ከ ደጋጎቹ ዓለም

በ አንድ ሙእሚን ላይ ሊኖርህ የሚገባህ ባህሪ ከነዚህ ሶስቶች ሊሆን ይገባል:- ★ልትጠቅመው ካልቻልክ አትጉዳው ★ልታስደስተው ካልቻልክ አታሳዝነው ★ልታወድሰው ካልቻልክ አታዋርደው ያህያ ቢን ሙዓዝ رحمه الله

ሰዎች ስላላወቁህ የምታጣው አንዳችም ነገር የለምና ድብቅ መሆን ከቻልክ ላለመታወቅ ሞክር!!  አላህ ዘንድ ምስጉንና ተወዳጅ ባሪያ ከሆንክ በሰዎች ዘንድ የተወገዝክ መሆንህ ምንም አያሳስብህ!!! ፉዶይል ቢን ዒያድ رحمه الله

እነዚህን አራት ነገሮች ለህይወትህ መሰረት አድርጋቸው ይላሉ:- 1: ለሰዎች ውዴታ ብለህ ራስህን አትቀይር፣ በቃ ራስህን ሁን። 2: ላንተ ያላቸውን አድናቆት ሲነፍጉህም አትቆጣ። 3: ስለተሸነፍክ ብለህም አትቀየር፣ 4: ከችግር ነፃ ስለወጣህም አትኩራ።ቀን ከሆነ ይገለባበጣል።

በ ወርቅ ሊጻፍ የሚገባ ንግግር "በባጢል ወይም በመጥፎ ነገር የተጋገዙ በዚህም ላይ የተዋደዱ ሁሉ ውዴታቸውም ሆነ መተጋገዛቸው ወደ ጥላቻና ጠላትነት መቀየሩ አይቀርም።" ኢብኑል ቀይ-ዩም رحمه الله

አሏህ ልቡን እንዲከፍትለት ብርሃን እንዲያደርግለት የፈለገ ስለማይመለከተው ነገር ከማውራት ራሱን ያቅብ። ወንጀል ከመስራትም ይቆጠብ።በርሱና በ አሏህ መሃል ብቻ ያለ፣ ማንም ሰው የማያውቀው ድብቅ መልካም ስራ ይኑረው።ይህን ካደረገ በሱ ብቻ በመጠመድ በሌሎች ነገሮች ከመጠመድ የሚጠብቀውን እውቀት ይቸረዋል። ኢማሙ ሻፊዒይ رحمه الله

በዚያ ከእሱ ውጭ ምንም አይነት እውነተኛ አምላክ በሌለው ጌታ ይሁንብኝ በዚች ምድር ላይ ለረጅም ዘመናት መታሰር ያለበት አካል ቢኖር #ምላስ ነው። ዐብደላህ ቢን መስዑድ رضي الله عنه በምንናገረው ነገር ጥንቃቄ እንውሰድ። በተለይም ግዜውን ያልጠበቀ ሃላፍትና ያልተሰማበት እንደው አጋጣሚውን አገኘን ብለን በሰዎች ላይ የተናገርናት ንግግር ልባቸውን ለመጠገን በሚያስቸግር መልኩ ሰብሮ ሊሄድ ይችላል።

ሁሌም ከሰዎች ጋር በሰላም መኖር ከፈለግክ ፍላጎት የሚያሳድሩበትን ጉዳይ ልቀቅላቸው። ከፍላጎታቸው ጋር እስካልተጋጨህ ድረስ አይነኩህም። አለዚያ ፍላጎታቸውን ቀድመህ ከወሰድክባቸው አርፈው አይቀመጡም፤ ወይ ስራህን በማነወር፣ በማንቋሸሽ የተጠመዱ ሆነው ታገኛቸዋለህ።

ዐይን/ዐይነናስ/ቡዳ በሁለት መልኩ ሊያጋጥም ይችላል። 1:በምቀኞች እይታ 2:በአድናቂዎች ውዴታ ሁሌም በወንድማችን በልጃችን፣ ጓደኛችን ላይ  የሚያስቀና/የሚደነቅ ነገር ስንመለከት ወይም ስንሰማ  አላህ ሆይ መልካምን አብዛለት( አሏሁመ ባሪክ ) ወይም (ማሻ አሏህ ላቁወተ ኢላ ቢላህ) ማለትን እንላመድ::

በየሚዲያው ሴት ልጅ ራሷን መልቀቋ ሃያእ ለማጣቷ አንዱ ማሳያ ነው። በሚለቁት ምስል ምቀኞች ድግምት እንደሚያሰሩባቸው ልብ የሚሉም አይመስሉም እያንዳንዱን እንቅስቃሴያቸው ማሳወቅ ይወዳሉ።በዚህ ስራቸው የብዙዎች ትዳር እንዲፈርስ ምክንያት ሆኗል።እንግዲህ ሰው ሲነገረው ካልሰማ መዘዙን ሲቀምሰው ይገባዋል። ተው ግዴለም ተመከሩ የሰው ዐይን መጥፎ ነው።ምስሎቻችሁን አጥፉ፣ ግዴለም ቢጠቅማቸው እንጂ አይጎዳችሁም። ዐይን ሀቅ ነው። ግመልን ለብረትድስት ይደርጋል። ሰውንም ለመቃብር ያበቃል። #ዐይነናስ  ክፉ በሽታ ነውና መጠበቂያችንን አጥብቀን እንያዝ።ከ ክፉ አይን አሏህ ይጠብቃችሁ።

ከሚገርመው ከሴቶች ባህሪይ ውስጥ አንድ ወንድ ለ አንዲት ሴት ያለውን ጥላቻ አርባ ቀን ያክል ሊደብቅ ይችላል። ፍቅሩን ግን ለ አንድም ቀን መደበቅ አይችልም። ሴት ልጅ ለ አንድ ወንድ ያላትን ፍቀር ለ አርባ ቀን ያክል ልትደብቅ ትችላለች። ጥላቻዋን ግን ለአንድም ቀን መደበቅ አትችልም። الآداب الشرعية