#SEERA DHAALAA BIYYA KEENYAA FI SADARKAA DHAALLI ITTIN DHAALAMU.
‘Dhaala’ jechuun:- Adeemsa mirgaa fi dirqamni nama du’ee gara dhaaltotatti ittiin darbu dha. Adeemsa kunis karaa lamaan ta’uu danda’a. Isaanis:-Dhaamoo malee fi Dhaamoo dhaani.
Dhaalli bakka teessoo muummee dhaalchisaa (principal residence) isa dhumaatti banama. Akkasumas bakka dhaalchisaan jiruudhaaf filate ykn bakka jireenya hawaasummaa hundeeffate fi dhaabbataan filate(domicile)tti banamuu danda’a (SHH kwt.826 fi (kwt.177(1),183,184,185)).
#Wantoota Dhaalaan Darbuu Danda’an
✓Mirgaa fi dirqama sababa du’a dhaalchisaatiin hafaa ta’uu hin dandeenye (SHH kwt.826(2).
✓Mirga fi dirqama diinagdee ykn qabeenya gosa adda addaa dhaalchisaa.
Haa ta’u malee, kanneen armaan gadii dhaalaan dabarsuu hin danda’amu:-
✓ Inshuraansii lubbuu qaamni fayyadamaan dhaaltotaan alatti caqafame.
✓ Kaffaltii beenyaa fi sooramaa sababa du’aatiin maxxantoota dhaalchisaatiif kaffalamu. (SHH kwt.827-828)
#Dhaaluudhaaf namni ga’umsa qabu (Capacity to Succeed) SHH kwt.830;
-Yeroo dhaalchisaan du’u lubbuun kan jiru ta’uu
-Nama dhaalchisaan dhaaluu hin qabdu ittin hin jenne ta’uu dhabuu (unworthy)
Haala addaatiin:
✓Daa’ima dhalatee sa’atii 48 ture ykn dhalatee sababa miidhaa qaama alaatiin yoo du’e dhalachuun dura hanga guyyoota 300 gidduutti akka lubbuun turetti fudhatamee gahumsa qabaata.(SHH kwt.2-4,834)
✓Namni tokko yeroo dhaalchisaan du’etti lubbuun jiraachuu baatus bakka bu’ummaan dhaaluu danda’a.kwt.831(3), d/t with 833,
#Bakka bu’ummaan dhaalchisaa dhaaluuf ulaagaaleen sadii wal-faana guutuu qaba(SHH kwt.853-856):- Isaanis:
✓Bakka bu’aan dhaalchisaa wajjiin firooma kan qabu ta’uu
✓Namni bakka bu’iinsaan dhaalu (the represented heir) nama dhaalchisaa dhaaluu hin malle (unworthy) ta’uu dhabuu. 855
Bakka bu’iinsaan dhaaltummaa hin simatamne dhaaluun hin danda’amu. 854
#Bakka bu’iinsaan dhaaluuf BAKKA BUUSAAN ulaagaa armaan gadii guutuu qaba:
✓Dhaaltummaaf hin maltu nama hin jedhamne
Nama dhaaltummaa simate,
✓Nama dhaaltuu seeraa sadarkaa dhaaluudhaaf isa dandeessisu irra jiruu fi
✓Nama dhala(ijoolle) dhiisee du’e ta’uu akka qabu beekuun barbaachisaa dha.
SHH kwt.855 irratti nama dhaaltummaaf hin maltu jedhame ijoolleen bakka bu’anii dhaaluu akka hin dandeenye ni ibsa. Kana jechuunis, bakka buusaan nama gahumsa dhaaltummaa qabu yoo ta’e malee aangoo bakka buusuu hin qabaatu jechuu dha. Bakka bu’iinsaan kan dhaalamu mirgaa fi dirqama dhaalchisaa waan ta’eef, dhaaltuun tokko aangoo bakka bu’iinsaa goonfachuudhaaf gahumsa dhaaltummaa qabaachuu qaba.
#Dhaaluuf ulaagaan kan biraa Dhaaluuf Nama Hinmalle (Unworthiness) Ta’uu Dhabuu;
Dhaaltuun dhaalchisaa, dhalattoota (ilmaanii fi abbayyuu) isaa ykn abbaa manaa /haadha manaa isaa;
Itti yaadee ajjeesuun ykn yaalii ajjechaa irratti raawwachuun ykn
Himata yakka adabbii du’aa ykn hidhaa cimaa Wag.10 ol adabsiisu irratti ragaa sobaa bahuun isaa mirkanaa’ee itti murtaa’e ykn adabame(SHH kwt.838)
Du’aan duratti ji’a 3 gidduutti dhaalchisaan dhaamoo akka hin goone, akka hin jijjiirre, akka hin haqne kan godhe (kwt.840)
Fedhii dhaalchisaa malee dhaamoo dhabamsiisuu, haquu fi dhaamoo sobaa qopheessuu kkf. Yoo kan godhe ta’e dhaala irraa ni buqqiffama ykn dhorkama.
#DHAALA DHAAMOO MALEE ‘INTESTATES’KWT.842-856
Dhaalchisaan haala qabeenyi dhaalaa isaa itti dhaalamu ilaalchisee dhaamoo kan hin dhaamne yoo ta’e ykn dhaamoon dhaamame bu’uura tumaa seeraatiin fudhatama kan dhabe taanaan, qabeenyi dhaalaa isaa bu’uura seera dhaala dhaam-maleessaatiin dhaalama. Dhaalmaan kunis sadarkaa 4 qaba.
#Dhaaltuu sad.1ffaa,
kwt.842-ijoollee du’aa fi bakka bu’oota isaanii gahumsa qaban fi dhaaltummaa simatan.
#Dhaaltuu sad.2ffaa
(SHH kwt.843,844), abbaa fi haadha fi bakka bu’oota isaanii
Kwt.844(3)abbaa ykn haadha keessaa tokko lubbuun kan hinjirre fi ijoollee kan hin qabne yoo ta’e dhaaltummaan guutummaa guutuutti gara sarara isa biraatti darba.