:០០នាទីព្រឹកតទៅ។ ភ្លាមៗបន្ទាប់ពីបេក្ខជន ១រូបៗ បញ្ចប់ការប្រឡង តទុលជាមួយមេប្រយោគ ៣រូប រួមមក ក្រុមការងារបានបន្តនីតិវិធីយ៉ាងមមាញឹក ក្នុងការវាយបញ្ចូល ផ្ទៀងផ្ទាត់ និងបូកស្រង់ពិន្ទុវិញ្ញាសាសួរផ្ទាល់មាត់ រួមបញ្ចូលគ្នាជាមួយពិន្ទុវិញ្ញាសាសរសេរលើកទី១ យ៉ាងសុក្រឹតបំផុត ក្រោមការត្រួតពិនិត្យលម្អិតគ្រប់ជ្រុងជ្រោយពី ACU និងក្រុមការងារពាក់ព័ន្ធ ដើម្បីដាក់ជូន ឯកឧត្តមឧបនាយករដ្ឋមន្ត្រី ពិនិត្យ និងសម្រេចលើលទ្ធផលផ្លូវការ ក្នុងគោលបំណងប្រកាសផ្សព្វផ្សាយជូនបេក្ខជនភ្លាមៗ ក្នុងថ្ងៃតែមួយតែម្តង។