Gulchehra NUR ijodi

* * * AJABLANISН Abdulla QODIRIYga Sizga tegish dovrug‘ ko‘rmadi sizni... Habiblikka loyiq bo‘lmadi habib... Yashar edingiz-ku nurlatib so‘zni, Yashar edingiz-ku millatga tabib... Faqat sevinmoq shart yorug‘ nigohga... Axir siznikiydi beminnat quyosh... Otar edilar-ku mevali shoxga, Ajab, nechun sizga tegaverdi tosh?! Nasibangiz edi olamdagi baxt... Yuksak turing edi bodomday gullab... Kesilar edi-ku mevasiz daraxt, Ajabo, nechun siz ketdingiz qulab?! Sizni asramoqqa bo‘lolmay molik, Jur'at qayda edi, qaylarda jur'at?.. Iste'dod qismati – nahot tanholik?! Haqiqat qismati – nahot uqubat?! 1987 yil. @Gulchehra Nurullaeva Instagram YouTube Facebook

* * * АЖАБЛАНИШ Абдулла ҚОДИРИЙга Сизга тегиш довруғ кўрмади сизни... Ҳабибликка лойиқ бўлмади ҳабиб... Яшар эдингиз-ку нурлатиб сўзни, Яшар эдингиз-ку миллатга табиб... Фақат севинмоқ шарт ёруғ нигоҳга... Ахир сизникийди беминнат қуёш... Отар эдилар-ку мевали шохга, Ажаб, нечун сизга тегаверди тош?! Насибангиз эди оламдаги бахт... Юксак туринг эди бодомдай гуллаб... Кесилар эди-ку мевасиз дарахт, Ажабо, нечун сиз кетдингиз қулаб?! Сизни асрамоққа бўлолмай молик, Журъат қайда эди, қайларда журъат?.. Истеъдод қисмати – наҳот танҳолик?! Ҳақиқат қисмати – наҳот уқубат?! 1987 йил. @Gulchehra Nurullaeva Instagram YouTube Facebook

* * * KELAJAKNING ODAMI Qo‘llariga tushdi siz bitgan xatlar, «Afsus, tushunmog‘im dargumon...» – dedi. ... Siz makr kitobin o‘qigan damlar U mehr kitobin yodlagan edi... Qulog‘iga kirdi xanjarli so‘zlar... Lablarin tishladi, hayratda qolib... ... Siz barbod ilmiga muk tushgan kezlar U bunyod ilmiga bo‘lgandi tolib... Yuksak edi unga bani odamlar, Unga bedog‘ edi ko‘ksi dog‘ hayot… ... Siz uning zavolin o‘ylagan damlar Tilab yurgan edi sizga kamolot... ... Qani, aytolsa-chi biron so‘z sizga... So‘zga aylanmovdi undagi g‘uluv... So‘zsiz tikildi-yu raftoringizga, O‘gay davrangizni taloq etdi u... Oldi o‘zi bilan ulug‘ poklikni... Sig‘inib yashardi shu kimyosiga... Siz uchun qoldirib yoqachoklikni, Ketdi u ardoqli o‘z dunyosiga... 1987 yil. @Gulchehra Nurullaeva Instagram YouTube Facebook

* * * КЕЛАЖАКНИНГ ОДАМИ Қўлларига тушди сиз битган хатлар, «Афсус, тушунмоғим даргумон...» – деди. ... Сиз макр китобин ўқиган дамлар У меҳр китобин ёдлаган эди... Қулоғига кирди ханжарли сўзлар... Лабларин тишлади, ҳайратда қолиб... ... Сиз барбод илмига мук тушган кезлар У бунёд илмига бўлганди толиб... Юксак эди унга бани одамлар, Унга бедоғ эди кўкси доғ ҳаёт… ... Сиз унинг заволин ўйлаган дамлар Тилаб юрган эди сизга камолот... ... Қани, айтолса-чи бирон сўз сизга... Сўзга айланмовди ундаги ғулув... Сўзсиз тикилди-ю рафторингизга, Ўгай даврангизни талоқ этди у... Олди ўзи билан улуғ покликни... Сиғиниб яшарди шу кимёсига... Сиз учун қолдириб ёқачокликни, Кетди у ардоқли ўз дунёсига... 1987 йил. @Gulchehra Nurullaeva Instagram YouTube Facebook

