СУFДИËН | RASMIY KANAL

ВАТАНИ МАН ВАТАНИ НАВРӮЗ АСТ... Ҳама аз ишқи Ватан дар сӯз аст, Бахтам аз бахти Ватан пирӯз аст. Шодам аз доди Худванди Карим, Ватани ман Ватани Наврӯз аст. Ҳама дашту даманам гулборон, Кӯчаҳои Ватанам гулборон. Ҳама бар ҳамдигарӣ дилсӯз аст, Ватани ман Ватани Наврӯз аст. Косаву ҷоми ҳама гардон аст, Қимати нуқлу наво арзон аст. Ҳамаи ҳамватанам хушрӯз аст, Ватани ман Ватани Наврӯз аст. Шукри ободии ин рўзи Ватан, Шукри ин соати Наврӯзи Ватан. Шукри он рӯз, ки чун имрӯз аст, Ватани ман Ватани Наврӯз аст. Иброҳим.

🕌🕌🕌🕌🕌🕌🕌🕌🕌🕌🕌🕌      Фасли гул нест, ки борон нашавад, Fунчае нест, ки хандон нашавад! Дар бузургии Худованди Карим, Одаме нест, ки ҳайрон нашавад! Аз фироқи писари раҳдури хеш, Модаре нест, ки пазмон нашавад! Дӯстон марг дар ин рӯи замин, Хонае нест, ки меҳмон нашавад! Дод, сад дод, ки аз дасти аҷал, Манзиле нест, ки вайрон нашавад! Аз Худованди Карим ёд кунед, Мушкиле нест, ки осон нашавад ✍Фарҳод Дилфигор

НАВРӮЗ ШУД Дар кишвари зебои ман, Наврӯз шуд, Наврӯз шуд, Дар мулки беҳамтои ман, Наврӯз шуд, Наврӯз шуд. Гармӣ расад аз чор сӯ, сарсабз гардад ин замин, Дар теппаву дашту даман, Наврӯз шуд, Наврӯз шуд. Аз хоби дай бархез ту, лабханда зан гул без ту, Эй ғунчаи гулпираҳан, Наврӯз шуд, Наврӯз шуд. Бар ноумед умед деҳ , кун норасоёнро расо, Эй оқили ҳар анҷуман, Наврӯз шуд, Наврӯз шуд. Дар базми шеъру шоирӣ, дорам ҳазорон муштарӣ, Бахшо ба ман шаҳди сухан, Наврӯз шуд, Наврӯз шуд. Гулдухтарони гулбадан, гул бар сару гул пираҳан, Пӯшед дебову чакан, Наврӯз шуд, Наврӯз шуд. Бо лафзи ноби Рӯдакӣ, Мафтуни шайдову закӣ, Гӯяд ба гӯши гулбадан, Наврӯз шуд, Наврӯз шуд. Ибодуллоҳ Одинаи Мафтун