* * * Bir manfaatparastga deganlarim Sizning davrangizda qolmoqlik uchun yarim yulg‘ich bo‘lmoq, yarim subutsiz, yarim ayyor bo‘lmoq, yarim hayosiz, yarim mo‘ltoni-yu yarim dilozor, yarim ko‘r, yarim kar, yarim savdoyi... – qisqasi, kuygunchak butun yurakni iflos yarimlarga bulg‘amoq kerak, voz kechmoqlik kerak o‘zlikdan butkul, moslashib chiqish-chun har biringizga... Men-chi, qolmoq istab butunligimcha, Tashqari chiqaman, davrangiz tashlab... ... Oh, qanday sokinlik, musaffo havo!.. Ko‘ksimni to‘ldirib olaman nafas... Tegramga tikilib qarayman... Ajab?! – Bir-ikki mendaylar tashlanar ko‘zga... Taajjub qilaman: nima sababdan odamlari siyrak toza havoning?! 1987 yil. @Gulchehra Nurullaeva Instagram YouTube Facebook

* * * Бир манфаатпарастга деганларим Сизнинг даврангизда қолмоқлик учун ярим юлғич бўлмоқ, ярим субутсиз, ярим айёр бўлмоқ, ярим ҳаёсиз, ярим мўлтони-ю ярим дилозор, ярим кўр, ярим кар, ярим савдойи... – қисқаси, куйгунчак бутун юракни ифлос яримларга булғамоқ керак, воз кечмоқлик керак ўзликдан буткул, мослашиб чиқиш-чун ҳар бирингизга... Мен-чи, қолмоқ истаб бутунлигимча, Ташқари чиқаман, даврангиз ташлаб... ... Оҳ, қандай сокинлик, мусаффо ҳаво!.. Кўксимни тўлдириб оламан нафас... Теграмга тикилиб қарайман... Ажаб?! – Бир-икки мендайлар ташланар кўзга... Таажжуб қиламан: нима сабабдан одамлари сийрак тоза ҳавонинг?! 1987 йил. @Gulchehra Nurullaeva Instagram YouTube Facebook

VIJDON Ro‘paramda ko‘z ko‘rmas devor... Oshib o‘tsam, bo‘lurman abgor... Ro‘paramda ko‘z ko‘rmas parda... Azob bo‘lar, ochsam agarda... Ro‘paramda ko‘z ko‘rmas chiziq... Bosib o‘tsam, hayotim buzuq... Ro‘paramda ko‘z ko‘rmas dovchi, - So‘zni, hatto ko‘zni tergovchi... Devor, parda, tergovchi, chiziq... – Domlarida yashashim qiziq... Asirlikda yo‘g‘-u borligim, Shu asirlik – baxtiyorligim... 1987 yil. @Gulchehra Nurullaeva Instagram YouTube Facebook

ВИЖДОН Рўпарамда кўз кўрмас девор... Ошиб ўтсам, бўлурман абгор... Рўпарамда кўз кўрмас парда... Азоб бўлар, очсам агарда... Рўпарамда кўз кўрмас чизиқ... Босиб ўтсам, ҳаётим бузуқ... Рўпарамда кўз кўрмас довчи, - Сўзни, ҳатто кўзни терговчи... Девор, парда, терговчи, чизиқ... – Домларида яшашим қизиқ... Асирликда йўғ-у борлигим, Шу асирлик – бахтиёрлигим... 1987 йил. @Gulchehra Nurullaeva Instagram YouTube Facebook

* * * Birpas xayollarga bog‘lanib turdim, Turfa savollarga bog‘lanib turdim... Ne bo‘lar, o‘zing ayt, onajon yurtim, Shoir rost so‘zini aytmasdan qo‘ysa?! Bag‘ringni yog‘iylar to‘ldirmasmikin?! Mehmon mezbonini o‘ldirmasmikin?! Yolg‘on yurt to‘rida o‘ltirmasmikin?! – Shoir rost so‘zini aytmasdan qo‘ysa... Erkin fikrlarni sirish ortar-ku, Silliq ruxsorlarda tirish ortar-ku, Iymon-e'tiqodda chirish ortar-ku, Shoir rost so‘zini aytmasdan qo‘ysa... Odam odamligin qo‘ygay unutib, Loyqa talotumni bo‘lmas tinitib... Sovrilmog‘i tayin, charhi dun yitib, Shoir rost so‘zini aytmasdan qo‘ysa... Minbar, kitoblardan qiling quvg‘indi, Uvol erur unga hatto yuvindi... Mayli, g‘urbatlarga bo‘lsin sig‘indi, Shoir rost so‘zini aytmasdan qo‘ysa... G‘urbat ham jirkanib, atasin «xoin», Undan darig‘ tutsin bir parcha joyin... Umrlik qismati shu bo‘lsin doim, Shoir rost so‘zini aytmasdan qo‘ysa... Yashnoq ko‘ray, deyman, yurtim atlasin, Har jilosi uning rost she'r yodlasin! ...Portlay qolsin zamin, osmon portlasin, Inson rost so‘zini aytmasdan qo‘ysa... 1987 yil. @Gulchehra Nurullaeva Instagram YouTube Facebook